Juéces 12 - Dupade Uruode

Jefté, galaádgosode ore cho dajocaningame efraíngosode ga ore sué ore gai nanique

¹ Enga efraíngosode ore chudute uje Jefté ore sué amóngosode ore gai ga ore tṍraji yote quedéjnai uéchai uje i tu Jordán enga ore quítequiguíji ore idai uje i tu Zafón iji tié uéchamitó uña, ga ore chicáji Jefté iguíjnai. Ga ore chise Jefté ga ore chojningame: –¿Gotique gu a uje uacoyo uacajocaningame amóngosode ore diríca, mu que ango uacajocaningai aja yoque to diríca ga que atṍri efraíngosode uyoque to diríca? ¡Enga a yãco baguíjnai gai jne, ga yátago ua aja baguíjnai to jne ga yãco babai to jne iji baguíjnai ajei!–

² Jefté chajnai efraíngosode uruode ga chojningame ore: –Jachi yibidi uaque ica ya ome amóngosode ore ica uje ore adode gajnaréngome yoque ica. Mu uaqueteque ica eti beyoi yuruode ica jeta arota yoque to ica.

³ Uje yimo ica uje que aríño ga yisi ome yu ome amóngosode ore ica jeta yirota yurasade ore, ga cho jeta yẽra yu ome amóngosode ore ica, mu Pangarádejnai Dupade u uje ipesute yúringai pujnuéngaisṍre ome amóngosode ore diríca, ga yujnué udore ore gai diríca. Ga ¿gotique gu uje uacapótayo pocaningai ome yu uje que yiraja gotique jeta yipésu uacajuredie mu?–

⁴ Efraíngosode ore dojnóngaja Jefté, urasade ore iji ore uniri Galaad ga chojningame ore: "Uacarásapísode u efraíngosode, manasésgosode uyoque arĩa, mu uacajíñoñome yóguiji te jmete nanique ga purása quedéjna unératácho uágome yoque gajiné iji uacaniri Galaad uté." Ga Jefté chejnáreque efraíngosode ore uruode ome re ga nóna darasade galaádgose ore ga cho dajocaningame efraíngosode ga ore sué ore gai nanique.

⁵ Ga galaádgosode ore cho dajnéngu efraíngosode gajnepídi ore aquesupídebeque iji yote quedéjnai uje i tu Jordán. Ga jĩraque ore chirote uté uéchade jnese. Jeta ore urásarique pota chicáji tié uéchamitó ga ore catecã́ri gosi ga ore chojningame: "¿Efraíngose ua ya?"

⁶ Mu ujetiga gosi chojninga: "Úngare, que efraíngose yu go," enga ore chojninga: "Jé cá ojningáma to 'Shibolet'." Ujeta gosi chirajapise i ome galaádgosode ga obiréjna uje galaádgose gosi ga ore juéga doi ome gosi. Mu ujeta gosi chécãre uje que chimécãre i ga chojningame: 'Sibolet', ga obiréjna uje efraíngose gosi ga ore chujé uté gosi. Ga ore chisecãru degode iji efraíngosode gatuaque ga ore batigai chise 42.000 nanique.

⁷ Jefté chajire darasade israélgose ore adode aja quigade nanique ga siqueredie chise 6 años ga jé u uje toi. Ga ore chijóchame iji ore idai Galaad. Ga idai uté u Jefté iríguidi, ga jé u uje ore chicha ode taja ore idai tuté nanique.

Israélgosode adode ajirisórone uñane basája Jefté quigade nanique ga ore adode u udojo nanique

⁸ Uje Jefté toi ga israélgosode ore adode ajirisṍri cuse to uje i tu Ibzán ga uté idai i u Belén nanique.

⁹ Ga Ibzán urodie cuse ga ore chise 30 nanique, ga ujnacarode ore chisápo 30 to nanique rĩ. Uje ore dayé chucué darodie abayode nanique enga chucuéji guidai unejángone, enga jé chopome dajnacarode ore rĩ uje chucué ore acotedie iji guidai unejángone to. Ga Ibzán uté guejnanie siqueré chise 7 años nanique uje chajire israélgosode adode aja quigode.

¹⁰ Mu chise diri uje Ibzán toi ga ore chijóchame iji ore idai Belén.

¹¹ Enga zabulóngosi Elón chajire israélgosode adode aja quigode iji uté quigade, ga guejnanie siqueré chise 10 años nanique uje chajire ore adode aja quigode.

¹² Mu uté toi nanique ga ore chijóchame iji zabulóngosode ore uniri nanique, ga ore chicha uté ode aja ore idai uje i tu Ajalón.

¹³ Iji Elón uté quigade ga israélgosode ore adode ajirisṍri u Abdón. Ga uté idai tu Piratón, ga uté dayé u jnani bajai Hilel.

¹⁴ Enga uté guejnanie siqueré chise 8 años nanique uje chajire israélgosode adode aja quigode. Ga Abdón uté abode jiei nanique ga ore chise 40 nanique, enga ájnamone 30 u ore nanique to. Ga ape chojmara, chojmarane ore ga jecucha ore choru dachidode burica quedéjna, jé aja ájnamone ore to.

¹⁵ Uje Abdón uté toi ga ore chijóchame iji ore idai uje i tu Piratón. Ga Piratón uté déji cucaranone ujai uje amaléquegosode ore gajnecho cucaranone udore nanique, mu jé ore cho cucaranone udore i iji ga ore chojningame Cucarãte Amalec. Ga déji efraíngosode ore gajnei jnupe.