Juéces 5 - Dupade Uruode

Débora, Barac ore chigójna cananéogosode ore gai uje Pangarádejnai Dupade chicha udore ore aja israélgosode ore jmainie gu nanique

¹ Iji diri uté uje ore sué cananéogosode ore gai ga Débora, Abinoam ujnacari Barac ore chigójna cananéogosode ore gai uje Dupade chicha udore ore aja israélgosode ore jmainie. Ga ore chósi tome dachachagúgode:

² "¡Beyoi ga yicotágo israélgosode yocangureni Dupa Pãrésõre ga yacãco uté gai ome yocurasade ore uje ore doi pocaningane ga ore sué yocumajosórone gáyode ga gose yocangureni uté irotaquei! Uje jnanione uñane qué ore déji yocujade uje a ore chudute pocaningárique ujnomérique ga jĩraque ore pésu rome yui.

³ ¡Ayoré dacasutedie uáguiji erámi údode jnese, jé aja ore eduguéjna cuchape uáguiji erámone, beyoi ga angachobi yijñecade udojo jne! ¡Uje a yedoi u Pangarádejnai Dupade jne uje israélgosode yocangureni u uté!

⁴ Urénga, Pangarádejná, basaporase yoquiquiga casodé ga borei yóguiji ore uniri casodé uje i tu Seir diríca, ga yicagóji edómgosode ore uniri ga que cucha dacatique chósi ti iji yoque diríca ome ua. Enga jnumi cho cocho, cochóguiji bajmainie diríca, jé aja guéode iji gaté. Uje coyotáji dajogadode ome ua diríca ga jé u uje bajose guéode diríca ga cho corágaja jnumi.

⁵ Yocangaradéjna Dupá, israélgosode ore angarádejnai tu ua uje bapésu cucarãte cuchábode ica mu udore ore cho cocho, cochóguiji gatéode ome ua to diríca. Jé aja cucarãte cuchábi uje i u Sinaí, uté icotaguipísiji jóroque dáringárique cuchape diríca mu jé bapésu cochóya iji cucarãte cuchábi uté to.

⁶ Mu chisaporase diri casodé iji yoquirotangóri uquécasé Anat ujnacari Sámgar uté quigade diríca rĩ, ga que picasite yocumajosórone ore ome yoque diríca ga que yajnángopo dajéreraque to rĩ uje yitodógo ore gu. Ga yayógo ore idáyode gáyode gatuaque ga yajnángo ore úgugóde iji dajéredie dosadode. Ga jé isoca aja yocurása chequé Jael jogapíode guedosío uje que picasite yocumajosórone ore iji to.

⁷ Mu israélgosode ga e garósi yóguiji yoquidáyabode jnese. Mu Débora uyu ga Pangarádejnai pésu yu ga uacoyo uacasuté iji yu ome Dupade ojningane cucha yúode. ¡Ga jé yajnua tupúsu jeta israélgosode jnese uacãrapié uacaté jé uyu!

⁸ Uje israélgosode yocurasade uñane ore chetingare dupa quedéjnane to ga que Dupapísi chisiapome yoque yoquetotiguérique rĩ ga chijna petotiguei iji yocari nanique ga que yujñapejome yoquisórone yocujo ayoré ore nanique. Ga ore chãraque cõrácha poidode ome yoque nanique, ga jnanione ore chise 40.000 mu que uñeque asṍreraque déji yocujade. Jé aja yoquibandéra iji yocuniri udé pijoguto chequécadaté uje que pujuegade nanique ome yoque.

⁹ Ga yáyipie dépisi yocasutedie udiji ore diríca iji israélgosode yocujade, jé aja pocaningane imosórone iji yocujade to. Uje yibicoi ore ome pocaningai enga jĩraque ore jnome yui jeta ore chujé udore ore. ¡Ga beyoi ga acotáyo Pangarádejnai Dupade to ome úringa pasuté pãreto!

¹⁰ Ayoré atade uaque uje uacácayoji burica quedéjna pórorodie gáyode aja uacajesúode, ¡beyoi ga acotáyo Pangarádejnai Dupade to aja quedéjnane! Jé aja ayoré atade uaque uje uaquetéquetí ayáguenaño gatérique iji uacayaripíode, ¡beyoi ga acotáyo Pangarádejnai Dupade uté to! Jé aja ayoré jmatágode uaque uje que ácayo uacádi ome uacáringane urugúo, ¡beyoi ga acotáyo Yocangarádejnai to aja uacajesúode!

¹¹ Deyáquechoquíode uaque á, ¡beyoi ga ácayoji yodi ejode enga ajñecachóji, ga acotáyo Pangarádejnai ome cutejmane átedatéo ome yocumajosórone ore! Chamáñaje yocumajosórone ore chirase yocúringane edódimanéo uje que yimóngo cucháringome yoque gu diríca, ga ore cho dajocaningame israélgosode yoquidáyode jnese diríca, mu que ore chisa dejóringome Pangarádejnai úringai yoquirotasṍri.

¹² Uacabicho yibai ga uacojnichome yu: 'Ãrijína bejórique to á, Débora yá. Ãrijína bejórique to ga ayáguena gatérique to. Ajñecare ga atata uacatója casé uje bajína barasade ore aja cananéogosode diríca, ga uacajnuéño ore gai.' Ga uacabichopo Barac gai to rĩ uje dayé i tu Abinoam ga uacojnicho: 'Barac, ayague ga ajína basatígo purása quedéjna aja bajesui ga barasade ore pañaji baquetade udore ore to uje udore chirase yocúringane ayoré edódimanéo diríca ga ore jmongarája yoque diríca.'

¹³ Ga israélgosode yocopise Dupade isoldátigo diríca aja yocajesui ga yicoi jnumi tiji cucarani ójo ga yicoi ayoré jõcaratáguebéode ore uje dicase ore ome pocaningane. Mu uyoque ga que yugúcoji cuchárique ome pocaningane to.

¹⁴ Jnacarode uñane tṍraji efraíngosode ore ujade. Jé basa ga uñane tṍraji benjamíngosode ore ujade ome yoquijocaningai. Jnacarode uñane tṍraji maquírgosode ore ujade ga ore nóna dasutedie aja yoquijocaningai to. Ga adi jé upo ome zabulóngosode ore rĩ uje ore nonapo dasutedie aja to rĩ. Ga yocopise pijochaque chojmarai aja yoquigaidi yoquijocaningai yui.

¹⁵ Ísacargosode ore nóna Débora uyu to, ga ore asutedie nóna Barac ga ore cho dajnéngu cananéogosode ore irengúi. Jé chimo jóroque re uje rubéngosode chiese pujnuéngaitó ore asutedie, ga chiese áyipierãque ore to.

¹⁶ Mu que uñeque déji yocari to. Que uñeque doi yoquibijnane gotique to diríca. Ga a ore angaránone u áyasadie gachisórone ore iji dedai uje ore tibidi dachidedie áyasai aja quedéjnane iji dedai údode. Ga que pujnuéngaitó rubéngosode asutedie gotique uje jnani sadodébeque ore gu.

¹⁷ Ga adi jé upome galaádgosode rĩ iji yote quedéjnai Jordán uéchamitó uje ore cho paráguiji dedai ga cho jeta ca cuchárique jmongarája israélgosode uyoque. Ga jé chopome dángosode rĩ uje ore moji dachidode cuco ajéode iji daniri ga que ore áyipieraque déji israélgosode yocajnetique pocaninga. Ga adi jé u ome asérgosode ore diríca uje ore chácariji yote quedéjnai edúdode ga que ore cho cuyúguiji dayaridode udore diríca. A ore chudúdi jóroque israélgosode yocajnetique pocaninga ujnomérique marínga, qué ore taquiri ñane iji purúdode.

¹⁸ Mu udore ore uje ore déji orónenie gai ga ore u uje ore doi yocajnei pocaninga diríca ga que ore chichagápo raja punínique rĩ ome dagaidi pocaninga. Yojningane u zabulóngosode ore diríca, jé aja neftalígosode ore.

¹⁹ Cananéogosode ore asutedie chimáta ñane aja ore idai Taanac uje déji tié edógai uje i tu Meguído. Ga ore chucué dáyipiedie quicho ome dajocaningai yui ga ore ajegaidi u jórogu jeta ore cho dagúchade iji yocugúchade, yoquipláta ore jeta ore sué yoquibai. Mu jé ore ate dadi uje yujnuéngo ore gai ga jé jmataque ore ome cuchade. Jétapũré uje jé ore topísi.

²⁰ Uje yicoi yoquijocaningame Sísara ga cho jetiga guédodie iji gatajnoquei ore u to jeta ore cho dajocaningame cananéogosode asuté uaté, urasade ore diríca.

²¹ Uje israélgosode yicoi yoquijocaningame Sísara ore diríca ga yocajnui tupúsu yote bayaque cuchábi Cisón diríca uje chijnoque cuchade aja dajesui ga jĩraque tita cuchade jogadi. Yojninga iji yajei diríca: 'Yajéode u jetiga yujnusi yu ome Sísara uté uje jecucha pésu pocaningane ome israélgosode uyoque, ga yujégo udore ore isoguedie iji jnumone gajneri.'

²² Yojnijo diríca: '¿Adúcho cuchárique to a? A ore gachidode burica u guicharane udore. ¡Cajicho to á! E ore di ga ore déji dachidode burica gai ga chinguíra ore aja jnumi aja yoqui.

²³ Jé adójnacho to uje Pangarádejnai Dupade utocaidi gaté unirísõre qué cho darúja yocurasade uñane ore iji yoquejo tuti uje ore idai i tu Meroz. Ga iyieja jóroque Dupade ujuyaquei yui ome ore uje que ore cháta raja darasade uyoque to ome yoquijocaningai. ¡Pangarádejnai tibidi ore to mu ore etéquetí ore doi utoquérique to!

²⁴ Dupade imeserãpise quenítagosi Heber acoté iji ujodie chequei ore ujade jnese. Yojninga tu Jael uaté. Jé ũré uje jiei israélgotodie uje ore cho daguíjnane iji cárpade, mu Jael u uje jnuéngaipísi dojodie chequei udire jnese. Uje Dupade acacarã uaté iji yocujade gu.

²⁵ Sísara chojningame daruode: 'Ãre chejna yu. Asíyo yu iji yotique.' Jael chequé parague ga chisi ome leche ome uté. Ga chisa dajopite ueradi ga chanire leche aja ga chátaja créma unéri aja ore asuté jodi leche. Ga chojningame: '¡De de jã, óji!'

²⁶ Uje uté e mo ga Jael doi ga chisa ojnaquéro yoríco ome darasei, jé chisa ore isagode cucha pisaque erãto martíllo, ga chisa ome dãrachua. Ga jé u uje chajója Sísara uté ũríaroi ga tṍraji ũríaroi uñai ga quítequigája jnumi ¡sa! ¡sa!

²⁷ Sísara chuchiéjna jóroque dejode iji dagachodi tuté ome Jael ore. Chayo jóroque dádi jeta chague mu cho jnóro aja jnumi iji uaté iquei. Uje uté cachodi u ga jé cachodi upúsu ga topísiji uté.

²⁸ Sísaradaté chajire guesi iji daguíjna bocadi uté. Jecucha chajire dajei garani ome dajnacari ga chojninga: '¡Jé adi ĩringuípie uje guedé e jno mu cáma yujnacari uté di. Uje uté jecucha choru dachidi guebéquedatéi uje pocaningane gajnei u mu que di gotique!'

^29-30 Mu Sísaradaté jõra irajatedie udire chajnai uaté uruode, ga ore chojninga: 'A bajnacari ore chejna israélgosode que, ga a qué ore chajuque ore ugúchade iji jnumone ome ñane. Jecute cáma di.' Ga Sísaradaté qué chigotape ore uruode, ga chojninga: '¡A jé u jõ! A di yoquirógueraque údi jne jeta doi yoquiroquéode bisideque to. Jé chome isoldádode ore jeta ore chiqueta ore iróguerigui jnese to ga ore cho darogue iji daquetárigui ore to jne. A Sísara cho dajnéngu borapeque ĩrararãtique jne jeta uerate ga di údi iji yoque. Ga jé tiógara jeta yipéco yocasutedie ore iguidérigui iji borapeque ichajúnerãi tuté jne ga dóji ore etabídode jne.' Cananéagotodie ore jnátu jórogu dajnacarode ore yui mu que ore di gotique.

³¹ ¡Yipésupú ga Yocangarádejnai guetesórone jé ore chopise cananéogosode ore isoldádode udore ore jne jõ! Mu uyoque ga yijnórango ua, Pangarádejná. Apésu ga jé yocopise guedé ome úringai ichotaque uje chijñate erámi gai ome dadírecaringuejnái. Ga e gusu yoquicotaquéode udojo ome ua, Pangarádejná." Uje israélgosode ore ajirito u Débora nanique ga siqueredie chise 40 años nanique uje israélgosode ore cho paráguiji danirone ga que picasidápo ore nanique rĩ ome ore ujórique ayoré.