Juéces 13 - Dupade Uruode

Dupade iroi chiqueta raja Manóa acoté ga chingome uje a abi cuse jne ga úringa ujningaqué jé u ome uaté nanique

¹ Ga israélgosode ore chajniapója date gajnaréngone to rĩ iji Dupade edominone. Enga Pangarádejnai tẽra petotiguei ome filistéogosode ga ore guejnanie siqueré chise 40 años nanique ome dáringane pujnuéngaisṍno ome israélgosode ore nanique.

² Enga dángosi déji ore idai Zóra nanique uje i tu Manóa. Uté acoté que atique cuse gotique to uje abere gu.

³ Enga Dupade utocaidi gaté unirísõre chiqueta raja chequé uaté enga chojningame: "Que amo disi patígo ome ua to, mu a báringa ujningaqué jé u iji de to jne."

⁴ Ga Dupade utocaidi uté qué jno daruode údi ome uaté ga chojninga: "Ajuse babi guio iji bajei jeta jé ca óji víno uje qué déji bajei, jé aja yote pioi úringárique pote. Enga jé ca agupo Dupade garéngone cucha to rĩ.

⁵ Ujetiga ga babi base jne enga jé ca aju uté gatui to jne. Uje Dupade e cãra babi ga 'nazaréo' babi uté jne uje qué déji bajei mu. Enga cho jetiga e doi nazaréode ore jmapié uje ore chisi ome daru iyiejájnane ome Dupade, ga que toc jetiga ca ore dopísi daruode udore aja quigode to. A pijnimique israélgosode ore iji filistéogosode ore ujade jne, ga bajai tu babi uté jne ujetiga socárome ore. Mu israélgosode irotangórone uñane a basája uté quigade jne ga a ore chajnerame adode enga a ore u jne jeta ore chijnimipise israélgosode iji ore jmainie jne."

⁶ Udojo quigade ga chequé tibágui dabai ga chatata deyasṍri gaté unirísõre adode ome abai uté ga chojningame: "Jnanírique tibágui yu que uje chatata Dupade uruode ome yu ga yangaripísi uté uru quigode ome yu que. A gaté unirísõripíse ome yajéode, mu que yicatecã́ri ome írique jeta tṍraji rique. Enga que chatatapo déringome yu que rĩ jeta tṍraji rique.

⁷ Gusu uruode ome yu que uje a yatique cuse jne. Enga chojningame yu que: 'Jé ca óji víno to jne, jé aja yote pioi to, jé aja Dupade garéngone cucha pibotique jeta jé ca agu to, uje bagaidi tu gu ujetiga babi úringai nazaréo pijoguipísome Dupade to iji bajei.' Ga chojningápome yu rĩ: 'A bababi basosi jne enga jĩraque nazaréo uje Dupade ingarai u, ga a jé chuságaja eruénique jeta ga topísi jne.'"

⁸ Uje Manóa chudute dacoté ojñane udojo ga catecã́ri Dupade ga chojninga: "¡Pangarádejná, Dupade á! Arógapo jnani uqué gosi aja yoque rĩ uje e tibágui yacoté que, ga catecãrami yoque iji de ga chatata dojningai uté disi gotique ome yoque rĩ iji de ga a yirajágo yoquisocáringome uté jne."

⁹ Enga Pangarádejnai Dupade tangári Manóa uru quigode ga gaté unirísõri chisápo acoté rĩ uje qué déji garai. Uje Manóa acoté chimo gaté unirísõri ga jĩraque chayóji dabai yui.

¹⁰ Ga chojningame dabai: –Yiyasṍri casé jnani e chisápo yu que rĩ ga ¡boji te! ga jé qué yibájoi.–

¹¹ Manóa jĩraque chague ga nóna dacoté aja gaté unirísõri uté jogadi. Enga Manóa catecã́ri ga chojningame: –¿Ama ua u diríca ya uje bacatecã́ri yacoté diríca?– Enga jnani catecã́ri ga chojningame: –Ejẽ́, jé uyu u diríca.–

¹² Enga Manóa chojningame: –Ujetiga ga disabi basosi jne ga ¿yoco ringome jne jeta yipécosu, disabi suté? ¿Yocorási ringome rĩ a jeta Dupade cho daróguiji?–

¹³ Ga Dupade iroi gaté unirísõre chojningame Manóa: –Beyoi yuru qui casodé uje e yingome bacoté diríca.

¹⁴ Enga jé ca uaté chójisi dabogoro chojmaráraque to jne iji víno, yote pioi ore. Enga jé ca tagupo úvadie rĩ, jé aja cucha pibotique uñeque rĩ jeta ore cháta úvadie aja ore posode udore. Enga jé ca tagupo Dupade garéngone cucha uñeque to jne rĩ. Enga jecucha beyoi yuru quigode udojo jne.–

^15-16 Manóa que chiraja uje gaté unirísõre dacatecãraisṍri uté gotique, jecute dejéna uté aja daquigade ga chose dojórique ayoré aja gu ga chojninga: –¿Ama agúrasu yoquigátique áyasa quedéjna ape to a?– Mu gaté unirísõri chojningame Manóa: –A yácariji uacari marínga, a jé ca yacásãrarásaja uáguiji uacabosode udore to iji uacaguíjnai uté to. Mu jeta apota ajé áyasa quedéjna abape suté ga ẽrame Dupade jne.–

¹⁷ Ga Manóa catecãrápoi gaté unirísõri gaté rĩ ga chojningame: –¿Jé go uje que atataba bérique ome yoque jeta yocabi base jne enga yacãco babai jne a?–

¹⁸ Ga gaté unirísõri chajnai Manóa uruode ga chojningame: –¿Gotique gu a uje bapota jeta araja yi? Uje cucha pitijabádode datei tu yi gu, enga que pute ome ayorérique uaque.–

¹⁹ Enga Manóa chujé áyasa quedéjna ape chocábi ga chicháji cucarané gai, ga chimera arroz quedéjnai aja uaté iji cucarané gai. Enga chibore dẽrapáidabi suté ome Dupade. Enga jé u uje Pangarádejnai Dupade pésu dapesute pitijabádi iji Manóa, acoté ore edominone.

²⁰ Uje ore ipotai ocarádejna ga ore icatecãraisṍri uqué, Pangarádejnai Dupade iroque gaté unirísõre, tṍraji ore ipotai uté ocaraidie ajei ga nóna pioque ocaraidie udire aja gaté. Uje Manóa, acoté ore chimo cucha dacadode udore, enga ore chichaga dagataidie aja jnumi ga ore gatoidie chisípise jnumi ome daguté joradie.

²¹ Uje ore guiyasṍri gaté unirísõre que chisápo ore rĩ jeta catecã́ri Manóa, jeoga acoté, mu Manóa e chiraja uje Pangarádejnai Dupade iroque uté aja ore, uje obiréjna uje que ayoré gotique.

²² Enga jé u uje Manóa chojningame dacoté: –¡Ise mu a yitogoi jne jõ! Uje Dupade a upúsu yoquimoi uté que.–

²³ Mu Manóa acoté chojninga: –¡Ise mu jé ca u baruode quigode udore gotique jõ! Ujetiga gaidi urásu yocúringárique chuque ga a jé ca chimesẽrirase yoquigábi áyasa quedejna abape suté uje yisígome qué, jé aja yoquẽrapáidi arroz quedéjna uje yimecója áyasa quedéjna que. Bamo uje uté chingo cucha dacadode udore aja yoque mu qué yiquecágo uje cachi ingongarãque udore aja yoque gu. Ujetiga gaidode urásu yocúringáringo chuque, ga a jé ca chatatarása yocabi úringai basuque gotígome yoque.–

²⁴ Uje chise dínique enga Manóa acoté abi base ga ore chĩ́care Sansón aja. Enga ore ababi quérãsi ga Pangarádejnai Dupade jecucha chacacãrósi uté aja gaté.

²⁵ Uje e jnacare gatódape Sansón ga uté déji garai iji ore idáyode ujai uje ore íode u Zóra, Estaol ore nanique, enga jogadi uté i tu Majané-dan. Uje Sansón déji jogadi uté nanique ga quene Pangarádejnai Dupade Ujopié chijocase re iji Sansón uté ajei.