Márcos 11 - Dupade Uruode

Jesús chicai Jerusalén yui ga ayorébui chicotapísaja yui

¹ Uje Jesús, acadigode ore chirõre Jerusalén enga ore chise idáyatigo uje ore íode u Betfagé aja Betánia ore. Mu idáyabode sudore idógosipísiji cucarani uje i tu Olívos. Ga jé u uje Jesús catecã́ri dacadique gáreode.

² Ga chojningame ore: –Boyo jne enga acayóji ore idáyabi suté jne. Mu ujetiga eso burica quedéjnarique to jne ujetiga gachisónique chigaru enga ejñúño jne enga ajnáño aja yu jne. Uje a cáma piyaripi burica quedéjnai uté to ome ayorérique.

³ Mu ujetiga uñeque catecã́ri uágome burica quedéjnarique gajneri ujetiga chojninga: "¿Gotique gu a uje uacajnáño?" Mu achajnáñoi uté gajneri ga ojnichome jne: "Yoquirósõri potapísa gu, mu a jĩrique chatirépo uacabai jne rĩ."–

⁴ Jecute ore doi Jesús uruode ga ore jno ga ore chise burica quedéjnai uje gachisṍri chigaru que iji daguíjna piagoi. Mu jogadi u dajere edúdi. Jecute jĩrique ore doi enga ore chejñu.

⁵ Mu uñéngo déji uté to ga jĩrique ore chajire udore ga jĩrique ore chojningame ore: –¿Uacapesutique a? ¿Gotique gu a uje uaquejñúño burica quedéjnai uté a?–

⁶ Mu udore ore chingo Jesús áyipiedie ome ore ga jĩrique ore juéga doi ome ore ujetiga ore chijna.

⁷ Ga jé u uje ore jno údi aja Jesús, burica quedéjnai uté. Mu ore di údi iji Jesús ga ore pésu charipi iji daguidedie enga jé u uje Jesús chujé raja uté gai.

⁸ Mu jiépisi ayoréode uje ore nínapísa Jesús yui. Ga ore chejñu daguidedie ga ore chitẽ́raja daguidedie aja Jesús iquéode ujetiga burica quedéjnai diguiji gáyode. Jé basa uñane ore chaquesu ijnacojodie enga ore chicha Jesús iquéode iji dajei to.

⁹ Mu udore ore uje ore déji Jesús iquei iji dajei, jé aja quigaminórone ore rĩ ore tibidája dajei ga ore pijnane chósi te: –Peduguéjna cuchape uté é. Dupade edopi tu uté enga utocaidipísi upo rĩ ome uyóguiji udé jnumi.

¹⁰ Pitijabate opejãre uté enga úringárique yoqueduguéjna e puja yui ujetiga chimate raja. Enga a jé dopísi yocai jnani bajai David jmapiedie jne ome yoque. Beyoi ga yejnángo yógaja ujetiga yicotágo Dupade ome udore yui.–

¹¹ Jé u uje Jesús chimate raja Jerusalén uje chacája. Ga quítequiguíji Dupade iguíjna cuchábi to rĩ. Mu Jesús chajmita cuchade aja quigode jnese iji uté. Mu quigade enga jno ga nóna dacadigode aja daqui aja ore idai Betánia. Chamáñaje e guedé jnopise gu.

Jesús urugaidé higuéra toi dádi

¹² Mu chise dire gatérique uje Jesús ore jnoji ore idai uje i u Betánia. Mu Jesús ore déji dajei mu chaguhénique chejna iji dajei.

¹³ Jecute Jesús chajire daquei mu chimo ore aca pore iji ta uje poria uaté i u higuéra. Jecute jĩrique jno ga tibágui poria uaté ujetiga tagúrasu áraque. Mu chise mu íjnoque adie. Gusu acãraque uécho iji poria uaté. Uje cáma deréjnane u gu ujetiga poria uaté chaquesu re.

¹⁴ Mu jé jogadi tu uje Jesús cho darúja poria uaté ga chojningame: –A ca esápo báringárique arẽ́ to jne rĩ ujetiga ayorérique chise ua ga tagúrasu báraque.– Mu Jesús acadigode ore chudute uruode quigode udore jnese.

Jesús tṍra cuchabujnane aja guesode iji Dupade iguíjna cuchábi

¹⁵ Mu Jesús ore chajnésarapo Jerusalén rĩ ga jé u uje Jesús chacája Dupade iguíjna cuchábi. Mu jé u uje chimo uñane iji Dupade iguíjna cuchábi uté uje qué ore tẽra cuchade iji. Jé basa uñane ore doi oredie ome cuchade uñane ome daplátadie. Mu jé jogadi u uje Jesús socárome ore ga chijócãre ore aja guesode. Ga chéngame pláta quedéjnanie gaisóningo ore agapiedie to. Ga chatapója cucujnadatéode ore guẽrasóningo ore charipíode to rĩ uje chéngame ore to.

¹⁶ Enga Jesús chojningame ayorébui ore: –Ca acayopója Dupade iguíjna cuchábi udé rĩ ome uacajnutígo udore uacagúcha.–

¹⁷ Enga Jesús chacate ore ga chósi tome udore ore: –Ore urusarane Dupade urúo déji uje quigode chósi te: "A yiguíjna cuchábi udé chise dáringárique ibijoque jne ome ducunirone jnese ujetiga ore gajneque ujetiga ore catecã́ri Dupade iji ajei." Mu oriechoquíode uaque, uacoyo uacacoyapídi iji Dupade iguíjna cuchábi udé, uje uacaráño uacojode ayoréo iji udé ome cuchade oredie udire.–

¹⁸ Mu sacerdóteode, ore eduguéjnane, jé aja Moisés urusarane atatasórone ore rĩ uje ore chudute Jesús uruode udore ga ore chucué dasoca ujetiga ore chimate Jesús aja jnumi ome úringárique chuque. Chamáñaje ore todo gu ujetiga ayorébui ore chejna rángaja acajnaquéode. Uje ayorébui ore irasique uté acajnaquéode ga ore tijapísa to quigode.

¹⁹ Mu dejai chise ore iji te ga jé u uje Jesús chijnime re iji ore idai uté.

Jesús urugaidé casé higuéra e topísi

²⁰ Uje chise dire gatérique mu Jesús, acadigode ore chisápo urugaidé casé pore rĩ iji duraséraque. Mu poria uaté higuéra topísi ga jé chuságaja erode rĩ.

²¹ Jecute Pédro jĩrique jnusinapísa Jesús uru casodé enga chojningame: –Yocacadisṍri á, barugaidé casé higuéra e topísi.–

²² Mu Jesús chajnai uté uruode ga chojninga: –Beyoi ga anguretáyopise Dupade to.–

²³ Enga chojningápome ore rĩ: –Jé ũrepise yu ome yuruode udojo quigode: ujetiga uacuñeque chojningárasa ome cucarãte cuchátique: "Be ga écãre bajogatíguiji bajogadi uté ga bo ga ṍra ua aja yote quedéjnarique," mu qui tu ujetiga ca uaque gosi áyipieraque cho quiyíguiyí ome uté mu chejnápise raja danguretigade enga a jé jogadi u ujetiga uté gosi uruode tocade.

²⁴ Jecute yuruode quigode jé u udore ome uaque jnese: cuchade jnese ujetiga atáyoi Dupade enga ca ayáyo uacangoroné ome. Mu ejnáñopise uágaja uacanguretigárigo ome uté yui, ga a jé u jne ujetiga pisi ome cuchárique uté ome uaque gosi.

²⁵ Mu ujetiga qué uacagúsoi uacacatecãraitigade udore gai mu uacuñeque jnusina detétigarigome dojórique ayoré ga jĩrique uaque gosi doi enga chiramurase detétigade udore iji dajei. Ga a jé Dupade chijna uaque gosi jmapié jne enga chĩro uaque gosi isijnaringuéone to.

²⁶ Mu jé basa ujetiga uaque gosi ca chiramurase detétigárigo iji dajei ome dojórique ayoré ga a jé Dupade isocai u uté jne ome uaque gosi. Ga a ca chĩro uaque gosi isijnaringuéone to jne.–

Judíode ore angaránone catecã́ri Jesús ome imenuringuei guẽrasónique

²⁷ Mu Jesús ore chajnésarapo ore idai Jerusalén rĩ. Mu Jesús qué chisõre iji Dupade iguíjna cuchábi ajei enga sacerdóteode eduguéjnane, jé aja Moisés urusarane atatasórone ore, jé aja judíode angaránone uñéngo rĩ, ore sose Jesús yui ga ore catecã́ri.

²⁸ Enga ore chojningame: –¿Jé uñeque juegabate cuchade udore ome ua ya ujetiga apésu cuchade aja quigode iji udé a? ¿Jé gosi guẽrate báringai eduguéjna ome ua ya, uje bapésu cuchade udore a?–

²⁹ Mu Jesús qué chajnai ore ga chojninga: –Jé cho yu uje a qué yipésabu uacajnetígo yurúo to jne ujetiga jé arajáyo quitígo gajneri. Ujetiga diga achajnáñoi yu gajneri ga a jé jogadi u jne ujetiga yingo yipesudode udore guẽrasṍri jne ome uaque.

³⁰ ¿Jé gosi iroquei u ome Juan nanique ujetiga tṍra ayoréode aja yodode a? ¿Ga Dupade u nanique a, jeoga ujórique jnani u uje irógaja? Beyoi ga achajnáñoi yu.–

³¹ Mu ore botare ñane enga ore chucué jórogui daru quicho ome uruode udore yui. Enga ore chojningame ñane: –Ujetiga yojnijome uté: "Dupade iroque Juan uté nanique." Ga a jé basa enga chojninga gajneri: "Jé ¿gotique gu a uje a ca anguretáyo uté to nanique?"

³² Mu que togome yoque to ujetiga yojnijo: "Jnanírique a iroque uté aja."– Chamáñaje ore agutu rágome ayorébui. Uje ayorébui ore changuretapise uje Juan uté acajnaquéode udore garani jé upúsu Dupade gu.

³³ Jecute ore chojningame Jesús: –Que yirajágo gosi ujetiga iroque Juan uté.– Mu jé basa Jesús chojningame ore: –Jé cho yu, a jé yijna uacajmapié to ga a ca yingome uaque jne yipesudode udore guẽrasṍri.–