Márcos 3 - Dupade Uruode

Jesús chiqueta jnani jmanacacoi nanique

¹ Iji dire puyai uñeque ga Jesús chisápo judíode aquiningamérique guiguíjna rĩ uje i tu sinagóga. Enga jnanírique déji to uje jmanai cacoque.

² Mu Jesús guetesórone uñéngo ore chajire Jesús aja tijode, uje ore chajmita ujetiga chiqueta jnani tuté iji dire puyai. Ga jé u ujetiga ore cho báji.

³ Jecute Jesús catecã́ri jnani uté uje jmanai caco enga chojningame: –Boji te ga ayágueji yocajei udé.–

⁴ Quigade enga Jesús catecã́ri judíode ore iji darosadode enga chojninga: –Angoñome yu cucha pujuegátique ujetiga pipesudi iji dire puyade udore. ¿Ga pujuegate a ujetiga pipesute cucha oníngo iji, jeoga cucha gajnarétigo? ¿Arei tu ujetiga piquetaque ayorériguiji a, jeoga chuque uñénguiji?– Mu que togome ore gotique ujetiga ore chajnai uruode quigode.

⁵ Mu Jesús chibéro dedodie iji ore uje que posõraquérique déji ore uñeque ome jnani tuté. Ga chopise dáyugu re, mu ajei dotãripis ome ore rĩ. Uje que ore potapísa acajnaquéode gu ujetiga ore tangári to. Mu jé u uje Jesús catecã́ri jnani tuté uje jmanai cacoque enga chojningame: –Apotingare bajmanai.– Enga jĩrique jnani tuté doi Jesús uruode enga jĩrique chipotingare dajmanai, enga jĩrique ueradípise jmanai to rĩ.

⁶ Mu jĩrique fariséode ore jno enga ore cháta rágaja Heródes irógode ore ujetiga ore chucué dáyipierigui ome Jesús úringárique chuque.

Ayorébui yore Jesús, acadigode ore gai to iji yote quedéjnai edúdi

⁷ Mu Jesús jno enga nóna dacadigode aja yote quedéjnai edúdi. Mu ayorébui ore cho jara aja quigade to iji ore uniri Galiléa údode.

⁸ Uje ore chudute Jesús ujnomei ome ipesútedatéode, jecute jiépisi ayoréode uje ore diguina Jesús to ujetiga ore chajirape ipesútedatéode to. Ayorébui udore ore gãrapíode u ore unirone Judéa, Iduméa ore. Jé aja idáidatéi Jerusalén idaisórone uñéngo to rĩ. Jé aja ore itié Jordán uéchamitó jogonórone rĩ uje ore déji guedé garani iji ore itié uaté. Jé basa ga uñane tṍraji ore idáyode Tíro, Sidón, jé aja ejominóningo ore idáyo ujetiga ore chimope Jesús to.

⁹ Uje Jesús chimo ayorébui uje ore bese ga todo ujetiga ore chajo aja. Jecute Jesús chiroque dacadigode aja cucórique ujetiga dimane ome ujetiga chacárasaja ome dacajnaquéode.

¹⁰ Uje ore chimo iquetaguébujnane ayoré ejnarétacho, jecute ore tṍra rángaja Jesús gáyode ujetiga ore chijocase to enga ore úringai piquetaque jogadi u to ome Jesús.

¹¹ Mu Satanás utocaitígo pírigo uñéngo déji ore gari to. Uje ore isocai tu uje ore tibágui Jesús ga ore chichaga dagataidie iji Jesús iquei. Ga jé u uje ore tibidi dejode ga ore pijnacaraichi uje ore chojninga: –¡Yirajágo báringai Dupade ujnacaripise!–

¹² Mu Jesús chaquĩ́ra ore ome darai enga chajo raja ujetiga ca ore chatata úringárique ayoré ome erámi.

Jesús edopírigo "apóstoles" gare ore iji yirídai ome uté iroquéode

¹³ Quigade enga Jesús cheru cucarãtique ójoraque enga tibidi dajegaidode iji dacadigode. Enga jĩrique ore chamáta ñane aja.

¹⁴ Jecute Jesús edopírigo gare ore iji yirídai ome daroquéode, ujetiga ore nóna aja tijode enga ore jno Dupade uruode údi to aja erámi. Enga Jesús chĩ́care "apóstoles" aja ore.

¹⁵ Enga jé u uje tẽrája dedopíode udore ome dajopié ujetiga ore chiquetape deyatígo ayoré ejnarétacho to. Enga ore chijnimape Satanás utocaidode iji isatígo ore to rĩ.

¹⁶ Enga Jesús edopíode uje gare ore iji yirídai ore íode u udojo: uñai u Simón, uje Jesús pésu i gaté ga chĩ́care Pédro aja.

¹⁷ Jé basa Zebedéo ujnacarode u uñane. Uje uñai i tu Jacóbo, jé basa uñai i tu Juan. Mu Jesús pésu ore i gatéode to. Enga chĩ́care "Guei Darade" aja ore uje Boanérges u ome judíode uruode.

¹⁸ Jé basa uñane ore íode u: Andrés, Felipe, Bartolomé, Matéo, Tomás. Alféo ujnacari Jacóbo u uñai. Jé basa uñane u Tadéo, Simón ore. Enga Simón uté cháta raja darasade uñéngo nanique uje ore pota jeta ore chijócãre ore eduguéjnane uje rómagose ore. Jecute ore chĩ́care Cananísta aja uté.

¹⁹ Enga Júdas Iscariote u uñai to uje uté u uje guẽrate Jesús ome umajosórone jne.

Ore chichaga Satanás ujopié aja Jesús uje chiese oidé tu

²⁰ Quigade enga Jesús acadigode ore chajni aja dapusiédi guiguíjna enga jé u uje ayorébui ore chamátapo rágaja Jesús ore iji guiguíjnai uté. Enga irágupúsu ajei enga que edóraque cuse iji guiguíjnai uté. Jecute que togome Jesús ore ujetiga ore tagu dabotígo to.

²¹ Enga Jesús iguiosode ore chopise dáyugu uje ore chudute uje chiese ũruso Jesús. Chamáñaje ayorébui ore ijópise gu iji charipi guiguíjna. Jecute iguiosode ore tibágui jórogui Jesús iji uté ujetiga ore jno údi.

²² Enga Moisés urusarane atatasóningo uñéngo uje ore tṍraji Jerusalén gajnarenguipise ore uruode ome Jesús to. Enga ore chojninga: –Cachi Satanás utocaidode ore eduguéjnai Satanás Beelzebú déji uté ajei arĩ́e. Enga Satanás u uje chisi ome dajopié ome ujetiga tṍra utocaidode aja guesi iji dabíode ayoré.

²³ Jecute Jesús chojningame ore: –¿Ja pisocárase ome uacajéode a ujetiga Satanás chiroque datocaitique aja gosi ajei, mu quigade ga chijócãraporásaja guetique rĩ iji uté gosi a? A ca pisocai urásu arĩ́e.

²⁴ Ujetiga pachamitique jogosóningo ore chetaque ñane iji daniri ga que toc ujetiga ore chimate raja páyipie oméringui. Mu diga ore chajni ñane gai ga ore chejna ñane enga que ore bisitique pijoque go ome ñane.

²⁵ Enga jé isocai tupome jnani jogasúrãtique rĩ. Ujetiga ore chetaque ñane ga cachodi tu to ujetiga ca ore bisitique pijoque.

²⁶ Gajnui jé upome Satanás rĩ. Ujetiga doi enga chijócãre datocaitique iji pírique enga cachodi tu ujetiga ca bisitique pijógapo rĩ. Enga diga chise uraque deruénique iji te uje socárome re gu.

²⁷ Uacarajáyo uje que toque ujetiga pajnoñaque jnani etótique ome ugúcharigo. Mu a qui tu ujetiga pigarique uté gosi bajaque ga jé u ujeta gosi chacája iguíjnai enga cho dajnenguíji jnani etoi uté ugúchade udore.

²⁸ Enga que potigayaque yu gotique ome yuru quigode udojo: uje que piragome Dupade gotique ujetiga chĩro ore ate gajnarétigo jnese, jé aja ore uru noñatígo jnese rĩ.

²⁹ Mu ujetiga gosi dojnóngaja Dupade Ujopié Espíritu Sánto ga a ca toque jne ujetiga pĩroque uté gosi idojnóngabátigade ome Dupade Ujopié Espíritu Sánto. Mu a uté gosi badatéode upúsu jne dadojnóngabátigade ome Dupade Ujopié Espíritu Sánto iji deréjnane jnese.–

³⁰ Enga Jesús uru quicho udojo ome ore gu uje chiese oidé u Satanás ujopié ome ayoréode ore uje tṍra Satanás utocaidode iji ore.

Jesús daté, desade ore tibágui Jesús

³¹ Uje qué Jesús déji dacajnaquéode gai enga Jesús daté di to, jé aja desade ore rĩ. Mu que togome ore ujetiga ore chacája gari iji guiguíjnai ajei. Uje ayorébui ore irágu ejode gu. Jecute ore chiroque jnanírique aja ujetiga tibidi Jesús tome ore.

³² Mu ayoréode uje ore chácariji Jesús ejode ore chojningame uté: –Baté, besade ore déji guesi. Ga ore potapísa ujetiga ore chimo ua to.–

³³ Mu Jesús chajnai ore ga chojninga: –¿Jé gotodie iji uaque ujetiga yo ité iji uaque a? ¿Jé gosode rĩ a iji uaque ujetiga yo yeságuiji uaque a?–

³⁴ Enga Jesús chajire ore iji dejode enga chojninga: –Yo ité iji chequedíe udire iji yejode enga yopo yeságuiji jnanione udore ore iji yejode rĩ.

³⁵ Chamáñaje yopise yeságuiji udore ore jnese ujetiga ore pésupúsu Dupade ajegaidode. Enga jé chopome chequedíe udire ore rĩ uje ore dopísi Dupade áyipiedie quigode uje yo ina iji ore, ga yopo ité iji udire uñanie rĩ.–