Márcos 8 - Dupade Uruode

Jesús ipesútedaté ejoi u uje chisi ome cucha pibosode ome ayorébui, uje 4.000 u ore

¹ Iji dirode udore ga ayoréburique ore chamátapo ñane aja Jesús ejode rĩ. Mu íjnonguipíse ore posode. Ga Jesús cho dáyugu ore, jecute tibidi dacadigode ore.

² Enga chojningame ore: –Yosõripise ayorébui uje e ore guejnane dire gadioque iji yocari. Enga a e íjnonguipíse ore potígo.

³ Enga que togome yu ujetiga yiroque ore aja ore iguíjnane. Chamáñaje yiraja uje que ore tagu dabotique gu enga uñéngo a ore chorase sere ome dayaguhéode iji dajei. Uje uñane ore iguíjnane idájapise iji yoque.–

⁴ Mu Jesús acadigode chajnai ga ore chósi tome: –¿Jé yocorási ringome ayorébui ore ujetiga yisíngome ore potígo ome? Uje que ayorérique cunguésõri yoquiyaridi udé ujetiga yicórasi arurétigo iji uñeque.–

⁵ Mu Jesús chajnai dacadigode enga chojninga: –¿A ca arurétique déji uacuñeque a?– Mu ore chojninga: –Uñane déji enga gare iji ti yijmanuñai.–

⁶ Jecute Jesús chingome ayorébui ore ujetiga ore chácariji jnumi. Ga jé u uje chisa arureque gare iji tíode. Ga catecã́ri Dupade ujetiga chacãre gai. Ga jé jogadi u uje chajugája jnumi. Ga chisi ome dacadigode ujetiga ore chajuguína ayorébui ore jnese. Enga jĩrique acadigode ore doi Jesús uruode.

⁷ Mu jé isocai tu ome oyítigo uje déji mu garósi. Ga doi ga catecã́ri Dupade bajaque. Ga jé u uje chisi ome dacadigode ujetiga ore chajuguína ayorébui ore to.

⁸ Jecute ayorébui ore tagu ga ore chĩreta dacadie jnese. Mu uje ore cha ga Jesús acadigode ore chamáta ore iquebéode iji. Ga ore ĩretadie gare iji ti yijmanuñai iji ore oradie ijnacojoi.

⁹ Enga arurégode udore gunorone ore déji 4.000. Udojo quigade enga Jesús chiroque ore aja doi ujetiga ore chajniápo aja daguíjnane rĩ.

¹⁰ Uje Jesús chejna ayorébui ore aja doi ga jé u uje nóna dacadigode ore aja cucoi ajei. Uje ore qui tu ore uniri uje i tu Dalmanúta.

Fariséode ore pota jeta ore chimo Jesús ipesútedatérigo to

¹¹ Enga fariséode uñéngo ore yore Jesús gai uje qué ore botare. Uje ore ajegaidi tu ujetiga Jesús chetingarape re ome ore, enga pésabu dapesútedatérique ome ore ujetiga tõramíji gaté ome ore. Uje ore ipotigádi u ujetiga ore chimópise ome dedodie ga jé urásu ujetiga chiese ore changuretarase uté to.

¹² Mu jogadi jé u uje Jesús chijnime dajñari ga chejnápise daguesi ome udore ore. Enga chojninga: –Gajnarenguipise uje que panguretigárique déji ayoré disi ejode udore ajénique. Mu ore ucuegode u yipesútedatérigo ome ore ujetiga ore chimópise. Jé ũrepise yu ome yuruode udojo: uje a ca pujuegate pipesútedatérique ome udore gotique ujetiga ore chimope.–

¹³ Enga jé u uje Jesús noñome fariséode ore iji te jmete. Ga Jesús ore chacája cucoi ujetiga ore chicáji yote quedéjnai uéchamitó uña.

Jesús chopise quique dacadigode ujetiga ore susípise deo ome fariséode ore jmapiedie

¹⁴ Mu Jesús jorane ore chicadígui ujetiga ore chijnoque dabotígo aja daqui uté. Gusu ore jnutique arurétique chojmára iji cucoi ajei.

¹⁵ Enga Jesús catecã́ri dacadigode ujetiga cho ore quique. Enga chojninga: –Angachopísi yu jne enga ca ajocáso arurégode bisidi jne uje fariséode, Heródes ore angúromei u uté.–

¹⁶ Jecute Jesús acadigode catecã́ri ñane enga ore chojninga: –A Jesús aníri u gu uje yicadíjoi arurégode que.–

¹⁷ Mu Jesús e chiraja uje acadigode que ore chibote uru quigode uje chacãra fariséode, Heródes ore jmapié gajnarénguenie aja arurégode bisidode. Jecute chojningame ore: –¿Jé gotique gu a uje que uacáyipieraque jnoji arurégode uje uacacadíchoi que? ¿Gotique gu a uje uaquejnáño deréjnane iji yari múñi cáma abócho yacajnaquéode udore quitique? A ca ajnusináño to uje jecucha yacãra yacajnaquéode aja cuchade múñi. Ísega etoguipise uacáyipiedie jõ.

¹⁸ ¿A ca amóño ome uaquedodie a? ¿Jé ca adúchopo ome uacangoninguinone rĩ a? ¿A ca uacáyipieraque déji yipesútedatéi casodé a?

¹⁹ Uacamóño diríca uje yajuguína arurégode ome ayorébui ore diríca. Uje arurégode chejna yijmanai diríca. Jé basa ga jnanione 5.000 u ore diríca. ¿Mu jé cho rique uacãretárigui iji ore orárigui ijnacojoi diríca iji ore iquebéode udore diríca ya?– Mu acadigode ore chojningame: –Cachi gare iji yirídai diríca arĩ́e.–

²⁰ Enga Jesús qué jno daruode údi ome ore gaté ga chojninga: –Uacamóñopo to diríca rĩ arĩ́e uje yajuguína arurégode ome ayorébuode uñane diríca rĩ. Uje arurégode gare iji ti diríca iji yijmanuñai. Jé basa ga jnanione 4.000 u ore diríca. ¿Jé cho rique uacãretárigui iji ore orárigui ijnacojoi diríca iji ore iquebéode a?– Enga ore chojningame: –Cachi gare iji ti yijmanuñai diríca arĩ́e.–

²¹ Enga jé u uje Jesús chojningame ore: –A cáma ajnicho yacajnaquéode ãrírique jõ.–

Jesús chiqueta edoparitíguiji ore idai Betsáida uté

²² Mu Jesús chejna udojo guesi iji cucoi ajei ga chise daqui uje ore idai Betsáida u. Mu jĩrique uñane ore chijna jnani edoparitígaja Jesús. Enga ore chijócha Jesús ajei údi ujetiga chiquetape uté.

²³ Jecute Jesús chisa edopari uté jmanai enga jno údi aja ore idai eruei. Mu jé jogadi u uje chutĩ́raja dajmainie ga chajo aja jnani edopari edodie, enga jé u uje chujé dajmainie aja jnani edopari uté gai. Mu Jesús catecã́ri jnani tuté enga chojninga: –¿Ga jé amo cuchárigo a?–

²⁴ Mu edopari chajire dejode ga chojningame Jesús: –Yimo jnanione uje ore dique. Mu ore gajnunie u poridie ome yu.–

²⁵ Jecute Jesús dopoi dasocai tuqué ome rĩ. Uje chujé dajmainie aja edodie gáyode que. Jecute jĩrique edodie cho jnaque ga jĩrique niji ga chimópise cuchade to rĩ.

²⁶ Enga jé u uje Jesús chiroque daquetai jnani edoparique aja iguíjnai. Mu cho quique bajaque enga chojninga: –Jé ca acája idai ujetiga angongara yu aja erámi. Mu bo ga o carúja baguíjnarique jne.–

Jesús pijogúsõri u Pédro uje cho quique ome úringai Crísto, Dupade utocaidipise

²⁷ Uje Jesús chejna udojo guesi ga nóna dacadigode aja ore idai Cesaréa acorásedie uje déji ore uniri Filípo. Enga jé catecã́ri ore iji dajei. Uje chojninga: –¿Ayorébuiso jé ore cho ringome yu que a? ¿Jé uyu gosi ome ore que a?–

²⁸ Jecute Jesús acadigode ore chajnai ga ore chojninga: –Que ore chiraja ua gosi go. Jecute uñane chacãra ua aja Juan ucácasicá uje uté garãte ore aja yodode nanique. Jé basa ga uñane ga ore cho jnani baja cásodicáite Elías iji ua. Mu uñane ga ore chojninga: "A jnani baja cásodicáite Dupade uruode atatasṍri cásodicáite a uña uté."–

²⁹ Mu Jesús catecã́ri ore ome re rĩ enga chojninga: –¿Jé oyo ringome yu to a? ¿Ujetiga uyu gosi to a ome uaque?– Mu Pédro jĩrique chajnai ga chojningame: –Cachi que piraque ua arĩ́e, uje Dupade utocaidi Crísto u ua.–

³⁰ Mu Jesús chaquĩ́ra ore enga chojninga: –Jé ũrepise ua, Pédro á, mu ca angongachoba yu aja erámi jne.–

Jesús pañapísiji dagachodi jecute chingo dacadigode ore

³¹ Jecute Jesús cho dacadigode quique ome dagachodi yui. Enga chojningame ore: –A Dupade utocaidi uyu a yejnárenguipísi jóroque ore josipiérigui jne ome yu. Ga yetésõredatéode upúsu judíode ore angaránone jne, jé aja Moisés uruode atatasórone ore to rĩ, jé aja sacerdóteode ore angaránone ore rĩ. Udojo a ore imanique yu aja jnumi dirome. Mu a chise dire gadiótigo iji yigachodi quigade ga jé u ujetiga yiquecápo rĩ iji yúringárique toque.–

³² Enga Jesús uruode choqui guesode ome acadigode. Jecute Pédro jno Jesús údi aja ore eruénique. Enga chaquĩ́ra ome darai.

³³ Mu Jesús chiguísãre dacadigode ore gai iji daquigade. Enga chojningame Pédro: –Pédro á, ca amere yu iji uje Satanás angúrome ua gu. Uje baruode udore garani u Satanás. Uje boidedie u jnanione ore áyipie gajnarénguenie mu que ajnime Dupade áyipiedie ãrírique go.–

³⁴ Uje chejna daruode udore guesi enga Jesús tibidi ayorébui ore ga jé chatapója dacadigode ore rĩ enga cho ore quique jnese. Enga chojninga: –Ujetiga uacuñeque pota nóna yu to enga uacuñeque jĩrique cha cucha ponáyone unerane ome re. Mu dimane uaque gosi ome gadoi ujetiga cho daba yadode.

³⁵ Mu uaque gosi ujeta chagutu rome yadode ome dáringárique pumajo jne, ga a uté gosi chachia re jne. Mu uté gosi ujetiga tẽra rome datatagode yacho, ga a piquetai tu uté gosi jne.

³⁶ A ca cuchárique tõrapísiji ayorérique ujetiga chimo dajegaidode cucha iji erámi údode jnese, mu quigade enga uté gosi chachia re jne ome Dupade idai.

³⁷ Ujetiga uté gosi chachia re ga e que toque ujetiga qué dopoi oréraque ome dacuecaringuérique rĩ. Ujetiga jiérasi ingomenie ome Dupade múñi, e que chise doréraque gotique.

³⁸ Mu ujetiga gosi chajéngome Dupade utocaidi uyu, jeoga chajéngome yacajnaquéode iji daquitígo erámio iji ayoré ate gajnaréngone ore ujade enga a jé yijna uté gosi jmapié ome jne. Enga a yajéngome uté gosi to jne iji yiríringárique, ujetiga obiréjna Yapade ingoningájnai iji yu ujetiga Yapade irógode gateminóño ore cháta rágaja yu to jne aja de jnumi.–