Márcos 5 - Dupade Uruode

Jesús chiqueta jnani uje Satanás utocaidode isaque, ga jnani uté uniri u Gadára

¹ Diga Jesús ore chise daqui iji yote quedéjnai uéchamitó ga ore gãrapi u ore uniri uje i tu Gadára.

² Uje Jesús doi jnumi iji cucoi mu jĩrique jnanírique chachai iji garani. Uje Satanás utocaidode ipesute jnani tuté ujuredie. Jecute uté charidode u ducódedie.

³ Satanás pi uté jnani jecucha charidode u ducódedie uje que togome ayorérique ujetiga ayorérique sué uté gai. Uje ore chigaru ome ojnaquérodie mu jĩrique uté chaquesu ojnaquérodie udire iji dádode.

⁴ Uje ore isocabeque múñi uje ore chigaru uté guídade aja ñane, jé aja jmanáyone rĩ. Mu doi derã́todie ojnaquéroi ga jĩrique chayo údi ga daquesu iji údode ga pépitabio iji jmainie. Jecute jnani tuté cháji ore údode.

⁵ Enga que jnani uté cho dariguítigárique uja iji dirode jnese, jé upo iji dejade rĩ. Uje jecucha tibidi dejode gatuaque. Ga isoránenie quigode u cucaranone uje ducódedie jogadode u gu. Jecute que chañurupúsu deo ome cucaranenie uje chaquesu údode gatuaque.

⁶ Uje qué idája jnani, Jesús óriji ñane mu jĩrique uté chayóji Jesús yui. Enga chichaga dagataidie aja jnumi iji Jesús iquei.

⁷ Mu chinguíra dabijnani aja Jesús ga chósi tome: –Yirajapise bãrapi uje Dupade upúsu. Ga Dupade pujnuéngaisṍri ujnacari tu ua. Jecute ¿gotique gu a uje bapota báta ua aja yoque to? Ujetiga Dupade osongaquei déji ua ga ca ope bajuñame yu gaté rĩ.–

⁸ Jnani tuté urúo udore gu uje Jesús e chiroque Satanás utocaidode aja guesi iji jnani tuté uje chojningame: –Satanás utocaidi ua, be guesi ga ajíñome jnani tuté iji te.–

⁹ Mu Jesús chojninga: –¿Jé bérique a?– Mu uté chajnai enga chojninga: –Yi tu Dipeséode. Chamáñaje Satanás utocaidode dipesépise yoque gu iji jnani tudé údode.–

¹⁰ Enga Satanás utocaidode ore chijócha Jesús ajei údi ujetiga ca tṍra ore aja guesode iji ore achamini tuté.

¹¹ Mu yãcoré quedéjnanie idógosi iji ore charidi iji cucarani uté. Uje qué yãcoré quedéjnanie udire taguíji.

¹² Mu Jesús ijnimíso Satanás utocaicho ore chutai Jesús enga ore chojningame: –Be ga ajuéga yãcoré quedéjnanie udire ome yoque ga yacágoja udire ore ajéode.–

¹³ Enga Jesús juégame Satanás utocaidode ujetiga ore chacája yãcoré quedéjnanie. Enga jé u uje ore pésu ũrusodie iji yãcoré quedéjnanie. Enga jĩrique ore quejnapísiji cucarani edógai enga ore tṍra rángaja yote quedéjnai. Enga que toc ujeta qué piqueta udire uñáraque uje idájapise jnumi gu. Enga 2.000 u yãcoré quedéjnanie guejnanie.

¹⁴ Jecute Jesús ipesútedatéode udore chajuque yãcoré quedéjnanie irodisórone agutedie. Enga jé u uje ore jno ga ore chayója dedáidatéi ujetiga ore cho gojñame ore jnese iji, jé aja acorásabidie rĩ. Jecute ayorébui ore tibágui Jesús ore to. Uje ore igaminone gajnengóri u Jesús.

¹⁵ Uje ore chise Jesús ore enga jĩrique ore chimo Jesús iquetai jnani uje chácariji ore ejórique. Uje Satanás utocaidode ipesute edójnaringuéone diríca. Mu e chigui daguidérigui to enga e chajníja dáringai ayoré pórecajna. Enga chajuque ayorébui ore agutedie jnese.

¹⁶ Mu yãcoré quedéjnanie irodisórone ore chingome ayorébui ome Jesús isocade ome daquetai uqué jnani, jé upo isocade rĩ ome yãcoré quedéjnanie uje chijnime Satanás utocaidode iji jnani uté ga nája yãcoré quedéjnanie.

¹⁷ Enga jé u uje ayorébui ore todópisa Jesús tome úringai ujopíerãque to. Ga jogadi u uje ore chijócha ajei údi ujetiga jnoji ore uniri.

¹⁸ Uje Jesús e ore chimate raja dabi cucoi ajei ga Jesús iquetai uqué jnani catecã́ri Jesús ga nejepúsu Jesús údode ujetiga nóna aja tijode.

¹⁹ Mu Jesús chaquĩ́ra daquetai tuqué jnani enga chojninga: –Ácarape to. Ga bo ga ajni aja baguíjnarique. Ga angongaráma ua aja bajogasúrique ore uje yocangaráni Dupade u uje chosõripise ua enga chiqueta ua que.–

²⁰ Mu jĩrique jnani tuté jno enga chingo ore iji ore uniri Decápolis údode jnese uje Jesús chiqueta que iji Satanás ujuyaquéode jmainie. Jecute uté ojñane udore chajuque ore agutedie jnese.

Jesús chiqueta Jáiro abia, jé aja chequé uje diyajmácho ejnaréngone iji

²¹ Mu Jesús chejna udojo guesi ga jé u uje chacapója dabi cucoi rĩ enga chajnésarapo yote quedéjnai uéchamitó uña te rĩ. Mu e dimane ayorébui iji Jesús iquei uje ore chirote yui iji yote quedéjnai edúdi. Jecute Jesús cháji yote quedéjnai edúdi.

²² Mu jnanírique di to uje judíode ore eduguéjna cuchape uté iji ore aquiningaméone. Uje jnani uté i tu Jáiro nanique. Mu chimo Jesús ga jĩrique chichaga dagataidie aja jnumi iji Jesús iquei.

²³ Enga jnani tuté chijócha Jesús ajei údi ga chósi tome: –Jesús á, ajinama yu aja yiguíjnai jne. Uje qué yutṍri ua ujetiga aquetásiape yababía suaqué gajneri. Ujetiga achaba bajmainie aja suaté gai ga ejnarei a jnoji gajneri.–

²⁴ Enga Jesús jĩrique nóna jnani uté to. Mu jé chopo ayoréburique rĩ, uje ore nóna ore to. Jecute ore chapédugu Jesús dosadode iji dajei.

²⁵ Mu chequéraque déji gáguedaté uaté ore gari to. Uje ejnareté ga ejnaréngone u uje iyode tocade gatuaque. Mu diyajmanguipise uaté ejnaréngone uje chisa, uje e sequeredie gare iji yirídai iji yui.

²⁶ Mu chequé uaté ipeya re ome dejnaréngone udore. Jecute tẽra dagúchade ujetiga chicabi jórogui daijnane ga ore pésabu. Mu que toc ujetiga daijnárique chibote uaté ejnaréngone. Uje ejnarei cho dabáyode.

²⁷ Uje chequé tuaté chudute Jesús ujnoméone ome iquetade ayoréo, enga jé u uje chaguitóna Jesús to iji daquei uje chajo raja ayorébui ore ujade aja yui. Enga chisa Jesús iguidé iji quigade.

²⁸ Uje chequé uaté pésu dajéode enga chojninga iji dajei: "A yisarase Jesús gotique iguidéraque gajneri ga a jé chiquetárase yu gajneri jõ."

²⁹ Uje chequé tuaté chisa Jesús iguidé ga jĩrique iyoi cha tamuta que. Uje chequé chuniname mu íjnoque uaté ejnarei uqué. Ga jogadi u uje tijode cho jnángome chequé tuaté.

³⁰ Mu jĩrique Jesús chiraja uje chiqueta dajocayasónique ome dajopié. Jecute chumuchase re enga chajire ayorébui iji daquigade enga chojninga: –¿Uaque gosi chijocase yiguidé que a?–

³¹ Mu Jesús acadigode ore chajnai enga ore chojningame: –Bamo arĩ́e uje ayorébu ga a ca toc ujetiga ca pijocayaque ua uje ore chijocase ua aja tijode jnese. ¿Mu jé barúo udore ome báringárique pijocayaque a?–

³² Mu jé ca Jesús cha dajocayasṍri uté gosi unerai gotique. Jecute chajire dejode gatuaque uje chucué uté gosi.

³³ Mu chequé tuaté chopise dáyugu re uje todópisa Jesús yui. Enga tãrarapise. Mu diga sose Jesús yui enga chichaga dagataidie aja Jesús iquei. Ga jé u uje chingo dejnarei isocade ome enga que pógu datígome go.

³⁴ Ga Jesús chojningame chequé tuaté: –Yababía, jé tiógara uje yiqueta ua que ome banguretigai ome yu. Bo jne mu ca o báyugu ua jne aja baquitique jne.–

³⁵ Mu uje cáma Jesús chejna daruode udore guesi mu ore eduguéjnai Jáiro irótigo ore di. Enga ore chojningame Jáiro: –Babia tuaqué e tosi que. Aya atṍri Jesús jne ga yico ga yajníngo to.–

³⁶ Mu qué Jesús chajo raja Jáiro iguíjnai yui. Enga chojningame Jáiro: –Jáiro á, ca o báyugu ua jne. Mu gusu ujetiga angureta yu.–

³⁷ Mu que Jesús juéga daquigade ome ayorébui ore jnese. Gusu Jesús acadigode Pédro, Jacóbo, Juan ore uje dejéna ore aja daquigade. Enga Juan uté u Jacóbo jõrai.

³⁸ Mu uje Jesús ore chise Jáiro iguíjnai mu ayoréode ore uyacamicho iji uaté ejode uje ore chisa dabade iji ejode.

³⁹ Mu uje Jesús chacája Jáiro iguíjnai enga chojningame ayoréode ore: –¿Gotique gu a uje uacapéso uacachorájnai iji de, uacayacamini rĩ? Uje disabía suaté que cho ujetiga togape mu qué mongape.–

⁴⁰ Uje ayoréode ore chudute Jesús uruode udore ga ore cana gai uje ore poja uté uruode. Enga jogadi jé u uje Jesús chiroque ayoréode udore aja guesi. Jé gusu disabía dayé, daté ore uje juéga daquigade ome ore. Jé aja dacadique gadiógode ore to rĩ. Enga udore ore u uje ore nóna aja disabía jogadi uté.

⁴¹ Jecute Jesús chisa disi togué uaté jmanai ga chojningame: –¡Talíta, cúmi!– uje uruode udore qui tu: 'Disabía, angári yu ga ãriji to jne.'

⁴² Mu jĩrique disabía suaté ucuecaringuei chajnísi gai ga jĩrique chague ga jĩrique digápo rĩ. Mu chajuque ayoréode ore agutedie uje Jesús chiqueta disabía suaté. Enga sequeredie gare iji yirídai iji Jesús iquetábia suaté yui.

⁴³ Mu jĩrique Jesús chiroque disabía daté ore aja ujetiga ore pésu suaté potique. Mu Jesús chopise quique ayoréode ore ujetiga jé ca ore tujua ipesútedatéi ome togué tuaté úringa piqueta.