Matéo 25 - Dupade Uruode

Jesús pésapo ejémplo rĩ, ga cucha gajnúone udojo júdedie u gapudíe uje ore chejna yijmanáyone

¹ Arei tu ujetiga yanguresórone dimane ore ome yiríringai yui ome yúringa dacasuté. Yojñane a chichaga raja cuchade unojo jne. Uje gapúrigui cuse nanique. Enga ore chejna yijmanáyone. Enga ore chijna dabiotígo jnese. Uje ore gaidi tu ujetiga ore chachai gapúraque gajmasónique iji garãtique uje gajmáraque quene ore chisa ñane.

² Mu gapudíe udire uñanie ajmité ore. Jeque uñanie que chajmita cuchárique.

³ Jecute ore chejna yijmanai uje que ore chajmita cuchárique. Enga que ore chajmita aceite quedéjnai ome dabiogode gaté.

⁴ Jé basa ajmitedie ore ajminone aceite quedéjna cuse ome dabiogode.

⁵ Quigade enga moi doi ore uje gajmasṍri que di. Jé u uje ore mo.

⁶ Mu ore chudute ore pijnacaraidie iji dejnínga gatócoro uje chojninga: "¡Gajmasṍri e di é! Beyoi enga achayoi to é."

⁷ Gapudíe udire niji jmame enga ore chaguineru dabiogode yúode.

⁸ Gapudíe uquidé uje que ore chajmita cuchárique, ore chuta jórogui aceite quedéjnai iji dajoranie. Enga ore chojningame ore: "Asíñope yóguiji uacanírone to. Uacamóño uje yoquibiogode toi."

⁹ Mu gapu ajmitedie ore chojningame udire ore: "Úngare. Cachi aceite quedéjnai chona yoque gu ujetiga yisíngo uáguiji. Boyo enga beyóji oredie iguíjnarique enga aníchoja uacabiogode."

¹⁰ Mu uje qué ore doi aceite quedéjnai enga gapua gajmasṍri di iji ore quigade. Jecute gapu ajmitedie ore cho búja quigade. Enga ore chacája ininaquei jogadi guiguíjna ajei to. Enga ore suru daquigade.

¹¹ Enga gapudíe uquidé quene ore di uje que ore chajmita cuchárique que. Enga ore tibidi gapua gajmasṍri enga ore chojninga: "¡Achẽre uacabai enga yacágoja uacari to é!"

¹² Mu uté chajnai ore enga chojninga: "Que yiraja uaque gotodie. Jecute que yuchẽre yoquibai ome uaque."–

¹³ Jecute Jesús chojningame ore: –Ãrijínaño uaquejode jeta dimane uágome yiríringai yui. Uacamóño uje que arajáyo Dupade utocaidi uyu yiríringárique deréjna jeoga guedé batigárique.

Jesús pésu ejémplo ome jnanírique uje chajuque daplátadie ome darótigo ujetiga ore chõre iji dari

¹⁴ Arei tu ujetiga Dupade urasapísode ore jno Dupade gueranone ore irajatíga údi gaté. Ujetiga diaporase rĩ enga a ca chise ore unerotiguérique. Enga yojñane a chichaga raja cuchade unojo jne ome uaque: Jnani cuse nanique uje e idógosi icoringai ome punire uñai. Enga tibidi darógode ujetiga chajuguína daplátadie iji ore ujetiga ore chõre iji dari.

¹⁵ Mu gueranenie cha ñane yui ome ore. Uñai uje chañurupúsu daplátadie guio gueranenie 5.000 ome. Jeque uñai gajnenie 2.000. Jeque ejoi gajné u 1.000. Enga quigade uje chajuguína daplátadie iji darógode enga quene jnome dajesúrique erãpe.

¹⁶ Jé u uje iroque bajai uté uje gajnenie 5.000 diríca, e tẽra cuchade ome dajnenie enga chijnime 5.000 gatéraque iji iquei.

¹⁷ Isocai jé u ejoi uje gajnenie u 2.000. Uje tẽrápo cuchade ome dajnenie rĩ enga chijnimápo 2.000 gatérigui iji iquei rĩ.

¹⁸ Mu ejópisi uje gajnéraque 1.000 u, jno dajné pláta údi enga chijóchame.

¹⁹ Enga diyajmaque enga udore ore irósõri e díji ore. Enga catecã́ri ore ome ore atígo ome guerané casidica daplátai ome ore.

²⁰ Enga bajai chise enga chojninga: "Yangaráni á, berané casidica 5.000 dépoi niji rĩ. Yijnimenie, 5.000 ejodie, dépoji niji rĩ."

²¹ Jé u uje irósõri chicotápise daroi uté enga chojningame: "Ueradípise badode ome yu. Enga yiroque yimeserãi tu ua. Uje garósi yeranenie ome ua ica, mu suépise uquécasidicá gai. Jecute a yãrai ua iji gaté jne. Acája yari enga a yipéco yoquininaquérigo jne ome ua."

²² Jé u uje ejoi chisápo to rĩ enga chojninga: "Yirósõri á, berané casica 2.000 de niji jã. Yijnimenie 2.000 iji iquei dépoji ne rĩ."

²³ Jé u uje irósõri chicotápise daroi uté to. Enga chojningame: "Ueradípise badode ome yu to. Enga yiroque yimeserãque ua to. Uje garósi yeranenie ome ua ica, mu suépise uqué casidica gai. Jecute yãrai ua iji gaté to jne. Acája yocari to iji yoquininaquédatéi."

²⁴ Enga jé u uje ejópisi chise to enga chojningame: "Yocangaráni á, yiraja uje jnani josipíerãquedaté ua. Uje bajegaidi tu ujetiga cuchade chise ua iji bayaritique bisideque, ujetiga ca bajuya ua ome. Bajnui tu ujetiga ãra pacaque quedéjnaringo enga bajnei orérigui.

²⁵ Jecute yitodópisa bei que, ujetiga baplátabia bijna. Jecute yijóchame que. Mu e yatire babai. Jé u berané casidica uje 1.000 uniji."

²⁶ Enga irósõri chojningame daroi uté: "Sijnaque ua enga ducutaque ua. A jé bajéo udore uje chiese yajegaidi tu ujeta yajnei plátadie bisideque. Jeoga cucha pacatígo jeta yajné orérigui bisideque.

²⁷ Baraja cuchade udore quigode múñi, ¿gotique gu a uje que acha yipláta casidica aja plátadie iguíjnarique ica uje i tu bánco? Bamo múñi uje plátadie quérã iji uté. Enga a atirerási yibai ujetiga quérã enga báringai yirasique jogadi a urásu ujeta yĩri iji yiguíjnai."

²⁸ Jé u uje catecã́ri darógode uñane iji dejode enga chojningame ore: "Ajnáño yiplátadie iji uté gari enga asíñome uté uje irodedie plátai quérãji gari. Enga chise 10.000.

²⁹ Chamáñaje ujetiga gosi gajnéone cucha déji, jé tiógara ujetiga pisi ome uté gosi gaté. Jé basa ga gosi ujetiga gajnetígo cucha que déji enga jé tiógara ujetiga gosi gajnetígo cucha garósi poidíji gari.

³⁰ Beyoi yiroque noñai uté enga óraño aja ijnangununie iji guesi. Enga jogadi u jne ujetiga po jóroguiji. Jogadi upo jne rĩ ujetiga chigase damatarane, uje a chejnárengui jóroque re ome dajnéone pujuyaquéo jne.

A pajirique erámi unirisórone ore adode aja quedéjnane jne

³¹ Ujetiga Dupade utocaidi uyu yĩriápo rĩ enga a eduguéjna cuchape yu jne. Enga a yirógode gaté unirísoño ore chicha yu aja dajei te jne. A yiyápoji yiyaripi jne rĩ ome yúringai pojnánguejna.

³² Erámi jogosórone iji ducunirone jnese a ore chamáta rágaja yiquei te jne. Jé u uje a yingara ore jogadode ome ñane jne. Enga yajnui tu áyasadie irodisónique jne uje cãra áyasadie, erámoro quedéjnanie ore jogadode ome ñane.

³³ Jé u uje a yicha áyasadie gajnunie aja yãrachua jne. Jé basa erámoro quedéjnanie gajnunie a jogadi u yarasé te jne.

³⁴ Mu eduguéjnai uyu a yojningame yãrachua jogonórone jne: "Dupade angacarane uaque á, boyo ome uacáringane purása yui ome Dupade. Uje jé ipesute ome uaque naninguéjna iji erámi taningápisode.

³⁵ Jé tiógara uacáringane yurása. Chamáñaje uacosṍcho yu nanique gu iji yiyaguhéode. Uacosṍchopó yu nanique rĩ iji yuyádode. Uacajnáño yu aja uacaguíjnane nanique to rĩ ujetiga yupúsi uaque iji yiriguítigade.

³⁶ Yijmátapome boraidie nanique rĩ mu uacasíñome yu. Yejnarengápo yu nanique rĩ mu uacajmitáyo yu nanique. Yugúsapoji soldádode iguíjnai nanique rĩ uje ore suru yibai enga uacabáchoi yu iji ujetiga osṍcho yu iji."

³⁷ Enga yanguresõripísode uje yicha ore aja yãrachua ome ore úringane ujñapetácho a ore chojningame yu jne: "Yocangaráni á, ¿jé déji rique a ujetiga yimóngo bayaguhérique to enga yisíngo ua? ¿Jé dépoji rique rĩ a ujetiga yimóngo ua iji bayátique nanique enga yaningaco ua?

³⁸ ¿Jé dépoji rique rĩ e ujetiga yimóngo ua iji baríringárique, enga yijnángo ua aja yoquiguíjnarique nanique? ¿Jé dépoji rique rĩ e uje chi ajmáta ome baguidérigui enga yisíngo ua?

³⁹ ¿Upo rĩ uje chi ejnarétaque ua enga yibájoi ua? ¿Jeoga bagúsi báringárique pujurúgai enga chi yibajopoi ua te rĩ?"

⁴⁰ Mu ore eduguéjnai uyu a yichajnai ore enga yojninga jne: "Uacátegoningáne udore ome yijorane, ore gajnui urásu ujetiga jé yajnecho to. Ca uñeque ibijoque marínga, jé u."

⁴¹ Jé u uje eduguéjnai uyu a yojningame yarasé jogosórone jne: "Dupade ujuyaquédatéi gajnesórone uaque á, acayoi quedéjnane ome yu. Uacaquítequiguíji gajño pioi uje Dupade jé ipesudome Satanás, irógode ore nanique. Enga a qué uacagúsoji jne iji deréjna pitade.

⁴² Jé tiógara udore ome uaque. Chamáñaje que osṍcho yu iji yiyaguhéode, yuyádode ore nanique gu.

⁴³ Que acueyópoi yimochádode nanique rĩ iji yiríringane, yiriguítigade ore. Que ajichópo yírique nanique rĩ ome boráraque uje íjnoque yiguidedie nanique. Que ajmitáyopo yu nanique rĩ iji yejnaréngone, yajnenie pujurei ore uje ore suru yibai nanique."

⁴⁴ Mu a ore chajnai enga ore chojningame yu jne: "Yocangaráni á, ¿jé déji rique e ujetiga yimóngo bayaguhénique, bayátique ore nanique marínga, ca yosṍco ua? ¿Jeoga yimóngo ua nanique iji bariguítigárique, baríringárique ore marínga, ca yosṍco ua? ¿Jé dépoji rique rĩ e ujetiga yimóngo ua iji báringárique ejnarétaque, jeoga pujurúgai marínga, ca yajmitágo ua?"

⁴⁵ Mu eduguéjnai uyu a yósi tome ore jne: "Uacamóño yijõra dipeséode ore nanique uje jmataque ore, mu que ajicho ore yúrique nanique ome uacosõraquérique. Enga gajnui urásu ujetiga uyu jé u eti ca ajicho yírique. A yanguresõre gajnareque marínga, ujeta ca ajire yúrique enga jé bo baba."

⁴⁶ Jé u uje a pujuya ore jne iji deréjna pitade. Jé basa ore uje que ore bárique cuse enga a ore chise dacuecaringuéringo jne iji deréjna pitade.–