Matéo 12 - Dupade Uruode

Fariséode ore chetaque uje Jesús acadigode ore chisa cuchade iji dire puyai

¹ Mu chise dire puyátique uje Jesús nóna dacadigode aja dajetique. Enga ore chicáji ore guejnatígo dosatígo. Uje chaguhei chejna Jesús acadigode ore, enga ore chisa ore acade ade. Enga ore chujñuque gáyode, enga ore tagu aja dajesui.

² Mu fariséode uñéngo chimo Jesús acadigode uje ore chisa ore acade ade enga jé u uje ore chojningame Jesús: –¿Ga ca araja to a uje dire puyaque uné? Mu bacadigode jé ore chisa cuchade iji.–

³ Mu Jesús chajnai ore enga chojningame ore: –¿Ga ca ajnusínaño Dupade uruode atatagode ome eduguéjna cuchábi casicaite David ipesudode ome dajorane ore nanique uje chaguhérique chejna ore nanique a?

⁴ Uje eduguéjnai David chacája Dupade iguíjnai nanique enga chise arureque puyade iji nanique. Enga tagu enga chajuguína dajorane to nanique rĩ. Uje gusúrasu Dupade irógode uje ore gajnecho arureque puyade udore nanique mu.

⁵ ¿Jé ca adúcho to a? uje Moisés urusarane chojninga: "Dupade irógode gajnei tu ujetiga ore chisa cuchade, jé iji dire puyade iji Dupade iguíjna cuchábi. Mu jé que pisijnaringuéo go ome ore."

⁶ Mu yingome uaque uje uyoque uñai déji ne uje sué Dupade iguíjnai úringai cuchape gai.

⁷ Ísenga ca arajáyo Dupade uruode quigode uje chojninga: "Yipotigádi tu ujetiga osṍcho uñane. Que gusu ujetiga ẽcho cuchisode ome yu." A arajayórase Dupade uruode udore quigode enga a ca anichorase ayoréode uje que ore pésu cucha gajnarétique.

⁸ Dupade utocaidi uyu. Jecute jé tiógara ujetiga yiji yáyipiedie, jé iji dire puyátique.–

Jesús chiqueta jnani jmanai poritai

⁹ Jé u uje Jesús jno enga chacája ore gari iji ore aquíningárique.

¹⁰ Enga jnanírique déji to uje jmanai cacoque. Mu uñéngo timíninga Jesús aja quedéjnane. Uje ore gaidi tu gu ujetiga ore chisíji jnani poritai gai ujetiga chiqueta iji dire puyai. Jé u uje ore catecã́ri Jesús enga ore chojninga: –¿Ja jé piquetaguirase ayorérique iji dire puyátique ome bajéode a?–

¹¹ Jesús chajnai ore enga chojningame ore: –¿Ja ca uacuñeque chijnimírase dachidéraque áyasa ya ujetiga basája ejóraque iji dire puyátique?

¹² Uacarajáyo uje orerãi tupúsu ayorei ome áyasaraque. Jecute arei tu ujetiga piquetaque ayorérique iji dire puyátique to.–

¹³ Enga jé u uje Jesús chojningame jnani: –Apotingare bajmanai.– Enga jé u uje jnani uté chipotingare dajmanai enga e uajádapo iñoñaringuei rĩ enga jé chopise jmanai ijõre.

¹⁴ Enga e ájningaránguipíse fariséode ore. Enga ore jno enga jé u uje ore chucué dáyipie ome Jesús ujetiga ore chujé.

Isaías churúsãre Jesús adode nanique uje cáma chise erámone

¹⁵ Jesús chiraja ore áyipiedie ome re. Jecute jnoji judíode aquiningamei guiguíjna enga ayoré dipeséode ore nóna. Enga Jesús chiqueta ejnaretade ore jnese aja dajesui.

¹⁶ Enga Jesús chojningame daquetade ore: –Apócho yu jne enga jé ca angoño yu ome uñeque jne.–

¹⁷ Cuchade udore tocade gu uje jé Dupade uruode quicho nanique ome uruode atatasṍri Isaías uje chojninga:

¹⁸ Yajegaidi u yiroi uté. Yijnorai upo rĩ enga yirasique yu ome. A yijmare Yujopié Espíritu Sánto aja uté jne. Enga chacate erámone jogosórone ore ome yadode jne.

¹⁹ A ca uté chucué dabotátique dojo ayoré jne. A ca etochopo uruode to jne rĩ. Enga a ca chucuepoi dáringárique ibijoque jne rĩ iji pujade.

²⁰ Ujetiga tagáca asíguedie chosi taque mu a ca chibéro go. Ujetiga pibiotique ocarádabia garósosi enga chejnásija úyujnanie mu a ca chajnísi pibiotique uté go. Enga a jno dáringai pajnotai tuté údi jec aja ujetiga chimate dáringai peduguéjna pujnuéngaisṍre aja re, ujetiga pésupúsu cuchade aja quigode ome darasade.

²¹ Enga jé u uje jnanione iji punirone jnese a ore changureta uté jne.

Ore chaguhéta Satanás ujopié Jesús gai

²² Quigade enga ore chijna edopari aja Jesús uje que urúrique cusapo rĩ. Chamáñaje Satanás utocaitique guejnai edodie, uruode ore gu. Mu Jesús chiqueta uté enga chimópo dajirigode rĩ. Nararápo to rĩ.

²³ Jé u uje ayorébui ore tija uté enga ore chojninga: –¿Jé uté gosi te? ¿Ja yoquijnati u a, uje eduguéjna casicaite David ape disi ejo?–

²⁴ Mu fariséode ore chudute uruode udore enga ore chojninga: –Que u gotique, uje uté chijócãre Satanás utocaidode iji píode, mu a jé oidé tu Beelzebú ujopié. Uje Satanás uté, i uñai u uté. Jecute Satanás utocaidode ore tangári deduguéjnai enga ore doi guesode.–

²⁵ Mu Jesús chiraja ore áyipiedie quigode enga chojningame ore: –Ujetiga pachamitique jogonórone chetaque ñane enga a diga ore chujé ñane jne. Uacamóño ujetiga idaisórone, jeoga yoquijogasúode ore chetaque ñane enga jogadi tu ujetiga ore cho jmíti, jmíti ome ñane.

²⁶ Jecute jé isocai u to ome Satanás. Uje a ca togome uté jne ujetiga chijnime datocaitique iji isatique ayoré. A socarirásome re gu. Enga a diga ca bisitique pijógapo iji uté rĩ.–

²⁷ Jesús qué jno daruode údi ome ore enga chojningame ore: –Yósi te ome uaque gu uje yiraja uaque uje chiese yijna Satanás ujopié ome Satanás utocaidode, uje yijócãre ore. Uacarajáyo uje uacojode fariséo uñéngo ore chequetingare chiqueta ayoréode to uje Satanás chacája ore. Ujetiga ojnichome ore: "¿Uacoidé uaté uacajopié tṍraji rique ome uaque?" Mu a ore chojningárasa: "Dupade Ujopié tu arĩa yocoidé." Jé yo ore. Jecute a oyópise parágome yu que ome uacaru quigode udore.

²⁸ Mu yoidé tu Dupade Ujopié Espíritu Sánto ome Satanás utocaidode uje yṍra ore aja guesode iji píode. Imoi tu ome yadode unojo uje Dupade e chijna dáringai eduguéjna cuchape aja ne enga e pijóguiji uacajade.

²⁹ A ca togome gosi ujetiga chacája jnani etótique iguíjnai ujetiga chajnose ugúchade ujetiga ca pigarique jnani etoi tuté bajaque. Mu ujetiga e pigarique enga quene jogadi u ujetiga pajnoñaque.

³⁰ Uté gosi uje que chingo raja erámi uje changureta yu, enga gajnui u ujetiga chetaque yu. Jé cho udore rĩ uje que ore cháta raja yu ome yipesudode Dupade iroquéo, enga gajnui u ujetiga ore chijócãre dojode ayoréo aja quedéjnane ujetiga ca ore chise yu.–

³¹ Jesús chojningápo rĩ: –Jecute yojningame uaque, Dupade a chĩro ore isijnaringuéone jnese, jé aja ore uru noñángone. Mu ujetiga gosi chedo Dupade Ujopié Espíritu Sánto ome daru gajnarétigo, enga Dupade a ca chĩro uté gosi isijnaringuéringo jne.

³² Mu ujetiga uñeque doi daru gajnarétigo ome Dupade utocaidi uyu to mu, a qué Dupade chĩrope uté gosi uru gajnarétigo jne. Jé basa ujetiga gosi chedo Dupade Ujopié Espíritu Sánto ome daru gajnarétigo enga a ca Dupade chĩro uté isijnaringuéringo jne. Enga a uté isijnaringuei jé jogate jne iji deréjna pitade.–

Jesús chacãra dacajnaquéode aja pojníngui adie

³³ Jesús chacate ore enga chacãra dacajnaquéode aja pojníngui adie enga chojninga: –Pojnaque a ijõre enga ueradei adie. Jé adi upo ome pore betáguedie rĩ, uje a adie gajnarénguei. Poridie pijoque gu adie.

³⁴ Uga gajnúone uaque á, ¿enga esórase uacaru oníngo a ome uacáringane sijnácho? Úngare. Chamáñaje uacasijnaringuéone irágu uacáyipiedie gu. Jecute uacaruode noñácho jnese uje tṍraji uacabijnanone.

³⁵ Isocai jé u ome ayoré áyipie omone uje ore uruode omío to. Mu ayoré sijnai uru noñángone garani tu áyipie uje isijnaringuéone garanája guesi tiji pijnani.–

³⁶ Jesús chojningápo rĩ iji dacajnaquéode: –Jé ũrepise yu uje yaquĩ́ra uaque, uje a chise dínique jne ujetiga pajirique uacaru noñángone aja quigode jnese jne.

³⁷ Uje Dupade a chajire uacapesudode aja quigode jne enga ujetiga uacarúrigo omío jne enga a ca chise uacayoguérique jne. Jé basa a uacarúrigo gajnarécho jne enga a uacáringane iyonguerãque jogadi u ome jne.–

Jnani sijnángone ore chutai Jesús ome ipesútedatérigo

³⁸ Jé u uje fariséode, Moisés urusarane atatasórone uñéngo ore catecã́ri Jesús enga ore chojningame: –Yocacadisṍri á, a qué yajicobírase bapesútedatérique to ujetiga ajna Dupade Ujopié ome.–

³⁹ Mu Jesús chojningame ore: –Jnanione uaque iji deréjnane unojo, gajnarenguipíso uacadode, que angáchopoi Dupade rĩ. Uacapotigádi upúsu ujetiga amóñopise yipesutígo cuchadatéo. Mu a ca yujuéga jne jeta yingongara yipesútedatérigo ome uaque. Gusu ujetiga amóño yisocai jne uje jé u jnani bajai Jonás isocai to nanique.

⁴⁰ ¿Ajnusináño jnani bajai Jonás a? uje guejnane dire gadioque, dejade gadiógapo rĩ iji oyite cuchábi ajei. Uje a jé isocai u jne ome Dupade utocaidi uyu uje a yejnatígo dire gadioque jne, dejátigo a gadiógapo jne rĩ iji yitoringai iji jnumi údi.–

⁴¹ Jesús chojningápome ore rĩ: –A jnani bajade uñéngo, nínivegosode, ore chaguhéta uaque gosode gai to jne iji diri ujetiga Dupade chajire uacadode aja quigode. Uje ore tangári jnani bajai Jonás acajnaquéode nanique enga jĩraque ore cha date gajnaréngone. Mu uyu, yujnué Jonás gai ome yúringai Dupade utocaite, mu que angáchoi yu gotique.

⁴² Chequé bajé eduguéjna tṍraji umusoi garani ome eduguéjna cuchábi Salomón nanique ujetiga tangári irajatígadatéode to. A uaté u to jne ujetiga chaguhéta uacabai. Uje yirajatigade déji Salomón irajatigade iquéode, mu que apótayo angáchoi yu gotique.–

Satanás utocaidode ore doi datéringane ome dabíode gaté

⁴³ Jesús chacadápo ore rĩ enga chojninga: –Ujetiga Satanás utocaitique dorási guesi iji dasatique bisideque enga jno enga chucué dabírique cucha uña iji erãpe eyutiguei. Mu que chise. Jecute a chojningárasome re:

⁴⁴ "A yajni yibi bajai gai jne." Diga chise jnani uqué uje dimane ome yui uje que gajnesónique uñeque déji ajei go.

⁴⁵ Jecute uté dorási dajõráringo ore ome uté enga gare ore iji ti iji yijmanuñai enga ore chacapórasaja to rĩ. Mu udore ore suépise bajai uté gai ome dáringane sijnaque. Enga Satanás utocaidode udore ore dorási datéringane ome. A jé isocai u to udore ome jnani sijnángone iji deréjnane unojo.–

Jesús daté, ujnacarode ore tibágui uté

⁴⁶ Jesús cáma chejna dacajnaquéode guesi mu daté, jorane ore di mu ore cháji guesi. Enga ore pota jeta ore catecã́ri Jesús.

⁴⁷ Jecute jnani uñeque chingome Jesús ga chósi tome: –Baté, bajorane ore déji guesi enga qué ore pota ore catecã́ri ua to.–

⁴⁸ Mu Jesús chojningame gojñane atatasṍri: –¿Jé yaté goto a? ¿Yijorane jé gosode rĩ a?–

⁴⁹ Jé u uje Jesús chusẽre dacadigode ore ome ayorébui enga chojninga: –Yaté, yijorane ore u udore ore.–

⁵⁰ Enga Jesús chojningápome ore rĩ: –Udore gosode ujetiga ore dopísi yai Dupade uru quigode enga udore ore u ujetiga yo yiguiosíji ore.–