Matéo 10 - Dupade Uruode

Jesús chamáta darógode apóstoles ore aja ñane uje gare ore iji yirídai

¹ Jé u uje Jesús tibidi dacadigode ore uje gare ore iji yirídai. Enga chĩ́care darógode 'apóstoles' aja ore. Enga tẽra dajopié ome ore ujetiga ore chijócãre Satanás utocaidode iji ore píode. Jé aja ujetiga ore chiqueta dequejnareque ponáyone, pute dosógode ore to rĩ.

² Jesús acadigode udore ore íode u unojo uje gare ore iji yirídai: Simón u uñai uje i uñai tu Pédro; jé basa ga Andrés u uñai uje Simón desaque. Jeque uñane ore íode u Jacóbo, Juan uje ore dai tu Zebedéo.

³ Jeque acadique uñane ore íode u Felipe, Bartolomé, Tomás. Matéo upo uñai rĩ uje utaite ore ome ore iplátadie ome dasutedie nanique. Jacóbo u uñai uje dai tu Alféo. Lebéo u uñai uje i uñai tu Tadéo.

⁴ Simón upo uñai rĩ uje pota chijnime ore eduguéjnai ducurása quedéjna nanique iji ore uniri. Jeque Júdas u uñai uje i uñai tu Iscariote. Uté u uje guẽrate Jesús ome guetesórone nanique.

Jesús chiroque dacadigode ujetiga ore jno Dupade uruode údi aja quedéjnane

⁵ Jesús chiroque dacadigode ore aja quedéjnane nanique uje gare ore iji yirídai. Enga cho ore quique enga chojninga: –Ca abáchoi purása quedéjnaringo to jne, jé aja Samária jogonórone ore.

⁶ Mu acáputayoji israélgosode ore jne. Chamáñaje ore gajnunie u áyasa dodie.

⁷ Acacho ore ome Dupade adode enga angoñome ore uje e idógosi ujetiga Dupade chijna dáringa dacasuté cuchabe aja jnumi uné.

⁸ Aquetáyo ejnaretade ore to jnese jne, jé aja lépra isatígo to rĩ. Aringachopo totígo ore jne rĩ. Ajnichópo Satanás utocaidode ore iji ore pírigo jne rĩ. Enga jé ca atáyoi ore ome uacaquetatígo orérigui jne. Uacamóño uje bisideque yujopié ome uaque uje yẽrame uaque.

⁹ Boyo jne enga jé ca ajnócho uacaplátarigui jne.

¹⁰ Ca ajnóchopo uacagúchade pírigo jne rĩ iji dajei. Jé gusu uacamamitodie jne iji uacabai. Adi jé u uacachiédode. Jé ca ajnáñopo uacoguéraque jne rĩ. Uacamóño uje gosi uje doi Dupade iroquéode enga gajnei u ujetiga posõraque uté gosi.

¹¹ Ujetiga eso idáidatérigo, acoráserigui ore enga jĩraque acueyoi uacanguretique jnani jne ujetiga ayáyoji uté gosi iguíjnarique, jé aja ujetiga boyopo rĩ.

¹² Uje acáyoja ore iguíjnarique enga ojnichome uté jne: "A Dupade chatapísaja uaque jne ujetiga tijode cho jnángome uaque."

¹³ Ujetiga ca ore suseque uaque enga a jé u baruode ome ore jne. Jé basa ujetiga ca ore chajire uaquéode enga a ca Dupade chátaja ore jne.

¹⁴ Mu ujetiga uaqueyatique guidai jogonónique ca dejéna uágaja daguíjnarique enga jĩraque boyóji jne. Boyóji idai uté jne enga ajninguéso jnumi isapídode iji uacarídade. (Chamáñaje judíode jé yoquisocabeque gu. Enga imoi tu uje yetajopise cucha dacadode iji.)

¹⁵ Ũré yuruode ome uaque uje Dupade a chajire cuchade aja quigode jnese jne enga a pujuya guidai uté jne enga a suépise sodómagosode, gomórragosode ore gajnei pujuyaqué gai jne.–

Jesús chingo ore uje a pumajo ore jne

¹⁶ Jesús chojningápome ore rĩ: –Boyo mu ajusópise uaqueo iji erámi jne uje a uásejna erámi unirisórone ore jne ujetiga ore pota sué uacabai ome uacáringáringo chucho. Uje a uacajnunie u áyasadie jne iji cuchiso chagúrigo ajénique. Uacarajáyo uje ugade edodie chojmára ome dejode. Jecute omi tu to ujetiga oyo ugade edodie to ome uaquejode. Oyópo cucujudaijnane to rĩ, uje pajnotácho enga que tagu dejórique go.

¹⁷ Uacamóño uje a ore tẽra uaque jne ome pasutedie enga a ore chaquesu uacádode jne iji judíode ore aquiningaméone. Jecute ajusópise uaqueo gaté.

¹⁸ Enga a ore chijnapo uágaja deduguéjna cuchábode ore iquéode to jne rĩ uje ore chetaque uacáringáringo yanguresóño. Piotiguei a u jne ujetiga angoño yuruode ome eduguéjnane udore ore to, jé aja purása quedéjnane to rĩ.

¹⁹ Mu ujetiga ore jno uacádi aja dasutedie jne enga jé ca apemérañoji uacaru quitique ejórigo jne iji ore angaránone iquéode. Uacamóño uje a Dupade u ujetiga chisi ome uacarúrigo ome uaque ome eduguéjnane ore.

²⁰ Ujetiga e agúsoi uacáringane dara gánique jne enga Dupade a tẽra Dajopié Espíritu Sánto ome uaque jne ujetiga arajáyo uacaru quitígo ome ore.

²¹ Diga jnanione a ore tẽrápo dajõrápisirigo jne rĩ ujetiga chuque ore ome ore úringane Dupade anguresõre. Jé basa enga uñéngo a tẽra datígo to jne. Mu adi jé u uje jnacáningo a ore chajni dayode gai to jne. Enga a ore chujé ore jne.

²² A chisápo dínique to jne rĩ ujetiga erámi unirisórone ore chetaguipise uaque to iji erámi údode. Mu a uacabade jé u yadode jne uje uacatatayo. Ujetiga adotáyopise uáguiji uacanguretigai enga a eso uacáringane piquetacho jne iji deréjna pitade.

²³ Ujetiga ducañerájma uágome ore jne iji ore idánique uñeque marínga, jé atatayo yuruode aja uacajesúrigo guidai uña jne. Uacamóño uje a cáma eso israélgosode ore idáyode jnese ome yuruode, mu a jé u jne ujetiga óraño uágome Dupade utocaidi uyu jne ujetiga yise uaque.

²⁴ Uyu u mu, jé que ore chise yunétique, a ca iyieque yacadigode uaque jne ome ore atígo. Uacarajáyo uje que pisoca ujetiga dacatique omome ayoré gajnarétique, jé basa ca posõraque dacasutéraque.

²⁵ Ujetiga piroque uaque enga a uacáringai ducañerájma jé cho uaqueduguéjnai úringai ducañerájma jne. Jé basa ujetiga pacadique uaque enga a jé ca apíchome uacacadisṍri gajnei pujuyaqué to jne. Uacamóño uje ore cho Satanás iji yu. Mu a ore doi datéringai ome uaque jne.

Jesús chacate ore ome cuchade uje tiógara pitócho

²⁶ Enga Jesús chojningápome dacadigode ore rĩ: –Ca atodóyo uacojórique ayoré. Uje a ca ayorérique déji jne ujetiga pógu datique enga ca pirajaque iji quigade. Isocai jé upo rĩ uje dara pipoguiétique que cuse ujetiga noñaji siñeque enga ca pududique.

²⁷ Gajnui u ujetiga yugúcoi ñane gari iji dejai ome yatatagode cucha udore. Mu a chise deréjnai jne ujetiga agúsoi dírecaringuéi. Enga jogadi u jne ujetiga atatayo yatatagode udore ome ore jnese. Uacajnéone unojo yacajnaquéode mu gusu ome uaque iji deréjnai uné. Mu quigade enga atatayo ome ore enga chubu erámi.–

²⁸ Jesús chojningápome ore rĩ: –Ca atodóyo ayoréode uje ore yugode u yocúringane unojo ayorepíso. Chamáñaje que toque ujetiga udore ore chijocasipise yocáyipiedie gotique. Mu uacatódi upusurásu Dupade. Uje que gusu ujetiga ajéraso enga uñeque toi, mu ajepóraso enga chiroguirase uñéngaja gajño pioi.–

²⁹ Jesús chojningápome dacadigode ore rĩ: –Garósi chungúperenie oredie. Mu Dupade que suseque ore gotique. Enga que toque ujetiga chugué uñáraque ujetiga ca ajéo.

^30-31 Jecute ca atodóyo go. Uje uacajnuéño chungúperenie gai ome Dupade. Enga que suseque uaque to. Jé chuságaja batererodie uje Dupade isecarané jnese. Mu que gusu batererodie uje chiraja, chirajápo badode to jnese rĩ.

Jesús chingongara danguresórone aja dayé Dupade

³² A yise yai Dupade idai dirome enga a yingongara ore aja yai Dupade jne. Uje que ore chise yunerotiguérique iji erámi uné, enga ore chingongara yu aja darasade.

³³ Jeque udore ore uje ore chotigase yu iji erámi uné, jé basa a jé yotigase ore to dirome iji Yai iquei iji gaté.

Gosi changureta Jesús enga jé u uje jogasui chetaque

³⁴ A ajoso eti anguretáyorase yu enga tijode chorase jnángome uáguiji uacojode ayoréo ujade. Mu cachi uacajéo. Ujeta anguretáyo yu jne enga jogadi u jne ujetiga oyo jmíti, jmíti ome udore ore jne.

³⁵ Isocai a u jne gu ujetiga jnacánique chetaque danique úringárique yanguresõre. Jeoga gapúraque chetaque datéraque úringáraque yangureto. Jeoga picaríraque chetaque dejóraque ome úringáraque yangureto.

³⁶ Qui a u jne ujetiga ore jogasu dajogasui marínga, jé ore chetaque ore jne ome ore anguretigade iji yu.–

³⁷ Ga Jesús chojningápome ore rĩ: –Ujetiga uñeque ijnoraquei tadipise ome danique, datéraque ore, enga sué uñeque ijnoraquei gai ome yu, a ca uté gosi tiógara jne ujetiga yanguresõre. Jeoga uñeque ijnoraquérique cho dabai ome dataque, datique ore, jeque ca urénga chijnóra yu, a ca tiógara úringárique yanguresõre jne.

³⁸ Jé adi tu ujetiga ca uñeque chóji gaté ujetiga cho daba yu enga a ca togome uté gosi jne ujetiga chise dáringárique yanguresõre.

³⁹ Jecute gosi ujetiga pota chapídome dáringárique pujuya ome yu, ujetiga ca cho daba yu, enga a chachia re jne. Jeque gosi ujetiga timiningara dacuecaringuei ome yu, a chise dacuecaringué gatérique jne rĩ.–

Dupade a tẽrája yoque jne ome yocosõraquéode

⁴⁰ Enga Jesús chojningápome dacadigode rĩ: –Gosi ujetiga chimesẽre uaque enga imeserãi jé u yu to. Adi upo rĩ uje yimeserangórone ore imeserãi jé u yutocaisṍri Dupade to.

⁴¹ A uacuñeque chijna Dupade uruode atatasónique aja daguíjnarique enga gajnui tu ujetiga chijnorapise Dupade to. Enga Dupade guẽratique ome uté gosi a jé u Dupade uruode atatasṍri gajnetique to jne. Isocai jé u to ome ayorérique jeta chijna dojórique ayoré ate ujñapetaque aja daguíjnarique. A jé ore gajnetique cucha chojmára jnese jne ujetiga Dupade tẽrája ore.

⁴² Ujetiga uacuñeque chimo yanguresónique ujetiga uyátique chujé enga uaque gosi chaningare ome yote aréredatéi enga jé ũré yu uje Dupade a tẽrája uaque gosi te jne ome uacadi tuté. Qui tu gu uje uaque gosi chijnóra yu enga jé chijnóra yanguresórone to.