Lúcas 14 - Dupade Uruode

Jesús chiqueta jnani uje põ údode

¹ Mu chise dínique iji dire puyátique uje Jesús nóna fariséode uñéngo ore eduguéjnai aja iguíjnarique ujetiga tagábiji to. Mu fariséode uñéngo ore chuquéjnai iji ujetiga ore chimo atígo to.

² Mu jnanírique déji ore gari to uje ejnarétaque ga guejna údode.

³ Mu que Jesús chiqueta jnani míraque mu catecã́ri Moisés urusarane atatasórone, fariséode ore bajaque. Ga chojningame: –¿Ga jé areque ujetiga piquetaque jnanírique iji dire puyátique a?–

⁴ Mu que ore chajnai. Ga jogadi u uje Jesús chiqueta ejnarétai iji. Ga chirógaja doi ga chojninga: –Bo, e yiqueta ua.–

⁵ Udojo quigade ga jé u uje Jesús catecã́ri fariséode ore ga chojningame ore: –¿Ga uacuñeque gachidéraque aquirájna basirásaja ejopiéraque, jeoga búrro, ga uacuñeque ga ca chijnimírase e? Mu a uacasocai urásu to ujetiga jĩrique ajnicho iji dire puyátique ujetiga dire puyaque múñi.–

⁶ Mu que ore chiraja daru quitique ome Jesús uruode.

Gajnareque ujetiga gosi chosi re iji gaté

⁷ Mu Jesús timíninga dojode pinejéramáicho ome ore isocade. Mu ore ajiriguipise ore charipi ueradode ome raque. Jecute cho ore quique ga chósi tome ore:

⁸ –Ujetiga uñeque dejéna uacuñéngo aja daquigáningo ome dapesutique ore ajñamite, jeoga dasaguéraque dacoté, mu ca beyoi uacajmapié uje uacajichopise uágome ore eduguéjnane charipíode. Uje jé socaseti uñéngo di ga ore charipíode gajnengórone quene u.

⁹ Ga a uacanejérasṍri dirase jne ga a chojningárasa ome uaque gosi: "Asi ome bayaripi ome uté." Mu a jé jogadi tu ujetiga boyóji ore charipi tuté ga uacabeyoi ore charipi idájai ga uacajẽ́cho jórogome uaque.

¹⁰ Mu quique uñai déji. Ujeta uacanejérasṍri chise uacuñeque iji uaque gosi charipi idájai ga a chojningame uaque gosi: "Yijõra, écãrape bayaripírique ga ajosape yejoi to." Ga jé jogadi tu ujetiga ore chimo báringai ibijógome uté gosi uje dejéna ua aja dejoi.

¹¹ Jé u ujetiga uté gosi cho cuchadatéji re ga Dupade a sosi gosi iji jnumi jne. Mu uté gosi uje que ibijoque to mu a Dupade sosi uté gosi iji gaté jne uje que cho cuchadatéji re gu.–

¹² Jesús catecã́ri danejérasṍri fariséo uté ga chojningame: –Ca osõre bajogasúrique ore ome cucha pibotique, jeoga baguiotique, jeoga bojórique ugúcharã́que. Uje uté gosi a jĩrique chatire bosongaquei babai gu. Ga bajéode qui tu gu ujetiga uté gosi jĩrique chatire babai, jeoga jĩrique cho boré.

¹³ Mu quique uñai déji. Ujetiga osõre uñéngo ga bosongaquei gajnengórone urásu jmatágode, pérogode ore. Jeoga tatógode. Jeoga edoparigode ore u.

¹⁴ Ga báringárique pirasique pijoque ome ua jne. Uje que togome ore ujetiga ore cho boré. Mu a Dupade u jne ujeta cho bosongaquei uté oré jne iji diri ujetiga chiquetápo ayoré ate ujñapetade ore rĩ ujetiga ore nijiápo rĩ iji dáringai toque quigade.

Jesús pésu ejémplo ga chacãra dacajnaquéode aja jnani canirai uté uje ujode ayoré ore chetaque pijnane ome dagapítedatéi

¹⁵ Mu uñeque chudute Jesús acajnaquéode udore to uje chacásõra ore iji ore atigai to que. Ga chojningame Jesús: –A cachi udore ore irasique re jne ujetiga ore tagu dabosode iji Dupade gari ujetiga uté e chácariji dáringai ore eduguéjna cuchape jne.–

¹⁶ Mu Jesús chojninga: –Gajnui jé u ujetiga jnanírique dejéna uaque gosode aja daguíjnarique to ujetiga uaque gosi taguíji gari to. Ga jiépisi inejerãtígo uaque.

¹⁷ Mu a chisírase guedé batigai uje e ore taque ga chiroque daroi aja dabiditígo ore ujetiga ore di ga ore taque to.

¹⁸ Mu uje iroi tibágui ore mu ore chãra ránguiji cuchade jnese. Ga bajai chojninga: "Quene yiji jnumi oré que. Yipotapísa ujeta qué yajirape to. Yopise yáyugu uje que yicáji ua ome babijnane."

¹⁹ Mu ejoi chojninga: "Quene yṍraji te que uje yiji aquirájnanie uje chejna yijmanáyone. Ga yipotapísa ujeta qué yetingare ore ujetiga yigaru ore aja ñane. Yopise yáyugu múñi babijnane."

²⁰ Enga ejogatei chojninga: "Quene yacoté yisago ñane que. Jecute que yicagóji babijnane."

²¹ Jecute iroi díji darósõri ga chingo ore adode ome jnese. Enga irósõri ájningaránguipísome ore. Jecute chojningame daroi: "Bope jne rĩ ga acáji idáidatéi údode jnese ga ajnáma ayoré jmatágode, ayoré pumajone, ayoré pérogode ore aja de. Jeoga edoparigode ore aja de."

²² Mu udojo quigade ga uté iroi catecã́ri darósõri, ga chojninga: "Yangaráni á, e yipésu baroquéode jnese. Mu qué edo cuse ujetiga piyarite."

²³ Enga jé u uje uté irósõri chojninga: "Jé bopo rĩ ga acabíji dajéode rĩ iji ore idai údode ga ajóchape ayorérigo uñéngo ore ajéode údi ujetiga ore chacabája yocari to ujeta ore chĩreta yiguíjnai. Uje yigaidi tupúsu gu ujetiga ore chĩretapise yiguíjnai.

²⁴ Mu yojningame uaque: a yibididique bajáiso a ca uñeque chacája yocari iji de to jne jeta uñeque taguíji yocari to. Que ore pota gu iji taningai."–

Ujetiga gosi potárasa chajna Jesús to ga gosi noñome cuchade jnese

²⁵ Udojo quigade ga ayorébui ore chajna Jesús to. Enga Jesús chiguísãre ore gai ga catecã́ri ore.

²⁶ Ga chojningame ore: –Mu a ca togome uté gosi ujetiga chajna yu to ujetiga ca cha dayé, daté, dacoté, dabode, dajõráringo, jeoga dajõráringui udojo ore unerane jnese. Ga jé aja re rĩ ujetiga cha danétique to. Ga quene jogadi tu ujetiga chise dáringárique yimeserãque ome re.

²⁷ Mu jec adi tu to ujetiga ca cho daba yu ga ca togome uté gosi ujetiga chise dáringárique pacadisõre ome yadode.

²⁸ Ga jé gajnui tu ome uacuñeque ujeta potárasa dapesutique guiguíjna. Mu gosi chucué dáyipie ome bajaque ujeta jé chimate jne. Socaseti iplátaraque chona ga gosi ca chimate.

²⁹ Mu ujetiga ca chucué dasocáringome dapesudode cucha ujeta chimate jne, ga cha dapesudode udore uje iplátadie chona. Ga jé cachodi tu uje ujode jnanío ore cana gai. Uje que chimate dapesudode go.

³⁰ Ga a ore chojningame jne: "A jnani tuté ipesute daguíjnai quigode diríca mu que togome jeta chimate go."

³¹ Mu jé gajnui tu ayoré dacasutéraque to ujetiga pota pocaningárique ome dojóraque dacasuté. Mu qué uté chucué dáyipie bajaque. Doi ga chisecãru darógode. Chisecãrápo dojórique eduguéjna irógode to rĩ.

³² Mu ujetiga chiraja uje que toque jeta ore sué ore gai uje jiépisi ore, ga uté doi ga cha dáyipiedie ome dajocaningai. Ga jĩrique chiroque darótigo aja ore ujetiga ore chaquĩ́ra ore ome pocaningai, uje qué idája ore múñi.

³³ Jecute uacasocai turásu ujetiga acueyoi uacáyipiedie ome yadode bajaque to. Ujetiga ca ayáyo uacagúchade unerane jnese ga a ca toc ujetiga eso uacáringárique yajnangore to.

Ujetiga echoi charásu dáringai unere ga e noñarase ga cucha bisideguirase

³⁴ Echoi uerate múñi, ujetiga charásu dáringai echo ga e que cuchárique tṍraji uté to.

³⁵ Que toc ujetiga ayorérique chijna ome datique. Nóña ga cucha bisideque. Mu pisocai u ujetiga parãte. Mu uacajnúone cucha déji to. Mu ujetiga apéso uacáyipierigui ome ga a arajáyo quigode udore, ujetiga angáchoi.–