Márcos 12 - Dupade Uruode

Jesús pésu ejémplo ga chacãra dacajnaquéode aja jnani utácarique iroque áyipie eyúgode

¹ Jecute Jesús chacate ore gaté mu chacãra dacajnaquéode aja cuchade. Enga chósi tome ore: –Jnani déji nanique uje chaca dacadie úvai iji dajuyaquéode ajei. Mu jé u uje pésu guiguíjnarique ome dacadie udire ujetiga chijose úva udire adie iji ajei. Jecute pésapo cototé gajnúraque rĩ ujetiga chicha irodisóningo aja enga ore chajire udire ejode. Mu quigade ga jnani uté chajuguína dajnepídi uté aja darógode uñéngo ujetiga ore chajire dajnepítigo guejnai tuté yúode. Mu ujetiga diga ore na acárigui árigui ga ore chajuguína oredie ome ñane, jé aja ore irósõri to uje gajnei úvadie udire. Ga jé u uje uté jnome daquitique ome pachamite quedéjnarique.

² Mu uje e chise deréjnane ujetiga ore na ore acadie udire adie, ga jé u uje jnani tuté chiroque darótique aja dejnai irodisórone ore ujetiga chutai dajnepídi iji oredie udire.

³ Mu guejnai irodisórone ore chisa uté iroi aja ore. Ga ore chujépise údode. Ga jé u uje ore chirógaja doi rĩ. Enga a ca ore chisi ome cucháringome uté gotique. Jecute chedo dajmainie aja daqui.

⁴ Mu ore guejnai uté gajnengóri chirógapo daroque gatérigaja ore iji te rĩ. Mu ore doi uté ga ore chimitingare údode ome cucaranenie. Jecute ore chimate uté gatoi údode. Enga a ca ore chimo dedo dipóngueránguiji uté.

⁵ Mu jnumi gajnengóri uté chirógapo uñéngaja ore gaté rĩ. Mu ore chimate uté aja jnumi uje ore chujé. Mu jé u uje doi ga chiroque daroque jiéode aja ore. Mu ore chujé uñane údode, mu jé basa ga ore chimate uñane aja jnumone.

⁶ Mu uté chejnápise darógode ore aja ore yui. Ga gusu jnani uté abi iji gari uje chijnorapise. Mu chucué dáyipie ga chojninga iji dajei: "Yiabi yabi ga yirógaja ore gajneri. Socaseti udore ore ajéngome yabi uté gajneri."

⁷ Mu uje jnanione udore ore chimo uté ujnacari ga ore chingo dáyipiedie ome ñane ga ore chojninga: "Uté a jé basa ga gajnepite dayé gajnei tudé jnupe jne." Jecute ore chojningápome ñane rĩ: "Boyo ga yicoi ga yujégo. Ga nóña ga a jé yocajneque jnumi udé jne."

⁸ Jecute ore doi jnacari tuté ga ore chujé ga ore chimánaja jnumi. Ga ore doi ga ore churugúsiji guesi iji dayé gajnepídi tuté jnupe.–

⁹ Mu uje Jesús chejna daruode guesi ga jé u uje catecã́ri ore enga chojningame ore: –A yingomome uaque jne jnumi uté gajnengóri uté isocáringome daroque áyipie eyúgode udore. Uje a jĩrique doi udore ore ga jé basa ga chejnápisirase ore. Mu a jé basa chucué uñéngo ujetiga chicha ore aja ore charidode ujetiga ore susípise jnumi tuté guio.–

¹⁰ Jesús chojningame ore: –Ga jé ca arajáyo á, jnani bajade ore urusarane quigode iji Dupade uruode uje chojninga: Guiguíjna cuchábi ipesungórone ore guetegue cucarané nóña enga dequedójnariejna.

¹¹ Dupade chicháji dangoningai gu. Jé cachi cucha pitijátedatéode u udojo ome yoque.

¹² Jecute judíode angaránone ore chucuepísi dasocáringome Jesús ome úringárique pisaque. Ore chirajapise gu uje Jesús chacãra dacajnaquéode aja cuchade ga chopise ore adode. Mu a ca togome ore uje ore todo ayorébui gu uje ore cháta rágaja Jesús jnese. Mu a ca ore adésu dayaridode iji ore ejode enga jĩrique ore jnome daquitígo.

Jesús cho quique judíode angaránone ome pisocade ujetiga po oré ome rómagosode eduguéjna cuchábi

¹³ Udojo quigade ga fariséode, jé aja Heródes uáguedie ore chayója ñane ujetiga ore cháta rágaja ñane ome Jesús. Enga diga udore uñéngo tibágui Jesús ujetiga ore tangári uruode quitígo enga jé u ujetiga ore chise bárique ome uru gajnarétigo quitígo.

¹⁴ Mu diga ore chise Jesús ga ore catecã́ri ome daringaquéode ga ore chósi tome: –Pacadisṍri á, yirajagopise uje jé ũrepise ua ome bacajnaquéode udore Dupade acho. Enga que angaripísi bajnéone ayoréode ore uru gajnarécho ome ua gotique. Jeoga ayoré gajnareque yocuñeque, jeoga ayoré ataque yocuñeque, mu que ajuque yocajei gotique. Jecute yicatecãcoi ua ujetiga qué ope yoquiquique. ¿Ga jé cucha uome a ujetiga judíode yoco yocoré ome rómagosode ore eduguéjnai a? ¿Yoco yocoré jeoga ca yoco yocoré a?–

¹⁵ Mu jĩrique Jesús chiraja udore ore áyipie gajnarénguenie udire quigode ome re. Jecute chojningame ore: –Yiraja uaque uje uacagaidi u ujetiga ca yijnime uacaruode udore ãrírique. Mu boyo ga beyosi uacaplátataque enga yajirape. Ga a jé yimo enga jé u ujetiga yijnime yáyipiedie ome uaque.–

¹⁶ Jecute jĩrique ore dosi daplátataque enga ore chisísi ome Jesús. Mu Jesús chajire ore oidé pláta uaté ga jé u uje chojningame udore ore: –¿Jé uñeque edoi udaji iji plátabia sudaque a? ¿Jé gosi i uje ore churúsãre iji údi a?– Mu ore chojningame: –Rómagosode ore, yoqueduguéjnai edodie u, jé aja i.–

¹⁷ Jecute Jesús chojningame ore: –Que piraque quigode gotique. Asíñome rómagosode eduguéjnai gajnenie ome. Jé basa asíñome Dupade gajnenie ome Dupade.– Mu ore tijapísa Jesús uru quigode udore ome ore.

Saducéode ore botare Jesús

¹⁸ Mu cuchade udojo quigade ga saducéode ore tibágui Jesús to. Uje jecucha ore urúbecho uje ore chojninga: "Ca toque ome ayorérique ujetiga nijiápo iji dáringárique toque rĩ iji dóderaque." Mu ore gaidi tu ujetiga ca Jesús chijnime ore uruode ãrírique. Jecute ore catecã́ri to.

¹⁹ Enga ore chósi tome: –Pacadisṍri á, cachi Moisés jnani baja casicaite noñome darusarane iji yocari nanique arĩ́e. Ga quigode chósi te: ujetiga jnanírique toi mu noñome dacotéraque iji guesi, mu ujetiga cáma atique cuse, ga jé basa ga jnani uté jõrárique chójiapo iji gari rĩ. Uje áyipie quigode u gu ujetiga basája dajõrai toi tuté charidi. Enga socaseti atígo tṍraji chequé uaté.

²⁰ Jesús á, yobísi tome ua jne: Jnacarode déji jogasu chojmarai uje siete ore jnese. Mu bajai a chójirásiji chequé uaté gari mu cáma atique tṍraji. Mu toi jnani.

²¹ Mu jé isocai tu ome ejoi. Uje a chójirásiji chequé tuaté gari to mu jĩrique toi to. Mu que noñome datíguiji gari. Mu udore ore isocade u ome udore ore jõrárique uñeque rĩ.

²² Jecute diga jnacarode udore ore chejna rángaja chequé tuaté uje ore chóji gari. Mu a ca uñeque noñome datique iji uaté gari uje ore toi jnese. Mu udojo quigade ga chequé uaté torási to.

²³ Jecute angome quitígome yoque. Yocuruode qui tu udé: ujetiga 7 udore ore jnese ecárase rĩ iji dáringáringo tocho, jé aja chequé to rĩ, ¿jé abai gosirase a iji jnanione udore ore uje gare ore iji ti yijmanuñai?–

²⁴ Mu jĩrique Jesús chajnai ore ga chósi tome ore: –Que abóchopise cuchade udore quitique gotique. Chamáñaje cho ujetiga agúchoi ore urusarane Dupade uruode acajnaquéo gáyode gu. Chopo rĩ ujetiga agúchopoi Dupade úringai ujopíerãque gai rĩ ome yocúringáringo nirijío rĩ iji yocóderigui.

²⁵ Diga ayorérigo yĩrijíngopo jne rĩ iji yocódedie ga a ca pisocai tu jne ujetiga ayorérique chucué dacotéraque, jeoga chequé tu ga chucué damanique. Mu a yocajnúone u Dupade utocaidode uje ore déji gatajnoquei. Chamáñaje que ore chucué dacotérigui to go.

²⁶ Mu qué yo uacaquique to ome togode ore úringáringo nirijío yui. Ísega e ajicho Moisés urusarane quigode to jõ. Uje chatata uje Dupade uruode tṍraji porabia ome. Uje porabia suaté pioi ocaraidie tṍraji. Ga Moisés ududigode Dupade urúo quigode u udojo: "Cachi bayode jnani bajácho Abraham, Isaac, Jacob ore idupade u uyu iji deréjnane."

²⁷ ¿Ga Dupade chojningárasa "ore idupade u uyu" ujetiga e íjnoque jnani bajade udore ore jogadode? Úngare. Uje que Dupade cho dajnéone iji ayoré togode mu cho dajnéone iji uecade. Jecute uacoyópise paraque uje chiese ayoré togode ca ore nijiápo jne rĩ.–

Jesús chatata piroqué ibijógode ujetiga pipesucho

²⁸ Jecute Moisés urusarane atatasórone uñeque di to enga chudute Jesús uruode ome saducéode ore uje qué ore botare Jesús que. Mu uté chimo uje ueradipíso Jesús ijnimingone daru quicho ome ore. Ga jé jogadi tu uje catecã́ri gaté to. Ga chojningame: –¿Jé déji rique a Moisés urusãraque ibijoguipítique ome ua ya?–

²⁹ Mu Jesús chajnai ga chósi te: –Moisés urusãraque ibijoguipísi u udé: "Adójningachopísa israélgosode uaque á, uje yocangarádejnai Dupápisi u uté enga que yocangarate uñeque cuse go.

³⁰ Jecute be enga ajnorapise bangaráni Dupa enga ejna báyipie aja uté. Mu be ga ajo ua aja uté gaté." Uje Moisés urusãraque ibijóquedatéi u udé.

³¹ Jé basa ga ejoi dépoji rĩ ga jé chirõripise bajai ome úringai ibijoque. Ga quigode u udojo: "Mu be ga ajna udore jne enga jecucha ajire bojode ayoréo yúode jne, ga jé isocai tu uje bajire bei." Mu íjnonguipíse Moisés urusãraque uñéngo ujetiga sué udore gai.–

³² Jecute Moisés urusarane atatasṍri e chojningápome rĩ: –Pacadisṍri á, barajapise barecujaidie quigode udore. Uje jé ũrepise ua uje gusu Dupa ugurui u uté ga que ujórique Dupa déji gotique.

³³ Cucha omi tu ujetiga ayorérique ca chimoque dẽrapáitigo ome Dupade ujetiga chãru iji ore oratique gaserãte gánique. Mu cucha ueradipítique qué déji uje sué gai, ga u ujetiga ayorérique chijnorapise Dupade. Enga doi ga chejnápise daguesi ome. Ga jé jõrai tupo ujetiga chajiripise dojórigo ayoré yúode to ga jé isocai tu uje chajire dei.–

³⁴ Mu uje Jesús chimo jnani tuté uje susípise darecujaidie guio, enga jé u uje chojningame: –Báringai Dupade urásapise que idája iji ua gotique.– Mu jé u iji udojo quigade ga que qué uñeque casapoi ujetiga catecãrápoi Jesús gaté rĩ.

Jesús catecã́ri ore ome Dupade utocaidi Crísto danique

³⁵ Mu diga Jesús chacadápo ore iji Dupade iguíjna cuchábi te rĩ. Ga acajnaquéode chósi tome ore: –Uacarajáyo uje Moisés urusarane atatasórone jecucha ore urúbecho ome daruode: uje jnani bajai David ape disi ejo judíode ore ijnati Crísto jne.

³⁶ Jecute a yingome uaque jnani bajai David uruode quigode uje garani tu Dupade Ujopié Espíritu Sánto. Uje chósi te: Yocangarádejnai Dupade catecã́ri Yangarádejnai. Ga uru quigode u udojo: "Be ga abágui yu ga ácariji yirosadi iji yãrachua, Jé aja dínique ujetiga yujnué bamajosórone ore gáyode jnese."

³⁷ Jé chimo jóroque re quitique uje judíode ore ijnati Crísto a u jnani bajai David ape disi ejo jne múñi, David tuté chĩ́care dangarate cuchátigaja nanique. ¿Ujetiga jec ũré David cho dadupade iji nanique enga jé ape disi ejo u to a?– Enga ayorébui ore irasiguipise Jesús acajnaquéode, jecute ore tangaripísi.

Jesús chingo detétigade ome Moisés urusarane atatasórone ore ate gajnaréngone

³⁸ Jesús qué jno dacajnaquéode údi ga chósi tome ore: –Ajusópise uaqueo ome Moisés urusarane atatasórone ore to jne. Chamáñaje ore ucueguipísi tu gu dáringáringo ayoré ibijócho. Uje ore isocabei tu uje ore chigui daguidé umarenie. Jecute ore chicáji ore idáyode ujade ga ore jnatupúsu dáringáringo pidosobate ome dojórigo ayoré.

³⁹ Ujetiga ore chise pagapítique gánique jeoga ore chise judíode ore aquiningamétique mu ore ucueguípise piyaripi ueradode ome raque.

⁴⁰ Uje jecucha udore ore pésu chequé ecadie ujuredie ome ore iguíjnane. Uje ore chijna iji ore gari gatuaque. Mu a ca ore pota gu ujetiga pirajaque ore úringárique sijnaque ga jecucha ore catecã́ri Dupade enga a ca ore chajire raque ome dacatecãraitígadatéode udore. Jecute a ca Dupade chajire ore gajnetique dajuyaqué ome ore jne.–

Chequé eca jmatague chejnási daplátabidie ome Dupade úringa pẽrapaite

⁴¹ Enga chise deréjnarique uje Jesús chacája Dupade iguíjna cuchábi ga cháji ajé uñai uje jecucha ore na Dupade gajnenie ore iplátai aja pírigo iji. Mu chidójningapísa ayoréode ore isocade ome deranéringui daplátai iji uté. Uje chajire ore mu chimo uje jnani atade a ca ore cájnaru deranenie iji daplátadie uje ore nája píode udore.

⁴² Mu diga chequé jmatágueraque di to uje chequé eca. Uaté chijnime dapláta gárabidie ga násija píode udore uñeque to. Mu chequé eca uaté iplátabidie sudire ca oréraque cuse to go.

⁴³ Jecute Jesús tibidi dacadigode ga chósi tome ore: –Jé ũrepise yu ome yuru quigode udojo: uje chequé eca jmatague uaté gueranenie sué bajáiso ore gueranenie gáyode jnese.

⁴⁴ Chamáñaje bajade udore ore gueranenie u dapláta soguedie. Mu jé basa chequé eca tuaté ipláta cucha gotábidie jé sudire uje agutíyamánamínie jé su gu.–