Juéces 21 - Dupade Uruode

Israélgosode ore pésu cuchade aja quigode nanique ujetiga benjamíngosode ore acotedie cusapo rĩ

¹ Israélgosode uje ore chudute benjamíngosode ore ate gajnaréngone uje ore chujé levígosi acoté diríca enga ore chisíome daru iyiejájnane ome ñane iji ore idai Mízpa enga ore chojningame ñane: "Beyoi ga yocuñeque jé ca juéga daróraque ome benjamíngosode ujetiga jé ca ore chóji ore gari."

² Enga jé u uje ore doi dajocaningame benjamíngosode ore nanique. Mu uje israélgosode e chimátapo ñane aja ore idai Betel rĩ iji dajocaningai uté quigade ga ore poji darása casodé benjamíngose ore ejode. Enga ore catecãrápoi Pangarádejnai Dupade rĩ ga ore chuságaja dejai.

³ Enga ore chojninga: "¡Pangarádejná, Yocudupá! ¡Israélgosode yocangureni u ua! Chimo jóroque re uje israélgosode yocuague casidé uña bijnapise ome yoque jne uje íjnoque uecade ore acotedie gu iji benjamíngosode amirone udore, uje chequedíe ore toi jnese gu iji yoquijocaningai diríca."

⁴ Iji dire ejoi ga israélgosode ore chobéri daseradéjnai úringai pipesute yui. Ga ore chujé dachidode ome Dupade ga ore chãru dachidode udore iji daseradéjnai gai, ga ore gaidi tu jetiga Dupade ajei cho sere ome ore.

⁵ Enga ore jnusina daru casodica uje cáma ore doi pocaningai uje ore chimáta ñane aja ore idai Mízpa ica. Uje ore chojninga ica: "Jeta jé ca pidáyode uñeque chiroque datocaitígo aja ore idai Mízpa to jne enga a yujégo gosode iji ore idai uté to jne." Enga jé u uje ore catecã́ri ñane ga ore chojninga: "¿Gosode u ica uje que ore cháta raja yoque iji yocaquiningamei iji ore idai Mízpa?"

⁶ Ga que ore cha cho dáyugu darása casodé benjamíngose ore úringane pujnusiécho. Ga ore chojninga: "Israélgosode uyoque yocuáguedie jecucha 12 u yoque, mu e cho jetiga yocuague uña bijna ome yoque. Cho jetiga pajuque benjamíngosi casodé ore uyóguiji ñane, enga e yisogo."

⁷ Enga ore chojninga: "¿Yoco ringome uecade ore jne iji benjamíngosode uje yujégo chequedíe ore jnese diríca, ga a jé ca ore acotéraque cuse jne? Enga e yingongome Dupade ica jeta ca yujuéjo yocuróraque ome benjamíngosode udore ore."

⁸ Enga ore jnusina daru casodica uje cáma ore doi pocaningai uje ore chimáta raja ñane aja ore idai Mízpa ica. Uje ore chojninga ica: "Jeta jé ca pidáyode uñeque chiroque datocaitígo aja yocurasade ore idai Mízpa jne jeta ore pésu rágome yoquijocaningai to, ga a yujégo gosode iji ore idai uté to jne." Uje israélgosode ore angaránone chajire pidáyode íode jnese iji darusarane jetiga ore chiraja darasade uñéngo jetiga jé ca ore déji pocaningai to diríca, enga ore chimo uje que uñeque iji ore idai Jabés-galaad cháta raja ore gotique.

⁹ Chamáñaje ore chĩ́care pidáyode íode jnese gu iji daquiningamei tuté iji ore idai Mízpa ica, ga pidáyode udore ore idaisórone jĩraque chajnai ore pijnane. Mu uje ore angaránone ore chĩ́care Jabés-galaad i ica enga que Jabés-galaad idáisonique chajnai ore ga obiréjna uje a jé ca ore déji ore aquiningamei uté to ica.

^10-11 Enga israélgosode jĩraque ore chimáta dasoldádode aja uje pocaningane irajasórone u ore ga ore chise 12.000 nanique, jeta ore chicáji ore uniri Galaad enga ore chujé Jabés-galaad jogosórone ore iji te. Ga ore chojninga: "Ajéyo jnanione, chequedíe, disiode ore jne. Mu aquetáyo gapudíe jne jeta qué paré ore ga yocurasade benjamíngose ore cho dacoté iji udire jne."

¹² Enga israélgosode ore iquetadie iji gapu paredie ore chise 400, enga ore chijna udire ore aja ore idai Sílo uje déji Canaán ajei.

¹³ Enga israélgosode ore íjnongaja benjamíngosi casodica uecade ore úringane pucuecho iji ore acoyapídode iji cototedie ujade uje udire íode u Péña de Rimón. Uje ore chise ore ga ore chatata uje ajéquesé ore. Ga ore chiroque ore aja daquigade.

¹⁴ Ga israélgosode chisi ome daquetadie gapui ome benjamíngosode udore ore uje ore iqueta ore iji dajocaningai ome jabés-galaádgosode diríca. Mu gapudíe chiságui ore ga jnaneca uñane.

¹⁵ Israélgosode ore cho dáyugu uje Dupade juéga jeta ore chejnárase benjamíngosode ore ga pésurásu erãp uei iji ore uniri. Jecute ore chisi ome dasaguedie gapui ome benjamíngosode jeta ore quérãpo to rĩ, ga ore chĩretápo daniri údode to rĩ.

¹⁶ Mu israélgosode ore angaránone chojninga: "Gapudíe qué chona benjamíngosode ore enga ¿yoco ringome ore jne a, jeta gapudíe déji ore jnese? Uje e yejnángo chequedíe ore ica iji benjamíngosode ore ujade.

¹⁷ Enga yocajéode u jetiga benjamíngose uecade ore quérã ga ore chõre raque ga jiépoi ore to rĩ uje jé yocurása udore ore gu. Ga que yipótago jeta ore bijname yoque.

¹⁸ Mu uyoque ga que togome yoque jeta yujuéjo yocurodie ome benjamíngosode ore. Uje jé yocurúo ica gu jeta jé ca yocuñeque juéga daróraque ome ore. Uje yojnijome yocuruode ica: 'A gosi tẽra daróraque ome benjamíngotique jne ga gosi toi ome jne.'"

¹⁹ Ga ore chucué dáyipie quicho jeta ore chiraja dasocáringome benjamíngosode jeta ore chise dacotéraque. Enga ore jnusina israélgosode ore isocabei uje ore pésu daninaquei jogapi dire nanique iji siqueredie jnese jeta gapudíe doi jobeyei gatuaque iji ore ajñamini uté. Enga jecucha ore doi uté iji ore idai Sílo ga déji casaque garani yui iji ore idai Betel. Ga ore idai Sílo uté déji dajei dosadi yui iji guedé garani yui. Uje dajei uté qui u ore idáyode Betel, Siquem ore ujai. Enga déji umusoi garani yui iji ore idai Lebóna.

²⁰ Enga jé u uje israélgosode asutedie chósi tome benjamíngosode ore: "Boyo ga apócho uáguiji ore acadie úvai uéchade jne iji ore idai Sílo dosadode.

²¹ Enga arocho gapudíe ore jeta e ore doi jobeyei jne iji ore idai Sílo ga ore doi jobeyei aja dajesúode. Ga e ore déji dajñamini iji ore idai Sílo ejoi ga jé u jeta jnani chojmara, chojmarane ore doi guesi iji dacoyapídode ga jnani chojmarai toria gapúraque ga jno údi aja daniri ga jé acoté doridé uaté gapu.

²² Ga ujeta uacoridéraque gapu dai, jeoga dajade ore chise yoque enga ore chojninga: 'Benjamíngosode a toria yurábia que.' Mu a yojnijome ore jne: 'Chequedíe chona ore ga jé ca bajénique dotãre ome udore ore. Uje baraja uje yoquisaguedie gapui chona udore ore ica iji yoquijocaningai ome jadés-galaádgosi casodica.' Yirajágo uje uacojnicho ica: a chuque yoque jne jeta yujuéjo yocabidie ome benjamíngosode ore jne. Mu bamo uje que uaquerané uacarodie ome ore gotique. Jé ore oridei uacarodie. Jecute a ca uñeque cho uacaba ore oridedie uacaroi, enga a ca cucha dacatique chósi tiji uaque jne.'"

²³ Uje benjamíngosode ore chudute ore áyipiedie udiji quigode ga jé u uje ore chirote jobeyei gaitodie gapu ore iji Sílo uté ejode. Enga benjamíngose chojmara, chojmarane toria gapu chojmara, chojmaranie ga ore jno ore údi ga ore cho dacoté iji doridedie udire gapui. Ga jé u uje ore chajníja daniri uje Dupade e gueranome ore nanique. Ga ore pésu cuchade iji ga quérã. Ore idai papósi casodica chisápo dáringane quérãcho to rĩ, enga ore chopo dedáji udore ica rĩ.

²⁴ Uje israélgosode e ore pésu cuchade aja quigode ome benjamíngosode ore nanique ga jé u uje quene israélgose chojmara, chojmarane udore ore jnese chajnésarapo dáguedie jogadode rĩ. Ore chajníja dajogasúode ore iji dajnéone jnupe uje Dupade e gueranome ore ica.

²⁵ Iji deréjnane udore nanique ga cáma peduguéjna cuchátique cuse iji ore uniri Israel uté. Enga jé u uje israélgose chojmara, chojmarane jé ore doi dajequigode ome dameserãtígo cucha quitígo, enga que gosi chaquĩ́ra ore nanique.