Matéo 26 - Dupade Uruode

Judíode angaránone ore chucué dasoca ujetiga ore chujé Jesús

¹ Uje Jesús chejna dacajnaquéode ucode guesi enga chojningame dacadigode ore:

² –Uacarajáyo uje dirode amirone gare iji Páscua yui uje judíode yujnusinángo Dupade isocai uje chijnime yocai jnani bajácho ore iji Egípto nanique. Dirode unojo a jé upo dirome rĩ ujetiga ore tẽra Dupade utocaidi uyu ome yisóningo ore enga a ore chujé yu iji curesérique gaté dirome.–

³ Enga jé upo rĩ uje Jesús qué déji daruode udore gai ome dacadigode, mu judíode angaránone ore chamáta ñane iji ore eduguéjna cuchábi Caifás igóchocoijná. Enga Moisés urusarane atatasórone ore déji to, jé aja ore asutépisedie. Jé aja judíode ore angarate uñane.

⁴ Ore ucueguedie u dáyipie quicho ome Jesús ujetiga ore chisa ome daringaquérique. Enga jé u ujetiga ore chujérase.

⁵ Mu ore chojninga: –Jé ca yujégoji Páscua jne. Gajnareque gu ujetiga ayorébui ore cho dasorã iji dirode udore.–

Chequéraque chojne cucha ai unéri aja Jesús acãrai gai

⁶ Quigade enga Jesús déji Betánia. Enga cháji Simón iguíjnai uje lépra isaque ica.

⁷ Uje Jesús qué chácariji ore agapírique dosatique, enga jé u uje chequéraque sose Jesús yui enga chijna cuchirise alabástro aja. Uje póroropise mu dabujnaque. Enga cucha ai unere orerã́tique déji ajei. Jé u uje uaté chise Jesús, enga chojne cucha ai unéri aja Jesús acãrai gai.

⁸ Uje Jesús acadigode ore chimo udore enga ájningarãque ore. Enga ore chojningame ñane: –¿Chimo jóroque re uje chojne cucha ai unere orerãi bisideque?–

⁹ Enga ore chojningápome ñane rĩ: –Uje a yocórasi orérigui ujetiga pẽrate cucha ai unéri uté enga a jiérasi orérigui. Enga yajuguínarása jmatágode ore.–

¹⁰ Uje Jesús chudute udore ore uruode ome ñane enga chojningame ore: –¿Uacajéode udore gotígo a ome chequé uaté? Uje ueracho chequé uaté adode ome yu.

¹¹ Uje jmatágode jé charite uacari iji deréjnane ome uacosõraquérigo. Jé basa e idógosi ujetiga ca yugúsapoi uacari to rĩ.

¹² Chequé uaté ojnei cucha ai unere aja yibai imoi u uje a ore chijóchame yu dirome iji yode. Jecute e dimane yu ome yui.

¹³ Jé ũré yu uje a ca picadiguiete chequé uaté adode jne ome yu. A ore jno yujnomei údi aja erámi jnese jne ome yúringai piquetangore. Enga a jé nóna uaté ujnomei to jne ome adi uné ome yu.–

Júdas tẽra Jesús ome umajosórone

¹⁴ Unojo quigade enga Jesús acadigode uñai uje i tu Júdas, uje i uñai u Iscariote, e jno enga chicáji judíode ore asutépisedie.

¹⁵ Enga chojningame ore: –¿Uaqueranéringui plátai chorási ringome yu a ujetiga yẽra Jesús ome uaque?– Enga jĩraque ore chisi ome pláta guebéode ome Júdas uje 30 u.

¹⁶ Enga jé u iji deréjnai uté uje Júdas chucué piotiguérique ujetiga tẽra Jesús ome ore.

Jesús atiga erueminóri u uné

¹⁷ Enga dire bajai u uje judíode ore tagu arurégode uje ca nóna bisitique. Jé u uje Jesús acadigode ore sose Jesús yui enga ore chojningame: –¿Bajegaipítique déji rique jne a ujetiga yipéco yoquibosode iji to ome Páscua yui?–

¹⁸ Mu Jesús chajnai ore enga chojninga: –Acayóji idáidatéi enga acáyoja jnanírique iguíjnarique jne enga ojnichome jne: "E idógosi yocacadisṍri itoringai. Jecute pota jeta ajuéga baguíjnai ajé uñeque ome yoque ujetiga yipéco Páscua gajnetígo cucha piboso iji to."–

¹⁹ Jé u uje Jesús acadigode dopísi dacadisṍri uruode. Enga ore pésu dabosode iji deyai guiguíjna ajei ome Páscua yui.

²⁰ Uje guedé chise dabatigai enga dimane Jesús, acadigode ore uje gare ore iji yirídai iji ore atigabié mésa dosadode ujetiga ore taque.

²¹ Uje qué ore déji dáringai chagu gai enga Jesús chojningame ore: –Jé ũré uje uacuñeque a tẽra yu ome yumajosórone ore gajneri.–

²² Enga jé u uje Jesús chṹra pujnusiétigai aja dacadigode ore. Enga acadigode tṍra dajñarenie ome uje ore chojningame: –Yangaráni á, ¿ja yẽrate ua jne a?–

²³ Mu Jesús chajnai ore uruode enga chojninga: –A uacuñai u jne uje yacásorango uñane que iji yocatigai uné.

²⁴ Dupade utocaidi uyu a yitoi jne uje Dupade uruode jé quicho gu. Mu iyieja Dupade ujuyaquei yui ome uté uje a tẽra yu ome yumajosórone jne. Uje a ca Dupade chajire dajuyaquérigo ome jne. Arei urásu ome nanique ujetiga ca basíji erámone unojo to.–

²⁵ Jé u uje Júdas, uje a tẽra Jesús jne, chojningame: –Yacadisṍri á, ¿ja uyu jne a ujetiga yẽra ua ya?– Mu Jesús chajnai uruode enga chojningame: –A bẽrate yu jne erĩ́e.–

²⁶ Uje qué ore déji dáringai chagu gai enga Jesús chisa arurei. Jé u uje chacãre Dupade gai bajaque. Enga cha dacatecãraitigade enga jé u uje chajuque arurei aja jnumi enga chisi ome dacadigode. Enga chojningame ore: –Arurei de ne jã. Acho. Uacamóño uje uné gajnui tu yibai.–

²⁷ Ore chejna daboti arureque guesi enga jĩraque Jesús chisapo ore jopidi rĩ. Enga jé doi dasocai uqué uje chacãre Dupade gai bajaque. Quigade enga chisi ome dacadigode enga chojningame ore: –Yoquijódi de ne jã. Beyoi enga ójiyo to jnese.

²⁸ Uje yiyoi gajnui u, uje a yitoi jne enga Dupade áyipie ichadie tocachúringai jogadi u jne. Enga a yiyoi chinoningase erámi unirisórone ore isijnaringuéone jnese jne.

²⁹ A ca yójiapo cucha adie otadi uné to jne rĩ iji jnumi uné, jé aja diri ujetiga yugúcopoji ñane gari rĩ iji Yai idai. Enga jogadi u jne ujetiga yójigo yoquijote ichárique jne uje jé cãra re ome yoquijódi uné.–

Jesús chatata uje Pédro a chotigase jne

³⁰ Quigade enga ore chirate Dupade iradé enga jé u uje ore jnome cucarani uje i tu Olívos.

³¹ Enga Jesús chojningame ore: –Uacanguretigai a doi jnumi ome yu jnese gajneri iji dejai uné. Uje Dupade uruode jé quique gu uje chojninga: "A yujé áyasadie irodisṍri jne enga gachidedie áyasai a chisite rágaja quedéjnane jne."

³² Mu quigade ujetiga e yiquecápo rĩ iji yúringai toque enga a bajaque yu aja uacaquei jne iji Galiléa.–

³³ Jé u uje Pédro chojningame: –A ore anguretigade cho caru jnese ome ua, mu a ca uyu u to jne.–

³⁴ Jé u uje Jesús chojningame Pédro: –Pédro á, jé ũrepise yu uje yojningame ua: dejai uné a jé u gajneri ujetiga cochagájnai cáma po enga a otigase yúringai bamósõre to enga a gadioque gajneri.–

³⁵ Mu Pédro chojningame Jesús: –Que yãra ua go. A yipatĩ́orarásaja ua marínga, que yotigase báringai yimósõre to.– Enga ujode acadique ore uruode jé u udore to ome Jesús.

Jesús catecã́ri Dai iji cucarani údi uje i tu Getsemaní

³⁶ Jesús nóna dacadigode aja cucarani údi uje i tu Getsemaní. Enga jé u uje chojningame dacadigode: –Beyoi enga ayáyo iji ne jne. Uje a qué yijíabája siñeque jne, enga yicatecãrami Yai Dupade iji jne.–

³⁷ Jeque chijna Pédro, Zebedéo ujnacarode aja dajesui. Enga jé u uje áyipie doi cucha dacadode yui gajneri, enga jé u uje chijõrorase údode.

³⁸ Enga chojningame daríjogonórone dacadicho: –Yajnéone cucha dacacho chijõrorasipise yu. Ayáyobiji ne. Enga ca amóño jne. Átayo niriji aja yu to jne.–

³⁹ Jesús qué jno aja ore iquei enga jé u uje cṍraja jnumi. Enga chijócha Dupade ajei údi enga chojninga: –Yapá, yajnéone cucha dacate gajnui u gu ujetiga ore chaningárirase cucha aguté iringonguéjnaragaja yu. A bajérasome yu enga noñamírasiji gajneri. Mu jé be bajéningo, jeque ca yiji yajéningo jne.–

⁴⁰ Uje Jesús chejna dacatecãraitigade guesi enga chajni dacadique gadiógode ucode ore gai. Enga chise ore mu qué ore mo. Enga jé u uje chojningame Pédro: –¿Gotique gu a uje a ca uaquedóraque chope jnángaja siñeque que iji yiquigade? Uje yojningame uaque que: átayo niriji aja yu jne.

⁴¹ Ãrijínaño uaquejode. Beyoi enga acatecãchoi Dupade ome uaque. Ujetiga pequetingarãque uaque jne marínga, ca pijnimique uacãrírique. Jé ũré uje uacáyipiedie chóji gaté ome yu, mu uacáringai ayoré uné u gu uje cho jnóro.–

⁴² Enga Jesús e jno enga qué catecãrápoi Dupade gaté rĩ enga chojninga: –Yapá, ujetiga ca toque ujetiga qué yapite mu jé be bajéningo ome yu.–

⁴³ Uje chisápo dacadigode ore rĩ, mu jé ore ate uje que ore edóraque cho jnaque.

⁴⁴ Mu que chiringare ore mu quítequigapóji daquigade rĩ enga catecãrápoi dai Dupade gaté rĩ. Enga icatecãraitigade jé u bajade.

⁴⁵ Uje chejna dacatecãraitigade guesi, enga jé u uje tibágui dacadigode enga chojningame ore: –Jé amóño. Enga jé oyo uacajñare. E que qué pisocárique cuse gu uje deréjnai uné jé u ome Dupade utocaidi uyu ujetiga ore chisi ome yu ome sijnángone ore.

⁴⁶ Ãrijínaño to, enga yico. Yẽrasṍri e jnome gadoi.–

Ore jno Jesús údi ujetiga ore suru gai

⁴⁷ Uje Jesús qué déji daruode gai, mu acadigode uñai Júdas e di dajosé údi. Enga judíode angaránone ore iroque ore aja Júdas quigade ujetiga ore chisa Jesús, enga jiei ore. Enga ore chijna daguebedie, pidode, cõrachade uñane to aja Jesús yui.

⁴⁸ Jesús guẽrasṍri Júdas e chimate dáyipiedie ome dacadisṍri yui ome ore. Enga uruode u unojo ome dajorane jõcaratácho: –A uacasai u gajneri ujetiga yagu uréraque.–

⁴⁹ Enga jé u uje Júdas chijnare aja Jesús enga chojninga: –Yacadisṍri á, qué yibágui ua.– Enga e tagu uré.

⁵⁰ Enga Jesús chojningame uté: –Yijõra, ¿gotique uje bese yu?– Jé u uje Júdas josé yore ore gai. Enga ore jno Jesús údi aja dangaránone.

⁵¹ Enga jé u uje Jesús acadigode uñeque chisa daquesérique enga chaquesu judíode ore eduguéjnai irógode uñeque angoronéraque ¡jnaque!

⁵² Mu Jesús chojningame uté: –Ajmárapo boidi quesé aja pi te rĩ. Bamo uje ayorérique a chujérase dojórique ayoré ome daquesérique, enga jé basa a chuguírasome to.

⁵³ ¿Ja ca araja to a? uje a yicatecãrirási yai Dupade ome iroque dipesérigo enga a ore chirotárase yu gajneri.

⁵⁴ Mu ujetiga yujegorase ore to enga, ¿ja Dupade uruode tocaderase ome yúringai chuque?–

⁵⁵ Enga jé u uje Jesús chojningame ayorébui uje ore pota chisa uté: –Yo oriechoquíode iji uacajmainie uje uacajnáño cõráchaque dipeséode ome yu. Uacamóño yu iji deréjnane mu, uje yacate uáguiji Dupade iguíjna cuchábi, ¿jé que asayo yu iji diríca?

⁵⁶ Dupade uruode atatasórone urusarane tocadepise ome uacadode udore.– Jesús chejna daruode guesi, enga jé u uje acadigode que ore chajirápo dacadisṍri yui rĩ. Jé u uje ore chayome jõcaratade jnese.

Ore jno Jesús údi aja judíode eduguéjna cuchábode

⁵⁷ Enga jé u uje uñane chisa Jesús. Enga ore jno údi aja judíode ore eduguéjna cuchábi Caifás igóchocoijná, uje judíode ore angaránone uñéngo charite bajaque.

⁵⁸ Mu Pédro chajo ore quigade aja to mu ujai cuse iji ore uje ore chise Caifás igóchocoijná. Enga Pédro cháji soldádode gari iji guesi to. Ipotigádi u gu ujetiga chimo ore isocáringome Jesús to.

⁵⁹ Judíode ore asutedie chucué daguhétajarique cucha Jesús gai ujetiga ca ũré marínga, jé cho daba ujetiga ore chujé.

⁶⁰ Dipesei jóroque aguhétajasórone, uje ore ojñane deroco. Diga jnani táquechoquí gáreode chise ore to, enga udore ore u uje ore chise bai cucha.

⁶¹ Enga ore chojninga: –Ayorei uné chojningame yoque diríca: "A yucuasirase Dupade iguíjna cuchábi uné jne enga jĩraque yimánapórase rĩ iji dire gadiótigo."–

⁶² Enga judíode eduguéjna cuchábi chague jmame. Enga chojningame Jesús: –¿Ja ca adute ore uruode ome ua ya, uje que ãrarare babai?–

⁶³ Mu Jesús jé que cho chimíñimi go. Jé u uje judíode eduguéjna cuchábi chojningame: –Ujetiga ũré ua enga bangureni jé u Dupa uecai, enga baru ũréningo pijoque. Ãrarare. ¿Dupade utocaidi Crísto jé u ua ya?–

⁶⁴ Jé u uje Jesús chajnai enga chojninga: –Ejẽ́. Jé baraja. A qué yingopo cucháringome uaque jne rĩ. Enga u uje a amóñopo Dupade utocaidi uyu jne rĩ uje a yácariji yai Dupade ãrachua uje ujopíeranguipísi u uté. Enga a yacája gue abujáragaja jnumi tuné jne.–

⁶⁵ Enga jé u uje judíode eduguéjna cuchábi chejna dájningai aja guesi enga chajningarase daguidé aja quedéjnane iji dabai. Enga chinguíra dabijnani aja dojode eduguéjna enga chojninga: –E yipáñangoji uté bai jnese. Uje dojnóngaja Dupade enga cho Dupade iji re. Que togome yoque ujetiga qué yangácoi ayoré uñeque ojñáringo ome uté. Uje jé uyoque upúsu uje yudúcopise uté uruode ome re.

⁶⁶ ¿Jé oyo ringome uté uruode a?– Ore chojningame: –Jé tiógara erĩ́e ujetiga cho daba daruode enga chuque.–

⁶⁷ Enga jé u uje ore socárome Jesús. Uñane ore chutĩ́raja edodie. Jeque uñane ore chujépo edodie rĩ. Jé uñane ore chaquesu údode.

⁶⁸ Enga ore chojningame uté iji dajñiequéode: –Arajape besṍri uté gosi, ujetiga jé ũré enga Dupade utocaite ua.–

Pédro chotigase Jesús úringai imósõre to

⁶⁹ Uje qué ore socárome Jesús iji ajei enga ore irogué gapu chise Pédro iji guesi iji charidi enga chojningame: –Ísenga ua u uje bagúsiji galiléagosi Jesús gari to diríca jõ.–

⁷⁰ Mu Pédro chotigasipise uaté uruode iji ayorébui ajei. Enga chojningame uaté: –Que yimo bẽcarai gotique to.–

⁷¹ Uje Pédro e dorási guesi mu tuangóa ore irogué gapu uñáraque uje chimo to. Enga uaté chojningame ore jnese iji dejode: –Yiraja jnacari uté. Enga déji nazarétgosi Jesús gari to diríca.–

⁷² Mu Pédro jé ate uje chotigase uaté uruode enga e chojningápome rĩ: –¡Jé ũré yu erĩ́e! Que yimopie Jesús gotique to á.–

⁷³ Qué gajné mu uñane chojningápome Pédro rĩ: –Ísenga jé ũré enga Jesús acadique ua to jõ. Jecute baruode jé u galiléagosode uruode to.–

⁷⁴ Mu Pédro chojningame ore: –Dupade chiraja uje jé ũré yu uje que yimo uacojningai gotique to.– Mu Pédro cáma chejna darai guesi eti cochagájnai po.

⁷⁵ Enga jĩraque Pédro jnusina Jesús uru casodé uje chojninga diríca: "Dejai uné jé u uje a cáma cochagájnai po gajneri enga a otigase yúringai bamósõre to enga gadioque gajneri." Jé u uje Pédro dipónguerame re, enga jno bu iji ore ajei enga poja guesi.