Márcos 4 - Dupade Uruode

Jesús pésu ejémplo ga chacãra dacajnaquéode aja jnani utácarique

¹ Chise dire uñeque enga Jesús qué chacadápo ayorébui ore gaté rĩ iji yote quedéjnai edúdi. Uje uásejnapise ore uje ore chamáta ñane aja yote quedéjnai edúdi. Jecute Jesús chacája cucoi enga chácariji dayaridi uté ome dacajnaquéode ome ayorébui iji yote quedéjnai edúdi.

² Enga jé u uje Jesús chacate ore ome cuchade enga pésu ejémplo uje chacãra dacajnaquéode aja cucha ponáyone. Jecute chacãra dacajnaquei uñai taja jnani utácarique enga chósi tome ore:

³ –Angachopísabi yacajnaquéode quigode jne. Uje a jnanírique jnome dáringai utáca ujetiga chaca dajonatígo cucha ajñui.

⁴ Mu jnani tuté chaca dajonai iji dejnai mu acadie cucha ajñui uñanie basája dajei. Mu chugúperenie doi ga tagu. Ga que toc ujetiga udire sué.

⁵ Jé basa cucha ajñunie uñanie basája cucaranépitabui. Uje que urénga jnutique déji. Jecute jĩrique udire sué uje erode choqui guesode gu.

⁶ Mu uje guedé ojodie doi udire ga jĩrique beta uje que urénga erode chicáji jnumi gu.

⁷ Jé basa ga cucha ajñunie uñanie suéji ojnatébui ajei. Uje ojnatedie nóna aja gatéode. Jecute que udire chaquesu re go uje ojnatedie suépise gáyode gu.

⁸ Jé basa ga cucha ajñunie uñáringui basája jnumi ueratigai. Jecute jĩrique sué enga ijõrei gatuaque uje quérã. Ijõrei jnani acadie jnese mu chaquesu re ga ore adie cha ñane yui. Uje uñanie adie guejnanie 30 u. Jé basa uñanie adie guejnanie 60 u. Jé basa uñanie guejnanie 100 u.–

⁹ Jesús qué chósi tome ore: –Ujetiga angoninguite guesátigo déji uaque ga angachobi yacajnaquéode udojo quigode ujetiga apótayo arajáyo quitígo to.–

Jesús cho quique doidode dacãrája cucha quigode

¹⁰ Mu uje ayorébui e chejna Jesús acajnaquéode udojo guesi ga ore jno ga ore noñome Jesús iji te. Uje gusu acadigode ore iji gari ga jogadi u uje ore chingome Jesús ome acajnaquéode ucode quitígo.

¹¹ Jecute Jesús doi ga cho dacajnaqueiso quique ome ore. Enga chojninga: –Uacajnei tu ujetiga Dupade chingongara dajmapiedie ome darásarigo uaque jne ujetiga diga oyo uaqueduguéjnapísi iji uté. Mu Dupade jmapiedie udire cho cucha pipoguiédode ome guesíminórone udore ore uje que ore changureta to go.

¹² Yigaidi u gu ujetiga ore chudute yacajnaquéode mu a ca ore chiraja quitique go. Enga yigaidi upo rĩ ujetiga ore chimo yipesútedatéode mu a ca ore chijnime ãrírique ujetiga ore chiraja quitígo. Que yipota gu ujetiga yanguresórojmane ore chapu rágome Dupade yui ujetiga ore chajni uté gai ome ore isijnaringuéone úringáringo pĩrocho to.–

Jesús cho quique jnani utácai isocade

¹³ Mu Jesús qué catecã́ri dacadigode ore gaté ga chósi tome ore: –Que ajnicho yacajnaquéode udore quigode ãrírique go uje yacãra yacajnaquéode aja jnani utácai. ¿Ga toguírase ome uac ujetiga ajnicho yacajnaqué ejórigo ãrírique a?–

¹⁴ Enga jé u uje Jesús cho dacajnaquéode quic ome ore. Enga chojninga: –Jnani utácai uje chaca cucha ajñunie jé gajnui tu uté gosi ujetiga chacate ore ome Dupade uruode.

¹⁵ Ayoréode uñane ore gajnunie u cucha ajñunie uje basája dajei. Chamáñaje quene ore chudute Dupade uruode mu Satanás jĩrique doi ore áyipiedie ga chijna Dupade uruode iji ore gari.

¹⁶ Jé basa ga ayoréode uñéngo ore cho cucha ajñunie uje basája cucaranépitabui. Uje udore gosode ore chudute Dupade uruode ga jĩrique ore irasicho enga a ca ore chise unerotiguérique go.

¹⁷ Mu ayoréode udore isocai tu ujetiga ca ore énique chicai jnumi gotique. Jecute que ore etotiguérique cuse go. Uje petingaquéode chise gojni udore ga ore chopise daba danguretigade ome Dupade uruode ga jé jogadi tu uje ore anguretigai qui tu jnumi yui ome Dupade.

^18-19 Jé basa ayoréode uñane ore gajnunie u cucha ajñunie uje basája ojnatébui. Uje ore chudute Dupade uruode, mu que ore áyipiedie jnoji erámi tudé. Enga cucha ueradode udore iji erámi udé ipesute ore edójnaringuéone. Jecute ore chimate cuchade aja re mu cucha uñai qué dépoji rĩ. Jecute uté gosi cho cucha ajñu pacáraque uje toi dádi bisideque uje que chaquesu re go enga que áraque cuse. Chamáñaje cucha ueradode udore iji erámi udé suru Dupade uruode gai iji uté gosi ajei gu.

²⁰ Mu ayoréode uñane ore chudute Dupade uruode ga Dupade uruode catája ore áyipiedie. Jecute ore gajnunie u cucha ajñunie uje pacáji jnumi ueratigai. Jecute jĩrique quérã enga chaquesu re ga adie cuse. Jecute ayoréode udore cho cucha ajñunie uje chaquesu re enga adie cuse. Mu adie cha ñane yui. Jecute uñane adie cho 30. Jé basa uñane cho 60. Jé basa uñane cho 100.–

Jesús chacãra dacajnaquéode aja papótique

²¹ Mu Jesús chacãrápo dacajnaquéode aja ore apótique rĩ. Enga chojninga: –A ca ayorérique isoca go ujetiga chãru dapótique ga chicháji cuchárique útique. Jeoga chicháji damochápirique útique ujetiga pógu. Mu uté gosi ichajapidi tu gaté yui. Gaidi u gu ujetiga chijñate ejominórone ore gáyode jnese.

²² A ca toque jne ujetiga cucha pipoguiétique ca chise dáringárique pute. Ujetiga pipoguiete cuchárique marínga, diga tocade jne ujetiga chise dáringárique pute.

²³ Uacuñeque ujetiga angoninguitígo guesa ga ca acusúyo uaque. Mu beyoi ga angáchoi yacajnaquéode udojo.–

²⁴ Jesús chojningápome ore rĩ: –Mu ejnáñopise uacáyipiedie aja uacadudigode Dupade urúo quigode. Ujetiga apésu uru quitique ga a jé jogadi tu ujetiga chacadápo ua ome daru uñéngo gaté rĩ. Mu diga chimo jne uje que ese uruode unerotiguérique, ga jé u uje chojne barajatigai babai ome daruode quigode jnese.

²⁵ Jecute ujetiga pirajatigai déji uaque gosi enga uaque gosi doi ga tagúome uté enga Dupade a tẽrája uté gosi ome pirajatigai gaté jne. Mu ujetiga gosi ca tagúome ga Dupade chajnose uté gosi ome irajatígabode sudore gaté jne.–

Jesús chacãra dacajnaquéode aja cucha ajñu pacáraque

²⁶ Jesús qué cho quique Dupade isocáringome dajnetígo ayoréo uyoque ujetiga chamáta yógaja dari jne, enga chojninga: –Dupade isocai ujetiga chamáta darasade aja re jé péropísiji cucha ajñunie isocade uje jnanírique chaca.

²⁷ Uje jnani tuté chimate dacapiedie aja jnumi iji cucha ajñunie enga jno ga que chajirápo yui gotique rĩ. Moji dejade, enga niji iji durasedie jnese ome dasatígo uñéngo. Mu chejna deréjnane mu quigade ga chunina mu acapiedie udire sué enga chaquesu re enga adie cuse. Mu cachi agúpuranguipíse uté ome cucha ajñunie udire isocade ome udore.

²⁸ Uje jnumi uté jé ipesute iquéraningai gu. Ujnié u bajé aja guesi. Quigade ga jé u uje pésu dero. Mu udore quigade jé u uje pésu dade. Enga ade quigade ga jé u uje pésu dajñunie.

²⁹ Ujetiga adie udire chise dáringárique timachugué ga jé jogadi u ujetiga jnani uté gosi chijna erásonique ome ujetiga chaquesu. Uje chise deréjnai gu ujetiga e na dacadie udire gu.–

Jesús chacãra dacajnaquéode aja cucha ajñu ajámataque

³⁰ Jesús qué jno darai údi enga chojninga: –¿Jé Dupade úringárique yocurása yocorási ringome ujetiga yicoi uté gajnúringuiji cuchade a?

³¹ Gajnua tu cucha ajñu atíãtaque uje i tu mostáza ujetiga pacáji jnumi. Uje cucha ajñua suaté atiãpísape ome ujodie cucha ajñui jnese iji erámi udé.

³² Mu diga paca cucha ajñámia suaté ga jé u uje quérã ga chise dáringáraque poredaté. Enga jogadi jé u uje suépise dojodie pore ore gáyode ome dáringa poredaté. Jecute chugúperone cho daburúpie iji uaté jmaneca cuchábode rĩ.–

Jesús oidode u cucha gajnúone ome dacadigode

³³ Uje Jesús chacate ore ome Dupade uruode ga isocai jé u gajnúone udojo uje jecucha chijna cucha gajnúone ome dacajnaquéode udore. Mu que Jesús chó dacajnaquéode gai gotique ome ore. Mu oidode u ore irajatigade eruéode ome ore.

³⁴ Jecute que Jesús chacate ore bisideque ujetiga ca chijna cuchárique gajnúrique ome ore. Mu quigade ga jecucha cho cucha gajnúone udore quigome dacadigode.

Jesús chaquĩ́ra úyujna cuchabé, yote quedéjna bayade ore

³⁵ Mu jé deréjnai uté u uje guedé e chaca ga Jesús chojningame dacadigode: –Boyo yico ga yaquesúgo yote quedéjnai. Ga yicoi uéchamitó.–

³⁶ Jecute Jesús acadigode ore noñome ayorébui ore iji te. Ga ore nóna Jesús iji dabi cuco ajei enga ore jno. Mu ujórigo cuco ore nóna oraja dajei to.

³⁷ Mu uje Jesús, jorane ore déji yote quedéjnai ajei mu úyujna cuchabé chorei ore iji yote quedéjnai gatócoro. Mu chiringare yodi aja gatéode ga cási chĩreta ore pi cuco ome yodi. Chirõripise ujetiga jno ore údi aja yote quedéjnai údi.

³⁸ Mu Jesús moji cucoi ajidé tiji quigade. Enga chugutána dagutadéraque. Jecute jĩrique Jesús acadigode chiringare Jesús enga ore chojningame: –¡Yocangaráni á! ¿A ca cucha ome ua ya uje a yote quedéjnai jno yocúdi jne aja dádi a?–

³⁹ Mu jĩrique Jesús niji ga chaquĩ́ra úyujna, yote quedéjnai ore. Enga chojningame udore: –Oyo parácho iji jnumi.– Mu uje Jesús urúo udojo ga jĩrique ore cho paráguiji jnumi jnese.

⁴⁰ Mu jĩrique Jesús chósi tome dacadigode ore: –¿Gotique chimo jóroque re uje a garósosi uacanguretarétigátique ome yu a? Uje úyujna cuchabé tuaté chajuque uacagutedie que.–

⁴¹ Mu Jesús chajuque dacadigode ore agutedie ome dapesútedatéode udore. Jecute ore tijapísa enga ore chojningame ñane: –¿Chimo jóroque re jnani uté oidé pujopié garãtígome uje jé chuságaja yote quedéjnai, úyujna uje chaquĩ́ra ore enga ore tangári?–