Lúcas 8 - Dupade Uruode

Gojñane udojo júdedie u Jesús átajatódie chequei

¹ Uje Jesús chejna udojo guesi ga chicáji ore idáidatérigo. Jé aja ore idai ajámatigo rĩ ujetiga chacate ayoréode ore iji ome Dupade ujnomei yui ujetiga ore cho dangaranipísi iji Dupade. Ga Jesús utocaidode uje gare ore iji yirídai ga ore nóna aja tijode to.

² Mu chequérigui ore nóna ore to uje Jesús chiqueta ore iji ore ejnaréquedatérigo. Ga chijócãre Satanás utocaidode iji ore uñanie to. Enga uñáraque déji ore gari to uje i u María Magdaléna uje Jesús chijnime Satanás utocaitígo iji uaté uje gare iji ti yijmanai uñai.

³ Ga uñáraque i tu Juána uje Chúza gotique acoté. Uje eduguéjna cuchábi Heródes iróquegaté uté. Jé uña i u Susána. Mu jiépisi udire ore ujórigui chequei to uje ore chátaja Jesús, ore to ome dacaniratiguérigo.

Jesús pésu ejémplo ga chacãra dacajnaquéode aja jnani utácarique isocárigo

⁴ Jiépisi ayoréode ore uje ore tibágui Jesús to uje ore tṍraji pidai uñéngo. Uje Jesús chimo ayorébui ore ga jé u uje chacate ore ga chacãra dacajnaquéode aja cucha ajñúringui uje jnani utácai chaca ga chojninga:

⁵ –Jnanírique jnome dáringai utáca ujetiga chaca dajonatígo cucha ajñui. Mu cucha ajñunie uñáringui basája dajei edúdi. Mu a ayorérigo ore tṍrai tome ga ore chuchiéjna jnumone. Jeoga chugúperenie chimo ga tagu. Jecute que sué go.

⁶ Mu a uñanie basája cucaranépitabui ga cucha ajñunie udire sué mu jĩrique beta. Uje a ca jnup otadi déji udire jogadi gu.

⁷ Mu cucha ajñunie uñanie udire suéji jnacarapui. Ga a ca togome ujetiga ijõrei uje jnacarade nóna aja gatéode ga que chise dajóningárique go.

⁸ Jé basa ga cucha ajñunie udire uje jnani chacáji jnumi ueratigai u uje que chajire re dedórojnaraque.– Uje Jesús chejna dacajnaquéode udojo guesi ga doi ga chinguíra dabijnani aja ore ga chojningame ore: –Uacuñéngo angoninguitígo guesa ga a udore gosode u jne ujetiga ore chiraja yuruode udojo quigode.–

Jesús cho quique dacajnaquéode

⁹ Udojo quigade ga acadigode ore chajnai ga ore chojningame: –Jé ope bacajnaquéode udore quigode ome yoque to ga yirajagope quitígo to.–

¹⁰ Enga jé u uje Jesús chojningame ore: –Que yipógu yacajnaquéode quigode go ome uaque uje uacanguretigai déji ome Dupade úringai pangarate gu. Mu que yiji yacajnaquéode údi ome udore ore to. Uje que ore changureta yu to go. Uje ore chimo yipesudode cucha mu gajnui jec u ujetiga ca ore chimo. Ga adi jé u ome yacajnaquéode. Uje ore chudute mu que ore pésu gotique.–

Jesús cho quique dacãrájane cucha ome jnani utácai isocade

¹¹ Jecute Jesús cho dacajnaquéode quigome dacadigode ore ga chósi tome ore: –Cucha ajñunie udire gajnui tu Dupade uruode uje pingome ayorérique.

¹² Ga cucha ajñunie udire uje basája dajei edúdode ga gajnui tu ayorérique uje chudute Dupade uruode mu Satanás utocaidode na raja ajei ga jé u uje charatáyime Dupade uruode ome uté gosi. Ga chijna Dupade uruode iji gari uje que pota ujetiga uté gosi changureta Dupade ga piquetaque uté gosi.

¹³ Enga ome cucha ajñunie udire uje basája cucaranépitabui, gajnui tu ayorérique uje chudute Dupade uruode ga ca chise unerotiguérique. Changureta mu a cachi anguretíga uje petingaquéode chise uté gosi ga jĩrique anguretigai doi jnumi uje garósi anguretigai gu. Ga jĩrique cha.

¹⁴ Cucha ajñunie uje suéji erãp ojóningai gajnúone u udore ore uje ore chucué Dupade uruode, mu ore chejna rángaja dáyipiedie quigode. Jecute erámone jogonórone cucha cho ujetiga suru ore áyipiedie yui gai. Yojningane u ore áyuguhebátigade, jé aja ore áyipiedie gaidode cucha. Jé aja ore ipotiguéode ome dáringane ayoré ataque. Jecute ore gajnua upo pore paca uje sué bisideque enga íjnoque adie.

¹⁵ Mu cucha ajñunie udire uje pacáji jnumi ueratigai, gajnui tu ayoré parai uje dimane ome Dupade adode. Uje chudute Dupade uruode enga jĩrique doi. Enga chajo raja dagaidode Dupade iroquéo. Jecute jiei ate omone enga gajnua tu sequeré ueradé uje ore na dacadie enga jiépisi adie.–

Jesús pésu ejémplo ga chacãra dacajnaquéode aja papótigo

¹⁶ Jesús qué chacate ore ga chacãra dacajnaquéode aja ore apótique enga chojninga: –¿Ga ayorérique isocarase ujetiga chãru dapótique ga chaco cuchárique gai a? ¿Jeoga chicháji damochápirique útique a? Mu isocai tu ujeta ichajapidi tu cuchárique gai iji gaté yui. Ga gaidi tu ujetiga chijñate ore gai jnese.

¹⁷ Enga isocai jé u ome yacajnaquéode ome uaque. Uje yedu uaque uje yingome uaque. Mu que yipota go jeta yacajnaquéode cho cucha pipoguiédode ome uaque mu yáyipie quigode u ujetiga ajnerañome ga ore chise dáringáringo pududicho. Ga ududisóningo ore chirajapise quigode to uje jé ũrepíso.

¹⁸ Jecute angachopísi yacajnaquéode quigode uje udore ore uje ore tangaripísi ga a yajnerame ore irajatigai jne. Mu udore ore uje ore chicota raque ome darajatígabi ga ore irajatígabi a bijname ore jne.–

Jesúsdaté, jorane ore tibágui Jesús

¹⁹ Mu Jesúsdaté, ujnacarode uñéngo e ore chisíji uté to iji charidi. Mu a ca togome ore ujetiga ore chimo Jesús to uje ayorébui ore suru ejode gu.

²⁰ Jecute ayoréode uñeque chingome Jesús ga chojningame: –Baté, bajorane ore déji guesi ga ore potapísa ujetiga ore chimo ua to.–

²¹ Mu Jesús chojningame ore: –Udore gosode ujetiga ore chudute Dupade uruode ga ore doi Dupade uru quitígo ga udore ore u jne ujetiga yope yiguiosipísi iji ore jne.–

Jesús chaquĩ́ra úyujna cuchabé

²² Mu chise dínique uje Jesús acadigode ore chacája cucórique ga Jesús chojningame ore: –Boyo, yico ga yicagobíji yote quedéjnai uéchamitó.– Ga jĩrique ore chicáji uéchamitó.

²³ Mu qué ore déji yote quedéjnai ajei uje qué ore chaquesu mu qué Jesús mo. Mu úyujna cucháberaque choji ore iji yote quedéjnai ajei. Ga yodi chĩreta cucoi uté ajei ga cási jno cucoi údi aja yote quedéjnai údi.

²⁴ Jecute ore chaguineru ore chiringare Jesús ga ore chojningame: –Yocangaráni á, yocangaráni á. Yodi jno yoquibi cuco údi aja yote quedéjnai údi.– Jecute Jesús niji ga jĩrique chaquĩ́ra úyujna uaté. Ga chaquĩ́ra yodi iji yote bayai uté rĩ. Ga cuchade udore cho jnaque ome ore uje chaquĩ́ra. Ga jé u uje chopise parac iji jnumi.

²⁵ Mu Jesús chojningame dacadigode ore: –¿Jé oyo ringome uacanguretigai te a?– Mu que ore chajnai go uje chajuque ore agutedie. Uje ore tijapúsu ome ipesudode cucha ga ore catecã́ri ñane ga ore chojningame ñane: –¿Gotique chimo jóroque re ome jnani tuté uje chaquĩ́ra yodi ga yodi tangári? Chaquĩ́rapo úyujna ga úyujna tangárapoi rĩ.

Jesús chiqueta jnani uje Satanás utocaidode chacája uje gadáragose uté

²⁶ Jecute ore chise guesi iji yote quedéjnai uéchai. Uje puniri uté i tu Gadára. Enga déji Galiléa tiógarei iji yote quedéjnai uéchamitó.

²⁷ Uje Jesús doi jnumi iji cucoi mu jnanírique chise Jesús uje gadáragose. Mu nóña ga ayoré do jnani uté ome Satanás utocaidode iji ajei uje e diyajmanguipíso iji. Ga a ca pota go ujetiga chigui daguidéraque, ga jé u uje choquíbi. Enga que moji ayorérique iguíjnarique go, mu charidode u ducódedie jogadode.

²⁸ Uje jnani uté chimo Jesús ga tibágui Jesús ga chichaga dagataidie iji iquei. Ga chinguíra dabijnani taja Jesús, enga chojninga: –¿Gotique gu a uje bapota bátaja ua aja yu? Yiraja uje Dupa pujnuéngaisṍri ujnacari tu ua. Mu yipotigádi u ujetiga ca o bajocaningame yu.–

²⁹ Enga urúo udojo gu ome Jesús uje Jesús qué chijócãre Satanás utocaidode iji ajei. Uje Satanás utocaidode ore ijocayaque jnani tuté. Jecute uje ayoréode ore chisa uté mu ore chigaru jórogu ome ojnaquérodie. Ore chigaru jmainie, guídade ore aja ñane. Mu Satanás utocaidode irágu uté ajei ga jé chaquesu ore igaripídode iji dádode. Enga Satanás utocaidode ore pésu ga jnani tuté chayome ayoréode ore, ga chicáji erãp uégode uje a ca ayorérique déji go.

³⁰ Enga Jesús chingome írique ga chósi tome: –Jnani, ¿jé bérique a?– Mu jnani chojninga: –Yi tu Ayoré Dipeséode.– Ga uruode u udojo gu uje Satanás utocaite dipeséode déji údode gu.

³¹ Enga Jesús chijócãrirase Satanás utocaidode iji jnani tuté. Mu utocaidode ore chijócha ajei údi ujetiga Jesús ca chorei ore iji ejopié uje que eruénique cus.

³² Mu yãcoré quedéjnaringui idógosi ore iji cucarãtique gaté uje qué ore tagu dabosode iji uté. Ga Satanás utocaidíso, Jesús jocarane, ore chojningame Jesús: –Be ga ajmare yógaja yãcoré quedéjnanie ajéode.– Ga Jesús juéga ujetiga jocarane udore chacája yãcoré quedéjnanie ajéode.

³³ Jecute Jesús jocarane udore doi guesi iji jnani ga ore chacája yãcoré quedéjnanie ajéode. Ga Satanás utocaidode udore pésu ũrusodie iji yãcoré quedéjnanie ga yãcoré quedéjnanie idája ore iji jnumi mu jé ore basíji cucarani gaté ga ore tṍra raja yote quedéjnarique uje a ca toc ujeta piqueta uñáraque.

³⁴ Mu chajuque yãcoré quedéjnanie ore irodisórone agutedie. Ga jĩrique ore chayóji ore idáidatéi yui ujetiga ore chingongara erámi iji ore idáidatéi údode. Ga ore chingopome ayoréode ore rĩ iji ore idai eruéode rĩ.

³⁵ Ga jĩrique ayorébui ore jnome ujetiga ore chajire cucha dacate pipesudode udore. Uje ore chise Jesús iji charidi tuté ga iquetai tuqué ayoré chácariji Jesús ejoi. Uje Satanás utocaidíso e jnoji gari ga uté chacája daguidedie to. Ga e chirajapise cuchade rĩ. Jecute e chisápo dáringai ayoré rĩ. Ga ayoréode ore chimo ga chajuguipise ore agutedie ome úringai piquetaque.

³⁶ Mu ayoréode udore uje ore imo to Jesús ome isocai ome iquetai ayoré ga ore cho quique isocade ome ayorébui ore.

³⁷ Jecute gadáragosode ore jnese iji uté ore uniri ore chijócha Jesús ajei údi ujetiga jnoji ore gari. Chamáñaje ore todópisa gu. Jecute Jesús jĩrique chacája cucoi ga jnoji ore uniri uté.

³⁸ Mu Jesús iquetai tuqué ayoré potapísa ujeta nóna Jesús aja tijode. Mu Jesús chaquĩ́ra ga chojningame:

³⁹ –Bo ga ajníja baguíjnarique ga angomome erámi uje Dupade iquetaque ua que.– Jecute jnani tuté jno ga chajníja daguíjnai ga chingo guidai údode jnese uje Jesús iquetaque que.

Jesús chiqueta disia uje dayé i tu Jáiro

⁴⁰ Ga Jesús jno ga chajnésara yote quedéjnai uéchamitó rĩ. Ga ayoréode ore nínapúsu Jesús yui. Ore irasique raque jnese uje diyajmaque ore iji uje ore chirote yui gu.

⁴¹ Ga judíode eduguéjna cuchátique chachai Jesús to uje i tu Jáiro. Uté gajneque ore iji ore aquiningamérique. Mu jnani tuté chicha dagataidie aja jnumi iji Jesús iquei ga qué chijócha ajei údi. Ga chojningame: –Jesús á, qué yutṍri ua ujetiga ajinama yu aja yiguíjnai tuqué.–

⁴² Jnani uté gaidi tu ujetiga Jesús chiquetásiape ape ugurátaque. Disabía suaté sequeredie gare iji yirídai iji yui. Uje qué idógosipise ujetiga tosi. Jesús nóna mu ayoréburique ore nóna to. Uje ore irágu ore iquéode. Ga ore chujé raja Jesús to aja daqui.

⁴³ Mu chequé chojmaráraque déji ore gari uje ejnareté. Uje sequeredie gare iji yirídai uje pésu uaté iyosoringuéone. Enga ejnarei tu uje iyode que cha tamutaque. Enga chequé tuaté e tẽra dagúchade jnese ujetiga cho oré daijnane ore ujetiga ore pésu. Mu a ca daijnárique déji ujetiga chibote chequé uaté ejnaréngone ujetiga chiqueta.

⁴⁴ Mu chequé tuaté chaguitóji Jesús yui ga tṍraji quigade ome ga chisa Jesús iguidé eruémami. Jecute Jesús ujopié chise chequé tuaté ga chaquĩ́ra iyode úringane tamutaque.

⁴⁵ Enga jé u uje Jesús catecã́ri ayorébui ore. Ga chojninga: –¿Goto a iji uaque ujetiga goto chijocase yu que a?– Jecute ayorébui ore chósi tome: –Yocacadisṍri á, que pijocayaque ua arĩ́e.– Mu Pédro jorane ore chojningame Jesús: –Bamo ayorébui uje ore chinguíra ua aja ñane ga ore chijocase ua aja tijode. ¿Gotique gu a uje bacué bajocayasónique a?–

⁴⁶ Mu Jesús jé chajo raja uje chojninga: –Uacuñáraque chijocase yu que arĩ́e. Jecute jé yunina yujopié uje doi guesi iji yu uje yiqueta uacuñáraque que.–

⁴⁷ Uje chequé tuaté chiraja uje Jesús chiraja adode ome re, enga jé u uje jĩrique sose Jesús yui. Mu tãrara ome dasadodéringai ga jĩrique chichaga dagataidie iji Jesús iquei. Ga chojningame Jesús: –Uyu u que.– Ga uaté e chingo dejnarei isocade ome iji ayorébui ore ajei. Ga chojninga: –Yijocase Jesús iguidé eruémami ga jĩrique chiqueta yu.–

⁴⁸ Ga Jesús chojningame chequé tuaté: –Yababía, jé tiógara uje yiqueta ua que ome banguretigai ome yu. Bo jne ga ca o báyugu ua jne aja baqui.–

⁴⁹ Uje cáma Jesús ore chejna daruode udojo guesi mu ore eduguéjna cuchábi Jáiro irótique e di iji ore uje tṍraji Jáiro iguíjnai. Enga catecã́ri Jáiro ga chojningame: –Bababía e tosi que. Aya yocacadisṍri Jesús unerai ome úringai putocaite ga yajníngo to aja baguíjnai.–

⁵⁰ Mu Jesús chudute Jáiro iroi uruode udore ga chojningame Jáiro: –Jáiro á, jé ca o báyugu ua. Gusu ujetiga angureta yu. Ga bababía úringa piqueta jogadi a u jne.–

⁵¹ Uje ore chise Jáiro iguíjnai ga ore chacája disabía gari iji ajei. Mu Jesús que juéga daquigade ome ayorérigo uñéngo. Mu gusu Pédro, Jacóbo, Juan aja disabía dayé, daté ore ujetiga ore chacája gari iji guiguíjnai ajei tuté.

⁵² Enga ayorébui ore chisa dabade iji disabía ejode uje ore po. Ga ore yuare iji ejode ome suaté. Mu Jesús chaquĩ́ra ore ga chojningame ore: –Ca abóyo. Disabía que tosi go. Qué mósi.–

⁵³ Mu ore dojnóngapísaja Jesús. Ga ore cana gai. Uje ore chiraja disabía suaté úringa togape.

⁵⁴ Mu Jesús chisa disia suaté jmanai ga chejnápusu daruode ome uje chojninga: –¡Disiá, ãriji to!–

⁵⁵ Jecute disabía suaté ecásiapo rĩ. Ga disabía jĩrique niji. Ga e chague. Ga jĩrique Jesús chiroque daté, dayé ore aja potique ujetiga ore pésu ome disabía suaté.

⁵⁶ Enga disabía suaté dayé, daté ore tijapúsu Jesús uje chiqueta ore ababía. Mu Jesús chaquĩ́ra daté, dayé ore ujetiga ca ore chingo erámi.