Juéces 20 - Dupade Uruode

Israélgosode ore cho dajnutabádu levígosi acoté casica nanique ga ore pésu rágome pocaningai yui ome benjamíngosode ore nanique

¹ Israélgosode ore tṍraji dedáyode jnese nanique uje ore chudute benjamíngosode adode ujnomei. Uñane tṍraji ore idáyode uje ore íode u: Dan, Beerséba, Galaad ore. Ga uñane tṍraji dedáyode uñane to, ga ore chimáta raja ñane iji ore idáidatéi Mízpa. Ga ore chopise jnani chojmarai uje ore áyipie qui chojmaráji jnumi. Ga ore chutṍri Dupade ome benjamíngosode jeta ore chiraja dasocáringome ore.

² Israélgosode asutedie nóna darasade iji udore, udore jnese aja ore imatapídi. Ga Dupade cho darása iji ore nanique ga jé u nanique uje ore cho deduguéjnai iji Dupade to ome benjamíngosode ore nanique, ga ore isoldádode iji ore ejode chise 400.000 ore jnese jeta ore pésu rome benjamíngosode ore yui.

³ (Ga benjamíngosode ore chudute to uje e ore urasade israélgose chimáta raja ñane aja ore idai Mízpa ome ore jocaningai uje ore cho dajnutabádu levígosi acoté casica.) Enga israélgosode uje ore déji ore idai Mízpa ga ore catecã́ri levígosi uqué ome cucha dacadode quitígo.

⁴ Ga levígosi uté uje benjamíngosode ore chujé acoté ome cutejmai datuátiga chojningame ore: –Yico benjamíngosode ore idai Guibeá diríca, ga yijína yacoté aja jeta yimóngoji ore idai uté to.

⁵ Mu jnanione iji ore idai Guibeá ore chaparu yoquimochapie guiguíjna gai ga ore ajéode u jeta ore chujé yu. Ga ore chisa yacoté diríca ga ore tungarája uaté iji dejai údode ga ore chequésãre uaté ome cutejma dabupié.

⁶ Enga yisa yiquesei diríca ga yijnime uaté péode ga yirógaja israélgosode yocuniri údode jnese. Yigaidi tu jeta israélgosode ore chiraja cucha dacate noñai tuté to iji dedáyode ga ore cho dajuñame benjamíngosode ore to.

⁷ Jecute israélgosode uaque á, jé beyoi uacajequitígo ome uaque jeta yoco ringome udore ore jne, yacoté casé yungórone udore ore.–

⁸ Enga israélgosode ore chague jnese ga ore chósi tome daruode jnese: –¡A jé ca yocuñeque chajnésarapo dedánique jeoga dacárparique bajaque jne rĩ, jetiga cáma yijṍcacome benjamíngosode ore iji ore idai Guibeá!

^9-10 Enga yocáyipie qui jé u udé ome guibeágosode udore ore: israélgosode uyoque a yicoi yocajñamini ome ñane jeta yocajñamini yusórone chijnoque ore posode iji ore quigade. Enga pajñamini yusórone chojmara, chojmarane ore chãrei jõcaratade ore posode ome ore uje ore chejna yijmanáyone. Jé basa uñane ore doi pocaningai ome benjamíngosode ore iji ore idai Guibeá. Chamáñaje udore jé ore tiógara dáringane chucho gu uje ore bade u date noñángone uje que pisocame israélgosode uyoque gotique.–

¹¹ Enga israélgosode ore chopise ayoré chojmarárique aja benjamíngosode ore yui uje ore áyipie quigode chojmaráji jnumi jeta ore cugujnáji ore idai Guibeá uté.

¹² Enga jé u uje israélgosode ore chiroque dáyipiedie aja benjamíngosode ore uniri údode ga ore chojningame benjamíngosode: "Uacuñane pésu cucha noñanguipísi uje que déji israélgosode yocajénique.

¹³ Enga asíñome jnani dibáquechoquíode udore ore ome yoque uje ore déji ore idai Guibeá, ga a yejnángo ore jne. Enga a jé u jne jetiga israélgosode yocuniri udé chisápo dáringárique areque jne rĩ ome Dupade." Mu benjamíngosode que ore pota jeta ore chisi ome jnani dibáquechoquíode udore ome darasade israélgose ore gotique.

¹⁴ Enga benjamíngosode ore chimáta raja ñane to aja ore idai uje i tu Guibeá jeta ore chujé darasade israélgose ore.

¹⁵ Enga benjamíngosode ore isoldádode chise 26.000, enga Guibeá idaisórone ore chise 700 to uje ore cháta raja soldádode ore to ome ore jocaningai uté.

¹⁶ Iji benjamíngosode ore ga jnani araséode déji ga ore chise 700 ore. Ga ore chirajapise dachogaranone isocade jeta jé ca ore chicho dachotique cucha ejórique. Ujeta ore pota chicho dacatererotaque ga ore chichopise uaté enga cucarané que chicáji quedéjnarique gotique.

¹⁷ Mu israélgose uñane ore isoldádode 400.000 u ore. Enga ore dopísi dajocaningai uté uje que agúpurai ore gotique ome pocaningane.

Israélgosode ore jocaningai isocade u udojo nanique uje ore doi dajocaningai ome benjamíngosode

¹⁸ Enga israélgosode ore chicáji ore idai uje i tu Betel ga ore catecã́ri Dupade iji uté jeta gosode u iji ore ujade jeta ore cho dajnéngu benjamíngosode iji ore idai tuté bajaque. Enga Pangarádejnai Dupade juéga jetiga judágosode ore u jeta ore cho dajnéngu benjamíngosode ore iji ore idai tuté.

¹⁹ Enga israélgosode ore chobere ga ore basíji benjamíngosode ore idai ejábi uje i tu Guibeá.

^20-21 Uje israélgosode ore pésu dajochade iji benjamíngosode ore idai iquei, mu benjamíngosode cugujnáji israélgosode ga ore yugode chise 22.000 ore iji israélgosode.

^22-24 Jecute israélgosode ore chimátapo raja ñane aja ore idai Betel rĩ, enga ore catecã́ri Dupade iji uté enga ore chuságaja dejai ome dacatecãraitigade. Ga ore po jnese. Enga ore chingopo Pangarádejnai Dupade rĩ jeta jé ore dopoi pocaningai ome darasade benjamíngose ore rĩ. Ga Pangarádejnai Dupade chojningame ore: "Jé beyoi pocaningai ome benjamíngosode udore ore." Enga jé ore ijóningai cusapo rĩ ome dire uñai yui. Enga jé u uje ore dopoi dajocaninga casé rĩ ome benjamíngosode ore enga jé ore jocaningai jogadi u ore jocaninga casé jogadi uté uje ore chujé ñane iji diríca.

²⁵ Uje israélgosode ore dopoi benjamíngosode rĩ iji dire uñai mu jé isoca uje benjamíngosode ore tṍraji dedai Guibeá ga ore chuquéjnai ore ga ore yugode chise 18.000 ore iji ore isoldádode.

²⁶ Enga israélgosode ore chajniápo aja ore idai rĩ uje i tu Betel ga ore catecã́ri Pangarádejnai Dupade iji deréjnai údode enga que ore tagúpo dabotique rĩ. Enga que ore áyipie jnoji benjamíngosode ore yugode ore urása gu. Enga ore chujé dachidode cuchiso uñámone ome Pangarádejnai Dupade ga ore chaníraja Dupade aseradéjnai gai. Ore gaidi u jetiga Pangarádejnai Dupade ajei cho sere ome udore ore.

^27-28 Enga Dupade uruode pi cajo déji ore idai Betel uté iji dirode udojo nanique, ga uté irodisṍri u jnani bajai Aarón ajnami uje i tu Finees nanique. Ga uté dai i tu Eleazar to. Enga israélgosode ore chutṍri Finees ga ore chojningame: "Angoma yógaja Dupade jetiga ajéo ga qué yocope yoquijocaningame yocurasade benjamíngose udore ore, jeoga yiyágo pocaningai ome ore, enga jé dóji ga ore cho pujnuéngaisṍre iji raque." Ga Finees chojningame ore: "Pangarádejnai Dupade jnari uágome jetiga jé beyoi ore, enga a tẽra uacáringáringo pujnuéngaisóño ome uaque dirome jne."

²⁹ Enga israélgosode ore urasade soldácho jno bajaque ga ore pógu re iji benjamíngosode ore idai Guibeá ejode.

³⁰ Mu uñane ore dopoi benjamíngosode ore gaté rĩ, ga ore isocai jé u dasoca casé iji diri casodé enga ore pésu dajochai aja ore yui iji ore idai uté iquei.

³¹ Ga benjamíngosode ore tõrapóji dedai Guibeá ga ore cugujnápoji israélgosode ore rĩ jeta ore socárome udore ore gaté rĩ iji ore idai yui. Enga ore chicha degode israélgose ore aja ore idáyode Guibeá, Betel ore ujai. Enga ore chicha uñane cachodode aja garáyode, ga ore cháta degode aja ñane ga ore chise 30.

³² Enga que ore chimopo israélgosode gotique iji darosatique ga ore chojninga: "¡A ore chayopome yoque rĩ!" Mu que ore chiraja israélgosode ore áyipie quitique ga ore jos eti ore chayome ore, jecute jé ore jno dádi. Ore gaidi tu jetiga idája ore iji dedai ga jé u jeta israélgosode cugujnáji ore idai jogosórone ore uje irotasórone e idája iji ore gu.

³³ Bayade iji israélgosode ore chimátapo raja ñane rĩ iji ore idai uje i tu Baal-tamar, ga ore chucajningárome benjamíngosode ore. Ga ore ujóiso israélgose ore tṍraji dacoyapídode uje déji guedé cacadi yui iji benjamíngosode idai ejoi to rĩ.

³⁴ Enga ore cugujnáji benjamíngosode ore iji ore idai Guibeá uté nanique. Ga israélgosode udore ore u uje ore chirajapise pocaningane isocade ome ore ujode israélgoso iji ore uniri údode jnese; ga que pujnuéngai ore gotique ga ore chise 10.000 uje ore socárome benjamíngosode ore iji ore idai uté nanique. Enga benjamíngosode ore tṍra jórongui dajñarenie to ome dajocaningai uje cáma ore chiraja gu uje israélgosode udore e ore chajo ore aja ñane.

³⁵ Enga Pangarádejnai Dupade chisi ome israélgosode ore úringane pujnuéngaisóño ome benjamíngosode ga ore yugode iji benjamíngosode chise 25.100 nanique.

³⁶ Enga jé u uje benjamíngosode ore cha pocaningai unerai uje e ore chiraja uje que toc jeta qué ore suépo israélgosode ore gai to rĩ, uje ore jnese chijna dasṍrenie mu. Israélgose bayáiso ome benjamíngosode ore chayome ore gu uje ore angurenone u ayocaritade ore uje dimane ore iji danunguenie iji ore idai Guibeá ejoi.

³⁷ Ayocaritade ore cugujnáji ore idai ga ore chujé dácareode iji ore idai uté jnese ome dasṍrenie.

³⁸ Uje cáma ayocaritade ore jnome dajocaningai ga ore chojningame darasade: "Adójnacho jne jeta e yugúcoi ore idai jne enga a yãco gai jne ga a amóño úyujnáringui jne rĩ ga jé u jeta beyoi benjamíngosode ore to jne."

³⁹ Ga bayáiso ore chimo uje ore urásaisó e chãru ore idai gai ga jé u uje ore cugujnáji benjamíngosode ore to. Ga benjamíngosode ore chimo uje ore yugode iji israélgosode chise 30 ga uñane ore chayome ore ga ore chojninga: "¡Jé chopise yoquijocaninga bajade uje e yujnuéngopo ore gai rĩ!" Ga que ore áyipieraque déji jeta jĩraque ore chajniápo jne rĩ.

⁴⁰ Ga benjamíngosode ore chajnírase, mu ore chajire daquei mu ore chimo úyujna cuchábedie uje chichagu gatajnoquei uté.

⁴¹ Enga benjamíngosode ore chajirápo daquigade rĩ mu ore chimo israélgosode iji ga ore edodie tocade iji udore ore jmainie.

⁴² Enga jé u nanique uje quene benjamíngosode ore chucajningárome dajei uje chicáji erãpetarei ga ore chayome israélgosode. Mu que toc jeta ore chayo uje ayocaritade ucode uje ore chãru ore idai gai ga ore déji udore ore iquei ga ore chujé udore ore iji erãpetarei yui.

⁴³ Benjamíngosode ore chayo jórogome israélgosode ore mu jé ore chajna ore iji jnumone. Ga ore chicha ore cachodode aja dajei iji ore idáyode ujade uje ore íode u Guibeá, Menúha ore. Enga ore chejna udore ore iji guedé garani yui iji ore idai Guibeá uté dosadi to.

⁴⁴ Enga ore yugode iji benjamíngosode isoldádode chise 18.000 ore nanique.

⁴⁵ Ga benjamíngosode uñane ore chapite ga ore chicáji erãpetarei ga ore quigode urásu cototedie mu ore chicha ore cachodode aja cototedie udire yúode uje cototedie udire ore i tu Péña de Rimón. Enga ore yugode iji udore chise 5.000 nanique. Mu qué uñane chayo jóroque mu jé israélgosode chajna ore ga ore chujé ore ga ore chise 2.000 nanique.

⁴⁶ Iji ore jocaningai uté ga ore cháta degode aja ñane iji benjamíngosode ga ore chise 25.000 ore, uje jecucha ore jocaningane irajasórone u benjamíngosode udore ore.

⁴⁷ Mu benjamíngosode uñane qué ore chapite ga uecade iji ore chise 600. Ga ore chácariji cototedie udire ójodie uje cototedie udire íode u Péña de Rimón. Ga ore guejnane guedosi gagájni iji uté uje ore pógu re iji uté ome israélgosode.

⁴⁸ Enga israélgosode ore chejna benjamíngosode ore isoldádode ga ore chujé chequedíe, jnanione, disiode jnese ome dasṍrenie, jé aja ore gachidode cuchiso to. Ga ore chãru ore idáyode gáyode to aja dajesúode.