Juéces 7 - Dupade Uruode

Gedeón ore doi pocaningai ome madiángosode ga Dupade chicha madiángosode aja ore jmainie nanique Uje Gedeón e chiraja uje Dupade e utocaite ga chingo raja darasade ga ore cho dasuté iji uté to, ga ore chojningame: 'Yocasuté u Jerobaal.'

¹ Uje direjnipe nanique ga Gedeón uje i uñai u Jerobaal, jé aja pocaningai gaisórone ore jnese to ga ore chobéri dajesui ga ore diguiji deréjnai údode ga ore basíji ore ajmini uje i tu Harod. Ga sibíjnai déji uté to. Enga madiángosode ore irengúi déji casaque garani yui iji ore charidi uté pajmite. Ga qué ore déji dapáringai iji cucarã́techoquí More edúdi.

² Ga Pangarádejnai catecã́ri Gedeón uté nanique ga chojningame: "Urénga, bajorane iji barasade jiei ore ga a ore jos eti ore guejnaque madiángosode ore jne, ga a ore chisi dabai jne, uje a jé ca ore áyipie déji jne uje uyu upúsu uje yátaja israélgosode uaque gu ome ore.

³ Jecute ósi tome jnanione udore: "¡Jeta gosi iji uacajade chagutu rome ore jeoga gosi dosóñime yoquigaidode udore ore yui jne enga jé areque jeta gosi chajni aja daguíjnarique!" Uje Gedeón chatata Dupade uruode udore ome darasade ga uñane chajni. Ga ore chisecãru arorade ga ore batigai chise 22.000. Ga Gedeón chisecãrápo dajorane to rĩ aja dajocaningai ga ore chise 10.000.

⁴ Mu Dupade qué chajo raja uje chojningame: "Gedeón, jé jiei uaque. Bo ore údi aja yodi ga ore chóji, ga a yatata yajegaidode iji bajõráringo ore ujade jne jeta gosi nóna ua aja uacajocaningai, jeoga jé ca gosi nóna uaque jne."

⁵ Ga jé u uje Gedeón jno ore údi aja yodi jeta ore chóji. Ga Dupade chojningame uté: "Adójningapísa ore jne jeta ore chóji yodi iji jnumi ga amáta ore aja pijogatique jne. Jé basa uñane uje ore chóji ome dajmanáyone ga amáta ore aja pijogatique uñeque."

⁶ Enga Gedeón chisecãru udore ore uje ore chinguíra yodi úringai pote aja dajmainie ga ore chise 300. Jé basa ga amirone ore chibócare yodi iji jnumi jnese.

⁷ Enga jé u uje Pangarádejnai Dupade chojningame Gedeón: "A bajorane u udore uje ore chóji ome dajmanáyone jne. A 300 uaque marínga, a jé yátaja uaque gajneri ga a ajnuéño madiángosode ore gai gajneri uje jõcarataque obiréjna ore diríca mu. Jé dóji ga uacajorane uñane ore chajni to."

⁸ Uje Gedeón chiroque ore aja arorai ga chojningame ore: "Uacagórigui jé dóji yocari jne, jé aja uacapúpuridie ga a ajníño to jne." Uje Gedeón jorane jnani e garósi ga gusu 300 u jnese, mu Dupade imeserane u ore ome pocaningai. Uje jnanione uñane ore chajni ga Gedeón, jorane ore jno ga ore chicha darengúi aja madiángosode iquébi iji cucarani ajéjonguei.

⁹ Uje Gedeón urasade qué ore déji damóngone mu Dupade chojninga: "Gedeón, ãriji to ga beyoi madiángosi casodé ga ajṍcãchome ore jne. Ga a uyu u gajneri jetiga yicha ore aja uacajmainie."

^10-11 Enga Dupade qué jnopo daruode údi ome Gedeón nanique rĩ, ga chósi tome: "Mu jeta qué arosóñime ore yui jeta gusu ua aja, ga ajína bapesudi bajnacare uje i tu Fúra ga aquéjnañoi madiángosode ore jne enga angáchoi ore uru quitígo ome uaque jne. Ga a achietáyoji ore uru quitígo ome uaque gajneri ga jogadi u gajneri jeta ayóyoji ore." Enga jé u uje Gedeón nóna dapesudi Fúra ga ore chuchiéjna raja jnumi yui aja dagaidode madiángose ore irengúi jeta ore chuquéjnai ore ga ore tangári ore uru quitígo iji uté. Enga ore chosipise raja madiángosode ore ejábi enga ore tangári ore uruode iji pijnangone charidi.

¹² Uje Gedeón ore chajire dagaidode udore ore iji dádi ga ore chacãra ore aja chuguyúgu dipesedie ome úringanie dipesei. Ga madiángosode ore u, jé aja amaléquegosode ore uáguedie u to, jé aja purása quedéjnane uñane ore upo to rĩ uje ore tṍraji guedé garani yui. Ga ore gachidode caméllo jiépisi ga cho ungaréjnai arĩ iji yote quedéjnane gáyode ome dapetígajnai.

¹³ Uje Gedeón ore déji danungué iji madiángosode ejábi ga ore chudute soldádode uñai uruode uje qué chatata darigode ome darasade ore ga chojninga: –Yurigode qui tu de que uje yĩ́cara ga arurétique déji yoque que ga cho cutu, cutúgaja yoque que iji yoquirengúi tudé. Enga chinguíra raja yoquiguíjna cárpa uñeque que ga íjnonguiji jnumi.–

¹⁴ Ga uñai chojningame darásai urigode udore: –A israélgosi Gedeón iqueséjnai u baricáidi uté que. Yojningai u Joás ujnacare ujnomerãi uté. Uje israélgosode ore angureni Dupade gotique a chisi ome madiángosode uyoque ome Gedeón uté gajneri, ga Gedeón uté sué yoquibai jnese jne. Ga a socárome yoque jne iji yoquirengúi tudé jé aja yoquiguíjnane cárpa udore jnese.–

¹⁵ Uje Gedeón chudute madiángosode uñai urigode quigode to ga áyipie déji uje Dupade a guẽrate ore urigode udore quigode ome ore que. Ga jĩraque catecã́ri Dupade iji ore ejoi ga chachietáji Dupade ome udore yui. Ga jno enga chajniapója darasade israélgose irengúi te rĩ ga chojningame darasade: –Ayágueyo, ga a jĩraque yachẽ́co madiángosode ore irengúi uté, uje Yocangarádejnai a tẽra udore ore irengúi ome yoque gajneri ga a jé ca ore chisa yoque jne.–

¹⁶ Ga jé u uje uté chajuque dajõráiso jnani ore iji ñane ga ore jogadode gadioc. Ga chisi ome púpuria chojmara, chojmaranie ome ore jnese, jé aja co ajeguesague chojmara, chojmaranie ome ore to. Enga ore chanire dajnani aja coidie udire piagode jnese.

¹⁷ Enga Gedeón chojninga: –A yi jne ga yayo ore gai jne enga adójnachopísa yisocai jne jeta e yugúsiji ore uéchai ga jé beyopísi yisocai to jne.

¹⁸ Ujeta yapaco ore gai jnese jne ga adúcho yijorane uyoque yocubúchudie jocarane jne ga abúchuyo uacapúpuridie to jne ga a abicho ore gai jne enga ojnichome uacabijnáringo jne: "¡Yujnuéngo uacabai iji uacarengúi tudé ga gose Pangarádejnai Dupade irotaquédatéi ome yoque, jé aja iroi Gedeón uté uajatiguei ome yoque!"–

¹⁹ Uje Gedeón e chise ore uéchai ga quene madiángosode ore chécãrirase dejai irodisórone ore uje e dejnínga gatócoro gu. Gedeón jorane 100 ore aja ore uéchai. Ga jé u uje ore chubúchu dapúpuridie iji ore uéchade jnese ga ore chusaque doidéisi co ga ore chinguíraja ñane.

²⁰ Ga ore jõráiso ore chubúchu dapúpuridie to ga ore chusaque coidie to. Ga ore chijna dajnaningone iji darasei, jé ore chijna dapúpuridie iji dãrachua ga ore pijnacarachi ga ore chojningame dabijnane: "¡Pocaningai e u ome uaque é! ¡Uje uaquesórone u Pangarádejnai Dupade, iroi Gedeón ore é!"

^21-22 Israélgosode que ore cha chubúchu dabúchudie púpuri iji madiángosode irengúi ejode uje que ore chacája ore irengúi gu. Ga Dupade pésu ga madiángosode ore chujé ñane iji darengúi ga ore chisa dabade iji darengúi ga ore chayome ñane iji darengúi tuté uje ore dosóñime púpuri pubúchudie udire gu. Ga ore chayome israélgosode ga ore chisite rágaja quedéjnane. Uñane ore chicáji ore idai uje i tu Bet-síta uje idógosi ore idai Zeréra. Jé basa uñane chicáji ore idai Abel-meholá uje idógosiji israélgosode ore uniri eruei. Ga ore idai uté idógosiji ore idai Tabot.

²³ Ga Gedeón tibidi neftalígosode uje chatire ore que ga chojningame ore: "Boyo ga ajnáño madiángose bayade ore jne ga achayo ore cachotígo aja toniñeque jne." Ga chutõrapoi manasésgosode ore to ome ore, jé aja asérgosode ore to rĩ.

²⁴ Ga Gedeón chirógapo jnacarode uñane aja cucaranone rĩ uje efraíngosode ore cho dajnéngu udore nanique jeta efraíngosode ore chicha raja madiángosode ore iquei ga ore chirote ore iji yote quedéjnai Jordán. Chamáñaje jecucha madiángosode ore chaquesu yote quedéjnai iji uté gu, ga Gedeón ajéode u ujetiga efraíngosode udore ore chirote madiángosode ore yui tiji uté jé aja ore idai Bet-bára uje idógosi yote quedéjnai Jordán. Efraíngosode ore doi Gedeón utoquei ga ore quítequiguíji pajmini uté, ga ore chirote madiángosode yui iji ore aquesupídebei iji yote quedéjnai Jordán uje garéro gu ga jecucha diguijnutíode ore chaquesu iji gatuaque.

²⁵ Ga Efraíngosode ore chujé madiángosode ore iji pajmini tuté ga ore chiqueta ore asuté gáredie uje ore íode u Oreb, Zeeb ore. Ga ore jno Oreb údi aja curuté ójo ga ore chicha cachodi aja curuté uaté ójo. Ga jecucha ore cho curuté uaté i iji ore yui Oreb i to nanique. Ga ore chijna ore asuté uña aja ore ijoyapídi iji úvadie jogadi ga ore chicha Zeeb uté cachodi aja udore ejoi nanique. Ore pésu ore ijoyapídi i ga jé ore cho Zeeb iji to. Ga ore chaquesu degode madiángosode ore asutedie etabídode ga ore chijna ore gatoidie ome Gedeón iji yote quedéjnai Jordán uéchamitó.