Juéces 18 - Dupade Uruode

Dángosode ore dejéna sacerdote levígosi aja daquigade jeta ore chutṍri uté ga ore cho sacerdote iji uté to

¹ Íjnoque israélgosode eduguéjna cuchátique iji ore ujade iji deréjnane udore. Enga dángosode cáma ore chimate rágaja dajnei erãpe gotique to. Uje unirisórone qué ore déji gu. Enga que ore chiraja dayaritique jecute ore chacája ñane iji darasade unirone uje e ore déji dajnepídode jnupe.

² Jecute dángosode uje ore idáyode u Zóra, Estaol ore nanique, ga ore chiroque jnani chaguesíode uñane uje ore chejna yijmanai ga ore cho guidai ga ore chicáji cucaranone uje ore i u Efraín Gajnéone Garáyo. Uje ore eduguéjnane chósi tome ore: "Adójnachopísa cucaranone iji te, jé aja unirisórone udore ore." Ga jé u uje ore jno ga ore chicáji Micaía iguíjnai aja dajesui ga qué ore moji uté to iji dejai.

³ Ore déji Micaía iguíjnai ejoi iji guesi enga ore chudute levígosi uruode ga ore chiraja uje purása unejaque, enga ore catecã́ri ga ore chojningame: –¿Gosi jõra ua aja dojo ica ya? ¿Bacuetíguiji udojo a? ¿Gotique gu a uje bagúsiji udojo to?–

⁴ Ga levígosi chojningame ore: –Micaía u ica uje chaquĩ́ra yu iji dari ica jeta cho sacerdote iji uyu.–

⁵ Enga ore chojninga: –Angoba yógaja bangureni Dupa to jeta jé ca cuchárique chósi ti iji yoque aja yocajesui.–

⁶ Ga sacerdote levígosi chojninga: –Boyo, ga ca oyo uacáyugu uágaja uacajesúode uje Pangarádejnai Dupade a chuse uaqueo jne aja uacajesúrigo.–

⁷ Ga guidáyode udore uje ore chejna yijmanai ga ore jno ga ore chicáji ore idai uje i tu Laís. Ga laísgosode ore isocai jé upúsu darasade sidóniogosode ore isocai, uje tijode cho jnángome ore ga que cuchárique chonapo ore gotique rĩ. Que ore dosóñime cuchárique yúrique gotique, ga que ore áyipieraque déji pocaningárique úringárique pipesute. Gusu ore iji ore idai Laís uté nanique, chamáñaje ore urasade uniri idájapísiji ore idai Laís uté gu. Enga laísgosode udore ga que ore chopo darása iji purása quedéjnane gotique rĩ iji ore uniri uté.

⁸ Enga jnani guidáyode udore uje ore chejna yijmanai ore chajni aja ore idáyode uje ore íode u Zóra, Estaol ore. Ga ore urasade dángose catecã́ri ore ga ore chojninga: –¿Jé cho rique datã ya?–

⁹ Ga ore chojninga: –Yico punirone udore iji cucaranone ujade ga ueracho erámone iji udore. Boyo, yico ga yoco yoquijocaningame laísgosode udore ore, ga a yoco yocuniri iji ore unirone udore jne. Ayágueyo ga yicoi ore.

¹⁰ Ujeta e yico ore jne enga a amóño jne uje cáma ore chimáta rágome pocaningai yui to. Ga a amóño jne uje jnumi ueradíji udore, ga querúo jnumone iji laísgosode udore ore uniri uté údode. Enga a Dupade u jne jeta ipesute yoquijochai aja uté yui.–

¹¹ Enga jnani jõcaratade ore chise 600 iji dángosode udore ujade uje dimane ore ome pocaningai yui, ga jĩraque ore jnome laísgosode ore uniri.

¹² Uje ore chise judágosode ore uniri ga ore chicha darengúi aja ore idáidatéi ejode uje i tu Quiriat-jearim. Mu udojo quigade ga ore chécãre ore idai uté i ga ore chojningame 'Dángosode Ore Apáringai.' Ga ore idai Quiriat-jearim déji guedé cacadi dosadi iji ore uniri uté.

¹³ Ga ore jnoji dapáringai ga ore chicáji cucaranone uje ore íode u Efraín Gajnéone Garáyo. Enga ore chise Micaía iji iguíjnai iji te.

¹⁴ Enga guidáyode udore uje ore chejna yijmanai diríca uje ore chidójnanga cucaranone iji laísgosode ore uniri uté, ga ore catecã́ri dajorane ome dupa quedéjnane iji Micaía iguíjnai ajé uñai. Ga ore chojninga: –Ore angurenone dupa quedéjna jiéji ore iguíjnai tuté ajei uje cãra rome ñane. Ga uñai déji uje ore chimesa pláta nanganatáguedie ga pláta uéguepise uté, ga ore arobé gaminóri déji to uje i tu efod, ga chopise jnani bajai Aarón gaminóri casicaite. ¿Yoco ringome jne jeta yoriago? Ga yoco yocangurecho iji udore to jne.–

¹⁵ Enga guidáyode ore chicáji Micaía iguíjnai jeta ore chajmita jnacari levígose uje pusi Micaía uté iguíjnai nanique. Ga ore catecã́ri uté nanique.

¹⁶ Enga ore jorane chirote ore iji iguíjnai piagoi iji guesi uje 600 u dángosode ore, uje udore dimane ome pocaningai yui.

¹⁷ Uje guidáyode ore chacája ore angurenone dupa iguíjnai ajei ga ore toria dupa quedéjnai oré tuaté uje ore chimesa pláta nanganatáguedie ga pláta uéguepise. Ga ore chátaja efod, jé aja dupa guichayade uñane uje Micaía acoté, abode ore catecãrainone u udore. Uje ore pésu udore mu sacerdote catecã́ri soldádode iji guesi uje ore chise 600.

¹⁸ Uje guidáyode udore ore doi guesi iji Micaía angurenone dupa quedéjna iguíjnai ga sacerdote chimo ore ga chojningame ore: –¿Uacapesutique?–

¹⁹ Enga guidáyode chajnai uruode ga ore chojningame: –O paraque, ga bo ga ajína yoque to. Ga a yoco yocangarate sacerdote iji ua jne ga a ca yujuséjo ua jne. Ga a dángosode uyoque yocopise yocaji ua jnese jne. Cachi ayoré chojmara barásai iji de uje tangári bacajnaquéode. Jé basa ga dángosode uyoque yocuatigájna uje a yangácoi ua jnese jne. ¿Ja jé ca ueradi tu ome ua jetiga israélgosode uague chojmara uje jiépisi ore iji ore uague uaté ore cho dangaráni iji ua ya?–

²⁰ Enga sacerdote irasique ore uru quigode ga chisa efod ga jno ga nóna ore to. Enga ore chijnoque Micaía angurenone dupa uñane oredie aja dajesui to, jé aja ayoré gajnui oredie uña uje ore chimese gai ome guebeque póroro nanganatágode.

²¹ Enga dángosode ore chijñaque dacotedie, dabode ore, jé aja dachidode cuchiso ga ore chácariji ore quigade uje ore chiraja gu uje Micaía a chajna ore jne.

²² Enga Micaía chimáta darasade ga ore chajna dángosode ore. Ga ore chijna dõrachade to.

²³ Ga Micaía ore pijnacarachi aja ore quigade. Uje dángosode ore chudute pijnacaraidie ga ore chachai Micaía iji garani ga ore catecã́ri ga ore chojningame: –¿Babijnane gotique? ¿Gotique uje babijnacarachi, ga uacabicho yoquibai?–

²⁴ Enga Micaía chojninga: –Yajna uaque gu uje uacaboyo yangureni casodé údi ga uacaboyópo yacadisṍri casé údi to rĩ enga yácariji te ¡paque! uje que cuchárique dépoji yu rĩ. E mu uacojnichome yu: "¿Babijnacaraidie gotique?" Uje uacarajáyopise pijnai cucha mu.–

²⁵ Ga dángosode ore chojningame: –Micaía, jé ca anguíra babijnani aja yoque. Ja seca yocuñeque chejnáreque babijnanone gajiné ga jĩraque chujé ua gajiné. Ga jé ca yedugo báringárique chuque, e mu báringai chuque chise bajogasui ore to jne.–

²⁶ Enga Micaía chimo uje ayoré dipeséjna dángosode ore ga chajni aja daguíjnai. Jé basa dángosode jé ore jno daqui údi.

²⁷ Ga dángosode ore nóna Micaía acadisṍri, jé aja angureni casodé dupa quedéjna uje Micaía ipesucho nanique, ga ore chise daqui guidai nanique uje i tu Laís. Mu idai idaisórone que ore áyipieraque déji pocaningárique yúrique, jecute dángosode jĩraque ore chujé ore ome dasṍrenie ga que ore chisa dejóringome desórone ore, ga ore chãru ore idai gai jnese.

²⁸ Sidóniogose Laís idaisórone ore, mu ore uniri idája iji ore ga que toque ore irotangónique ore ujo ayoré, jecute dángosode sué ore gai. Ga que ore ejominónique ore ujo ayoré cháta pocaningai aja ore, uje purása quedéjna Laís idaisórone udore ore gu. Ore idai Laís déji cucaranone ujai, enga idógosiji ore idai uñai uje i tu Bet-rehob. Ga dángosode ore chácariji dapósi uqué ore idai ga ore pésu adode enga jé u uje ore cho dedáji uté to.

²⁹ Enga ore cha ore idai tuté i bajai ome, ga ore pésu i ejoi ga ore chojningame Dan. Uje ore urásarique israélgose i u nanique jecute ore chĩ́caraja dedai tuté. Ore gaidi u gu jeta jé ca picadique ore gãrapi jnani bajai uté uje jnani bajaguipise Israel ujnacarode uña uté nanique.

³⁰ Enga dángosode ore chijnime doridi casica dupa uje ore pésu iji guebeque nanganatágode ica ga ore chuguhésiji dedai ejoi ga ore catecã́ri uté jnese iji dedai. Enga ore oridi casica Micaía acadisṍri déji ore gari to ga jé ore cho dacadisṍri iji uté to. Enga ore acadisṍri uté i tu Jonatán, ga jnani bajai Gersón ujnacari uté, ga Moisés ájnape Jonatán uté to. Enga dángosode jecucha ore cho dacadisórone iji Jonatán ape disi ejode ore iji dedai tuté to nanique, jé aja diri uje purása quedéjnane jno israélgosode údi to aja danirone erámio.

³¹ Dángosode que ore dopoi Dupápisi uruode to nanique rĩ iji darásapísode israélgose ore idai Sílo uje Dupápisi Iguíjnai déji uté mu. Enga dángosode ore chácariji dedai ga ore catecã́ri doridi casica dupa iji dedai uje Micaía uté ipesudi u nanique.