Matéo 20 - Dupade Uruode

Jesús pésu ejémplo ga chacãra dacajnaquéode aja úvadie ĩrasórone

¹ Ujetiga Dupade e di dáringai eduguéjna údi iji jnumone enga a isocai tu jnanírique uje chobere aja dajesúrique uje chucué darótigo ujetiga ore na acadie úvai.

² Chise gojni darógode enga chingo dáyipiedie ome ore ujetiga gueranenie pláta denário chojmára iji dire chojmarai. Enga ore chimesẽre áyipiedie. Jé u uje chiroque ore aja daroquei.

³ Jnani uté chicapóji ore idai ajã́ro rĩ uje guedé qué paráta. Jé u uje chimópo jnanione rĩ uje íjnoque ore itrabajátique.

⁴ Enga chojningame ore: "Boyo enga beyoi yiroquei to. Aráñomu yacadie úvai to jne. Enga jé yiji uacameseráringui plátai jne ome uaque." Enga jé u uje ore doi iroquei to.

⁵ Guejnasṍri chucuepoi darógode gaté rĩ iji guedé gatócoro. Enga chucuepoi ore rĩ uje guedé cho jñuque.

⁶ Uje guedé e jnopise, mu chicapóji guidai ajã́ro rĩ enga chise ayoréode uñane uje que ore doi piroquérique to. Enga chojningame ore: "¿Gotique gu a uje que beyoi piroquérique iji diri uné to?"

⁷ Ore chojningame uté: "Que uñeque catecã́ri yoque gu. Jecute que yicoi uñeque iroquérique." Enga uté chajnai ore uruode enga chojningame ore: "Beyoi enga aráño yacadie úvai to jne. Enga jé yiji uacameseráringui plátai jne ome uaque ujetiga aráño to."

⁸ Uje e cho sere enga guejnasṍri chojningame daroguipísi: "Abidi yirógode enga o ore oré ome diri uné. Mu o bajágu ejode jne. Jeque o ejoi iji bajade ore jne."

⁹ Iroque ejópisode uje ore doi trabájo iji guedéjnoringái, ore gajnenie jé u ore ipláta denário chojmarai.

¹⁰ Quigade enga cho uñane oré to. Mu bajaguipísode ore jos eti ore gajnéringui déji ejode iquéode. Mu que u ore áyipiedie go uje ore gajnenie jé chojmára jnese.

¹¹ Uje ore chimo ore gueranenie uje jé chojmára, enga ore cho chi-chi-chi aja darósõri.

¹² Jé u uje ore chojningame: "Guedé gatócoro chojmáraque uje ejode ucode ore doi baroquei to que. Mu yocajnenie jé cho ore gajnenie to. Uyoque u múñi uje yejnángo yoque aja guesi enga guedé ojodie chejna yoque iji diri jnese."

¹³ Mu guejnasṍri chojningame ore uñai: "Yijõra yá, que yatique gajnareque go. Yeranenie jé u yojninganie ome uaque que. ¿Ma ca ajnusina ya uje yicatecãcoi uñane que ujetiga amesecho yeranenie iji diri tuqué?

¹⁴ Asa bajnenie udire enga bo. Yipota ujetiga ejóiso ore gajnenie jé u bajade gajnenie to.

¹⁵ ¿Ma ca araja to a uje yiplátai enga jé tiógara uje yiji yajéode ome? ¿Jeoga aratáyime yúringai caniraque ome yu?"–

¹⁶ Jesús chejna daruode guesi enga chojningame ore: –Jecute yingome uaque uje yanguresõre ejode uñane a ore sué yanguresõre bajade gáyode jne ome Dupade guẽratígo ome ore. Jé basa yanguresõre bajade, bajac ore mu, a querénga ore gajnetique unájna jne. Uje Dupade ibidigode jiei ore. Mu imeserane garósi iji ore.–

Jesús chopo dagachodi quique rĩ ome dacadigode

¹⁷ Uje Jesús ore déji dajere iji Jerusalén yui enga chijna dacadigode aja quedéjnarique uje gare ore iji yirídai. Enga chojningame ore:

¹⁸ –Uacarajáyo uje yoquiqui tu Jerusalén. Mu ujetiga yico gajneri a pisi ome Dupade utocaidi uyu ome judíode angaránone asutépisedie, Moisés urusarane atatasórone ore to gajneri. Enga a udore ore tẽra yu ome chutique dirome.

¹⁹ Enga a ore tẽra yu ome ducurása quedéjnane ore dirome ujetiga ore chujñieta yu. Enga a ore chujépo yúdode jne rĩ. Quigade enga a ore chajo yu aja curesérique jne. Enga a jé yitoji jne. Mu a gadioque díningo dirome iji yitoringárique quigade enga jé u ujetiga yĩrijíapo rĩ iji yúringai toque.–

Jacóbo, Juan ore daté chijócha Jesús ajei údi ome dajnacarode

²⁰ Jé u uje Zebedéo ujnacarode Jacóbo, Juan, ore daté ore tibágui Jesús. Enga ore daté chichaga dagataidie aja iquei enga chingo dajnacarode ome.

²¹ Enga Jesús chojningame: –¿Bagaitíguiji yu a?– Enga chequé chojningame: –Yibágui ua gu yujnacarode. Yajéode urásu ujetiga e ajna báringai eduguéjna aja erámi uné jne enga acharása ore aja barosadode ujetiga dacasuté ore to. Uñeque a charásiji bãrachua qui, jeque uñeque charásiji barasé qui ome úringáraque dacasuté.–

²² Mu Jesús chojningame ujnacarode ore: –Que arajáyo uaquẽcarane cucha udore úringane cucha ibiraguéjna. ¿Ja jé acasorási yúringai ducañerájma to a? Uje a yajnéone cucha gajnui tu cucha pijote iringonguéjnarique jne.– Mu jĩraque ore chajnai enga ore chojningame: –Cachi yicácoi erĩ́e.–

²³ Enga Jesús chojningame ore: –Jé ũré uje uacacásoi uacáringáringo ducañerájma to, jé aja ujetiga ójiyo yijótique cucha iringonguéjna to. Mu que yajneque go ujetiga yi yajéningo ome yirosadi charisóningo. Yai Dupade a u jne ujetiga doi dajegaitígo ome yirosadode.–

²⁴ Uje Jesús acadique uñane, uje ore chejna yijmanáyone, ore chudute Jacóbo, Juan ore ajéode ome ore úringa dacasuté enga ájningarãque ore.

²⁵ Jé u uje Jesús tibidi ore enga chojningame ore: –Uacarajáyo uje dacasutedie ore chopise daroguipísiji darasade. Enga ore chijna damenuringuei aja ore.

²⁶ Jé basa uaque enga a ca uacadi u to jne. Quigueque uje a uacuñeque pota dáringárique uacangarate jne enga a uñeque chucué dasocárigo jne ujetiga chátaja dojode Dupade anguresóño.

²⁷ Mu ujetiga uacuñeque pota dáringárique uacangarate jne, uté doi enga ca suseque dajorane ore.

²⁸ Uje Dupade utocaidi uyu jé yisocai u to uje que yĩri gu ujetiga yijna yimenuringuei aja uaque ujetiga apéso cuchade ome yu, mu yigaidi u ujetiga yátaja uaque. Yigaidi upo rĩ ujetiga yẽra yu enga yimate uacasijnaringuéone oré. Cho jetiga pisijnaringuéone igarique uaque, mu yigaidi u ujetiga yirame uaque. Enga a jiei yiraméone iji uaque jne.–

Jesús chiqueta edoparique gáreode

²⁹ Uje ore jnoji ore idai Jericó enga ayoré dipesérigo ore nóna Jesús to.

³⁰ Enga edoparique gárerigo ore cháji dajei dosatique. Enga ore chudute uje Jesús déji dajei ga e chirõre ore. Enga jé u uje ore tibite Jesús gai to. Enga ore chojninga: –Jesús, David ape disi ejo á. ¡Osõrape yoque é!–

³¹ Mu ore ejominórone ayoré ore chetaque darai ome ore. Enga ore chojninga: –Oyo parácho.– Mu edoparigode ore tibite gaté. Enga ore chojninga: –¡Jesús, David ape gaté á! ¡Be enga osõrape yóguiji ne to é!–

³² Enga Jesús chudute ore pijnacaraidie udire enga jĩraque chague iji gaté. Enga tibidi edoparigode enga chojningame udore ore: –¿Uacajegaitique a ujetiga yipésu ome uaque?–

³³ Enga edoparigode chojninga: –Yocangaráni á, qué yutocoi ua ome yoque ujetiga aqueta yoquedodie.–

³⁴ Jé u uje Jesús chosõre udore ore enga chisa ore edodie gáyode. Enga jĩraque edoparigode ore edodie omépo rĩ. Enga ore quítequiguíji Jesús quigade to.