Matéo 24 - Dupade Uruode

Jesús chojninga: "Dupade iguíjna cuchábi a íjnoque jne."

¹ Uje Jesús e doi guesi tiji Dupade iguíjna cuchábi, mu acadigode uñane ore tibágui enga ore tija Dupade iguíjna cuchábi uje ueradípiso jogosórone cucha jnese gu.

² Mu Jesús chojningame ore: –Ueracho uacatijabáidode cucha iji Dupade iguíjnai. Mu a chise dínique jne ujetiga ore chajningarasipise jne enga urui jnumi. Enga a ca pimópo cucaranéringui iji jogadi jne rĩ ujetiga chugápoja ñane gánique rĩ.–

Cucha tocachugode u unojo iji erámi eruei yui

³ Jé u uje Jesús, acadigode ore chise cucarani uje i tu Olívos enga qué ore chácariji. Enga Jesús acadigode ore catecã́ri iji quedéjnarique enga ore chojningame: –Yocacadisṍri á, ¿jé cho rique a ujetiga cuchade udore tocade a? ¿Jé pãrapiérigui jne iji baríringai, erámone eruei ore yui?–

⁴ Mu Jesús chojningame ore: –Yingoma quigode ome uaque jne. Añuchopúsu uaqueo enga ca pãraque uaque jne.

⁵ Uje a jiépisi jnaníringo jne ujetiga ore chósi tome uaque: "Cachi uacangarádejnai Crísto u yu a." Udore a ore chãra ayoré uásejnane jne.

⁶ Ujetiga adúcho pujnoméringo ome pocaningane iji erámone údode jne, mu ca chajuque uacagutedie gotique. Enga a arajáyo jne uje bajácho cuchade udore jnese ujetiga tocade. Mu erámone eruei cáma upúsu gotique.

⁷ Mu a arajayópo erámi eruei yúode jne rĩ ujetiga erámi unirísoningo ore socárome ñane iji erámi údode ome dajocaningádatérigo ome ñane. A chaguhéode socarapome uaque to jne rĩ. Jé aja dequejnaréquedatérigo ujetiga tṍraji dajñarenie ome uaque. Jé cho jnupe tãrarachutígo ujetiga chise quedéjnane.

⁸ Mu taningami qué su ome cuchadatéode uje a pésu erámi unirisórone ore ujuredie jne.

⁹ Mu a jé irába jne ujetiga qué ore chisa uacuñéngo. Enga a ore cho dajuñame uacuñéngo jne rĩ. Enga a ore chujé uacuñéngo to jne rĩ. Enga a ore chetaguipise uáguiji erámi údode jne. Uacabade a jé u yadode jne.

¹⁰ Enga a Dupade anguresõre uásejnane ore cha danguretigai iji Dupade jne. Enga a ore chetaguipise dojode Dupade anguresóño jne. Enga a ore tẽra ore jne ujetiga ore chujé ore.

¹¹ Jé u uje urupatáquechoquírigo a ore di jne enga a ore cho Dupade uruode atatasõre iji re jne. Enga a uásejna ore jne ujetiga ore jos eti jé ũré ore.

¹² Jé u uje pisijnaringuéone a chichagu raja erámone jne enga erámi unirisórone a ca ore chisápo uñane unétique jne rĩ ome cucha dacate gajnaréngone unojo. Jé u uje a ca docosõrangápo ore ome ñane jne rĩ.

¹³ Mu ujetiga uñeque jé chidota re aja dáringai ducañerájma eruei enga a piquetaque jne.

¹⁴ Enga a ore jno Dupade ujnomei údi aja erámone jnese jne uje ore potapísa gu ujetiga erámone unirisórone ore chiraja uje Dupade pota cho darása iji ore. Enga eruei a u jne.

¹⁵ Ajnusináño Dupade uruode atatasṍri Daniel urusarane quigode uje chĩ́care cucha puyáquedatéi uje que toque ujetiga picha gotígo aja Dupade iguíjna cuchábi ajei. Mu uté chojninga: "A chise dínique jne ujetiga ore chijna cucha puyaque noñai uté aja Dupade iguíjna cuchábi. Enga Dupade iguíjna cuchábi úringai eyuque jogadi tu jne." Daniel urusarane udore ajirisórone uaque a arajáyo jne ujetiga urusarane chise dáringai tocachuque.

¹⁶ Ujetiga unojo tocade jne enga areque ujetiga judéagosode jĩraque ayóyo jne aja cucaranone.

¹⁷ Enga ujetiga uñeque déji daguíjnai guesi enga jé ca áyipieraque chachẽrapo daguíjnai rĩ ujetiga chiqueta dagúcharique iji.

¹⁸ Enga ujetiga uñeque déji erã́tique enga ca chajniapója daguíjnarique rĩ iji daquigáningo ujetiga áyipieraque déji daguidé piquetatígo.

¹⁹ Yosõripise cheque icamasuguérigui, jé aja ore uje ore chacucãre dababode. Uje a ca toque jne ujetiga ore chayo iji diri uté to.

²⁰ Ujetiga agúsoji deréjnane unojo to enga ajóchayo Dupade ajei údi ujetiga uacagajñua ca basíji dire puyátique jne jeoga tejnuringa aréredatérique útigo.

²¹ Uje parecujate dosóguedie, páyuguhebátigade a ca chajire re jne iji dirode udore. Uje que pimope gajnúrique nanique, jé aja unojo, jé aja yoquiquei jne.

²² Ujetiga Dupade ca chaguinerurásu jetiga pésu cuchade unojo eruénique enga a jé ca ayorérique chapidirase go. Mu Dupade a chaquĩ́ra cucha dacadode jne gu danguresórone jne ujetiga ore chapite. Chamáñaje chijnorapise dajegaidode ore gu.

²³ Mu ujetiga uñeque potárasa jeta chãra uaque enga chojningame uaque: "Crísto déji ne." Jeoga uñéngo chojninga: "Crísto déji ta." Mu jé ca angáchoi udore gosode to go.

²⁴ Uje a aringáca dírigo jiei jne uje chiese ore acajnaquéode garani tu Dupade. Enga a uñane ore cho Dupade utocaidi Crísto iji raque to jne. A ore pésu cucha pitijátigo ome daringaquéode ome uaque jne. Enga a idógosi jne ujetiga Dupade anguresõripísode ore timíningarása ore to, uje Dupade ajegaite ore múñi.

²⁵ Yingo cuchade unojo bajaque ome uaque ujetiga dimane uágome yúode.

²⁶ Jecute ujetiga ore chojningame uaque: "Crísto déji erãpe eyutiguei." Mu jé ca angáchoi udore ore. Jeoga ore chojningame uaque rĩ: "Beyoi enga ajicho to. Crísto déji guiguíjnai uné ajé uñai." Mu adi jé u, jé ca angáchoi udore ore uruode go.

²⁷ Uje Dupade utocaidi uyu yiríringárique gajnui a u ajnorátique jne. Uje tṍraji gaté enga chicáji quedéjnane.

²⁸ Uje gajnui tu jetiga cuchiso totique dóji erã́tique enga chugúpẽre chagúode jĩraque chiraja jogadi.

Jesús isocai u uné jne jeta diapo rĩ

²⁹ Parecujate dosóguedie udire quigade enga guedé a toi jne. Guedoside a ca chajniápo jnumi te jne rĩ. Guédodie a basapo jne rĩ iji gaté. Enga gaté a chijocase re jnese jne.

³⁰ Ujetiga ore chimo Dupade utocaidi uyu yãrapiedie udire iji gaté enga pagoyedie jogadi tu ome erámi unirisórone ore iji erámi jnese jne. Enga a ore chimo Dupade utocaidi uyu iji gue abujáraque. A ore pañaji yúringai ujopíerãque, yúringai pujnuéngaisṍre ore jne.

³¹ Enga a yiroque yirógode gaté unirísoño uñeque ujetiga chubúchu dabuchui jne enga a chejnápusu. Enga a yiroque yirógode uñéngo aja erámone quigode jnese jne ujetiga ore chamáta yajegaidode ayoréo jnese aja yari.–

³² Jesús qué jno dacajnaquéode údi enga chacãra dacajnaquéode aja poridie. Enga chojningame ore: –Adójningachó poridie agatadode adi to. Uje poridie acarane e sué enga imoi tu gu uje e idógosi sequeré.

³³ Jé isocai upo rĩ ome cuchade unojo uje a tocade jne enga a arajáyo jne uje yiríringai e idógosi.

³⁴ Jé ũré yojñane uje cuchade udore jnese a tocade jne uje cáma ore toi iji deréjnane unojo.

³⁵ Guéode, jnumi a ore íjnoque jnese jne. Mu a gusu yuruode jne ujeta ca íjnoque to.

³⁶ Mu que pirajaque yiríringárique dire, guedé gatócororaque ore. Gaté unirisórone, Dupade irógode u marínga, que ore chiraja. Jé chopome Dupade ujnacari uyu rĩ uje que yiraja to. Gusu yai Dupade uje chiraja yiríringai dire.

³⁷ Dirode iji Dupade utocaidi uyu yiríringai yui a chopise dirode yui jne uje gue dequejnangóri chejna Noé urasade nanique.

³⁸ Ore áyipiedie gaidode upúsu daquetangóningo cucha ome raque nanique. Uñane ore áyipiedie gaidode u dabosode. Jé uñane áyipiedie gaidode u dajódode yote piocho. Jé basa uñane ore áyipiedie gaidode u dajmatodie gapui, dajmasórone jnacare ore ujetiga jé ore chisa ñane. Mu chise diri uje Noé e ore chacája dabi cuco cuchape ajei.

³⁹ Enga ore chuninga mu gue dequejnangóri yore ore gai enga chejna ore jnese. Adi a jé u jne ujetiga Dupade utocaidi uyu yĩriápo rĩ iji uaque.

⁴⁰ Qué yingopo yiríringai isocade ome uaque rĩ. Uje a jnaníringo ore déji uñane gari jne iji erã́tique uje qué ore cháta dasagode aja ñane. Mu a pijna uñeque jne. Jeque pijíñome uñai.

⁴¹ Enga a jé cho chequé gárerigui jne ujetiga qué ore chijáro dajarotique cucha. Enga a jõra chuningame jne eti pijna jõra. Jé pijíñome uña.

⁴² Beyoi enga ajuso uaqueo enga dimane uágome yiríringai yui. Uacamóño uje que arajáyo uacangarádejnai uyu yiríringárique yui.

⁴³ Adi tu ome guiguíjna gajnengónique. Ujetiga uté chirajárase ayoré oriechoquírique diringárique iji dejai, enga uté gosi a ca morase to iji dejai údode. Gaidi tu gu ujetiga chuninga oriechoqui enga ca uté toria ugúcharique.

⁴⁴ Yacajnaquéode unojo quigode u ujetiga arajáyo enga dimane uágome yiríringárique yui. Uje a ca urénga uacáyipierigui doi ujetiga tocade jne, mu a aninañome eti Dupade utocaidi uyu yiríringai tu.–

Jesús chacãra dacajnaquéode aja jnanírique irótigo

⁴⁵ Jesús catecã́ri dacadigode enga chojningame ore: –¿Piróquegaté áyipierã́tique atígo cho rique? Uacarajáyo uje isocai u uje susípise darósõri iguíjnai guio, jé aja irógode ore jnese. Que chimoque uje dimane ore posode.

⁴⁶ Enga a uté irasique re jne ujetiga irósõri di enga chisíji daroquéode gai uje pésupúsu aja quedéjnane.

⁴⁷ Enga a jé u jne ujetiga uté irósõri chojningame: "Yipota ujetiga jecucha be yiroquéode uje que amoque cuchárique gu. Enga a yẽrapísaja ua jne ome."

⁴⁸ Mu ujetiga uté gosi iróquegatérique sijnaque enga a ca áyipie déji uraque darósõri diringárique yui, enga a chojninga iji dajei: "Yirósõri a ca di míraque jne jõ."

⁴⁹ Jé u uje chanire dojode irócho aja quedéjnane. Enga nóna yote pioi yugode jnanío aja quedéjnane. Chacásõrapo ore rĩ aja quedéjnane.

⁵⁰ Mu uté a chunina jne mu irósõri tṍraji tome.

⁵¹ Jé u uje a iroi ujñapié ajámi iji dajuyaquei jmainie jne. Enga Dupade a isocai u tome jnani urupatáquechoquíode. A ore chisa jóroque dabade iji ujuyaquéode jmainie. Enga a ore chigase damatarane uje ore chejnárengui jóroque re iji uté jne.