Juéces 8 - Dupade Uruode

Gedeón cugujnáji madiángosode ore eduguéjna cuchábode nanique ga jĩraque chisa ore

¹ Uje e ore cha dajocaningai ga efraíngosode ore dosója Gedeón ga ore chojningame: –Chimo jóroque re uje que batocaidode u yoque to diríca iji pocaningai taningai, mu uje madiángosode ore chayome uaque ga quene batṍri yoque.–

^2-3 Mu Gedeón chojningame efraíngosode ore uruode: –Cachi uaque u uje uacajnuéño baja casodé ore yoquibai. Uje cachi yocachẽraque ore iji ore irengúi diríca, mu uaque ga uaquejnáño madiángosi casodé ore aja jnumi enga uacasayo ore eduguéjna cuchábode. Yojningane u Oreb, Zeeb ore uje uacaquesúyo ore etabídode diríca. Mu uyu ga que yatique cuse to iji ore jeta yujórique ayoré chisi yibai ome.– Uje efraíngosode chudute Gedeón uruode udojo ga jĩraque ore cha dajei dotáningane ome.

⁴ Ga jé u uje Gedeón, jorane soldácho ore uje ore batigai u 300, ga ore chaquesu yote quedéjnai Jordán ga ore chicáji uéchamitó jeta ore chajna damajosórone iji jnumone. Ga eyuque ore iji dariguítigade, mu jé ore chajo rágaja damajosórone jeta ore chujé ore iji toniñeque.

⁵ Uje Gedeón ore chise ore idai uje i tu Sucot ga catecã́ri ore ga chojningame idaisórone: –Uacuñeque chisi yóguiji dajóningárique jne jeta yijorane udore jnacare ore tagu uacuñeque osongaquérique. Chamáñaje e ore diape ome chaguhei ga qué yajnángo madiángosode ore asutedie jeta yichago ore cachotígaja toniñeque uje ore íode u Zéba, Zalmúna ore.–

⁶ Mu Gedeón ore guiyai guidai ore asutedie chajnai uté uruode ga ore chósi tome: –¿Ama e uacojninganie udire ore asutei déji uacajmainie a? ¡Cáma ore déji uacajmainie arĩ́e, enga a jé ca yisígo uáguiji cucha pibotique gotique to jne!–

⁷ Gedeón jĩraque chajnai ore uruode chojninga: –¡Jé areque! Ujeta Dupade e tẽra Zéba, Zalmúna ore ome yoque dirome iji erãpetarei ga a yoquiquítequigápoja uáguiji de jne rĩ, ga a yajnangaráco uágaja yoquejode dirome ga a jé yoco yocõráchaguiji catáguedie, jé aja ojnaquérodie jne ome uaque. A yisago ojnaquérodie udire jne iji erãpetarei ga a yocõrachade u udore dirome jne ome uaque.–

⁸ Gedeón ore chisápo ore idáyode uñai te rĩ uje i tu Peniel ga chutápoi ore ome cucha pibotique rĩ, mu jé ore adi u deyaque bajai tuqué ore idai isocai. Que ore chisi ore iji dabotique.

⁹ Jecute Gedeón chósi tome ore: –A yajníngo dirome ome yocúringane pujnuéngaisóño enga a yucuácome uacoragadé uaté dirome uje chiese uacuñeque tibágui ga uaque gosi chacája ajei ga que cuchárique chósi ti iji uaque gosi iji uaté jmainie.–

¹⁰ Ore ajnanie dacasutei udire, Zéba, Zalmúna ore, e ore déji ore idai Carcor. Ga udire ore jorane soldácho uje ore chayome Gedeón to ga ore déji ore idai Carcor uté to. Jiépisi soldádode udore uje ore tṍraji guedé garani yui iji pocaningai taningai, mu Gedeón ore yugode chise 120.000 iji ore diríca ga jé u uje uecade gusu 15.000 jnese iji ore jocaningai quigade.

¹¹ Uje Gedeón ore chise erãpetarei ga que ore chacája gotique. Ore chajna dajei iji dosadi uje tṍraji erãpetarei uté uéchai uñai. Ga chicáji ore idáyode Nóba, Jogbéha ore yui iji guedé garani yui. Ga ore asutedie Zéba, Zalmúna ore irógode jecucha chajire dajei garani jeta ore chimo dajnasóningo iji daquigade, mu que ore chajire dajei garani to iji daquei, ga jé u uje Gedeón chachẽre ore ga ore tṍra rome uje ore tṍraji ore iquei.

¹² Ga madiángosode ore asuté garedie Zéba, Zalmúna ore chayome Gedeón ore mu Gedeón cugujnáji ore ga jĩraque chisa ore asutedie udire ore. Uje Zéba, Zalmúna ore jorane soldácho chimo uje Gedeón ore chisa ore asutedie udire enga chajuguipise ore agutedie nanique.

¹³ Iji udojo quigade ga Gedeón ore chajníji dajocaningai ga ore chajna tuijnárique aja cucaranone uécha uñai. Ga tuijnai uté i tu Héres nanique.

¹⁴ Enga Gedeón ore chise cucaranone uéchai ga ore chague jnacari gai iji uté uje idai tu Sucot. Ga ore chisa jnacari uté ga jno údi aja dasuté Gedeón. Ga Gedeón chojningame jnacari tuté: "Arúsãrape uacasutedie íode iji uaquedai, jé aja uacangaránone ore írigo to." Ga jnacari uté doi Gedeón utoquei, ga churúsãre ore íode ome uté. Ga ore asutedie, ore angaránone ore chise 77 jnese nanique.

¹⁵ Quigade enga Gedeón quítequiguíji ore idai uje i tu Sucot enga catecã́ri ore iji ore idai tuté. Ga chojningame ore: –Ajnusináño uje uacachietáyiñome yu diríca ga chiese jé ca yisína ore asutedie Zéba, Zalmúna ore diríca ome uaque. Ga ajnusináñopo rĩ uje yutágo jórogui uaque diríca ome cucha pibotique diríca ome yijorane ore uje ore diape iji dayaguhei jmainie diríca. Uje chiese ca yujnuéngo ore gáningo ome uaque diríca. Mu ore de dojo, Zéba, Zalmúna ore, ¡ga ajichopise ore enochade to!–

¹⁶ Ga jé u uje Gedeón chimáta sucótgosode ore asuté casidé ore aja ñane ga jé u uje chiroque darógode aja ore ga chijnime doidi casodé ojnacho uje ore chijna iji erãpetarei diríca, ga ore chicangurásiji sucótgosode asutedie údode.

¹⁷ Ga ore chicáji ore idai uje i tu Peniel ga ore chucuásome ore oragadé iji ore idai tuté, ga chejna idaisórone ore jnese.

¹⁸ Udojo quigade ga Gedeón catecã́ri dasagode ore asutei ga chojningame ore: –Ope quique uaquetígo ore atígo diríca iji ore idai uje i tu Tabor.– Ga Zéba, Zalmúna ore chojninga: –Jé ore enochade chopise benochai uté diríca. Ga ore iguidedie jé chopise baguidedie udire diríca uje que ore piragome yoque diríca uje a pasuté udore ore to.–

¹⁹ Ga jé u uje Gedeón tibite ga chojninga: –¡A ajéyo yesa casodé ore to jõ! Yesaguipísode ore u.– Ga Gedeón chopósi tome ore rĩ: –Dupa uecai irajatai chirajapise yuruode udojo quigode jnese uje a ca ajéyorase yesade ore diríca ga a ca yujérase uaque to gajneri.–

²⁰ Ga jĩraque tibidi dajnacare urẽjai uje i tu Jéter ga chósi tome: –¡Jéter, ayáguena gatérique to! ¡Be udore ore ga ajé ore jnese ga ore patĩ́ora ñane jne!– Mu Jéter uté ga qué jnacare gatódape ga que chijnime daquesei gotique, uje dosóñime ore gu.

²¹ Ga jé u uje Zéba, Zalmúna ore chojningame Gedeón: –¡Ja be ga ajé yoque! Uje ayoré dacasuté yoque ga que toc jeta ayoré gajnarétique doi ga chujé ayoré dacasutéraque.– Enga Gedeón chague ga jé u uje chujé Zéba, Zalmúna ore. Ga chijna ore gachidode caméllo ujnápeode uje ore chadíja dachidode etabídode.

Gedeón chetaque jeta israélgosode ore pésu deduguéjna cuchábi iji uté, mu gajnareque uje uté pésu pujnápeode iji óro uje i tu "efod," ga urasade ore cho dadupáji nanique

²² Iji cucha dacadode udojo quigade nanique ga israélgosode ore chojningame Gedeón: –Gedeón á, ua u uje bajnué madiángosi casodé ore icasitigájnai gai ga jé tiógara jeta yoco yocasuté iji ua ome cutejmai bacasitiga. Ga a bape disi ejórigo a jé ore chajnera basocai údi uté jne ga a jecucha yangácoi ore jne iji yocunirone udojo údode jnese.–

²³ Mu Gedeón jĩraque chajnai ore uruode ga chojninga: –Que uyu u gotique jeta oyo uacasuté iji yu. Que yocatígo ore upo rĩ. Mu gusu Pangarádejnai Dupade jeta oyórase uacasuté iji uté jne.–

²⁴ Mu Gedeón jnopo daruode údi ome darasade ga chojninga: –Gusu uje yajegaidi u ome jnani chojmara, chojmarane uaque jnese jeta asíñome ore angoronépiédie chojmaráraque ome yu uje uaqué casodica ore angoronépié ica iji garáijnane, uje uacajnimicho iji uaquegode ore ica. Ga boyo udire údi ome yu jne.– (Uje madiángosode ore gãrapi u Ismael nanique, ga jnanione ore isocabei tu uje ore chijna dangoronépiédie jnese uje pipesudei udire iji óro nanique.)

²⁵ Ga Gedeón urasade chajnai uruode ga ore chojninga: –¡Yijnátugopúsu yui ujetiga yisígome udire ome ua arĩ́e!– Ga jé u uje ore doi borapetique ga ore chitẽ́raja jnumi jeta urasade ore chicha deranenie óro aja gai iji jnumi. Ga ore nínapúsu re uje ore jno údi ome Gedeón uté.

²⁶ Enga ore chuguhese ore angoronépiédie udire uje óro ueque ga udire imenuringuei jnese chirõre 19 kílos. Mu que ore chedu ore angoronépiédie gotique mu ore chátaja borapeque ueradode to uje madiángosode ore asutedie gajnecho udore, jé aja ore ujnápeode uñane to uje cucarané orerenie déji to. Ga ore chátaja ore gachidode caméllo ujnápeode to.

²⁷ Ga Gedeón pésu pujnápeode iji óro udire ga ipesudi ueradipise. Ga jé cho Dupade iroguipísi jnani bajai Aarón arobé jogotodie cucarané uje i tu Efod. Ga urasade ore irasiguipise oradie udire. Ga Gedeón jno dapesudi uté údi ga chicha aja dedaipísi Ófra jeta urasade israélgose ore pañaji jnese. Mu uje e igasique iji dajogadi ga israélgosode jnese ore cho dadupáji ga ore catecã́ri Gedeón ipesudode udore pujnápecho. Que gusu ore mu Gedeón, jogasui ore, ore ãrai tu raque to ga ore changureta Gedeón ipesudi uté to, enga a jé cho trámpa ome ore. Ga jé ore ipesute dajnei Dupade etétiga nanique.

Gedeón e chise dáringai choquíjna ga e toi iji dedai Ófra nanique

²⁸ Uje israélgosode ore suépise madiángosode ore gai, ga que togome madiángosode udore jeta ore pésapo israélgosode ujuréraque gotique rĩ. Ga Gedeón qué chapite aja siqueredie nanique uje chise 40 años, enga que pipesudápo israélgosode ujuréraque nanique rĩ uje uté qué eca nanique.

^29-30 Ga Joás ujnacari Jerobaal uté chajníja daguíjnapísi ga chácariji uté. (Jerobaal, Gedeón jé ío udojo jnese nanique.) Ga uté abode cuse ga abode chise 70 gu uje jiépisi acotedie ore nanique.

³¹ Mu Gedeón mochápasadie chequé cuse to ga siquémgoto udire uña ga abi déji to ga ore chĩ́care Abimelec aja Gedeón abi uté.

³² Uje Gedeón e chise dáringai choquíjna ga e toi iji ore idai Ófra. Ga ore chijóchame iji dai ode jogadi to. Ga ófragosode jé ore cho danuchúji dáqui i uje i tu Abiezer nanique. Enga ore chojningame raque abiezérgosode uyoque.

³³ Mu uje Gedeón e toi ga jĩraque israélgosode ore tẽra rágome dangureni dupa quedéjna Baal adode rĩ, ga ore chisi uté gai gatuaque. Enga ore pésu uté oredie ga ore cho dadupa iji ayoré gajnúone udore iji daniri údode jnese. Ga ore angurenípisi tu Baal-berit, ga ore dopísi uté adode gatuaque. Ga israélgosode udore ore gajnua tu chequéraque uje noñome abaipísi ga moji jnani unejátique gari.

³⁴ Uje ore chicadígui Pangarádejnai Dupápisi uje chiqueta ore ome ore umajosórone ica uje ore umajosórone chicha ore aja dajã́ronie ica.

³⁵ Ga Gedeón urasade ore chicadígui dangaráni Gedeón uté nanique ga que ore jnusinápo uté átegoningáne gotique rĩ ga ore cho cucha bisidéguiji uté ujnacarode ore to.