Juéces 16 - Dupade Uruode

Sansón chijnime gázagosode ore idai ujuyaquéode piago cuchábode nanique ga jno údi aja cucarani ójo

¹ Iji dirode uñeque ga Sansón chicáji filistéogosode ore idáyode uñai uje i tu Gáza. Enga chimo gapu dibéchoquía iji ore idai tuté ga nóna uaté aja iguíjnai jeta qué moji gari iji dejai.

² Ga idaisórone ore chudute uje Sansón déji ore idai ga ore chirote ore idai ujuyaquéode piagode jeta Sansón chise ore ga ore chisa ga ore chujé. Uje e dejnínga ga ore chajni jeta ore mo ga ore suru piagode. Ore gaidi u jetiga ore chobéri Sansón yui dirome iji durasé.

³ Uje Sansón doi guesi iji dibéchoquía iguíjnai iji dejnínga gatócoro ga dorási guesi iji ore idai mu ore suru piagoi ga uajádiji uje ore chanire erã́sori aja gu. Ga chijnime ore ujuyaquéode piago cuchábode uje ore chiramísara ñane, mu uje chijnime ga isangurúone tocade to, jé aja erásorone jnese, ga chaníraja dorotadé ga jno udore údi aja ore idai ejominóri cucarãte ójo enga chicháji uté ójo tiji gaté. Cucarani uté déji cucarãte uñai tiógarei uje i tu Hebrón.

Sansón pota gapua nanique uje i tu Dalíla ga chingo detotiguei garani ome uaté nanique

⁴ Cuchade udojo quigade enga Sansón chimo gapúraque iji cucaranone ujai uje i tu Cucarãte Ujai Sorec enga pota chóji uaté gari uje gapua uaté i tu Dalíla.

⁵ Enga filistéogosode asutedie ore tibágui gapabia suaté ga ore catecã́ri enga ore chojninga: –Ãra Sansón enga acatecã́ri ome etotiguei garãtique cucha jne. Ga ojningame jne: "¿Cucha dacatique dérasi iji rique jeta suérase babai?" Enga a chatatame ua jne enga a angome yoque gaté jne. Ga jé u jeta yirajágo yoquisocáringome jne jeta yisago. Enga a yoco boré jne jeta acatecã́ri ome etotiguei garãtique cucha. Ga a jnani chojmara, chojmarane iji yoque chimate ua ome 1.000 iji pláta guebéode.–

⁶ Enga jé u uje gapabia chojningame Sansón: –Sansón á, ¿betotiguei garãtique a? Angoba yu. ¿Ga pigarique ua ga jé aquesúrase babai a?–

⁷ Enga Sansón chojninga: –A pigarique yu ome docojitígo jeta carupe ichade gare iji ti ga que toc jetiga yaquesu udore. Ga a jé yorase jnani serẽrachugode ore iji udore jmainie.–

⁸ Uje filistéogosode chudute udojo ga jĩraque ore chisi ome docojique carupe ichade ome Sansón ipotigadé suaté ga chuse guio iji dejode. Uje Sansón diji gapabia suaté jeta qué chajmitárase mu gapabia chigaru Sansón ome ojninga casodé ducaricho uje gare iji ti uje uté mo.

⁹ Ga jnanione uñane ore déji dacoyapídode iji uaté iguíjnai ajei. Enga gapua chigaru Sansón ga tibite ga chojninga: –¡Sansón á! ¡Filistéogosode déji de ga a ore chisa ua jne!– Enga Sansón jĩraque chaquesu docojique carupe icháiso ¡jnac! ¡jnac! Enga jé u uje filistéogosode que ore chiraja Sansón etotiguei garãtique cucha.

¹⁰ Enga Dalíla chojningame Sansón: –Sansón á, bãra yu. Taque ua.– Enga Dalíla chojningame: –Angopísa cuchárigaja yu jeta pigarique ua ome marínga, ca aquesu jeta betotiguei jé ca chijnime cuchárique ãrírique, ga angopísa betotiguei guejnangónique cucha aja yu.–

¹¹ Enga Sansón chojninga: –Ujetiga pigarique yu ome enué ichárique, ga que toc jeta yaquesu enga a uté u jeta chejna yetotiguei enga jé yo jnani serẽrachugode ore to.–

¹² Enga Dalíla chisa enué ichai ga chigaru Sansón ome, ga chigarupúsu aja ñane. Enga uaté tibite ga chojninga: –¡Sansón á! ¡Filistéogosode e ore di jeta ore chisa ua!– Ga jnanione ore déji dacoyapídode to iji Dalíla iguíjnai ajei ga dimane ore ome Sansón yui. Mu jé isoca uje Sansón chaquesu enuéone udore ga chopise jeta aparané ome Sansón.

¹³ Ga Dalíla jé ate dadi uje chojningame Sansón: –Bãra jé u yu uje que atata betotiguei jnuéngaisónique cucha ome yu. Be, ga angopísa betotiguei jnuéngaisónique cucha ome yu jeta pigarique ua ome ga que aquesu.– Ga Sansón chojningame: –Dalíla, aro yacãrai aja bora ujade ga bajugupétigo gare iji ti jne iji yacãrai jeta arója bora ujade. Ga ajo ojnaquéro aja bora uaté eruei enga a bora tuaté u jne jeta chejna yetotiguei. Enga a jé yopise jnani serẽrachugode to jne.– Iji dejai uté ga Dalíla chirote yui jeta Sansón e mopise, ga jé u uje uaté jĩraque chiro Sansón acãrai aja dora ga chajo ojnaquéro aja dora eruei.

¹⁴ Enga chajopísaja jnumi jeta uajádiji jnumi. Enga Dalíla tibite ga chojninga: –¡Sansón á! ¡Filistéogosode ore di jeta ore chisa ua!– Mu Sansón niji enga jĩraque chijnime ojnaquéro iji jnumi jé aja gapua ora uaqué.

¹⁵ Enga Dalíla chojninga: –¡Aringácachoquí ua! Uje bãra yu ga gadioque. Chiese ajnóra yu, mu taque ua, uje bajñieta yu gatuaque gu. Uje que atata betotiguei garãtique ome yu.–

¹⁶ Dalíla jecucha chojningame Sansón iji deréjnai údode: "Ango betotiguei garãtígaja yu." Que chimoque guedé batigárique uje pota chiraja Sansón etotiguei jnuéngaisónique cucha. Enga Sansón ga tangári Dalíla uruode quigode ga uruode chácariji Sansón údode.

¹⁷ Ga quene Sansón chatatapísa detotiguei garani ome. Enga chojningame: –Dalíla, uje yibase nanique mu que pujugape yatui to nanique iji yibatigai, jé aja deréjnane udojo to. Uje cáma yibase nanique ga Dupade cãrai nazaréo uyu iji ité ajei. Bamo uje gosi cho nazaréo iji re ga que toc jetiga pujuque gosi gatui to jé aja jeta chimate daruode aja guesi jnese ome Dupade. Mu jecute Dupade jé ajéo ome yu ica jeta jé ca pujuque yatui to jé aja yeruénique. Mu ujetiga gosi chuju yatui ga a yetotiguei íjnoque jne ga jé u uje yiserẽrája ga yopise jnani serẽrachugode ore to.–

¹⁸ Enga Dalíla e chiraja uje Sansón que pógupo cuchade ome rĩ, uje chatatapísa udore ome, enga jĩraque chiroque daroi aja filistéogosode asutedie ore yui jeta chingome ore uje Sansón quene chatata detotiguei garani ome. Enga filistéogosode ore tibágui Dalíla ga ore chijna daplátadie iji dajmainie aja uaté yui ujetiga ore chisi ome Sansón oredie ome uaté.

¹⁹ Ga Dalíla chojningame Sansón: –Amope ga ajé batoi aja yetarúdode gai.– Enga Dalíla pésu ga Sansón mo. Enga jé u uje tibidi jnani ga chaquesu ipesudíso chaguhéjna uje gare iji ti iji gatui. Enga uaté chinguíra dabijnani aja Sansón.

²⁰ Ga chojninga: –¡Sansón á, filistéogosode ore di jeta ore chisa ua!– Enga Sansón niji jmame ga jos eti qué etotiguei casé déji uje que chunina gu uje Pangarádejnai Dupade Ujopié e chijnime re iji que.

²¹ Enga filistéogosode ore chisa Sansón ga ore chusaque edodie enga ore jno údi aja ore idai uje i tu Gáza. Ga ore chigaru Sansón uté ome ojnaquérorigui uje ore ipesudome guebéode uje i tu bronce. Ga ore chisi ome Sansón isai cucha pisaque ome iji ore jurúgai guiguíjna ga uté chijáro ore acai trígo ome erã́sori iji deréjnane jnese.

²² Uje iyajmaque Sansón iji úringai pujurúgai ga gatererodie suépo rĩ ga quérã, quérã ga umarejnápo rĩ.

Sansón toi nanique ga umajosórone ore patĩ́ora Sansón uté iji itoringai

²³ Ga chise diri uje filistéogosode ore asutedie ore pésu dajñamini ga ore tẽrája dangureni dupa quedéjna iji uté uje ore angureni dupa i tu Dagón. Enga ore chijñecãre ga ore chicha Sansón aja dachachagúgode. Ga ore chojninga: "Yocangureni dupa Dagón chicha yocumajósõri casé Sansón aja yoquijmainie uje etotiguei sué yoquibai diríca mu."

²⁴ Enga ore urasade chirate ore ga ore chijñecãre to ome dangureni dupa Dagón. Ga ore chicha Sansón aja dachachagúgode to ga ore chojninga: "Yocangureni dupa Dagón chicha yocumajósõri casé Sansón iji yoquijmainie. Cachi qué déji uje sué yocurasade ore gáyode diríca enga chujé ore diríca ga chãrupo garáyode diríca rĩ ga chejnápise cuchade gáyode to diríca rĩ. Cachi ujuya re uje yocangureni dupa tṍra uté aja yocúdi."

²⁵ Ga ore chutṍri dasutedie jeta ore chijnája ore ajñamini to. Enga ore doi Sansón iji jogadi ga ore chijna aja ore ajñamini jogapi guiguíjna ajei. Ga ore chicháji dajñamini guiguíjna cutádedie ujai ga ore chujñieta uté ome dajñiequéode.

²⁶ Enga Sansón chojningame dajorámi disape suté uje jno údi aja quedéjnane: –Asa yijmainie aja cochocóiya cutádedie gotórigui ga yope yujñare iji udire jne.–

²⁷ Enga filistéogosode ore asutedie jnese déji ore iguíjna cuchábi uté ajei nanique. Ga chequedíe, jnanione ore déji uté to ga jiépisi ore. Ga udore uñane déji guiguíjnai uté gateminóri ga ore chise 3.000 iji ajé gateminóri uté. Ore chácariji uté ga ore toji dasutedie gai iji dádi uje ore chujñieta Sansón iji guiguíjna ajei jnutiminóri, ga ore cana ore ujñiequéode gai ome Sansón iji dádi.

²⁸ Enga Sansón jnusina Dupade ga chojninga: "¡Pangarádejná, Dupade á! ¡Ajnusinama yu to iji de yé! Enga átape ua aja yu ga chojmarárique jne rĩ. Ga yope yedo pusíga casidé ujo jne ome filistéogosode udore ore. Ga atire yetotigué casé yibai ga chojmára."

²⁹ Ga Sansón chucué ore cochocóiya uaté cutadé gáredie uje déji ore ajñamini jogapi guiguíjna uté gatócoro, ga chisa chojmára ome dãrachua ga chisa jõra ome darasé.

³⁰ Ga jé uje Sansón tibite ga chojninga: "¡Ajuéga filistéogosode ome yu jne enga ore patĩ́ora yu jne jeta ore angureni dupa gotique iguíjnai tudé cṍra yoquibai é!" Enga jé u uje Sansón chejna detotiguei aja guesi uje chisa ore angureni Dagón iguíjnai cutádedie ga chucuase iji gaté ga jé u uje cho cocho-cochóguiji gaté ga cṍra filistéogosode ore asutedie ore gai, jé aja ajeminórone filistéogose ore jnese. Ga Sansón yuque ejode uje ore patĩ́ora uté, ga suépise yuque bajade gáyode jnese uje Sansón uecaringuéone qué u nanique.

³¹ Uje ore chudute Sansón ujnomei to ga jĩraque desade tibágui jeta ore jno Sansón údi jeta ore chijóchame iji garai uje déji ore idáyode ujai uje ore íode u Zóra, Estaol ore. Enga Sansón iguiosode jnese nóna desade aja yui. Enga ore chijóchame iji dai Manóa ode ejoi. Enga Sansón guejnanie siqueré chise 20 años nanique uje chajire israélgosode ore adode aja quigode.