Márcos 6 - Dupade Uruode

Jesús isocade u udojo uje déji ore idai Nazaret

¹ Uje Jesús chejna dapesudode udojo guesi ga chajníja daniri. Enga acadigode ore nóna to.

² Mu Jesús chise judíode ore aquiningamei guiguíjna uje i tu sinagóga iji dire puyátique enga chacate ore iji. Mu ayoré jiéode ore tijapísa uté acajnaquéode quigode. Jecute ore chojningame ñane: –¿Uté irajatígadatéi tṍraji rique ome a? ¿Jé chorási ringome dapesútedatéode udore to rĩ a?

³ Cachi María, José ore ujnacari u uté arĩ́e uje poridie irábesṍre to. Enga Jacóbo, José, Júdas, Simón ore uyai u uté. Ga uté neronie déji udé to yoquidai, ga yocurása udire ore to.– Jecute ore popísaja Jesús uté enga que ore chise acajnaquéode unétique go.

⁴ Mu Jesús chojningame ore: –Yirajágo uje ore edójnari u Dupade uruode atatasónique mu ujetiga tṍraji punire uñeque. Mu jé basa ore urása uté gosi enga que toc ujetiga ore chise acajnaquéode unétique go. Jé isocai tu ome uté jogasúrique to rĩ, uje que ore tangári uté to gotique.–

⁵ Jecute que toc ujetiga Jesús pésu dapesútedatérique iji dedai uté. Uje Jesús aníri tu gu uje ore popísaja. Mu jé chiqueta ayoréode garósiode uje chujé dajmainie aja ore gáyode.

⁶ Enga jé u uje Jesús chopise dáyugu darasade uje que ore changuretapise úringai Dupade utocaite gu. Jecute Jesús chijnime re iji udore ore gari, ga chicáji ore idai uté dosadode ujetiga chacate uñane ore iji.

Jesús chiroque darógode aja ujetiga ore chacate ayoréode iji erámone

⁷ Enga Jesús chamáta dacadigode aja dari uje gare ore iji yirídai ujetiga chajuguína óraja tijode. Enga gare ore aja ñane aja ore quigode ujetiga ore jno Dupade uruode údi. Enga chisi ome dajopié tome ore to ujetiga ore chiqueta Satanás utocaidode pírigo ore to.

⁸ Enga Jesús qué cho quique dacadigode ome ore quigode erámio ga chósi tome ore: –Boyo jne ome uacajesúode erámio mu gusu ujetiga ajnáño uacagutadéraque iji uacajmainie. Ca ajnóchopise uacagúcharique jne rĩ. Jeoga arurécho, jeoga uacapláta.

⁹ Eduyo uacarídade udore ujetiga déji uaque. Jé chopo uacaguidéraque rĩ ujetiga chojmára mu jé eduyo uaté enga ca ajnáño gárerigui.–

¹⁰ Jesús chojningápome ore rĩ: Ujetiga eso uacapusiétique enga ayáyoji uté jé aja uacacoringárique.

¹¹ Ujetiga uaqueyai tuté ore idai idaisórone ca ore chise uacanétique enga jĩrique boyo iji ore idai uté. Mu ajninguéso jnumi isapídode iji uacarídade aja ore gai. Uje judíode jé yoquijmapié u gu uje yetajopise gosi isocárique. Ũrepise yu ome yuruode udojo: ujetiga ayoréode udore ca ore chimesẽre yirógode uaque ga a ca Dupade ujuyaquei chajire re ome ore dirome. Ga a suépise Dupade ujuyaquei casica gai jne ome Sodóma, Gomórra idaisórone ore gáyode jne.–

¹² Jecute uje Jesús chejna daruode udojo guesi ga jé u uje acadigode ore jno. Enga ore chacate ayoréode ujetiga ore chécãre datígo ome Dupade yui.

¹³ Enga ore tṍra Satanás utocaidode aja guesode iji píode ayoré ore to. Enga ore chojnepo aceite rĩ aja ejnaretade ore gáyode rĩ. Ga jé u uje ore chiqueta ore iji ore ejnaréngone to.

Eduguéjna Cuchábi Herodes acoté Herodías ijnimi pocaninga uje chimate Juan el Bautísta aja jnumi

¹⁴ Udojo quigade ga ore eduguéjna cuchábi Heródes chudute Jesús ujnomei to ome úringai pitijabate ome ayorébujnane ore. Jecute Heródes chojningame yui: –Chimo jóroque re ujetiga yi casica Juan ecápo rĩ iji dáringai toque. Uje cachi Jesús uté gotique oidé pujopié péropísiji yi casica ujopié.–

¹⁵ Mu jogadi jé u to uje ayoréode botare ñane ome Jesús. Enga uñane chojninga: –Cachi a Dupade uruode atatasṍri jnani bajai casicaite Elías u uté arĩ́e.– Jé basa uñane ore chojninga: –A ujo cásodicáite Dupade uruode atatasórone uñeque u uté.–

¹⁶ Mu uje Heródes chudute ore uruode udore enga jé u uje chojninga: –A yi casicaite Juan u uté, uje yiroque ore aja ica ga ore chaquesu etabi ica. A jé upúsu uté ga a e ecápo rĩ.–

¹⁷ Juan uté bade u daquĩraquéode ome Heródes uje Heródes pota desai Felipe acoté uje i tu Herodías enga doi enga chijna iji gari. Jecute Heródes chachopise Juan aquĩraquéode enga doi ga chisa Juan ga chigaru, ga suruápo gai rĩ.

¹⁸ Uje jecucha Juan chojningame Heródes: –Gajnarenguipise basocai uje bajnose besai Felipe ga bajna acoté iji gari ga bo bacoté iji uaté.–

¹⁹ Jecute Herodías ajei dotãripísome Juan. Ga ipotigádi upúsu ujetiga chujé jóroque Juan. Mu a jé ca chiraja dasocáringome úringárique chuque.

²⁰ Uje Heródes chãraque Juan ome gu. Uje Juan uté pésu daquiñiringuei ome doidode Dupade urúo, jé upo ome dáringai ayoré ate uome uje que piyaque iyoguérique gu. Jecute Heródes todópisa enga que juéga ujetiga acoté chujé. Heródes jé irasiguipise Juan acajnaquéode udore, mu chajugapo aguté rĩ enga chopise dáyugu re uje tangári.

²¹ Mu e chise piotiguei ome Herodías uaté uje ore pésu dajñamítedatérique uje Heródes batigai dire u nanique. Jecute pésu uraque dabose uneréjnane. Ga chimate ga jé u uje tibidi ore asutedie uje déji gobiérno jnese iji ore uniri Galiléa údode, jé aja jnani atade ore rĩ.

²² Enga jé u uje Herodías uro chacája ore gari to iji ore atigai. Enga que chuseque re. Ga gapua uaté doi ore ajñamini uje chichagu dógorodie iji gatéode iji. Uje ore chirase gapua isocade ga jé u uje Heródes chojningame: –Atai bajegaitique cucha iji yu enga a yisi ome ua jne.–

²³ Jecute Heródes qué chajo raja dacatecãrainé gapu ga chósi tome: –Que cho cuchárique go ome yu ujetiga jiei bataitique cucha orérigui marínga, a jé yisi ome ua gajneri. Jeoga bajegaite yuniri ga yajuguína petígome ua jne.–

²⁴ Mu gapua a ca chiraja dajegaitique cucha. Ga jé u uje qué chingome daté gaté. Ga chojningame daté: –Ité á. Que yiraja yajegaitique iji Heródes jõ.– Mu daté jĩrique chajnai uruode ga chojningame: –Bo ga atai Juan gatoi uje uté garãte ore aja yodode nanique.–

²⁵ Enga jĩrique gapua chayója ore eduguéjna cuchábi yui rĩ ga chojningame: –Yajegaidi u ujetiga aquesu Juan el Bautísta etabi ga ajna gatoi iji pírique ome yu jne. Jé u iji de.–

²⁶ Enga uaté uruode chajuque Heródes aguté. Ga jé u uje chopise dáyugu. Mu ujode eduguéjna ore chudute uje chajo raja daruode ome gapua que. Jecute a jé ca togome ujetiga qué chopo darúrique gai rĩ ome uaté.

²⁷ Jecute Heródes jĩrique chiroque darótigaja Juan ujetiga chaquesu etabi.

²⁸ Enga jé u uje Heródes iroi tibágui Juan iji úringai pujurúgai, enga chaquesu etabi. Ga chijna gatoi iji pírique aja gapua enga chisi ome. Jé basa gapua chisiapome daté rĩ.

²⁹ Mu uje Juan acadigode chudute uté ujnomei to ome úringai chuque ga jĩrique ore doi ga ore jno údi ujetiga ore chijóchame.

Jesús ipesútedatéi u udé uje chajuguína arureque garósiode ome jnanione uje 5.000 u

³⁰ Enga chise deréjnai uje Jesús acadigode ore diapo iji rĩ. Chamáñaje ore chejna Jesús utoquéode gu. Ga jé u uje Jesús irógode apóstoles ore chingome dapesudode cucha ome uté, jé aja ore acajnaquéode quigode rĩ.

³¹ Enga Jesús chojningame dacadigode: –Boyóji te ga oyope uacacajnaquéode uja to. Ga ajínañoma yu aja sañeque ujetiga gusúabu yóguiji enga yocope yocujñare to jne.– Uje Jesús urúo udojo gu uje ayorébui a ca ore cho dajame uje ore tibágui ore gatuaque. Jecute que togome ore ujetiga ore tagu dabotique.

³² Jecute Jesús acadigode ore nóna Jesús ga ore chacája cucórique jnese enga ore chicai sañeque ujetiga gusúabu ore iji.

³³ Mu ayorébui ore chimo Jesús ore iji ore pi cucoi ajei. Jecute ore edójnaringuéo ome Jesús quigade uje ore diguiji yote quedéjnai edúdi. Ga bajaque ayorébui ore aja Jesús qui uté erãpe. Enga udore garanone u ore idáyode jnese.

³⁴ Jecute Jesús ore chise dabatigai mu chimo ayorébui iji dejode enga chosõripise ore. Uje ore gajnunie u áyasarigui ome Jesús uje íjnoque ore irodisónique. Ga jé jogadi u uje Jesús chosõre ore ga chacate ore ome Dupade uruode quique dipeséode.

³⁵ Mu e guedé jno jecute Jesús acadigode ore sose Jesús yui enga ore chojningame: –E guedé jnopise mu que ayorérique udore iguíjnarique cunguésõri yoquiyaridi tudé gotique.

³⁶ Jecute a ca toque cucha pibotique úringárique pigaite jne iji de. Be ga aroque ayoréode udore aja ore quitígo ujetiga ore chucué dabotígo ome raque iji ore iguíjnane acorásedie iji daté.–

³⁷ Jecute Jesús chajnai ore enga chósi tome ore: –Beyoi ga asíñome ore potígo ome ore.– Mu Jesús acadigode ore chojninga: –Cho jetiga 200 denário déji yoque arĩ́e ujetiga yicórasi ayorébui udore ore potígome ore.–

³⁸ Mu Jesús chajnápoi ore rĩ enga chojninga: –Ajicho uaquetígo arurécho amíningo.– Jecute ore jno ga jĩrique ore chucué. Uje ore chise ga ore chojningame Jesús: –Yocangaráni á, arurégode amirone chejna yijmanai. Jé basa oyídode garósi.–

³⁹ Mu uje Jesús chudute ore uruode udore ga chiroque dacadigode ujetiga ore chingome ayoréode gaté enga ore jnese chácariji jnumi iji jnacarai gai iji dáguedaté uásejnanie.

⁴⁰ Jecute acadigode jĩrique ore doi Jesús uruode quigode uje ore chingome ayoréode ore ujetiga ore chamáta raque iji dayaridode ujetiga ore pésu dáguerigui. Jecute ore pésu dayoyade ome dáguedie. Enga uñane uáguedie ore guejnanie 50. Jé basa ga uñane ore guejnanie 100 iji dáguedie.

⁴¹ Jecute Jesús chisa arurégode uje chejna yijmanai. Mu jé u uje chajire gaté bajaque enga chacãre Dupade gai ome. Ga jé u uje chajuque arurégode udore aja jnumi. Enga jé u uje chisi ome dacadigode ore enga chojningame ore: –De do jã. Beyoi ga ajuguínaño ayorébui ore jnese jne.– Enga isocai jé upo udore ome oyite gáreode rĩ.

⁴² Jecute ore tagu arurégode jé aja oyídode rĩ enga ore chĩreta dacadie jnese.

⁴³ Enga ore chejna chagúi guesi enga ore chamáta daquebéode. Ga ore chĩreta doradie ijnacojoi iji daquebéode enga gare iji yirídai ore ĩretadie.

⁴⁴ Enga arurégode, oyídode udore ore gunorone jnanío u 5.000.

Jesús diguiji yodi gai

⁴⁵ Uje Jesús ore chejna udojo guesi ga Jesús chiroque dacadigode aja ore idai uje i tu Betsáida, uje déji yote quedéjnai uéchamitó. Jecute ore pi tu cucoi aja. Mu Jesús qué jnaseque ujetiga catecãrámi ayorébui ore bajaque ujetiga chejna ore aja doi.

⁴⁶ Enga jé u uje chimate ore aja doi jnese ga quigade ga cheru cucarani ga gusúji ujetiga catecãrámi Dupade iji uté ójo.

⁴⁷ Mu e dejágome Jesús acadigode iji yote quedéjnai gatócoro. Mu Jesús qué déji jnumi.

⁴⁸ Enga Jesús chimo dacadigode ore iji yote quedéjnai ajei, uje a ca togome ore ujetiga ore ijocayai cuco cáputaji daquitique uje emi chorei ore iji quedéjnane gu. Mu direjnipe ga Jesús tibágui dacadigode uje diguiji yodi gai aja ore yui. Mu chopise ujetiga carubíji ore dosadi.

⁴⁹ Uje Jesús acadigode ore chimo Jesús uje diguiji yodi gai, mu a ca ore chiraja gotique. Jecute ore cho dicoré iji uté. Enga jé u uje ore chisa dabade iji uté jmainie uje chajuque ore agutedie.

⁵⁰ Uje Jesús acadigode ore chimo Jesús jnese. Jecute chajuguipise ore agutedie jnese rĩ. Jecute jĩrique Jesús catecã́ri ore iji quedéjnai enga chojninga: –Ca uacagutéraque cho jora ome yu jne. Jesús jé upúsu yu gu.–

⁵¹ Enga jĩrique Jesús cheru ore pi cuco to. Ga jé jogadi tu uje úyujna cho parágome ore. Mu que Jesús acadigode chiraja daru quitique ome uté gu ipesudode udore ome ore.

⁵² Ore pañaji Jesús ipesútedatéode ome ore poti casodé arurécho diríca, mu a qué Jesús acadigode udore ore áyipiedie cho quiyíguiyí gu. Jecute Jesús chajuque ore agutedie uje diguiji yodi gai enga pésu emi ujetiga cho parágome ore.

Jesús chiqueta ejnarétatigo iji ore uniri Genesaret

⁵³ Uje ore chijocásapo dabi cuco rĩ ga ore chaquesu yote quedéjnai enga ore chise ore uniri uje i tu Genesaret. Ga ore chigaru dabi cuco iji yote quedéjnai edo gai iji te.

⁵⁴ Uje Jesús ore doi jnumi iji dabi cuco mu jĩrique ayoréode iji te chiraja uje Jesús u.

⁵⁵ Jecute ayoréode udore ore jno enga ore chayo iji darasade yúode ujetiga ore chijna darása ejnaretade aja Jesús. Jecute ore tṍraji dajñarenie ome Jesús uje ore chijnoque darása ejnaretade iji ore mochápiode aja jogadi uté.

⁵⁶ Enga a ca ayorébui chimoque Jesús quitique ome doidode daguiose ejnarétacho iji ore píode ore idáyo. Uje ore chijna darása ejnaretade aja Jesús quigade uje Jesús chise ore idáyode, jé aja acorásedie ore iji ore idáyode dosadode rĩ. Enga ore nejepúsu Jesús údode ujetiga juégabá daguidé eruénique ga ejnaretade ore chisa. Enga ejnaretade udore jnese uje ore chisa Jesús iguidé eruéode ga jogadi u uje chiqueta ore jnese.