Matéo 14 - Dupade Uruode

Juan el Bautísta itoringai adode u unojo

¹ Iji dirode udore nanique ga eduguéjna cuchábi Heródes chudute Jesús ipesútedatéode ujnoméone iji dajnepídi punire Galiléa.

² Enga Heródes uté chojningame daríjogosórone nanique: –Chimo jóroque re ujetiga yi casicaite Juan el Bautísta uté u uje tṍra ore aja yodi nanique, enga ecápo rĩ. Jecute e pésu cucha pitijádode ome dáringai ujopíerãque.–

^3-4 Juan uté u uje chaquĩ́ra ore eduguéjnai Heródes nanique gu uje uté chijna desai Felipe acotéragaja re uje uaté i tu Herodías, enga Moisés urusarane cucha puyácho chãraque pisocai uté. Mu Heródes que tangári Juan aquĩraquéode. Enga chisa Juan gu dacoté uje uté chaquĩ́ra ome. Jé u uje chigaru uté enga suru gai iji soldádode iguíjnai.

⁵ Eduguéjna cuchábi Heródes pota jóroga ujetiga chujé Juan. Mu todo ayorébui nanique uje ore chopise Dupade angúromei proféta iji Juan nanique.

⁶ Mu chise Heródes batiga sequeré nanique enga jé u uje uté pésu dajñamítedatériguiji nanique. Enga Herodías uro doi ore ajñamini to. Enga gapua uaté doi baile iji ore ajei nanique. Enga jé u uje Heródes irasépise dabejñua.

⁷ Jé u uje Heródes chojningame gapua: –Yurúo yurúrique enga que yajéninga. Atai cucháriguiji yu enga a jé yisi ome ua jne.–

⁸ Jecute gapua cáputaji daté enga daté chingome ujetiga chutai Juan el Bautísta gatoi iji Heródes. Jecute uje gapua chise Heródes enga chojninga: –Asíome Juan el Bautísta gatoi ome yu enga ajnáji agapírique jne aja ne.–

⁹ Ga jnusiétaque eduguéjna cuchábi Heródes ome gapua uruode, mu que chiraja dasocárique ome Juan. Chamáñaje ore chudute uruode ucode jnese to que, uje chi uru darúrique enga chi ca ajéninga. Jecute que toc ujetiga uruode noñaji.

¹⁰ Enga jé u uje uté chiroque soldádode aja Juan ujetiga ore chaquesu etabi iji ore jurúgaipidi.

¹¹ Quigade enga ore di Juan gatoi údi enga ore chijnáji agapi. Enga jé u uje ore chisi ome gapua. Jé basa gapua chisi ome daté.

¹² Unojo quigade enga Juan acadigode ore di to. Enga ore gaidi tu dacadisṍri ujetiga ore chijóchame. Uje ore chimánaja jnumi enga ore jno enga ore cho gojñame Jesús iji quigade.

Jesús chajuguína cucha pibosode iji ayoré dipeséode uje ore batigai chãraja 5.000

¹³ Uje Jesús chudute Juan ujnomei to uje ore chujé enga pota ujetiga gusúji dayaritique. Jecute chacája cucórique aja daquitique erãpe yui. Mu uje ayorébujnane ore chiraja qui enga ore jnoji dedáyode enga ore jnome quigade. Enga ore diguiji jnumone aja yui.

¹⁴ Mu uje Jesús doi guesi tiji cucoi enga chimo ayorébui enga jĩraque chosõre ore. Jogadi jé upo rĩ uje doi ore enga chiqueta ejnaretade iji ore ujade.

¹⁵ Mu uje e tota erámi enga Jesús acadigode ore tibágui enga ore chojningame: –Guedé uqué e chaca arĩa. Enga que ayorérique iguíjnarique cunguésõri yoquiyaridi tuné. Jé go que aroque ayorébui aja ore quitígo ujetiga ore doi oré tome dabotígo ome raque iji ore iguíjnane acorásedie iji daté.–

¹⁶ Mu Jesús chojningame ore: –¿Gotique gu a ujeta ore chucué dabosode iji quedéjnarique a? Beyoi enga asíyo ore potígo ome ore.–

¹⁷ Mu ore chojningame: –¿Jé yocórase írique? uje yoquigode arureque chejna yijmanai, oyite gáreode dépoji yocari rĩ. ¡Que toc ujetiga chise ayoré dipeséode iji yocari jnese!

¹⁸ Enga Jesús chojningame ore: –Ajnáño gotígo aja ne.–

¹⁹ Jé u uje chojningame ayorébui: –Ácayoji jnacarai gai iji te.– Enga Jesús chisa arurégode uje chejna yijmanai, aja oyite gáreode. Enga chajire gaté uje catecã́ri Dupade, uje chacãre gai ome ore posode. Jé u uje chajuque arurégode, oyídode ore aja jnumi. Enga chisi ome dacadigode ujetiga ore chisi ome ayoré dipeséode.

²⁰ Enga ore do gojni enga ore tagu jnese. Enga ore chĩreta dacadie iji jnese. Jé u uje ore chejna chagúi guesi enga ore chamáta ore pose pépitade, ore iquebéode to. Enga ore ĩretáringui dora depei gare iji yirídai iji.

²¹ Cucha pibosode udore gunorone jnanío ore batigai u 5.000. Que pisecarané chequérigui, disírigo ore to.

Jesús cho jnumi iji yodi uje diguiji gai

²² Cuchade unojo quigade enga Jesús chiroque dacadigode ore aja cucoi ajei ujetiga ore jno bajaque. Enga ore chirodírasiji uéchai. Enga quene Jesús chajnárase dacadigode ore to ujetiga ayorébui ore íjnongaja dajesúode.

²³ Ga jé u uje Jesús chiroque ayoré dipeséode ore aja doi iji gari; quigade enga cheru cucarani ujetiga gusu iji ujetiga catecã́ri Dupade. Mu jé dejágome iji icatecãraitigade gai.

²⁴ Mu acherangóri chachẽre acadigode ore iji cucoi uje ore chise yote quedéjnai ajei. Enga chãrai ore pi cuco iji gatéode.

²⁵ Enga e chise dirájnanie uje Jesús qué diguiji yodi gai enga chachai dacadigode ore iji ore pi cuco.

²⁶ Mu uje acadigode ore chimo uje diguiji yodi gai enga chajuque ore agutedie. Enga ore todópisa. Ore tibidi dejode, ga ore chojninga: –¡Cachi dicoré tocade ome yoque é!–

²⁷ Mu Jesús chojningame ore: –Uyu u erĩ́e. Jé ca uacagutérigui cho jora.–

²⁸ Jé u uje Pédro chojningame Jesús: –Ujetiga jé ũré enga yocangaráni Jesús u ua, enga aroque yu aja bei enga yiriguiji yodi gai to aja ua.–

²⁹ Enga Jesús chojningame: –Be enga abágui yu.– Jecute Pédro doi jnumi tiji cucoi enga diguiji yodi gai aja Jesús yui.

³⁰ Mu Pédro áyipie déji úyujna, jecute todo. Enga jé u uje Pédro jnome yodi údi. Mu chasẽra Jesús ome dabijnane enga chojninga: –¡Yangarádejná, aquetape yu é!–

³¹ Enga jĩraque Jesús chachẽre jmanai to aja gaté enga chojningame: –Pédro a, ¿banguretigai chicai rique que a? Uje bangureta yu que iji taningai, mu baya bangureta yu.–

³² Uje Jesús, Pédro ore cheru cucoi enga úyujna cho jnaque.

³³ Enga jé u uje acadigode uñane iji cucoi ajei ore chichaga dagataidie aja jnumi iji Jesús iquei enga ore chojningame: –Que potigayaguipise ua. Jé ũré enga Dupade ujnacaripise ua.–

Jesús chiqueta ejnaretade iji ore uniri Genesaret

³⁴ Uje ore chiramísara yote quedéjnai uéchamitó enga jĩraque ore chise ducuniri iji uéchai uje i tu Genesaret.

³⁵ Uje genesarétgosode chidójnanga uje Jesús u enga ore chingo erámi. Jecute Jesús ujnomei jĩraque chubu erámi. Jé u uje ore chijna ejnaretade aja Jesús jnese.

³⁶ Enga ayorébui ore chutai Jesús ujetiga juéga daguidé eruémami ome ore ujetiga gusu ore chisarase marínga, jé chiquetárase ore. Enga uje diga ore chisa enga jĩraque ore ninguira jnese ome dejnaréngone.