Lúcas 17 - Dupade Uruode

Udojo oquigode u pipesute gajnarétigo ujetiga chetingare yoque

¹ Jesús qué cho dacadigode ore quique ome pipesute gajnarétigo atígo yui. Ga chósi tome ore: –A jecucha ga cucha gajnarétigo déji erámi jne ujetiga pésu uacajuredie ome uacapotiguérigo jne. Mu yirajágo uje Dupade ujuyaquei gajnengórone a udore u jne uje ore acadique dojode ayoré ome pate gajnaréngone.–

² Mu chojninga: –Cucha ueradi tu ujetiga pigarique uté gosi ome cucarané cucháberaque aja etabi. Ga paranája yote quedéjnai. Uje Dupade ujuyaquei a ca chajire re ome uté gosi jne uje uté gosi chacadósi disi parátagabode ome pisijnaringuéone adode gu.

³ Jecute ajusópise uaqueo. Ujetiga bojórique Dupade anguresõre pésu cucha gajnarétique ome ua, mu bo ga o uté gosi quique. Mu ujetiga uté gosi ajéo ga chécãre datígo ome ua ga, jĩrique aya bájningai ome.

⁴ Ujetiga bajõrai ate gajnarétigo gare iji ti ome ua iji diri chojmarárique mu uté gosi chojningame ua, "Jé yiya yate gajnaréngone." Enga be ga acadígui ate gajnaréngone gatuaque.–

Ujetiga atíãpe yocanguretigárique múñi a jé cuchárique tṍraji

⁵ Enga Jesús irógode qué catecãrápoi yocangaráni gaté rĩ ga ore chojningame: –Ajnerámome yocanguretigai tiji ua.–

⁶ Mu yocangaráni Jesús chojningame ore: –Ujetiga atíãpe uacanguretigátique múñi, ujetiga gajnua tu cucha ajñu atíãtaque uje i tu mostáza, mu a jé cuchárique tṍraji. Ga a uacarúrigo tocaderase ga a ojnichórasa ome pore cucháberaque: "Be ga écãre bajogatíguiji de, ga jé ayábiji yote quedéjnai ajei." Ga a uaté dorási uacuñeque urúrigo quitígo.–

Jé ca yicotágo yoque ome yoquipesutígo cucha

⁷ Jesús qué jno dacajnequéode údi ome ore ga chósi te: –A uacuñeque dérasi ujetiga uacuñeque irótique cuse. A gosi iroi chajnirase re iji dasatígo mu que togome uté gosi ujetiga jĩrique taque.

⁸ Mu a uaque gosi chojningárasome darótique: "Be ga apésabu yoquibotígo ga bo údi ome yoque. Ga a yejnangorase yoquibosode guesi ga quene baque to."

⁹ Isocai jé u ome baroi uté uje que toc ujetiga acãre gai gatuaque ome imanitígo cucha ome ua. Uje jmapié jé u gu ujetiga uté gosi jé gajnei u gu ujeta pésu baroquéode.

¹⁰ Jé isocai tu ome uaque, ujetiga ca asíyo uacabai ome uacamanitígo cucha ome Dupade. Mu cucha omi tu ujetiga ojnicho: "Cachi yipesute cuchade ome Dupade. Dupade iroque yu gu ga jé tiógara ujetiga yipésu iroquéode. Mu que togome yu ujetiga yicota yu ome yipesutígo."–

Jesús chiqueta jnaníringo, lépra isatígo, uje ore chejna yijmanáyone nanique

¹¹ Enga udojo quigade ga Jesús qué jnome daqui uje chicáji Jerusalén. Mu chicapísiji ore unirone Samária, Galiléa ore ujai to ome daqui yui.

¹² Uje chirõre ore idáyatique mu ayoré ejnarétatigo ore chisíji dajeque pajei uje ore chejna yijmanáyone. Enga ayoréode udore ore ejnaréquedatéi i tu lépra nanique. Mu ore basíji quedéjnai ome Jesús.

¹³ Enga ore chinguíra dabijnanone aja Jesús, enga ore chojninga: –Yocacadisṍri Jesús á, ¿jé gotique gu a uje que osõrape yoque a?–

¹⁴ Mu uje Jesús chajire ore ga chosõripise ore ga chojningame ore: –Boyo, ga angongachoba uágaja judíode yocangaránone sacerdote ore uje ore déji Dupade iguíjna cuchábi.– Ga ore jno mu qué ore déji yui mu ore chunina mu íjnoque ore ejnaréngone ucode.

¹⁵ Uje ore chimo uje Jesús chiqueta ore jnese ga uñeque chajniápo aja Jesús gai rĩ. Ga uté tijapísa aja daquigode uje chejnapúsu dabijnane.

¹⁶ Enga chisápo Jesús rĩ. Ga chichaga dagataidie iji Jesús iquei enga chacãripise gai uje chiqueta que. Mu jnani tuté que judíode jõra to go mu samáriagosode jõra.

¹⁷ Jecute Jesús chojningame: –¿Ga jé ca yiquetade ayoré ejnáño yijmanáyone que a? ¿Bajõráringo jé ore déji rique a, udore uje a gagájni ore iji ti?

¹⁸ A purása quedéjna ua múñi, gusúpusu ua uje bajni yibai ujeta atija Dupade ipesútedatéode ome ua que.–

¹⁹ Jecute Jesús chojningame jnani tuté: –Ãriji ga ayague. Ga bope uje yimóngo banguretígadatéi ome yu ga jé tiógara ome báringai piquetaque.–

Jesús chatata Dupade diringárique isocárique jne ome yoque

²⁰ Mu diga fariséode uñéngo ore catecã́ri Jesús to ga ore chojninga: –¿Jé cho rique jne Dupade diringárique ujetiga yoco yoqueduguéjna iji, iji de jnumi a?– Mu Jesús chajnai ore ga chósi tome ore: –Cho jeta cucha Dupade diringai ga pimojma quitígo,

²¹ ujetiga uacuñeque chimo ga chojninga: "De de jã," jeoga chojninga: "De ta ya." Uje que pisocai tu gotique. Mu Dupade jé déji uacajade mu que arajáyo gotique.–

²² Mu Jesús catecã́ri dacadigode ore ga chósi tome ore: –A chise dínique jne ujetiga apótayo jóroga amóñopórase Dupade utocaidi uyu jne rĩ ome dire chojmarárique mu a ca toque jne ujetiga amóñopo yu rĩ.

²³ Uje a uñéngo potárasa jne jeta chãra uaque ga a ore chojningame uaque gosi jne: "Dupade utocaidi déji de arĩ́e." Jeoga uñéngo chojninga: "Yudúco to uje déji ta." Mu ca angáchoi udore gosode ore ujetiga abáchoi ore to.

²⁴ Uje yiríringárique gajnui tu ajnorátique. Uje tṍraji gaté ga chicai quedéjnane jnese. Ga ore chimo jnese.

²⁵ Mu ujetiga cáma yiji ome uaque ga a qué yo ducujuyade bajaque jne. Uje a ayorébujnane diríe jogonóño a ore chetaguipise yu jne.

²⁶ A yiji ome uaque jne. Mu a chise dínique jne ujetiga yĩriápo rĩ. Ga a yiríringai yui gajnui ta u jnani bajai Noé ore urasade.

²⁷ Uje Noé urasade ore isocai u nanique uje ore áyipiedie gaidode upúsu daquetangóningo cucha ome raque nanique. Uñane ore áyipiedie gaidode u dabosode. Jeque uñane áyipiedie gaidode u dajódode cucha. Jé basa uñane ore áyipie qui tu darodie ujeta ore chijna ore aja ore amaníngo. Mu chise diri uje Noé e ore chacája dabi cuco cuchape. Enga uje ore chimate rágaja ajei ga jé u uje gue dequejnangóri diringai tu ome ore ujeta chejna ore ga ore toi jnese.

²⁸ Adi jé upo rĩ ome jnani bajai Lot urasade. Uje ore áyipiedie gaidode u cucha pibosode. Jé aja dajódode cucha rĩ. Jé aja dẽratígo cucha, jeoga ore gaitígo cucha oré rĩ. Jeoga ore áyipiedie gaidode u dejnane. Jeoga daguíjnane ujeta ore pésu.

²⁹ Mu e chise diri uje Lot jnoji ore idai Sodóma. Mu jé u sodómagosode ore cachodi uje Dupade cho dajuñame ore. Uje Dupade chiramurase piotique ore gai uje tṍraji gaté ome ore. Ga jé ca toc ujetiga uñeque ecáji.

³⁰ Ga a jé gajnui tu jne ujetiga Dupade utocaidi uyu yĩriápo iji uaque jne rĩ. Uje ore chunina mu yṍraji gaté jne.

³¹ Ujetiga chise diri ome yiríringárique ga ca uacuñeque chopise dáyugu dagúcharigo iji daguíjnarique ajénique jeoga iji guesi. Mu a jé ca áyipie chachẽre ujetiga chiqueta. Ujetiga uté gosi déji erã́tique, mu ca áyipie déji ugúcharigo iji dedánique.

³² Ga ca jnoji uacajéode uje Lot acoté chiguísãre daquigade gai ga jogadi u uje Dupade ujuyaquei chise.

³³ Mu uté gosi ujetiga cájnaru re ome cuchade ga ca toc ujetiga Dupade chiqueta uté gosi jne. Mu jé basa uté gosi uje que cájnaru re ome cuchárique ga a Dupade iquetai tu uté gosi jne.

³⁴ Ga yingomome yiríringárique isocade ome uaque jne ujeta jé gajnui tu ome ayoré gárerigo uje ore dérasi damochápi chojmarárique iji dejátique, mu a poite uñeque jne. Mu a piñome uñeque jne.

³⁵ Ga jé cho uje chequé gárerigui uje qué ore chijáro dajarotique cucha ujetiga ore déji ñane gari jne. Ga a jõra chuniname jne ti, poidé uña. Jé piñome uña iji.

³⁶ Jé isocai tu ome jnaníringo uje a ore déji erã́tique ga qué ore cháta dasagode aja ñane. Mu poite uñeque jne. Jé piñome uñai iji.–

³⁷ Mu Jesús acadigode ore chojningame: –Yocangaráni á, ¿jé udore déji rique jne a ujetiga tocade a?– Ga Jesús chojningame ore: –Mu ca oyo uacáyugu cuchade udore. Enga gajnui tu ujetiga cuchiso totique déji erã́tique ga chugúpẽre chagúode jĩrique chiraja jogadi.–