Matéo 18 - Dupade Uruode

Jesús cho ibijótique quique iji acadigode

¹ Quigade enga Jesús acadigode ore chojningame: –¿Jé ibijótique jne iji yoque ujetiga Dupade e chijna dáringai eduguéjna aja erámone unojo?–

² Mu Jesús que chajnai ore míraque. Diga dosi disabi enga chichasíji uraque dajei.

³ Enga quene chojningame dacadigode: –Jé ũré yu ujetiga uacuñeque ca chécãre dáyipie quitique enga ca chosi disabi suné, a ca uacuñeque chise dáringárique Dupade urása to jne.

⁴ Uacamóño uje a eso uacáringáringo Dupade urása jne enga ibijoi a upúsu uñeque jne ujetiga chosi disabi suné ome úringai pajnotaque. Uje que áyipie déji dáringárique cuchadaté.

⁵ Jecute ore uje que ore suseque disabi suné gajnúone, cho jeta ore ijnorai jé u yu to.–

Jesús chatata ujetiga gosi pésu pisijnaringuéone unéningárique ome Jesús anguresórone uñeque, enga uté gosi a chejnarenguipise re jne

⁶ Jesús qué cho dacadigode ore quique. Enga chojningame ore: –Dupade ujuyaquei a ca chajire re jne ome uté gosi ujetiga gosi chacate yanguresórone uñeque ome pisijnaringuéone atique, jétapũré ujetiga disape. Ujetiga pigariguírase cucarané cucháberaque aja uté gosi etabi, enga paranírasaja yote quedéjnai ajedatéode marínga, Dupade ujuyaquei a suépise cucha dacadode udore gai ome uté gosi jne.

⁷ Yo yáyugu uje pisijnaringuei jé jogate erámone unojo uje unéningai cuse ome erámone unirisórone. Mu a jé ate unojo jne iji deréjnane. Mu iyieja Dupade ujuyaquei yui ome gosi ujetiga chacate dojoi ayoré ome pisijnaringuéone unéningai.

⁸ Jecute ujetiga bajmanai, jeoga barídai ore chorei ua iji pisijnaringuéone, be udore enga aquesu enga ṍraja toniñeque. Bamo uje ueradi u ujetiga cõrocorõ ua aja bacuecaringué ichai marínga, ca porei ua iji gajño pioi jnese, uje pioi uté que eruénique cus.

⁹ Ujetiga bedo u ujetiga chorei ua iji cucha gajnaréngone, be enga ajnime enga ṍraja toniñeque. Arei tu ujetiga bedóraque chojmára aja bacuecaringué ichai marínga, jé ca ducarãte ua aja gajño pioi jnese.

Jesús chacãra dacajnaquéode aja áyasa bijnángueraque

¹⁰ Ca etáchosi disabi suné ujátique disape ore. Yingo uaque gu uje ore irodingórone gaté unirísoño déji Yai gari to iji guéode.

¹¹ Uje Dupade utocaidi uyu yĩri gu ujetiga yiqueta ayoré togadégode.

¹² Ujetiga uacuñeque gachidedie dérasi 100, mu a chojmaráraque bijnárase enga, que toc ujetiga uaque gosi noñome bijnangue iji erámi. Uaque gosi a noñomírasome amirenie iji pié enga jno enga chucuérasi bijnangue uaté.

¹³ A uaque gosi irasei dachidedie jnese. Mu quene ininaquei cho dabai uje chise dachidé bijnangue.

¹⁴ Isocai jé u uacai Dupade uje déji gatajnoquei iji guéode uéchai. Uje que pota to ujetiga disabode sudore uñátique bijnási ome.

Jesús chacate ore ujetiga ore chicadígui ñane isijnaringuéone

¹⁵ Ujetiga bojórique Dupade anguresõre pésu cucha gajnarétique ome ua, enga be uté gosi enga o quique iji quedéjnarique. Enga ujetiga doi baruode enga jogadi tu uje uacajõrápo ñane rĩ.

¹⁶ Jé basa ujetiga uté gosi ca tangári ua enga abidi bojórique Dupade anguresõre, jeoga gárerigo, enga átayo uágaja ñane ome uté gosi. Uacáringane ũréo pijogúsorone a u ore jne.

¹⁷ Mu ujetiga uté gosi jé ate ujetiga ca timíninga udore ore enga ajnáño uté aja Dupade anguresórone ore iquei iji ore aquiningamei. Mu ujetiga jé ate ujeta ca tangári Dupade anguresórone uaque, enga beyoi enga oyo Dupade uruode guetésõre iji. Enga a ca átayopo uágaja uté gosi rĩ. Enga uté gosi gajnui u jnanírique jne uje chutai yógome yoquiplátadie ome dasutedie ore, uje que diquiyaque udore ore unétique.

¹⁸ Jé ũré yu uje uacajnéone u ujetiga oyo ñane quique ome cuchade iji jnumi uné. Enga a Dupade narare uacabáyode to jne ome uacãrétigo cucha, uacajuegátigo cucha ore.

¹⁹ Yojningápome uaque rĩ: a yanguresõre gárerigo uacáyipieraque chojmarárase iji jnumi uné ome uacataitique cucha iji Yai uje déji gaté, enga a jé chisírasome uaque.

²⁰ Adi jé upo rĩ uje a yanguresõre garósirigo ore cháta rágaja ñane ome yuruode. Garósi ore marínga, jé yugúsiji ore gari to.

²¹ Mu Pédro sose Jesús yui enga chojningame: –Yangarádejná, ujetiga yujórique Dupade anguresõre gajnareque atígo ome yu enga ¿ja garijiti a ujetiga yicadígui uñeque atígo ome yu to?–

²² Mu Jesús chajnai uruode enga chojningame: –Úngare, que quigode u udore go. Que gusu ujetiga gare iji ti mu ueradi u ujetiga yicadíjoi yocujode Dupade anguresõre ate gajnarétigo ome yoque durasedie, deréjnane ore jnese iji dirode jnese to.

Jesús pésu ejémplo ome ore ga chacãra dacajnaquéode aja jnanírique uje que áyipieraque jnoji dojórique ayoré ijnose carutígo iji dari

²³ Ujetiga Dupade chijna dáringai eduguéjna aja erámone unojo, a chicadígui darasade ore isijnaringuéone jnese jne. Adi tu yojñane unojo gajneri ome eduguéjna cuchátique uje chajire darógode íode nanique.

²⁴ Enga uje qué déji ore íode gai, mu ore di irógode uñai údi uje írigo dipeséo iji gari.

²⁵ Mu a ca ugúcharique cuse ujetiga chimate déode. Jecute eduguéjnai chiroque ore aja daroi ujetiga ore tẽra, jé aja acoté, abode ore jnese, jé aja ugúchade rĩ. Enga eduguéjnai chijnárasa daroi ore oredie jnese ome íode.

²⁶ Mu iroi doi enga jĩraque chichaga dagataidie aja jnumi iji eduguéjnai iquei. Enga chijócha ajei údi enga chojninga: "Yeduguéjná, ca agu bejode ome yu. A yo boré jnese jne."

²⁷ Jé u uje eduguéjnai chosõre daroi enga chicadígui íode iji dari enga chirame daroi.

²⁸ Mu iroi jnoja daquei enga tuangóa jnani uje íode déji gari to. Mu qué garósi. Mu que chajire cucháringome. Jĩraque chisa etabi enga chibéro. Enga chojningame: "O yoré, jé iji ne ome béode iji yari."

²⁹ Jé u uje jnani uté jĩraque chichaga dagataidie aja jnumi iji uté iquei enga chijócha ajei údi. Enga chojninga: "Ca agu bejode ome yu go. Bamo uje a yo boré jnese jne ome yíode iji bari."

³⁰ Mu que pota. Enga doi jnani uté enga chijnája soldádode iguíjnai, jé aja ujetiga cho oré déode.

³¹ Mu uté jorane chimo adode enga jnusiétaque ore ome dajõrai. Udore ore jno enga ore chingo cucha dacadode udore aja deduguéjnai.

³² Enga jé u uje uté eduguéjnai tibidi daroi enga chojninga: "Gajnareque badode ome bojoi uté yiroque que. Chamáñaje bajócha yajei údi que enga yicadígui be dipeséode que. Mu que be yisocai to.

³³ Yosõre ua que. Enga badi a jé urásu ujetiga osõre bojoi yiroque."

³⁴ Jé u uje eduguéjnai ájningarãque cuchape enga doi enga chiroque darógode aja daroi uté ujetiga ore chisa. Enga pujuya uté iji soldádode iguíjnai, jé aja ujetiga cho oré déode jnese.–

³⁵ Uje Jesús chejna daruode udore guesi enga chojningame ore: –Yai Dupade iji gaté a isocai jé u unojo jne ome uaque ujetiga ca acadichopísi uñane adode.–