Matéo 17 - Dupade Uruode

Jesús tocade ome dacadigode

¹ Uje dirode chojmára iji ti iji acajnaquéode unojo quigade enga Jesús nóna dacadigode uñéngo aja cucarãte umánique ójoraque. Enga jorane u Pédro, Jacóbo ore, jé aja Juan uje Jacóbo jõra to.

² Uje Jesús qué déji cucarani ójo gai iji ore ajei enga edodie chécãre dasocade. Enga díreca. Cho guedé ojodie ichode. Jé aja iguidedie rĩ, uje póroropisi iguidedie enga chijninguese dayaridi.

³ Enga ore chuninga mu jnani gárerigo ore chiqueta raja Jesús. Enga Jesús ore catecã́ri ñane. Ga Moisés u uñeque. Jé Elías u uñai. Uje jnani bajácho ore nanique.

⁴ Pédro pañaji ore, enga jé u uje chojningame Jesús: –Yocangaráni á, ueradípise ujetiga yácagoji ne enga yipéco guiguíjna gadiótigo ome uaque. Bajneque uñeque jne. Jé Moisés gajneque uñeque jne. Jé Elías gajneque uñeque to jne.–

⁵ Uje cáma Pédro chejna daruode unojo guesi mu gue abuja nanganatágueraque díji ore. Enga chaco udore ore gai. Enga ore déji gue abuja uaté ajei. Enga ore chudute darárigo iji gue abuja ajei uje chojninga: –Yape yijnorai u uté enga yirasique yu ome. Angachopísi.–

⁶ Uje ore chudute cuchade unojo enga chajuque ore agutedie enga ore todópisa. Enga jé u uje ore cṍraja jnumi.

⁷ Jé u uje Jesús sose ore yui enga chijocase ore. Enga chojninga: –Ayágueyo. Jé ca atodóyo.–

⁸ Enga ore chajirápo dejode rĩ mu que ore chimo ayorériguiji. Mu gusu ore imoi u Jesús iji.

⁹ Uje ore doi jnumi iji cucarãte oroné ójo enga Jesús chojningame ore: –Jé ca ajúyo cucha dacadode unojo jne, jé aja ujetiga Dupade utocaidi uyu yiquecápo rĩ iji yitoringai.–

¹⁰ Mu acadigode ore chojningame: –¿Jé gotique gu a uje Moisés urusarane atatasórone ore chacate yoque uje bajaque Elías jne ujeta di, jeque judíode yoquijnati Crísto díji quigábode jne?–

¹¹ Jesús chajnai ore uruode enga chojningame ore: –Jé ũré uje Elías a di bajaque jne. Enga a pésu cuchade bajaque jne ujetiga dimane ome ore angaráni diringai yui.

¹² Mu yingome uaque uje Elías e di, mu que ore chiraja uté. Jecute ore doi datuátigade ome. Enga isocai a jé u jne ome Dupade utocaidi uyu. Uje a ore cho damajóji yu to jne.–

¹³ Jé u uje quene Jesús acadigode ore chiraja uje ore acadisṍri ojningai upúsu Juan el Bautísta uje chaca ore edodie iji yodi nanique.

Jesús chiqueta disi sereretáguebéi

¹⁴ Jesús ore doi jnumi iji cucarani enga ore chise ayorébui. Jé u uje jnanírique sose Jesús yui enga chichaga dagataidie aja jnumi iji iquei. Enga chojningame:

¹⁵ –Yangarádejná, osõrape yabi. Uje ejnarétaque enga ejnaréquedatéode chujé. Enga chipese re aja quedéjnane. Ejnarei jecucha tṍraja piogode. Tõrapója yodode to rĩ.

¹⁶ E yijnája bacadigode ore que, mu que ore chijnime ejnarei ãrírique.–

¹⁷ Jecute Jesús chojningame ore: –Que uacanguretigárique cuse go. Enga jecucha uaquecãcho cuchade quigode. ¿Chimo jóronguiráse re díningo ujetiga qué yugúsiji uacari iji ne enga yidota yu ome uacáringane angoninguite paricho? Boyo ga beyoi disi tuté ga ajnáño aja ne.–

¹⁸ Uje ore diósi disabi suté údi iji Jesús enga Jesús chijócãre Satanás utocaidi iji disabi. Enga jé u uje jnosíji. Enga jĩraque ijõrape disabi te rĩ.

¹⁹ Unojo quigade enga Jesús acadigode ore catecã́ri dacadisṍri iji quedéjnai. Enga ore chojningame: –¿Chimo jóroque re uje que yijnico Satanás utocaidi iji disabi suté que?–

²⁰ Enga Jesús chojningame dacadigode: –¡Chimo jóroque re uje uacanguretigai qué chonasia disabi ejnarei! Uje a atíamirase uacanguretigai marínga, enga chosi cucha ajñu atíãtaque, a jé cuchárique tõrarásiji. Enga a ojnichórasa ome cucarãte cototéraque: "Écãre bajogatique iji ne." Enga a chécãrirase dajogatique. Que cucha ibiratique cuse ome uñeque ujetiga anguretigai ũrepise ome Dupade.–

²¹ Enga cho dacadigode quique enga chojningame ore: –Satanás utocaidode unojo que ore doi guesi iji pisoca uñeque go. Ore doi guesi gu ujetiga ayorérique cho dayágome re ujetiga catecã́ri Dupade.–

Jesús chatatapo datoringai ujnomei ome ore rĩ

²² Uje Jesús, acadigode ore nóna ñane iji Galiléa údode enga Jesús chojningame ore: –A pẽrate Dupade utocaidi uyu ome yetesórone dirome.

²³ Enga a udore ore chimate yu aja jnumi jne. Mu a gadioque díningo dirome iji yitoringárique quigade enga jé u ujetiga yĩrijíapo rĩ iji yúringai toque.– Mu ojñane unojo cháji ore údode.

Jnanione ore cho doré ome Dupade iguíjna cuchábi

²⁴ Uje Jesús, acadigode ore chise Capernaúm nanique, enga jnanione tibágui Pédro uje ore chutai ore iplátadie ome Dupade iguíjna cuchábi. Enga jnanione udore chojningame Pédro: –¿Uacacadisṍri ja chorase doré to a ome Dupade iguíjna cuchábi?–

²⁵ Pédro chajnai ore enga chojninga: –Cachi cho doré to.– Quigade enga Pédro chise Jesús iji charidi guiguíjna ajei. Mu Jesús catecã́ri bajaque enga chojningame: –Simón Pédro á, angomome yu ujetiga eduguéjna cuchábode iji erámone unojo ore chutai darasade iplátadie ome impuéstos, enga ¿ja ore chutápoi dabode to rĩ a?–

²⁶ Mu Pédro chajnai enga chojningame: –Ore utaidode u ayoré unejángone.– Enga Jesús chojningame: –Jecute a ca cucha putaite eduguéjnane atígo to.–

²⁷ Enga chojningápo rĩ: –Ísenga a ca yorase yoré to uje yocangaráni Dupade ape yu gu. Mu jé dóji siñeque. Que yipota gu ujeta dequeteque yocatique. Jé yoco yocoré to. Be tié enga ṍra bojnai aja enga a jĩraque ajnime oyítique jne ujetiga tagu bojnai. Enga achẽre pijnani gai jne. Enga a jé u jne ujeta ajnime plátaraque iji pijnani. Enga a jé chopise yoque jne ujetiga yoco yocoré.–