Juéces 9 - Dupade Uruode

Gedeón ujnacari Abimelec adode u udojo nanique

^1-2 Iji dirode uñai ga Gedeón abi Abimelec chicáji daté idai Siquem ga gaidi tu jeta catecã́ri daté urasade ore iji ore idai tuté. Ga chojningame dajogasui ore: –Acatecãchoi guidai tudé ore asutedie jnese ome yai Jerobaal abode ore, uyoque uje yai uté i uñai u Gedeón nanique, enga ojnichome ore: '¿Ga ueradi tu jeta angáchoi Gedeón ape chojmarai, jeoga angáchoi abode jnese uje 70 u ore?' ¡Mu ajnusináño uje uacaguiosi tupúsu yu arĩa ga a jé omi tu jeta oyo uacangaráni iji yu jõ!–

³ Enga Abimelec jogasui jĩraque ore doi uru quigode. Ga ore chisite rágaja guidai údode jeta ore chingome guidai idaisórone jeta jé ca uñeque chumuchase ore áyipie quitique. Uje ore chojninga: "Aracho yoque ga yoco yocasuté iji Gedeón abi Abimelec jne. Uje yocurásapise uté gu."

⁴ Enga jé u uje siquémgosode ore chijnime pláta guebéode iji ore angureni Baal-berit jogadi ga ore chisi ome Abimelec uje 70 u pláta guebéode udore. Enga ome pláta guebéode udore ga Abimelec chutṍri ayoré yungóreméone jeta ore nóna aja ore idai Ófra ga ore chujé Abimelec desade ore jnese uje ore chise 70. Ga uté chimate desade yungórone ome doidedie uquidé pláta guebecho.

⁵ Uje ore chise ore idai Ófra ga jĩraque Abimelec chijnare aja desade ore ga jno ore údi aja cucarané cuchabé ga ayoré yungóreméone jĩraque ore chigota Gedeón abode udore ore iji jnumi ga ore chujé ore iji cucarané cuchabé uaté gai jnese. Mu Gedeón ape ejópisi tu uje chacose rome ore ga chayome ore ga chapídiji dayade ore cachodi. Enga uecai uté i tu Jotam nanique.

⁶ Ga udojo quigade ga Siquem idaisórone, Bet-mílo idaisórone ore chimáta ñane iji ore angureni Baal-berit gajnei gaserãte uburúpie pore údi iji ore idai Siquem uté. Ga ore eduguéjnane jnese chojningame Abimelec jnese: 'Yoqueduguéjna cuchábi u Abimelec iji yocuniri tudé.'

⁷ Uje Gedeón ape ejoi Jotam chudute to uje siquémgosode ore pésu deduguéjnarique iji dayade ore yusṍri casica ore ujo daya Abimelec ga choru cucarani uté iji ore idai uté ejoi uje cucarani i tu Gerizim. Ga chinguíra dabijnani aja siquémgosode iji dádi ga chojningame ore: "¡Siquémgosode á! ¡Jnanione uaque á! Ujetiga uacagaidi tu jeta pangarate uágome Dupade enga jé cangachobi yu to.

⁸ A qué yacãra yuruode aja poridie jne enga a yatata poridie ore uru quigode ome ñane jne uje cachi ore chucué deduguéjnarique iji dojodie pori ujade. Ga ore pota dojo pore uje i tu Olívo jeta ore cho deduguéjnai iji jne ga ore chojningame: '¡Be ga ajuéga jeta yoco yoqueduguéjna cuchábi iji ua jne!'

⁹ "Mu poria uje i tu Olívo chetaque ore uruode diríca ga chojningame ore uruode: 'Que yipota jeta yi ga yécãre yijogatique iji de. Uje yijnorapise yadie gu jeta ore chijose yadie ga aceite déji jeta ayoréode ore chagutíyame. Mu que gusu ayoréode jeta ore chagutíyame yu, mu Dupade chagutíyame yadie to iji iguíjnai.'

¹⁰ "Ga adi jé upo rĩ uje poridie catecãrápoi dojo pore uña uje i tu Higuéra, ga ore chojningame: '¡Be ga ajuéga jeta yoco yoqueduguéjna cuchábi iji ua jne!'

¹¹ Mu Higuéra chajnai dojodie pori ga chojninga: 'Que yipota jeta oyo uaqueduguéjnai iji yu. Que yipota gu jeta yécãre yijogatique iji yapácadi udé. Chamáña uneréjna yadie gu ga ayoréode ore chagutíyame yu jnese gu yadie udire.'

¹² "Ga poridie ore catecãrápoi quirodie to rĩ, uje ore chojningame udire úva: '¡Be ga ajuéga jeta yoco yoqueduguéjna cuchábi iji ua jne!'

¹³ Mu quirodie chojninga: 'Que yipota jeta oyo uaqueduguéjna cuchábi iji yu ga yécãre yijogatique ga a yiya yipésurásu yadie. Mu que yipota jeta oyo uaqueduguéjna cuchábi iji yu uje Dupade chagutíyame yadie udire gu uje ore chojne yadie otadi ome deranone cuchiso to uje ore tẽrája Dupade ome. Ga jé chopome ayoréode rĩ uje ore chagutíyame yadie otadi to, ga pésu ore irasitigade ome ñane.'

¹⁴ "Ga poridie jnese ore catecãrápoi dojo pore ojnacúco to rĩ ga ore chojningame: '¡Be ga ajuéga jeta yoco yoqueduguéjna cuchábi iji ua jne!'

¹⁵ Enga pore ojnacúco chojningame dojodie pori: 'Ujetiga uacajéode upúsu jeta oyo uaqueduguéjna iji yu ga ácayoji yuburúdi jnese ga beyoi yojningane cucha jnese jne. Mu jeta jé ca uacajéode u ome yu gajneri, enga ¡yipésupú ga pioque cuchátique tṍraji yibijnani ga tagu cucarãte cuchábi gai jne uje i tu Líbano, enga chejna ¡jaripe! enga a yujodie pore ujñapetei ore íjnoque iji uté jne uje poridie udire íode u cédro jõ!'"

¹⁶ Ga Jotam chimate dojñane udore aja guesi ga jé u uje catecãripísi darasade ore ga chojninga: "¿Ga ũrépise uaque ga uaqueduguéjna cuchábi u Abimelec uté jne a? ¡Uje uacoyo uacagutíyamániji yai nanique uje yai uté i tu Jerobaal ome uaque nanique! Yocai uté déji uacajade nanique ga susípise uaqueo nanique ga chosõrapo uágome cuchade nanique rĩ. ¿Ga osṍcho uté ujnacarode to diríca ya? ¡Úngare!

¹⁷ Uje iapade cho dajocaningame madiángosode ica ga chiraja uje madiángosode a ore chujérase, mu cho dajocaningame ore ica gu uje chirota uaque ga gaidi tu jeta chijna uáguiji madiángosode jmainie ica.

¹⁸ Mu uaque ga uacapótayo jeta ejnáño yocai casica ujnacaripísode ore uyoque uje 70 uyoque mu uacanguíraño yuyade aja cucarané chojmaráraque diríca ga uaquejnáño ore jnese. Uaquetácho yocai casé ujnacaripísode uyoque mu uacapótayo jeta oyo uaqueduguéjna cuchábi iji yocai casé mochápasa chequé abi Abimelec uté iji uaquedai tudé Siquem. Que uté isocade ueracho gotique, mu uacapótayo úringárique uaqueduguéjna gu uje uacacaya uté iji uaquedai Siquem udé.

¹⁹ Ujetiga ajusórase Gedeón jogasui yoquio diríca ga a jé ca yetaguirase uacatique jne, ga a jé tiógararása jeta oyo uaqueduguéjna cuchábiji uacajegaidi Abimelec uté jne ujeta chuse uaqueo ga a uté chagutíyame uaque to jne.

²⁰ Mu ujetiga jé ũré ga gajnareque uacasocade ome Gedeón jogasui uyoque diríca ga ¡yipésupú ga pioque cuchátique tṍraji uacajegaidi Abimelec uté pijnani jne ome uaque ga tagu uaquedai Siquem udé gai, jé aja bet-mílogosode uaquedai to jõ! ¡Ga yipésupú ga pioque cuchábi tṍraji Siquem, Bet-mílo idaisórone uaque ga chajni Abimelec gai jne, ga chãru uté gai to jne!"

²¹ Uje Jotam chejna daruode udojo guesi ga jĩraque chayome ore, ga chijna dagajñua aja ore idai uje i tu Beer ga chácariji uté to uje todo dayai Abimelec gu.

²² Enga israélgosode ore cho deduguéjna cuchábi iji Gedeón ujnacari Abimelec aja siqueré gadióguedie nanique.

²³ Mu udojo quigade ga Dupade chiramurase pujopié noñangue siquémgosode ore gai nanique uje pujopié uaté oidi u petétigai. Ga siquémgosode ore chetaque dajegaidi casica deduguéjna uje i tu Abimelec ica, ga e ore tagu uté uruode aja to.

²⁴ Ga Dupade chucué dasocáringome siquémgosode, Abimelec ore gu uje ore cháta raja ñane ome dajmongaquei uté ome Gedeón ujnacarode ore ica uje ore batigai u 70. Ga jé u uje ore chijnime Abimelec dayade udore iyode bisideque iji cucarané gai, ga e Dupade pota jeta cho udore ujo ome dajuyaquérique jne ome ore.

²⁵ Ga siquémgosode ore chiroque jnacarode uñane ore nanique jeta ore cho danunguéji dajeque pajéode ga ore chirote Abimelec yui iji uté, jeta ore chujé jne. Ga ore toria ayoré urugúode ore iplátadie iji dajeque pajéode iji cucarani údi uje ore chajna ore urugúi iji cucarani amotacúdi. Ga Abimelec chudute siquémgosode ore ujnomei to uje jecucha ore chajnose ayoré urugúode ore iji dajeque pajéode.

²⁶ Dirode uñai ga Ebed ujnacari Gaal nóna desade ore ga ore chicáji Siquem to. Enga Gaal uté ipotigádi u jeta ore cho dasuté iji uté to ga Siquem idaisórone ore irasique uté.

²⁷ Ga siquémgosode ore doi dacadie úvai ga ore chijose ga ore pésu yote pioi iji ga ore chóji iji dangurenone dupa quedéjna iguíjnai ajei. Ga ore dejéna Gaal uté to aja dajmini, ga cháta raja ore to. Ga ore dojnóngaja deduguéjnai Abimelec jnese.

²⁸ Gaal chojninga: "¿Ja cuchárique asuté Abimelec uté jeta tangári uru quigode? Abimelec dai Gedeón que déji cucha dacatique to ga uté jé chopise dai uje que pasuté gotique. Jé cho iróquegatébi Zebul uje que ujñapegápo to rĩ ga que déji cucháringome yoque. Yocáqui Hamor uje ipesute yoquidai udé nanique ga jé tiógara jeta yicoi iroqueóde uje dacasuté gu. Mu ome Abimelec uté ga a jé ca yangácopoi jne rĩ uje que yagutíyangome gotique to gu."

²⁹ Ga Gaal qué jno daruode údi ome ore ga chojninga: "Ujetiga oyorase uacasuté iji yu ga a jĩraque yiquítequiguíji Abimelec ga yujé uté, irógode ore ¡jaripe!" Ga Gaal uté chojningápome dabijnacaraidie rĩ: "¡Abimelec, ayague, ga ajína basoldádode ore ga beyoi yu ga yujégo ñane é!"

³⁰ Enga siquémgosode ore asuté Zebul chudute Gaal uruode quigode udore nanique to ga ájningaránguipísome.

³¹ Ga jé u uje Zebul uté toria chiroque dáyipiedie aja Abimelec uje déji ore idai Arúma to. Ga chósi te: "Ebed ujnacari Gaal ore diji Siquem to ga nóna desade ore aja de. Ga chijnime petétigai ome ua iji yoquidai tudé ga yocurasade ore chietáyime ua jnese to.

³² Jecute boyo ga ajína basoldádode ore jne iji dejai gajneri ga acóso uáguiji yoquidai Siquem udé ejórique jne.

³³ Mu ujetiga guedé quene tocade dirome ga jĩraque achẽ́cho yoquidai dirome. Enga a Gaal, jorane ore chirota ñane dirome ga be ore ga apésu bajegaitígo ome ore jne."

³⁴ Ga Abimelec, isoldádode ore jnome Siquem yui iji dejai ga ore chajuque dapajei ga péode gagájni ga ore chaparu siquémgosode ore gai.

³⁵ Uje Gaal ore doi guesi tiji ore idai gabi ga Abimelec, ore doi guesi tiji danunguenie to.

³⁶ Uje Gaal chimo ore jochai ga chojningame Zebul: –¡Cajire pijochai to é! ¡Chicai yoqui! ¡Ore doi jnumi tiji cucarani ójo!– Mu Zebul chajnai uté uruode ga chojninga: –A jé ca ayoréo bamone gotígo. Cucaranone oredie u ga cho ayoréode.–

³⁷ Mu Gaal qué chajo raja daruode, ga chojninga: –¡Que gusu udore uje ore tṍraji cucarani ójo, mu uñane tṍraji yocajmini dajeque uje yojnijome 'Jnumi Ichacurei!' ¡Jé uñane tṍraji pore cuchabé encína gabi dajeque uje daijnane ore angurené uaté ome dajopiedie!–

³⁸ Zebul chojningame Gaal: –Gaal, chérecheréchoquí á, bojningame Abimelec diríca: 'Que uté déji cuchárique ga que pasuté.' Cajire gojni ore jochaguéjnai uté to enga be ore ga ajé ore jne uje jé bo báñiejáme ore yui diríca gu.–

³⁹ Enga jé u uje Gaal doi guesi iji ore idai jeta doi Abimelec ore ga idaisórone ore íjnongaja quigade, ga Abimelec, ore chujé ñane.

⁴⁰ Mu que Gaal ore ujñapéguiji udore ore jmainie, ga Abimelec ore chayóna ore ga ore yugode jiei iji jnumi iji ore idai Siquem gabi uté nanique. Mu Gaal uté chayome Abimelec ga chacose re iji ore idai uté ajei.

⁴¹ Uje ore cha dajocaningai ga Abimelec chajniapója ore idai Arúma to rĩ ga chácariji uté. Mu siquémgosode ore asuté Zebul chisa Gaal, desade ore ga chijócãre ore iji dedai.

^42-43 Mu dire uñai enga siquémgosode ore chicapóji guesi tiji ore idai mu Abimelec, isoldádode e ore pógu re iji ore idai ejode. Chamáñaje Abimelec e chudute gu uje a ore doi ore jne iji dire uñai, ga e dimane ome ore yui. Abimelec e ore chajuque ñane pajei que, ga ore péode gadioque. Jecute uje siquémgosode ore doi guesi tiji dedai ga jé u uje Abimelec isoldádode tṍraji dajñarenie jnese iji ore gai.

^44-45 Abimelec isoldádode ore cugujnáji siquémgosode ore idai piagoi ga jĩraque ore chãraque, ga ore urasade uñane chacája siquémgosode ore idai ajei ga ore chujé ore iji uté údode jnese. Jé basa ga ore peque uñane chajna siquémgosode iji garáijnai, ga ore chicha ore cachodode aja sona. Abimelec, ore chujé siquémgosode iji diri údode jnese. Ore sué siquémgosode ore gai, ga ore chejna guidai idaisórone jnese ¡jaripe! Uje e ore chajnangarase cuchade aja dejode, enga jé u uje ore chujmute echoi ore idai gai. Ore gaidi jé u jeta jé ca jnumi ujñapegápo iji ore idai te rĩ ome cucha pacade.

⁴⁶ Uje Migdal-siquem idaisórone ore chudute jõcaratade ujnomei uje Abimelec ore chejna siquémgosode ore, enga ore chayome pocaningai ga ore chicáji ore oragadé uje piagoi chojmára jeta ore pógu ráguiji uaté ajei. Ga déji ore angureni dupa quedéjna Baal iguíjnai ejoi uje Baal iguíjnai uté i tu El-berit.

⁴⁷ Ga Abimelec chudute uje Migdal-siquem idaisórone ore déji ore oragadé cucháberaque ajei.

⁴⁸ Ga jé u nanique uje jno darasade údi aja uguíjnamui uje i tu Salmón. Ga chisa ajineré ga chaquesu pore ejnume ga chijnoque ga chicháji dorotadé. Ga chojningame dasoldádode: "Jĩraque aquesúyo pore ejnúmenie ga achayóji uacorotaidie to ga jé beyoi yisocai ome jne ga yico údi.

⁴⁹ Ga ore jno údi ga ore cherója ore oragadé ejode ga ore chipota ejode jnese ga ajeminórone, jnanione jé aja chequedíe, ore toi jnese uje que toque guesi ome ore gu. Ga Abimelec ore apósegáyode udore ore chise 1.000 nanique uje ore toji ore oragadé uaté ajei.

⁵⁰ Ga Abimelec, isoldádode ore dopoi tébesgosode ore rĩ. Ore chaparu ore idai gai, ga ore suépo ore gai to rĩ.

⁵¹ Mu Tébes idaisórone uje ore chudute uje Abimelec a doi ore jne, ga ore quejnája dedai ajã́ro jnese ga ore chacája ore ora asṍrejna ajei ga ore surúpusu ore ora uaté piagoi. Ga ore quítequiguíji ójo jogosṍri ajé uje ore pésu guiguíjnai iji gatajidipísi gu. Jecute uje Abimelec, isoldádode ore chise ore idai Tébes uté nanique ga jnanione, chequedíe ore déji ore ora uaté ajei jnese.

⁵² Ga Abimelec chise asṍrejna uaté piagoi ga cherója piagoi jeta chipota pioi iji uaté piagoi.

⁵³ Mu uje Abimelec qué déji derogode gai jeta chipotárase asṍrejna joride gajiné mu chequéraque iji asṍrejna ajé uñai chajire mu e cherója ore ero ga chisa degué cucarané enga chiramurase Abimelec taroi gai ga chimochẽre gatodé ajnoquei. Ga chequé uaté ijarode erãto jé u cucarané iménua uaté nanique.

⁵⁴ Uje Abimelec chimo uje chequé chiramurase cucarané gai ga chapu re ga tibidi daroguipísi ga chojningame: "Ajnime baquesei ga achagu yu ga ogota yu jne. Uje que yipota gu jeta yocujode ayoré chojningame yu jne: 'Chequé yugape Abimelec uquécasé.'" Ga iroguipísi chijnime daquesei ga chogota Abimelec ga jé u uje topísi.

⁵⁵ Uje Abimelec e toi ga jorane soldácho ore chajníja daguíjnane jnese.

⁵⁶ Dupade que chise Abimelec isocade unétique uje cho jeta jocaningai gajnei tu dai Gedeón uje chejna uté abode ica gu uje 70 u ore ica. Mu jé chejna ore ga quene Dupade cho dajnutabádu udore ore ga juéga pitoringai ome Abimelec uté uje ore chujé iji jocaningai to.

⁵⁷ Ga Dupade juégapo pitoringai ome siquémgosode ore to rĩ uje ore jõra Abimelec uté nanique aja Jerobaal abode ore uje cho dajocaningame ore ica. Jecute quene ore chimo Dupade jocaningai ome raque to uje Abimelec chujé udore ore jnese. Gusu Jerobaal abi Jotam u uje chapídiji dayade ore gajnei pocaningai ica ga uté cho darúja siquémgosode, Abimelec ore ica, ga amangaquéode tocade ome ore idai Siquem, jé aja ome ore uyai Abimelec uté to, ga ore toi jnese.