Márcos 7 - Dupade Uruode

Páyipie gajnarénguenie u uje ipesute ayoréode yoquiyoñaringuéone

¹ Udojo quigade ga fariséode uñéngo díji Jesús, jé aja Moisés urusarane atatasóningo uñéngo to. Uje ore garani tu ore idáidatéi Jerusalén.

² Mu udore ore poja Jesús acadigode uje ore chimo uje ore tagu dabosode mu que ore doi judíode ore jmapié gotique ujetiga ore churu dajmainie bajaque. Jecute ore chopise ore iyoguei iji.

³ Uje fariséode qué ore oidé u ore dayode jnani bajaque ore jmapié. Uje a ca ore chimoque ujetiga ore churu dajmainie ga jiépisi enga quene jogadi u ujetiga quene ore taque.

⁴ Uje ore doi cuchade iji oredie iguíjnane jogadode enga ore chajni aja daguíjnane ga que ore chijna re iji gotique mu jĩrique ore oidé u ore dayode jmapié. Enga ore churu dajmainie, dagaidode cucha gatuaque enga quene jogadi u uje ore tagu dabosode. Mu que gusu ore jmainie gotique mu jé ore chuságaja dagapíode cucha ore jnese, damochápiode ore to rĩ uje ore churu gáyode.

⁵ Jecute fariséode, jé aja Moisés uruode atatasórone ore catecã́ri Jesús enga ore chojninga: –¿Gotique gu a uje que bacadigode ore chijna yocayode jnani bajaque ore jmapiedie to a, ujetiga ore taque ga ore churupise dajmainie gatuaque to a?–

⁶ Mu Jesús chajnai ore arecujaidie ga chósi tome ore: –Jé ũrepise jnani bajai Isaías, Dupade uruode atatasṍri, ome darusarane quigode nanique. Enga ojningane u uaque uje arapatáquechoquí uaque. Uje Isaías churúsãre Dupade uruode nanique uje Dupade chojninga: "Ayoréode udojo que iyieque ore icotaquéode ome yu. Mu cachi garãte ore pijnanone. Uje idájapise ore áyipiedie iji yu.

⁷ Enga que cuchárique tõrapísiji ore icotaquéode ome yu. Chamáñaje ore chedu dojode ayoré ore acajnaquéode gu. Jecute que ore jmapiedie udire garani uyu gotique."–

⁸ Enga jé u uje Jesús chiboráta ore uruode enga chojningame udore ore: –Que piraque uaque uje uacayáyo Dupade ojningane cucha. Mu qué uacaboyo yocayode jnani bajaque ore jmapiedie údi uje uacarúyo cucha pagapíode gáyode jnese. Enga qué uacaboyo ore jmapiedie uñanie ore jnese údi to rĩ. Mu uacoyo uaquedobóya Dupade uruode.–

⁹ Enga Jesús chojningápome ore rĩ: –Yiraja uaque uje qué uacaboyo jnani bajade ore josipiedie údi. Mu uacoyo uaquedobóya Dupade uruode.

¹⁰ Uje jnani bajai Moisés cho quique Dupade urúrigo ome ore to nanique uje chojninga: "Añuchopúsu uacayode, uacatedie ore guio." Mu chojningápo rĩ: "Mu gosi ujetiga cho darúja danique jeoga datéraque ga beyoi uté gosi ga ajéyo ga eruénique jne."

¹¹ Mu uhuaque, uacojnichome uacayode jeoga uacatedie ore: "E que yátapo cuchárigaja uaque rĩ gu uje e yẽrapáicho yugúchade jnese ome Dupade."

¹² Enga chiese e que uacajnecho uacagúchade gotique uje e uaquẽrapáicho ome Dupade. Enga isocai tu uté ujetiga e que ajicho uacayode yúrique ome uacagúchade udore.

¹³ Que gusu uté mu uacapéso cucha ponáyone uñane to rĩ uje jé chopise udore. Jecute uacoyo cucha bisidégome Dupade uru quigode. Mu uacabeyoi jnani bajade ore acajnaquéode. Uje que pacajnaquéode udore garani u Dupade gotique, mu jiei garanone ome uaque. Uje garanone jé u ayoréode uaque iji de jnumi.–

¹⁴ Jesús e tibidápoi ayorébui ore to rĩ ga chacadápo ore rĩ. Enga chojninga: –Ujetiga uacuñéngo angoninguitígo guesa enga a uaque u ujetiga arajáyo yacajnaquéode quigode gajneri.

¹⁵ Cucha pibotique ujetiga ayorérique tagu ga a ca pésu uté gosi iyoguérique gotique. Jé basa páyipie gajnarénguenie uje tṍraji uté gosi ajei ga udire u uje pésu uté gosi iyoñaringuei.

¹⁶ Ujetiga arajáyo yacajnaquéode udojo quigode ga beyoi ga ajnáño to.–

¹⁷ Mu uje Jesús chejna daruode udore guesi ome ayorébui enga ore chicáji daquigode. Mu jé basa ga Jesús acadigode ore nóna Jesús aja guiguíjnai ajei. Ga ore chojningame Jesús: –Yocacadisṍri á, ope bacajnaqueiso quigome yoque.–

¹⁸ Jecute Jesús chajnai ore enga chojninga: –Yo yáyugu uje uacoyo ayorébui uje que arajáyo yacajnaquéode quitique to go. Mu qui tu uje cucha pibotique ujetiga yajo que toc ujetiga pésu yoquiyoñaringuérique.

¹⁹ Que cho ujetiga cucha pibotique chacája yocuñeque áyipieraque go. Gusu uje chacája yoquica, mu jĩrique jno ga yuchígoja. Jecute que toc ujetiga cucha pibotique pésu yoquiyoñaringuérique gotique.– Jesús uru quicho udojo gu uje cucha pibosode ueracho jnese.

²⁰ Enga Jesús chojningápo rĩ: –Mu jé basa ga cuchade uje tṍraji ayorérigo áyipiedie ga udore u uje pésu ore iyoñaringuéone.

²¹ Yirajágo uje jnanione ore ate gajnaréngone garanone u ore áyipie gajnarénguenie. Yojningane u isagocade, ipotinguerenie ore. Jé aja udore ore uje que ore áyipie jnoji dojórique ayoré ome úringárique chuque.

²² Jé aja ayoré oriechoquíode rĩ. Jé aja udore ore uje ore ipotiguéode déji ome cucha quedéjnane. Jé aja páyipie gajnarénguenie ipesungórone ore. Jé aja aringácachoquíode ore rĩ. Jé aja udore ore uje que ore chañurupúsu deo gotique. Jé aja udore ore uje ore charatáyime cuchade ome dojode ayoréo. Jé aja dacate ijnimisórone ore, jé aja udore ore uje dicotárechoquípise ore. Jé aja udore uje que ore áyipieraque cus.

²³ Udore ore jnese ore ate gajnaréngone suéji ore áyipiedie enga uje tocade ga jé u uje pésu ore iyoñaringuéone.–

Jesús chiqueta chequé purása quedéjna abia

²⁴ Mu uje Jesús chejna dacajnaquéode guesi iji uté ga jé u uje chicáji ore idáyode Tíro, Sidón yúode. Enga Jesús pusi jnanírique iguíjnarique iji uté. Mu Jesús ajéode u ujetiga ca uñeque chiraja uté jogatique. Mu que toc ujetiga pógu re uje ujnomei chubu erámi údode jnese gu.

²⁵ Enga jĩrique chequéraque chudute Jesús ujnomei to. Jecute tibágui Jesús gu ome dataque uje Satanás utocaidode uñeque déji uaté ajei. Ga chichaga dagataidie aja jnumi tiji iquei.

²⁶ Mu jé ca Jesús urása judéa chequé uaté to go. Mu unejangue enga uniri i tu Síria, enga uaté idai i tu Fenícia. Mu jé u uje chutai Jesús ujetiga chiquetape ababía iji Satanás utocaidode jmainie.

²⁷ Mu Jesús chojningame chequé: –Baraja uje yocabode gajneque cucha pibosode udore ujetiga ore taque bajaque. Enga que pisoca go ujetiga poite cucha pibotíguiji disírique gari ga pisi ome tamocórique.–

²⁸ Mu qué chequé uaté chajo raja daruode ga chojningame: –Jesús á, jé ũrepise ua ome baruode. ¿Mu jé ũré yu a? uje bojningane udore tamoco ore gajnenie u disi chagúrique abejnanie iji agapiéraque útique. Jecute qué yijócha bajei údi ujetiga bebi yutoquei ga aquetásiape yababía suaqué.–

²⁹ Jecute Jesús chajnai enga chojningame: –Que potigáya ua ome banguretarétigai ome yu. Jecute e yijnime Satanás utocaidi iji babia uaté údode que. Bo ga ajni to jne aja babia.–

³⁰ Jecute chequé chajníja daguíjnai. Mu jĩrique chimo dabia uje cho paráguiji damochápi. Enga Satanás utocaidi e jnoji. Jecute chisápo dáringa disi ijõre rĩ.

Jesús chiqueta jnani uje cuchade péro gai; uru tarataque mu angoronéparigápo rĩ

³¹ Udojo quigade ga Jesús jnoji ore idai Tíro yúode. Enga chicáji ore idai uje i tu Sidón. Uje chejna Sidón guesi ga jé u uje chicáji Decápolis uje ore idáyode udore chejna yijmanáyone uje ore déji yote quedéjnai edúdi uje i tu Galiléa.

³² Jecute ayoréode iji uté ore di darásai údi iji Jesús. Uje angoronéparíque uté enga uru taratagápo rĩ. Jecute ore chojningame Jesús: –Qué yijóchago bajei údi ujetiga achaba bajmainie aja uté gai ga aquetape jne.–

³³ Jecute Jesús doi jnani angoronéparí ga chijna aja guesi iji ayorébui ajei. Enga na dajmainie aja angoninguinone. Enga jé doi ga chutĩ́raja dajmanai ga jé u uje chajni jnani uté arei.

³⁴ Enga jĩrique Jesús chajire gaté ga jé jogadi u uje chijnime dajñari, ga chojninga: –¡Efáta!– Uje urui qui tu gu ujetiga angoninguinone chuchẽre dabáyode.

³⁵ Jecute jĩrique jnani uté chudute darade. Enga chijocásapo darei te rĩ uje narare ga ueradipíso uruode jnese.

³⁶ Mu Jesús cho ore quique ujetiga ca ore chingongarámaja erámi. Mu jé ca ore doi uruode gotique. Uje ore tujua gaté iquetai tuté jnani.

³⁷ Jecute ayoréode ore jnese tijapísa Jesús ipesútedatéode udore. Uje ore chojningame ñane: –¡Picotaguipise Jesús uje que cucha ibiratique cus ome uté! Uje chuchẽre angoronéparigóde ore angoninguinone gáyode. Enga ore chudúdapo darade to rĩ. Pésapo uru taratágode ore uruode ga uerachópo to rĩ.–