Juéces 19 - Dupade Uruode

Benjamíngosode adode gajnarenguipísome levígosi acoté uje ore moji ore idai Guibeá nanique aja dajesui uje ore chajníja dedápisi

¹ Uje cáma eduguéjnarique déji israélgosode ore gari nanique ga israélgosode uñane ore isocade gajnarenguipise nanique. Enga a qué yatata levígosi isocade jne uje cho darengúji cucaranone nanique uje déji Efraín Gajnéone Garáyo. Ga idájapise uté irengúone nanique ome urasade ore. Enga uté nóna gapua uje idai tu Belén. Ga uaté idai déji judágosode ore gajnei jnupe ajei to.

^2-3 Mu chise diri nanique uje uaté pojna dabai ga chajníja dayé ore rĩ iji ore idai Belén. Uaté chácariji dayé ore gari ga guejnane guedosi gagájni enga quene abai levígose chucué iji dayé ore iguíjnai. Enga déji uté ga catecã́ri acoté jeta nonapója irengúi to rĩ. Enga levígosi nóna daroi, jé aja dachidode burica quedéjna ore uje gare. Ga acoté que chirógaja doi, mu chojningame ore: "Apúsoi iapade iguíjnai jne."

⁴ Enga jé chome gapua dayé uje irasique re to uje nasarai ore di iji iguíjnai enga chojningame ore: "Ácayobíji yocari." Enga levígosi chácariji dayoquíjnai iguíjnai ga ore tagu ore posode to, ga ore chójiapo ore jódode cucha to rĩ, ga ore moji iguíjnai ajei to.

⁵ Iji dire gagájnia ga levígosi jĩraque niji jeta chobéri dajei. Enga levígosi iyoquíjnai chojningame nasarai uté: –Jé qué bo jne mu agábu arureque petígaja bajesui enga a uajate ua aja bariguítigai jne.–

⁶ Enga udore ore chácare ga ore taguíji ñane gari, levígosi iyoquíjnai ore. Enga gapua dayé chojninga: –Ácayope to ga oyope uacajñare ome dire uñai yui.–

⁷ Levígosi ajéode u jeta e jnorase mu iyoquíjnai chaquĩ́ra, ga jé u uje que jno ga tangári dayoquíjnai uruode ga chácare.

⁸ Uje dirode e chejna yijmanai iji gapua dayé iguíjnai uté ga, levígosi chobéri niriji jetiga jno. Mu jé isoca uje iyoquíjnai nejéna jetiga tagu dabotique cucha pibose aja dajesui jeta uajádaja dajei. Enga ore chacásãra ñane iji datigai ga ore catecã́ri ñane ga guedé e idája iji jnumi ome ore.

⁹ Levígosi e dimane acoté, iroi ore jeta ore jnorase, mu iyoquíjnai chojninga: –Ácayope to. Guedé e idája iji jnumi, ga amóñomíji de to rĩ, enga yugúcobi ñane gari iji dejai tudé ga yicatecãcoi ñane ga a quene obechoi doi dirome.–

^10-11 Mu levígosi que pota jetiga qué chácarapóji dirome rĩ. Enga chanire dachidode burica quedéjna charipíode aja gai, enga jé u uje quene ore jno, ga nóna dacoté, daroi ore aja dajesui. Uje ore chise jebuséogosode ore idai Jerusalén, ga levígosi iroi chojningame darósõri: –¿Cho ringome bajéode jeta yimóngomíji jebuséogosode ore idai uté to a?–

^12-13 Ga levígosi chojninga: –A jé ca yimóngoji pidánique to jetiga ca israélgose ore iji. Yico ga yimóngoji ore idáyode Guibeá, Ramá uñeque to jne uje israélgose ore gu iji te.–

¹⁴ Ga ore jnopo gaté rĩ mu guedé jnome ore iji benjamíngosode ore idai Guibeá.

¹⁵ Ga ore chácare iji dajere ga ore chicáji ore idai Guibeá jeta qué ore moji ore idai uté to iji dejai. Mu que ore chiraja damochátiguiji ore idai tuté, uje que uñeque dejéna ore aja daguíjnai jeta ore moji. Enga ore cháguena gatéode iji ore idai ajã́ro.

¹⁶ Enga ore chuniname eti jnani choquíjnarique quene chajni iji dasagode cucha pisacho iji garai, uje e guedéjnoringái u gu. Enga efraíngose jnani tuté uje garani upúsu cucarãte orónenie iji efraíngosode ore achamini uté, mu cho dedáji benjamíngosode ore idai Guibeá uté to.

¹⁷ Uje jnani choquíjnai uté chimo ayoré díode udore ore ga chojninga: –¿Órañoji rique? ¿Acayóji rique a?–

¹⁸ Enga levígosi chojninga: –Yórangoji Belén, judágosode ore uniri, ga yoquiqui tu Efraín Gajnéone Garáyo uje yirengúi déji cucaranone uéchai iji tiii. Mu que yirajágo yoquimochátique iji guidai tudé.–

¹⁹ Levígosi chojningápo rĩ: –Yocachidode burica quedéjna posode e déji yoque. Ga pan jé aja víno déji to ome yu, jé aja yacoté, jé aja yiroi uté. Enga que cucha uñeque chona yoque.–

²⁰ Enga jnani choquíjnai uté chojninga: –Yajéode u ujetiga jé ca cuchárique chósi tiji uaque jne. Ajínaño yu aja yiguíjnai. Ga a uyu u jne jetiga yisi ome cucha eyútique ome uaque jeta cuchárique chona uaque. Mu jé ca amóñomíji guetique jne.–

²¹ Enga jé u uje jnani choquíjnai uté jno ore údi aja iguíjnai. Ga chisi ome burica quedéjnane posode ome ore. Enga uté chisíome yodi ome levígosi uté jé aja acoté jé aja iroi ore jeta ore churu darídade. Quigade enga chisíome ore posode ome ore, jé aja ore jódode cucha.–

²² Levígosi, guiguíjnai iguíjnasṍri ore irasique ñane ga qué ore catecãrirási ñane, mu jnani cucha bisidégode iji ore idai uté chaparu guiguíjnai uté gai, ga ore chujé guiguíjnai piagoi. Enga ore chinguíra dabijnani aja guiguíjnai iguíjnasṍri enga ore chojningame: –¡Ajnime jnani uje di iji uaque! ¡Yipótago jeta yimóngo iji gari á!–

²³ Enga guiguíjnai uté iguíjnasṍri catecã́ri ore ga chojningame ore: –Jé ca uacaruode urásu udore ome di uqué jnani iji yiguíjnai tudé. Uje que pisoca gotique jetiga jnanírique tungarája dojórique jnani.–

²⁴ Ga jnani choquíjnai uté chojningápome ore rĩ: –Yurábia cusosi uje cáma amanique cus. Jeta apótayo ga yijnája ne ga angarachója uaté, jeoga jnani uté acoté u. Mu gajnareque jeta yijnime jnani uté uje yinejéramáite uté aja yiguíjnai que gu.–

²⁵ Mu jnanione udore que ore tangári guiguíjna iguíjnasoramí uruode gotique. Ga ore chojninga: "Ajnime jnani uté ome yoque." Enga levígosi chiroque dacoté aja guesi ga benjamíngosode udore ore pésu dajochai ome jeta ore tungarája uaté iji dejai údode. Uje guedé quene chipésosi guesi ga ore cha tungarája uaté ga ore juéga doi ome.

²⁶ Ga gapua uaté chajnírasaja dabai jogapi casé guiguíjna, ga chise piagoi mu cṍra aja jnumi iji piagoi iquei, enga jé chácariji dajogadi uté jé aja diri.

²⁷ Ga abai levígose niji iji durasé ga chuchẽre ore iguíjnai piagoi gai jeta ore jnome daqui mu chimo dacoté casé iji jnumi ga chose eti mongué uje chujé dajmainie aja ore iguíjnai joride isangurúone iji jnumi.

²⁸ Enga chojningame dacoté: –Ayague ga yico.– Mu que acoté cho cuyuque ga e chiraja uje a togué. Enga levígosi uté chisa dacoté casé ga chigarúja dachidi burica quedéjna guidoboi enga chijnóngaja daguíjnai.

²⁹ Ga diji daguíjnai ga chisa daquesei ga chajuque dacoté casé péode aja jnumi, enga gare iji yirídai. Ga jé u uje chiroque acoté casé péode aja israélgosode ore uague chojmara, chojmaranie jnese uje 12 u ore, jeta ore jnese chidójnanga cucha dacate gajnaréngone udojo.

³⁰ Ga israélgosode jnese uje ore chimo udojo ga ore chojninga: –Uje israélgosode yicoji Egípto nanique mu que pimo cuchárique uje cunguésõri cucha tocachugode udojo nanique jé aja deréjnane udojo. ¡Ga que déji pajénique, enga a yucuegoi yoquisocáringome cucha dacate gajnaréngone unojo jne!–