Juéces 4 - Dupade Uruode

Uje Barac, Débora ore cháta raja ñane ome dajocaningai nanique ga Dupade chicha israélgosode ore umajosórone aja ore jmainie nanique

¹ Uje e Aod toi ga israélgosode ore pésapo date gajnaréngone iji Dupade edominone rĩ enga que uté chisápo ore unétique gotique rĩ.

² Ga jé u uje Dupade chisi ome petotiguei ome cananéogosode ore eduguéjna cuchábi uje i tu Jabín nanique. Ga cho dajocaningame israélgosode nanique ga sué ore gai. Ore eduguéjnai cuchábi uté idai i tu Hazor nanique. Uté isoldádode ore asuté cuse to nanique ga i tu Sísara nanique ga uté idai u Haroset-goim.

³ Ga eduguéjna cuchábi Jabín uté gachidode guebéquedatéo 900 nanique uje irógode soldácho ore doi dajocaningai ga ore píode u aja dajocaningai nanique. Ga uajádipíso guebéquedatéode udore uje ore pésu iji guebéode gu. Ga siqueredie chise 20 años nanique uje cananéogosode que ore chañuru israélgosode guio nanique iji dajade ga ore cho damajo ore gatuaque. Ga quene israélgosode ore áyipiedie déji dayode angureni casicaite Dupa uje jecucha chátaja ore dayode nanique. Enga ore áyipie déji jeta chátaja ore to ga jé u uje ore chutṍri Dupade ome raque.

⁴ Enga israélgosode ore angarádejna cuse iji dirode udore nanique, ga chequé uaté jute Dupade uruode quigode to, ga israélgosode ore tangaripísi uaté nanique. Ga uaté i tu Débora, jé basa ga abai i tu Lapidot.

⁵ Enga jecucha ga chequé uaté chicáji pajmini uje déji cucaranone ujai nanique jeta urasade ore chingo dajuré gajnéone cucha aja iji uté. Ga jecucha chácariji ijnapu uague údi gatuaque nanique jeta cho darasade ore quique ome cuchade. Enga uaté charidébei uté déji efraíngosode ore gajnei jnupe iji ore idáyode Betel, Ramá ore ujai nanique.

⁶ Ga chise diri nanique uje chequé uaté uje i tu Débora tibidi jnani uje i tu Barac. Ga jnani bajai Abinoam ape uté nanique ga idai u Cédes. Ga uté urasade jé u neftalígosode ore to. Ga Débora uaté chósi tome Barac: –Yocangarádejnai chósi tome ua que: "Bo ga acáji cucarani uje i tu Tabor ga amáta jnanione uñéngo aja uté jeta ore chise 10.000. Ga neftalígosode a ore u jne, jé aja zabulóngosode ore to.

⁷ Ga a yipésu uacáringáringo pijosingóño jne ga a eduguéjna cuchábi Jabín iróquegatéi Sísara chudute uacajnomei jne enga jé u jeta chachai uaque ga choru guebéquedatéode aja uaque. Gaidi u jne jeta chãraque daniri yui ome uaque. Enga a atuãchóa iji tié jochai jne uje i tu Cisón. Ga a uyu u jne jeta yẽrate Sísara uté ome uaque jeta ajnuéño ore gai iji te jne."–

⁸ Mu uje Barac chudute dajnéone Dupade utoquei iji Débora pijnani ga chósi tome daruode to: –A yicáji Dupade ojningai uté jne jeta ajína yu aja. Mu ujeta ca ajína yu aja ga a ca yicáji jne.–

⁹ Ga jé u uje Débora chojninga: –A yijína ua aja jne. Mu jeta yujnuéngo Sísara ore gai jne enga a jé ca picotaque ua jne ome yocurasade ore. Mu a ore chojninga: "Pangarádejnai Dupade chicha yocumajósõri casica cananéogosi Sísara aja chequéraque jmainie ga sué gai".– Uje ore chejna daruode udore aja guesi ome ñane ga Débora nóna Barac aja uté idai uje i tu Cédes.

¹⁰ Ga jé u uje Barac chimáta jnanione aja ñane ujetiga ore chise 10.000. Ga chedu zabulóngosode ore, jé aja neftalígosode ore. Ga Débora nóna udore ore aja ore jocaningai yui.

¹¹ Iji cucha dacadode udore iquei nanique ga quinítagosi uje i tu Heber e chicha daguíjna cárpai aja ore idai Cédes uté ejoi. Enga jnani bajai Moisés iyoquíjnai Hobab ape disi ejo quinítagosi Heber uté nanique, mu uté cãra daqui ome darasade nanique. Ga chicha daguíjna cárpai aja pore cuchabé dosadi iji pajmini uté uje i tu Zaanaim, enga poria uaté i tu encína.

^12-13 Uje cananéogosode ore eduguéjna cuchábi iróquegatéi Sísara chudute israélgosode ore ujnomei uje e ore chimáta ñane aja Tabor jeta ore doi ore iji ore idai ga chimáta dasoldádode ore aja ñane to. Ga 900 u ore orutode guebéquedatéo udore. Uje ore jnoji dedai Haroset-goim ga ore quítequiguíji tié jochai uje i tu Cisón.

¹⁴ Ga Débora chimo ore iji dádi iji tié jochai ga chojningame Barac: –¡Ore déji sodi! Beyoi ore, ga a Yocangaráni Dupade chicha Sísara ore aja uacajmainie gajneri. Uje Dupade e cho dajnéngu basoldádode ore iquei. Yijñaco uté aja ore gajneri.– Ga Barac isoldádode ore doi jnumi tiji cucarani ójo uje i tu Tabor, ga ore doi Sísara urasade ore.

¹⁵ Ga jé u uje Dupade pésu Sísara, ore ga que ore chirajápo dasocárique rĩ uje ore gachidode guebéquedatéo chinguíra raja quedéjnane ga cṍra pac, cṍra pac. Ga israélgosode chamatáta ore iji jnumone uje ore chujé ore. Ga ore asuté Sísara doi jnumi iji dachidi ga chayome israélgosode ore.

¹⁶ Mu soldádode uñane qué ore chapite ga Barac, ore chajna ore aja ore idai uje i tu Haroset-goim. Mu chicha ore cachodode aja ore idai yúode. Iji ore jocaningai uté ga que Sísara irógode uñeque chapite gotique. Ga ore chejnápise ore jnese.

¹⁷ Uje quinítagosi Heber chise cananéogosode uniri nanique ga catecã́ri ore eduguéjna cuchábi Jabín ujetiga juéga daniri ome ga chácariji ore ujade to. Ga ore catecã́ri ñane jeta ca cho dajocaningame ore to. Ga Sísara chiraja jnani uté iguíjnai jogadi ga quítequigája ore iguíjnai uté. Ga chise uje diguiji yui. Enga chise Heber acoté iguíjnai cárpa bajaque. Ga chequé uaté i tu Jael. Sísara chojninga: –Acóso yu uje bayaque yu ome jõcaratade gu.–

¹⁸ Ga Jael doi guesi ga chusẽre daguíjnai ajei ome ga chojningame: –Aca ajei, yangaráni á, jé ca atodo cuchárique. A yipójo ua jne.– Sísara chacája ajei ga Jael pógu ga chaco datarãpei gai iji guijnatajei.

¹⁹ Sísara chutai yodi uje ãre chejna. Jael doi aquirájna aoi uje jecucha chanire leche aja ajei ga chuchẽre gai ga chisi ome Sísara ga chóji joyai aquirájna irisode otadi. Jnopo údi rĩ jeta suru aquirájna aoi piagoi.

²⁰ Sísara chojninga: –Ácariji yimochápi udé piagoi jne. Jeta ayorérique chise ua enga chojningame ua iji jne: '¿Gosi déji guijnatajei a?' Ga ojningame jne: 'Tita ga que yimóngo ayorérique iji udojo.'

²¹ Ga Sísara eyuguipise ga que cho cuyuque iji damoi. Ga Jael doi martíllo ga chátaja ore atai ojnaque uje ore icárpadie cutádei ome ore iguíjnai, ga Jael jno enga quĩrique dique jeta jé ca Sísara chunina atique. Ga jé u uje chajo doidi aja ũríaroi ga chajója jnumi iji uéchai. Ga jé u uje Sísara toi nanique.

²² Jĩraque Barac di iji udore quigade ga chucué Sísara jeta chujé uté to. Mu Jael chachai uté iji garani ga catecã́ri ga chojningame nanique: –¡Ca boji te á! A yingo bacuei Sísara aja ua jne uje déji yiguíjnai cárpa ajei iji ti.– Uje Barac chacája ajei ga chimo Sísara iji jnumi uje chequé uaté e chajo ore atai ojnaque aja ũríaroi, ga chajója jnumi iji uéchai.

²³ Ga Dupade isocai u udé iji diri uté nanique uje chijna cananéogosode ore eduguéjnai Jabín etotiguei iji gari nanique. Ga que dépoji cuchárique nanique rĩ iji israélgosode ore jmainie.

²⁴ Ga israélgosode que ore chapo pocaningane unétique rĩ jeta jé ore qui tuté ome dajocaningane ome Jabín, urasade ore. Ga ore chise diri nanique uje ore chejnápise udore ore nanique.