Juéces 2 - Dupade Uruode

Israélgosode ore angarádejnai Dupa chiroque datocaidi aja ore nanique, ga chiqueta raja ore iji ore apáringaméi nanique uje i tu Boquim

¹ Enga Pangarádejnai Dupade utocaidi gaté unirísõre chise israélgosode apáringaméi Gilgal nanique ga jnoji uté ga chicáji ore idai uje i tu Boquim jetiga catecã́ri ore iji uté. Ga chósi te ome ore: "Uyu u uje yijnimique uáguiji Egípto ica ga yoite uágaja puniri tudé ica uje yingome uacai casodica ore ica uje cáma ore gajneque jnumi udé ica. Uje yingo puniri tudé aja uacayode ore ica ga yojningame ore: 'Uacajneque yuru iyiejájnane ome uaque ga que toc jetiga yuruode toja gotique.

² Mu uacajnepídi ome yu ujetiga jé ca asíñome uacaru iyiejájnane ome yerani punire uté unirisórone udore. Enga ca beyoi purása quedéjnane udore ore jmapiedie to jne ome ore anguretígo cucha, mu ajéyo ore aseradéjnane iji jnumone to jne á.' Yuruode u jórogu udore ome uacayode ica, enga uacajnecho udore to, mu que angáchoi yuru quigode ome uaque. ¡Jé qué ajicho gojni to uje cuchade e chácariji uacádode iji yojninga casica punire udé!

³ Jecute yojningame uáguiji udé: A jé ca yirógapo purása quedéjnane udore ore aja dode jne rĩ iji uacaquéode. Ga a udore angurenone dupa quedéjna a cho paringaquei gajnéone ome uaque jne. Jé basa ga a purása quedéjnane ore cho jeta ore pésu dajuyáraque ome uaque jne. Enga a ca togápo guese pigaitígome uaque jne rĩ."

⁴ Uje Dupade utocaidi gaté unirísõre cha daruode ga israélgosode ore po iji dejode ga ore chinguíra dabijnanone aja dejode.

⁵ Jecute ore chĩ́care Boquim aja pijogadi uté, chamáñaje Boquim i qui tu Pagoyedie Jogadi. Enga ore tibidi ugode iji uté ga ore pésu daseradéjnai ome Dupade jeta ore tẽrája ga chicadígui ore ate gajnaréngone.

Josué toi nanique ga guejnanie siquerei 110 uje toi

⁶ Uje Josué e chiraja deruei nanique ga chingongarája darasade israélgose ore ga chopise ore quigode ome cuchade yúode. Ga jé u nanique uje juéga doi ome ore ga ore jnome daquigode daníño uje e ore gajnenguipíso udore.

⁷ Uje Josué qué eca ga pésu urasade israélgose ore doi Pangarádejnai Dupade uruode quigode. Ga jé isoca iji Josué úringai toque quigade uje ore dayode uñane pésu Dupade uruode ome darasade uje udore ore imópiso Dupade gueranone cucha pitijabácho to nanique uje Josué qué eca.

^8-9 Uje Dupade iroi Josué toi nanique ga guejnanie sequeré 110 años uje toi. Ga ore chijóchame Nun ujnacari Josué uté iji gajnei jnupe uje i tu Timnat-séra nanique. Ga Josué ode jogapi uté jnupe déji casaque garani yui iji efraíngosode ore uniri jogosórone cucarãcho tiógarei uje déji umusoi garani yui. Ga cucaranone udore uñai déji ode iquei ga cucarani uté i tu Gaas.

¹⁰ Iji Josué úringai toque quigade ga ujo casodica jnani uje ore urásapise Josué ica, ga ore chejna raja toi jnese. Ga jé u uje israélgosode ore ape ejode que uñeque chirajápo Pangarádejnai Dupade gotique rĩ. Ga que ore chirajápo Dupade átedatéode gotique to rĩ uje uté pésu ome ore dayode israélgoso ore jnese.

Chise diri nanique uje israélgosode ore íjnongaja purása quedéjnane angurenone cucha ga que uñeque doi Dupade adode gotique

¹¹ Ga chise diri uje Dupade chajire israélgosode ore isocade ga que chise ore unétique uje ore chirate purása quedéjnane ore aja ore angurenone ayoré gajnúo gu. Ayoré gajnúone udore ga ore chĩ́care Baal aja ore ga ore tẽrája udore ore angurenone to.

¹² Ga ore chapúsu ore dayode jnani bajácho angureni casica Dupapísi uje ijnimique ore iji Egípto ica, ga ore doi darasade purása quedéjna ore angurenone dupa quedéjna Baal adode to. Ga jé u uje Dupade ajei dotárome ore isocade.

¹³ Que gusu jeta ore catecã́ri dupa quedéjnai uje i tu Baal mu ore catecãrápoi dupa quedéjna uña rĩ uje i tu Astarté ga ore chijna uaté oré gatedie aja daguíjnane ajéode iji ore idáyode údode.

¹⁴ Jecute Dupade ájningaránguipísome israélgosode ore ga chiroque oriechoquíode ore aja ore idáyode jeta ore chajnose ore ome ore ugúcha ponáyone jnese. Mu que Dupade chedu oriechoquíode ome ore gotique mu tẽra ore ome purása quedéjna uñane to jeta ore socárome ore iji ore idáyode ga que ore chisa dejóringome desórone ore.

¹⁵ Ga adi jé upome ore umajosórone to rĩ uje Dupade cháta raja ore umajosórone ome israélgosode uje israélgosode do jórogui pocaningane ome ore. Uje Dupade jé urúo ome israélgosode nanique gu iji taningai uje chisíome daru iyiejájnane ome ore, uje chojninga: 'A jecucha yijína uágaja uacajesúode jne jeta beyoi yuruode. Mu jeta ca angáchoi yu, ga a yujuéga jeta uacamajosórone sué uacabáyode to jne.' Mu chise diri nanique ga israélgosode que ore chirajápo dasocáringome re rĩ, uje que ore ujñapegápome cuchárique rĩ ga jé u uje ore agutedie cho jora, jorame dasododéringai.

¹⁶ Mu que Dupade noñome israélgosode iji te jmete nanique. Ga chiringare jnanione uñane aja gatéode iji ore ujade jeta ore adode pijógome udore ore isocade. Ga jnanione udore ore cho darasade ore quique ome ore umajosórone isocade yúode. Ga Dupade gaidi u jeta udore chijnime darasade ore iji purása quedéjnane adode jmainie.

¹⁷ Mu israélgosode que ore tangári padode irajasórone udore. Ga jé ore chajnera dádi ome dadode uje que ore chise Dupade unétique. Enga jé ore chajo raja dangurenone Dupa quedéjna to. Ore dayode ga ore dopísi Dupade uru iyiejnane quigode ica, mu ore ujnacare ejode que ore dopoi dayode angureni casica Dupa uru iyiejane quigode gotique rĩ.

¹⁸ Mu uje qué padode irajasónique qué eca ga Dupade jecucha cháta cuchade aja israélgosode gu uté ijnoraquei ome Dupade. Dupade tangári israélgosode cutejmane ore uyaca uje ore chisa dabade iji damajosórone josipiedie jmainie, ga chosõripise ore gatuaque. Ga jé u uje chiroque padode irajasórone aja ore jeta chijnime ore iji pisocade udore jmainie.

¹⁹ Mu uje padode ajirisṍri toi ga israélgosode que ore basíji purása quedéjnane ore isocade yúrique. Ga jé ore chajnera dádi ome dasoca noñángone uje ore doi dupa quedéjnane isocade to. Mu uje ore ujnacare bajade toi mu ore ape disi ejode qui jé u ome cutejmane date noñácho, ga ore sué dai casodica ore isocade gai. Que ore cha dajegaidode cucha unétique uje ore cusu rome gu.

²⁰ Ga Dupade ájningaránguipísome israélgosode ore ujnacare ejode ga chojningame re: "Urénga, ayoréode udore ore tagu yuru iyiejájna casodica aja uje yisi ome ore dáquiode ore ica, ga que ore pota tangári yu gotique.

²¹ Uje cáma Josué toi nanique ga purása quedéjnane uñane qué ore déji punirone udore nanique iji israélgosode ujade. Yajéode u jetiga yijócãre ore iji ore iquéode mu a jé ca yijócãrapo ore jne rĩ uje angoninguite pariguipise disi ejode udore ome yuru quigode gu.

²² Uje yijíome purása quedéjnane iji israélgosode ore ujade, mu yigaidi u jeta yetingare israélgosode udore jeta ore pésu yajegaidode cucha. A yidójnanga jeta jé ore doi dai casodica ore jmapié uje que ore chimoque Dupade adode ica, jeoga ore doi purása quedéjnane jmapiedie to."

²³ Enga qui jé u uté uje Pangarádejnai Dupade juéga purása quedéjnane udore iji israélgosode ore ujade. Que jĩraque chijócãre ore, enga que chicha purása quedéjnane udore ore jnese aja Josué ore jmainie nanique iji uté úringai ueca.