Matéo 11 - Dupade Uruode

Juan el Bautísta chiroque darógode aja Jesús yui ujetiga ore catecã́ri

¹ Uje Jesús chejna dacajnaquéode udore guesi ome dacadigode ore uje gare ore iji yirídai, enga jé u uje uté jnome guidáyode iji erámi uté enga chacate ore aja daquigode guidáyo jnese.

² Enga Juan chudute Jesús ujnomei to iji dáringai pujurúgai. Jé u uje Juan chiroque dacadigode aja yui.

³ Juan ajéode u ujetiga acadigode ore catecã́ri Jesús ujetiga israélgosode ijnati Crísto jé upúsu, jeoga cáma u enga ore chirodape uñeque yui.

⁴ Uje ore chise Jesús enga ore chingo Juan uruode aja. Enga Jesús chajnai ore enga chojningame ore: –Boyo enga abáchopoi Juan rĩ. Enga angoño uacamone yipesute cucha ome to. Jé upo uacadudigode yacajnaquéo to rĩ.

⁵ Angoñome to jne uje yiqueta edoparigode enga ore chimópo dajirigode rĩ. Yiquetápo poritade rĩ enga ore digápo rĩ. Yiquetápo lépra isagode rĩ enga ore uditique que cusapo rĩ. Jé upo angoninguite parigode rĩ uje yiqueta ore enga e ore angoninguinone guesa. Enga jé chopome ayoré togode rĩ, uje yiringarápo ore rĩ enga ore eca. Jé chopo ayoré gajnaréngone ore rĩ uje e ore nína yacajnaquéode.

⁶ Angoñome Juan to ujetiga ca cho caru ome danguretigai. Uje uté gosi a ninapísa re jne ujetiga ca anguretigai doi jnumi ome yu.–

⁷ Uje Juan utocaidode ore jnoji ore gari enga jĩraque Jesús cho quique Juan adode ome ayorébui enga catecã́ri ore enga chojninga: –¿Ja uacacuei u gosi iji erãpetarei nanique a? ¿Ja ayoré gajnareque a nanique uje gajnui u jnacaraque bisidétique uje emi chubúchu aja quedéjnane?

⁸ Ujetiga ca ũré udore enga ¿ja ca uacacuetique ayoré dacasuté a ujetiga ca suseque re? Que uacacuei tu gotique. Uje uacarajáyo gu uje ayoré atade que ore charidi u erã́petarétique go. Mu ore charidode u eduguéjna cuchábode ore iguíjnane.

⁹ ¿Ja ca ũré yu a uje uacacuei tu Dupade uruode atatasónique nanique uje uaqueso erãpetarei? Jé ũrepise yu arĩa. Mu uacacuei tuté úringai uñai cuse uje suépise dáringai Dupade uruode atatasõre.

¹⁰ Juan jé upúsu Dupade ojningai datocaite ome dajnacari diringai yui uje jnani bajade ore urusarane quigode jé upúsu uje chojninga: A yiroque yutocaite gatérigaja baquei jne ujetiga dimane ore atígo ome baríringai yui jne.

¹¹ Jé ũré yu uje que yimo jnanírique iji jnani bajade jec aja diríe jogonórone rĩ ujetiga sué Juan gai, uté uje tṍra ore aja yodi nanique. Mu ujetiga Dupade e chimate darásapísode aja re jne enga a ayoré gajnareque udore uñeque mu a jé uté gosi suépise Juan gai jne.

¹² Ayorébuode ore jnusi rágome ñane nanique uje Juan chacate ore iji taningai ujetiga ore chacája Dupade gari ujeta cho darása iji ore to. Enga jé ate jec aja deréjnane unojo uje jnani dicaséode ore chejna rángaja ujeta ore chise dáringáringo Dupade urása.

¹³ Uacamóño uje Moisés, ujode Dupade uruode atatasórone uñane, jé ore atatai chojmára nanique. Enga ore chijáro iji jnumi uje deréjnarique déji yoquiquénique uje Dupade chijna dáringai eduguéjna cuchape aja ore jne iji jnumi. Ore atatai udojo quigade u uje Juan di enga chatata Dupade uruode to.

¹⁴ Ujetiga apótayo anguretáyo yu enga a yingo Juan úringai gosi aja uaque. Uje uté jé u ore atatai Dupade uruode atatasõre Elías uje a di jne.

¹⁵ Amíningachó yuruode unojo eti uacangoninguitígo guesa.–

¹⁶ Enga Jesús chojningame ore: –¿Ma yacãrájarique cucha aja Juan uyoque yoquetesórone ore iji dirode udojo a? Udore ore gajnúone u disabode uje ore chácariji dajñaminone jogadi, ga ore chugu uje ore chetaque ñane ajéode ome dajñamitique. Ga ore chinguíra dabijnanone aja dajorane, ga ore chósi te:

¹⁷ "Yipéco música ga yubúchugo orubuchugode fláuta jeta beyoi báile, mu que beyoi gotique; Quigade enga yicoi yoquiradedie, pujnusiétigade gajnei, uje chijõrorase ore, mu que abóyo gotique to."

¹⁸ Enga erámi jogosórone uacasocai jé cho disiode isocai uté iji dirode unojo, uje jĩraque ore chetaque ñane. Yiraja uje uacadojnóchoja Juan el Bautísta uté uje garãte uágaja yodi nanique. Uje que tagu cucha ueratique nanique. Enga que chójiapo yote pioi nanique rĩ. Mu ome uaque ga chiese Satanás utocaitique chijocase uté nanique.

¹⁹ Enga jé uacasocai tu ome yu to uje uacabóyoja yu uje Dupade utocaite yu mu. Uje chiese acharánecojna yu ome uaque. Chiese yátapo yu aja jnani sijnángone ore to rĩ iji ore atigade gáyode, jé aja eduguéjna cuchábode ore irótigo rĩ uje uaquetácho ore. Enga chiese yójiapo ore jódode yote piocho rĩ. Mu a pijoque áyipieranguipísiji yoque jne gu yoquipesudode cucha.

Jesús chatata uje a pujuya Corazín, Betsáida idaisórone ore jne

²⁰ Jé u uje Jesús chigota tijode ome guidáyode jogonórone uje ore chimo ipesútedaté uásejnane, mu que ore tangári go uje chaquĩ́ra ore ome ore adode. Enga chojningame ore:

²¹ –¡Jé bioque ji! Ujetiga Tíro, Sidón idaisórone ore chimo yipesútedatéode unojo to nanique, enga a ca toguírasome ore ujetiga ore cho uaque. Enga a ore chécãrirase datígo to. Uje a ore chorase dáyugu cutejmane dapesute gajnarécho unojo. Mu corazíngosode uaque, jeoga betsáidagosode uaque, uacapáñañoji yipesútedatéode unojo, mu que ecãcho uacatique go. Jecute iyieja jóroque Dupade ujuyaquei yui jne ome uaque.

²² Mu a chise dínique jne ujetiga uacajnetique Dupade ujuyaqué chise uaque enga a sué Tíro, Sidón idaisórone ore gajnei Dupade ujuyaqué gai jne.

²³ A capernaúmgosode uaque, uacajoso ati uacaqui tu gaté jne. Mu que uacaqui u go. Uacaqui tu jnaropié. ¡Jé bioque ji! Ujetiga sodómagosode chimo yipesútedatéode uje yipésu iji uacajade, enga a jĩraque ore chécãrirase dadode nanique enga a qué ore idai jogadírase iji dirode unojo to.

²⁴ Mu a chise dínique jne ujetiga uacajnetique Dupade ujuyaqué chise uaque. Enga a sué sodómagosode ore gajnei gai jne.–

Jesús chojninga: –Eyuque uaque enga ayóyo iji yi.–

²⁵ Enga Jesús e catecã́ri Dupade enga chojninga: –Yapá, yisípise babai uje bajnué gaté unirisórone ore gai jnese gu. Enga jé cho jnutiminórone ore, uje bajnué ore gáyode to. Yisípise babai to uje bapógu badode ome dicotárechoquíode, irajatade ore. Mu que apógu ua ome udore ore gotique uje qué garósi ore irajatigade.

²⁶ Yapá, ueradei báyipiedie udire.–

²⁷ Jesús cha catecã́ri dayé Dupade enga chojninga: –Yai tẽra cuchade ome yu jnese. Enga gusu Yai uje chiraja dajnacari uyu. Que ayorérique chirajapise yu to go. Que pirajagápo Yai to rĩ. Gusu yu uje yirajapise. Gusuapo yu rĩ uje a yingo Yai aja yipotigátigo ore jne.–

²⁸ Diga Jesús chojninga: –Ujetiga uacasagode chujé uaque, enga uacáyugabátigade chajópo uágaja ñane jne rĩ, enga anguinécho yi. Abáchoi yu enga jé u jne ujetiga oyo uacajñare iji yari.

²⁹ A tijode cho jnángome uaque jne ujetiga beyoi yiroquéode. Uje paraguipise yu ome uaque enga a yinejé uacádode jne. Que yigaidi u go ujetiga gusu uágome uacasagode cucha ome yu. Uje a yáta uacasatígo cucha aja uaque jne. Enga a yocajnui u buéyode jne uje pigaricho aja ñane.

³⁰ Enga a ca yirajágo yoquetabi isangurui jogosṍri pite imenuringuéone jne ome ñane. A ca yirajagópo yocujnutique cucha imenuringuérique jne rĩ.–