Márcos 2 - Dupade Uruode

Jesús chiqueta jnani poritátique nanique

¹ Uje dirode qué garósi iji udojo quigade ga Jesús chajniapója ore idai uje i tu Capernaúm. Enga jĩrique idaisórone ore chudute Jesús ujnomei uje pusi idaisórone udore uñeque iguíjnarique.

² Mu jĩrique ayorébui ore yore aja Jesús charipi guiguíjna uje que ore edóraque cuse iji guiguíjnai uté. Enga Jesús chatata Dupade uruode ome ore iji guiguíjnai uté.

³ Jecute jnaníringo ore di dojórique jnani údi iji uje poritaque uté enga que toque ujetiga uté dique. Jnungórone gagájni ore ome uje ore chijnáji dajai.

⁴ Mu que togome ore ujetiga ore chise Jesús iji charidi uje ayorébui irágu ejode gu. Jecute ore cheru guiguíjnai ome. Ga ore pésu edóraque iji guiguíjnai ójo. Enga ore chigaru jnani ejnarétai tuté mochápi eruéode ome ducarigode. Enga jé u uje ore chiramurase Jesús gai iji charidi uté.

⁵ Uje Jesús chimo jnanione udore ore anguretigade ome re enga jé u uje chojningame udore ore jõrai ejnarétaque: –A yĩro basijnaringuéone jnese jne.–

⁶ Mu Moisés urusarane atatasórone uñéngo ore déji uté to uje qué ore chácariji dayaripíode gai. Enga ore áyipiedie chamáña ome Jesús uru quigode udore.

⁷ Enga ore chojninga iji dáyipiedie: "¿Gotique chimo jóroque re uje jnani tuté pota ujetiga sué Dupade gai, enga chiese chĩro pisijnaringuéone? Uje gusu Dupade múñi uje gajneque ujetiga chĩro pisijnaringuéone."

⁸ Mu Jesús jĩrique chiraja udore ore áyipiedie quigode. Ga chojningame ore: –Gajnarénguepísi uacáyipiedie ome yu uje chiese yipota ujetiga yujnué Dupade gai.–

⁹ Mu Jesús chojningápome ore rĩ: –Que cucha piraque gotique ome yu ujetiga yĩro uté isijnaringuéringo, jeoga yiqueta iji ejnarétigo, enga yojningame: "Ãriji iji bamochápi, ga asa bamochápi, ga bo ga jĩrique arique."–

¹⁰ Mu qué Jesús jnopo daruode údi ome ore rĩ enga chojninga: –A qué yetingarape yu jne ome uaque. Yigaidi tu gu ujetiga apáñañomíji yu uje Dupade utocaidi uyu yajnei tu ujetiga yĩro pisijnaringuéringo iji jnumi tudé.– Uje chejna daruode udore guesi ga jogadi u uje catecã́ri jnani poritai uté.

¹¹ Enga chósi tome: –Yojningai tu ua ujetiga ãriji, ga asa bamochápi, ga bo ga acáji baguíjnarique.–

¹² Enga jĩrique jnani poritai niji iji ayorébui ore ajei. Uje chisa damochápi ga chijnóngaja daqui. Enga ayorébui ore chimo jnese. Jecute ore tijapísa Jesús ipesudode ome daquetai jnani uté enga ore chicota Dupade ome udore. Enga ore chojningame ñane: –Cáma yimóngo cuchárique to ujetiga cho udore.–

Jesús dejéna Leví aja daquigade to

¹³ Udojo quigade ga Jesús chajniápo aja yote quedéjnai edúdi rĩ. Enga uje ayorébui ore chamáta rágaja gari enga jĩrique chacate ore to.

¹⁴ Mu uje qué Jesús jnoji dayaridi tuté aja daquei, mu chimo Alféo ujnacari Leví. Enga ore eduguéjna cuchábi iroque uté ujetiga utaidé ore iplátadie ome impuéstos. Enga qué déji dataquéode udore gai uje Jesús chise. Enga Jesús dejéna uté aja daquigade to. Jecute chojningame uté: –Leví á, boji te ga ajinama yu to jne.– Enga que Leví cusu rome Jesús gotique, mu jĩrique nóna Jesús to.

¹⁵ Enga jé u uje Leví uté jno Jesús údi aja daguíjnai ga pésu uraque dabose unéningo ome raque. Ga Leví ujórigo jnacare déji to uje ore utaidé ore iplátadie to, jé aja jnani ate gajnareque uñane ore to. Enga ore chacásõra Jesús, acadigode ore to iji ore atigabié gai. Uje uásejna jnanione udore uje ore diguina Jesús acajnaquéode gatuaque to.

¹⁶ Mu Moisés uruode atatasórone uñéngo, jé aja fariséode uñéngo rĩ, ore dojnóngaja Jesús uje chacásõra udore ore to. Enga ore chojningame Jesús acadigode: –Gajnareque uje uacacadisṍri chacásõra jnani ate gajnaréngone udore, uje gajnarenguipíso ore isocade ome dojode jnani ore uyoque múñi.–

¹⁷ Mu uje Jesús chudute udore ore uruode ga chajnai ore enga chósi tome ore: –A ca toque ujetiga ayoré ijónique áyipieraque déji dáringárique pipesute ome daijnáringo ore. Uyu ga que yucuegode u ayoré ate omone gotique. Mu yajegaidode u ayoré ate gajnaréngone ujetiga yisape ore ga yiquetape ore to.–

Fariséode ore catecã́ri Jesús ome acadigode gu uje que ore cho dayaque to go

¹⁸ Enga chise dínique uje Juan acadigode, jé aja fariséode uñéngo qué ore cho dayágome raque uje jé ore jmapié u gu. Jecute udore uñéngo catecã́ri Jesús. Enga ore chósi tome: –¿Gotique chimo jóroque re uje que bacadigode chijna yoquijmapié to ujetiga ore cho dayágome raque ujetiga ore catecã́ri Dupade? Bamo gu uje Juan acadigode jé aja fariséode uyoque jecucha ga yoco yocuyaque.–

¹⁹ Mu Jesús chajnai ore uruode ga chósi tome ore: –Ujetiga ayorérigo déji pajñamítedatérique gai ga a ca togome ore ujetiga ore cho dayágome re uje qué ore déji pajñamítedatéi ipesungóri gari gu.

²⁰ Mu jé basa ga a chise dínique jne ujetiga pajñamítedatéi ipesungóri jno enga quene cachodi u ujetiga gosi cho dayágome re.–

²¹ Jesús qué jno dacajnaquéode údi enga chacãra dacajnaquéode aja borapetígo. Enga chojninga: –Ujetiga borapeque ijarórique edo cuse mu que toc ujetiga pugaque borapeque ichárique aja. Chamáña gu uje ichai etotiguei sué ijaroi gai. Jecute ichai chayo borapeque ijaroi údi ga jĩrique daquesu, enga edo casé e querújna.–

²² Enga Jesús chacãrápo dacajnaquéode aja cucha otadode rĩ enga chojninga: –Uacarajáyo uje que uaque gosi doi enga chojne cucha otate ichárique aja cucha ao ijarórique. Uje cucha otate ichai uté pésu ga aoi dusi ome gu, uje dajadája guesi enga jogadi u uje uaque gosi chachia dapesudi cucha otate. Jecute omi tu ujetiga uaque gosi chanire cucha otate ichai taja cucha ao ichárique ga ore etotiguéode chopise ñane. Enga isocai tu ujetiga ca uaque gosi chachia dapesudi cucha otate uté, jé aja cucha aórique.–

Fariséode ore chetaguipise uje Jesús acadigode ore chisa dejode iji dire puyátique

²³ Mu e chise dire puyátique uje Jesús nóna dacadigode ore aja dajei. Enga ore chise guejnatique uje cucha pacatígo déji. Mu acadigode ore chimochẽre adie uñáringui ujetiga ore tagábu to.

²⁴ Mu fariséode uñéngo ore chimo Jesús acadigode uje ore chimochẽre ore acadie adie. Jecute ore chojningame Jesús: –¿Ga jé ca amo bacadigode ore uje ore chimochẽre cucha pacade adie udire iji dire puyai udé a?–

²⁵ Mu Jesús chajnai udore ore arecujaidie ga chósi tome ore: –¿Ja ca ajicho jnani bajai David isocade to a iji Dupade uruode a? Uje chaguhénique chise jorane ore nanique iji dasoráneraque mu que toque ore potique garãtique ome ore nanique.

²⁶ Enga David chacája Dupade iguíjnarique ga chise arureque puyade iji. Uje gusu ome sacerdóteode uje ore poso arurégode udore. Mu David tagu to, enga chisiapome dajorane ore to rĩ uje chaguhei ujuyápise ore gu. Uje sacerdóteode ore asuté Abiatar irodique Dupade iguíjnai uté nanique.–

²⁷ Jesús qué cho quique dacajnaquéode ga chopósi tome ore rĩ: –Que Dupade pésu dire puyai gu ujetiga sué ayoréode yoquibáyode mu pésu dire puyai gu ujetiga pagutíyamáte uté ujetiga ore cho dajñare iji.

²⁸ Jecute Dupade utocaidi uyu yajnenguipise ujetiga yiji yáyipiedie quitígo iji dire puyade udore.–