Lúcas 3 - Dupade Uruode

Juan el Bautísta chacate darasade ore iji erãpe tarétigai

¹ Iji dirode udore ga Tibério e chise sequeredie uje chejna yirídai ome dáringai eduguéjna cuchape. Enga uté ipesute darasade ore úringanie dacasuté uje urasade ore ero tu gu. Enga chorei Póncio Piláto iji judéagosode ore ujetiga ore cho deduguéjna iji. Enga chorei Heródes iji galiléagosode ore. Enga chorei Heródes jõrai Felipe iji ituréagosode, traconítegosode ore rĩ. Enga chorei Lisánias iji abilíniagosode ore.

² Enga jnaníringo déji to uje ore íode u Anás, Caifás ore. Enga judíode angarádejnane sacerdote u ore iji Dupade iguíjna cuchábi. Enga qué Zacarías ujnacari Juan déji erãpe tarétigai nanique iji dirode udojo. Mu diga Dupade catecã́ri iji te ujetiga jno uruode údi ome erámi údode.

³ Enga jé u uje Juan jno dacajnaquéode údi ome ayoréode idáyode uje déji tié Jordán edúdode. Enga acajnaquéode quigode u uje chojningame ore: "Ecãcho uacatígo enga ayáyo uacate bajade ga yṍra uágaja yodi jne. Enga jogadi u jne ujetiga Dupade chĩro uacasijnaringuéone."

⁴ Dupade uruode atatasṍri jnani bajai Isaías urusarane ojningai jé u Juan uté. Ga proféta Isaías uté urusarane chósi te: A yudúco uté gosi pijnatígo jne ujetiga tṍraji erãpe tarétigai. Enga a chojningame yoque jne: "Boyo yico, yipéco dajei iji Yocangarádejnai iquei uje a di jne. Apésopúsu aja quedéjnane jne.

⁵ Ujetiga ejopiérigui déji mu acosáyoja ome jnumi. Ujetiga ocórorigui déji mu apéso ga tiroque. Jé ca apéso ga dajetique ditaji mu ujetiga cáputaji daqui. Dajetique ujetiga gajnareque ga apésopúsu ga uerate.

⁶ Enga diga erámi unirisórone ore jnese ore pañaji Dupade isocade ome ore úringane piquetaque."

⁷ Enga ayoréode ore yore Juan gai ujetiga chaca ore edodie iji yodi. Mu Juan chojningame ore: –Aringácachoquí uaque enga uacajnúone u uacajnai Satanás píode uga. ¿Jé uñeque ingome uaque ujetiga piquetaque uaque jne ome uacajnei pujuyaquédaté ujetiga ayóyorase ome? Uje pujuyaquédatéi e idógosi.–

⁸ Juan chojningápome ore rĩ: –Ajusópise uacatígo guio ujetiga pimo uacasoca arétigo uje uaquecãcho uacadode. Enga jé ca ojnichome ñane: "Jé areguipise yoque arĩ́e uje jnani bajai Abraham ape disi ejo yoque." Mu que quigode u gotique. Ujetiga Dupade ajéo ga a pesurásu cucaranéringui to ga ore gajnunie urásu Abraham ape disi ejode to.

⁹ Dupade jé cho jnani utácarique uje dimane ome dajnosé ujetiga chaquesu pore gajnarénguenie iji pore ijorenie ujade. Chiraja gu uje gajnarénguei enga que áraque cuse. Jecute chaquesu udire ore jnese enga tṍra ore aja pioi.–

¹⁰ Mu jé u uje ayorébui catecã́ri Juan. Enga ore chojninga: –¿Jé yoquipesutique cucha dérasi rique a ujetiga ca yico to Dupade ujuyaquei tuté?–

¹¹ Mu Juan chajnai ore uruode ga chósi tome ore: –Uacuñeque ujetiga iguidérigui gare, ajuguína uñáraque ome uñeque ujeta gosi ca iguidéraque cuse. Ga jé cho ome cucha pibosode rĩ. Ujetiga uacabotígo cuse ga asíyo udore ore iji uje ore jmáta.–

¹² Enga jnaníringo ore chise Juan to nanique uje ore utaite darasade ome deduguéjna cuchábi gajnenie plátai uje impuéstos u. Ore ajegaidi u ujetiga Juan tṍra ore aja yodi to. Ore catecã́ri Juan enga ore chojninga: –Yocacadisṍri á, ¿jé yoquisocárique dérasi rique to a?–

¹³ Mu Juan chojningame ore: –Ayáyo asayo uacangaráni ipesudedie plátai iquéode.–

¹⁴ Enga soldádode uñéngo ore chise Juan to ga ore catecã́ri to ga ore chojningame: –¿Jé yoquipesutique to jne a? Enga Juan chajnai ore uruode ga chojninga: –Jé ca ajnóso uñeque. Ca ajmongachopója ore rĩ ujetiga ca arajáyo ore bárique cucha. Enga ca etácho uacangaránone gueranenie plátai ome uaque ome uacatrabajándoringane.–

¹⁵ Mu ayorébui ore jnatupúsu daquetasónique yui uje jnani bajade ore erángate uje a Crísto di jne. Jecute ore jos eti e u Juan ome úringai pitijabate ome acajnaquéode.

¹⁶ Jecute Juan chojningame ore jnese: –Que potigayaque uje uyu u uje yṍra uágaja yodi ome bautísmo. Mu que yugúsiji cuchárique. Uje uñai qué déji yiquigade uje suépise yibai ome dajopiéjna. Uje ujopié gajnunie u pioi ocaraidie. Uje que cuchárique déji iquénique. Ga a uté di iji uaque jne ga a jé u ujetiga chĩreta uacajéode ome dajopiéjna Espíritu Sánto ome bautísmo uñai jne.–

¹⁷ Mu Juan qué chacate ore enga chacãrápo dacajnaquéode aja ayoré utácarigo ore isocárigo rĩ uje chojninga: –Dupade isocade a jé cunguésõri ayoré utacade ore isocade uje jé dimane ore ome doidode picho ujetiga ore chujé dacatígo cucha iji jnumi. Enga ore cãra ajñunie jogadi enga ore susípise udire guio. Jé basa ore chãru guidode gai. Mu Dupade iquetai que toc ujetiga pajnique pioi uté go iji deréjnane.–

¹⁸ Juan uté acajnaquéode, oquigode cucha jiei, ga jé isocade u udore uje chacate ayoréode ore ome yoquiquetangóri Crísto ujnomé ueradi yui.

¹⁹ Juan isocai upo rĩ uje pojna ore eduguéjnai Heródes iji uté ore uniri. Uje gobernador Heródes uté chijna desai Felipe acoté iji gari gu, enga chequé uaté i u Herodías. Ga Heródes jé bade u date gajnaréngone uñéngo to rĩ.

²⁰ Mu que Heródes tangári gotique. Enga doi datéringane uje pésu cucha gajnaréngone ome Juan. Ga chisa ga suru uté gai.

Juan tṍra Jesús aja yodi

²¹ Mu iji taningai uje Juan qué déji gai uje tṍra ayorébuode aja yodi enga Jesús tibágui to ujetiga Juan tṍra aja yodi. Enga uje Jesús qué catecã́ri Dupade enga jĩrique gaté chuchẽre dabai.

²² Enga jĩrique Dupade Ujopié Espíritu Sánto doi jnumi ga cho cucujnadatei aja jnumi. Enga basája Jesús gai. Enga jĩrique darade tṍraji gaté yui ome Jesús, uje chojninga: –Yape yedójnari tu ua uje yinína yu ome ua.–

Jesús gãrapíode jnani bajácho ore íode u udojo jnese

²³ Jesús e chise sequeredie uje 30 iji yui ga jé u uje chingongara raja erámi. Mu ayoréode ore jos eti José jé abípise Jesús. Uje José dayé i tu Elí.

²⁴ Jé basa ga Elí dayé u Matat. Ga Matat dayé i tu Leví. Ga Leví dayé i tu Melquí. Ga Melquí dayé i tu Jána. Ga Jána dayé i tu José gatei.

²⁵ Ga José gatei dayé i tu Matatías. Ga Matatías dayé i tu Amós. Ga Amós dayé i tu Nahum. Ga Nahum dayé i tu Ésli. Ga Ésli dayé i tu Nagai.

²⁶ Ga Nagai dayé i tu Maat. Ga Maat dayé i tu Matatías gatei. Enga Matatías gatei dayé i tu Semei. Ga Semei dayé i tu José uñai. Ga José uñai dayé i tu Judá.

²⁷ Ga Judá dayé i tu Joána. Ga Joána dayé i tu Résa. Ga Résa dayé i tu Zorobabel. Ga Zorobabel dayé i tu Salatiel. Ga Salatiel dayé i tu Nerí.

²⁸ Ga Nerí dayé i tu Melquí gatei. Ga Melquí gatei dayé i tu Adí. Ga Adí dayé i tu Cosam. Ga Cosam dayé i tu Elmodam. Ga Elmodam dayé i tu Er.

²⁹ Ga Er dayé i tu Josué. Ga Josué dayé i tu Eliezer. Ga Eliezer dayé i tu Jorim. Ga Jorim dayé i tu Matat.

³⁰ Ga Matat dayé i tu Leví gatei. Ga Leví gatei dayé i tu Simeón. Ga Simeón dayé i tu Judá gatei. Ga Judá gatei dayé i tu José uñai. Ga José uñai dayé i tu Jonán. Ga Jonán dayé i tu Eliaquim.

³¹ Ga Eliaquim dayé i tu Meléa. Ga Meléa dayé i tu Mainán. Ga Mainán dayé i tu Matáta. Ga Matáta dayé i tu Natán.

³² Ga Natán dayé i tu David. Ga David dayé i tu Isaí. Ga Isaí dayé i tu Obed. Ga Obed dayé i tu Booz. Ga Booz dayé i tu Salmón. Ga Salmón dayé i tu Naasón.

³³ Ga Naasón dayé i tu Aminadab. Ga Aminadab dayé i tu Aram. Ga Aram dayé i tu Esrom. Ga Esrom dayé i tu Fáres. Ga Fáres dayé i tu Judá uñai.

³⁴ Ga Judá uñai dayé i tu Jacob. Ga Jacob dayé i tu Isaac. Ga Isaac dayé i tu Abraham. Ga Abraham dayé i tu Taré. Ga Taré dayé i tu Nacor.

³⁵ Ga Nacor dayé i tu Serug. Ga Serug dayé i tu Ragau. Ga Ragau dayé i tu Peleg. Ga Peleg dayé i tu Heber. Ga Heber dayé i tu Sála.

³⁶ Ga Sála dayé i tu Cainán. Ga Cainán dayé i tu Arfaxad. Ga Arfaxad dayé i tu Sem. Ga Sem dayé i tu Noé. Ga Noé dayé i tu Lamec.

³⁷ Ga Lamec dayé i tu Matusalén. Ga Matusalén dayé i tu Enoc. Ga Enoc dayé i tu Jared. Ga Jared dayé i tu Mahalaleel. Ga Mahalaleel dayé i tu Cainán gatei.

³⁸ Ga Cainán gatei dayé i tu Enós. Ga Enós dayé i tu Set. Ga Set dayé i tu Adán. Ga Adán gãrapi tu Dupade.