Juéces 11 - Dupade Uruode

Israélgosode ore cho dasuté iji Jefté nanique ome pocaningai yui ome ore umajosórone amóngose ore

¹ Chequé dibéchoquía déji ore uniri nanique. Ga uaté, ga abi déji ajei uje jnani bajai Galaad ica uaté ica nanique. Ga abi tuté base ga jé ore pésu i ga i tu Jefté nanique. Uje uté chise dáringai jnacare ga jõcaratáguebec, ga chiraja pocaningane adode.

² Jefté dayé ape uñane cuse to iji dacotépise gari nanique. Enga uje e jnacare ga Galaad ujnacarode uñane ore chijócãre iji dedai. Ga ore chojningame: "¡Bo ome ua! ¿Ama yocai abirase ua ya? Bãrapié tu chequé dibéchoquía ica. Ujetiga yocai ga toi jne enga a jé ca o bagúchaji ugúcharique to jne. A gusu yógome uje yocaipise uté gu."

³ Enga jé u uje Jefté chayome dayade ore nanique ga chicáji ore achamini uje i tu Tob. Ga jnani ducaranone cháta raja Jefté iji uté ga ore nóna aja quedéjnane. Ga ore cho danunguéji dajei ejode ga ore toria ayoré urugúode ugúchade.

⁴ Iji deréjna uñai ga amóngosode ore socárome israélgosode iji ore uniri Galaad.

⁵ Ga eduguéjnane iji ore uniri Galaad ore chiroque darógode aja Jefté yui iji ore achamini Tob uté jeta tibágui ore iji ore idai uté to.

⁶ Uje ore asutedie chimo Jefté ga ore chojningame: –¡Boji te! Yipótago jeta yoco yocasuté iji ua ga yijnajo ua aja amóngosode ore jne jeta yoco yoquijocaningame ore uje jecucha ore socárome yoque gatuaque gu.–

⁷ Mu Jefté chajnai ore uruode ga chojningame ore: –¡Uaquetachopise yu iji uacaniri Galaad ica arĩ́e! ¿Ga jé ca ajócãcho yu iji iapade iguíjnai ica ya? ¿Ga ca uaque u to a, uje uacarócho yu aja doi ica? Ga que uacuñeque chaquĩ́ra yu iji dajogatique ica. Ga ¿gotique gu a uje uacacueyoi yu uje quene cuchade chajo uágaja ñane?–

⁸ Ga ore chajnai Jefté uruode ga ore chojningame: –Jachi, jé u arĩ́e. Uje cuchade chajo yógaja ñane ga yocáyipiedie doi ua, uje dicase ua gu jeta ajína yógaja amóngosode ore ga yicoi ore. Ga a yiyágo yoquijocaningai jne ga galaádgosode a yoco yocasuté iji ua jnese iji yocuniri udé údode.–

⁹ Jefté chajnai ore uruode ga chojninga: –Ujetiga uacajéode jé u jeta yáta yu aja galaádgosode uaque iji de ome amóngosode enga a yijína uágaja ore jne. Ujetiga Dupade ajéo ga yujnuéngo ore gai ga a quene oyo uacasuté iji yu iji uacaniri tudé.–

¹⁰ Ga eduguéjnane udore ore chojninga: –Yoquipijogúsõri Pangarádejna Dupade chiraja uje ũré yoc. Jeta yiyágo yoquijocaningai jne, ga a yoco yocasuté iji ua jnese.–

¹¹ Ga Jefté cháta raja israélgosode ore ga ore cho dasuté iji uté ome pocaningane yúode, ga ore chopo dasuté iji uté rĩ iji ore uniri tuté údode jnese. Ga Jefté nóna jõcaratade ore aja ore idai Mízpa ga chingopísa raja Dupade iji ore idai tuté ga chatata eduguéjnane ore uru quigode jnese ome Dupade, jé aja daru quigode to. Gaidi tu gu jeta Dupade nóna uté aja ore jocaningai yui.

¹² Ga Jefté chiroque datocaidode aja amóngosode ore yui ujetiga ore chingo uruode quigode aja ore. Ga Jefté utocaidode chise amóngosode eduguéjna cuchábi uté ga ore chojningame uté: "Yocasuté Jefté uruode u udojo ome uaque: '¿Betétique iji yoque uje bapota ujetiga uacoyo uacajocaningame yóguiji yocuniri?'"

¹³ Enga amóngosode ore eduguéjna cuchábi chojningame Jefté utocaidode udore: "Israélgosode uje ore jnoji Egípto ica ga ore socárome yoque iji yocuniri Amón uté nanique. Ga ore chijna yocuniri pei iji yocari nanique. Uje uté eruéode u tiedie nanique uje íode u Arnón, Jaboc, Jordán ore. Enga yipótago jeta asíñopome yocuniri pei tuté ome yoque rĩ ga a yiyágo yoquijocaningane ome uaque jne."

¹⁴ Uje ore irógode di amóngosode ore eduguéjna cuchábi údi ome Jefté ore nanique ga jĩraque Jefté chirógapo daroque uñane aja amóngosode ore eduguéjna cuchábi yui te rĩ.

¹⁵ Ga Jefté utocaidode ore chise dabaguiédi eduguéjna ga ore chojninga: "Jefté uruode quigode u udojo que: 'Israélgosode uyoque ga que yijnángo yocujórique ayoré gajnetique jnupe iji gari gotique, jeoga amóngosode ore gajnetique jnupe, jeoga moábgosode gajnetique.

¹⁶ Uje yocáquiode israélgose ore jnoji Egípto nanique ga ore chicáji erãpetarei ga ore qui tu Yote Quedéjna Caratai. Ore chicáji uéchamitó to aja pajmini uje i tu Cádes nanique.

¹⁷ Enga yocáquiode ore chiroque datocaidi jnacare aja edómgosode asuté yui jeta ore chaquesu ore uniri aja daqui yui, mu que juéga ome ore. Ga ore tibágapoi moábgosode eduguéjnai rĩ ujetiga juéga daniri ga ore chajuque uté aja daqui danire yui, mu que juégapome ore rĩ. Jecute igasique ore iji ore ajmini Cádes uté nanique.

¹⁸ Uje ore jnopóji dapácadi dajmite uté nanique ga yocáquiode israélgose ore chayo moábgosode, edómgosode ore unirone gai nanique ga ore tṍraji guedé garani yui iji tié edúdi uje tié uaté i tu Arnón. Ga que toque jeta ore chicáji uéchamitó uje moábgosode ore uniri u uéchamitó gu.

^19-20 Ga yocáquiode chirógui jóroque datocaidode aja amorréogosode ore eduguéjna cuchábi Sehón yui nanique jetiga ore catecã́ri iji idai uje i tu Hesbón. Mu jé isoca uje que juéga jeta israélgosode ore chaquesu tié Arnón nanique jeta ore chaquesu ore uniri ga ore chicáji daniri yui. Sehón uté chotigase yocáquiode israélgose ore nanique gu enga que juéga jeta ore chajuque ore uniri aja daqui danire yui. Ga Sehón chimáta dasoldádode jnese ga ore pésu rágome pocaningai yui iji ore idai Jaháza nanique. Ga jé u uje ore socárome yocáquiode israélgose iji te nanique.

²¹ Mu yocáquiode israélgose ore angarádejnai Dupa u nanique uje jnuéngai amorréogosode ore eduguéjna cuchábi Sehón ga guejnaque ore asutedie ore nanique. Jecute guẽrate amorréogosode ore unirone udojo ome yocáquiode israélgose ore nanique ga ore cho daniri iji udojo nanique gu uje Dupade gueranome ore.

²² Enga ore cho daniri iji tiedie ujai nanique uje ore íode u Arnón, Jaboc ore. Jé aja erãpetarei ga chuságaja yote quedéjna uñai uje i tu Jordán nanique.

²³ Mu uaque ga uacapótayo jeta ajnáño Dupade guerani cásodicáite puníño udojo iji yocari uje chisi ome yocáqui cásodicáite ore nanique.

²⁴ Ujetiga uacangureni dupa Quémos chisírasome puníningome uaque, ga a jé ca etachorase guẽratique punire ome uaque. ¿Jé ũré yu a? Ga adi jé u ome israélgosode uyoque uje que toc jeta yetájo Yocangarádejnai Dupa guẽratique punire ome yoque uje gueranome yoque gu.

²⁵ ¿Ama ajos eti ua u a ujeta ajnué jnani bajai Balak úringa dacasuté gai? Yojningai uté u moábgosode ore asuté uje dai u jnani bajai Zipor nanique. Mu que uté ujñapegome yocáqui casodica israélgose ore nanique ga que doi pocaningai ome yocáquiode udore nanique.

²⁶ Enga e siqueredie chise 300 años uje yocáquiode ore cho daniri iji yocuniri udé nanique. Ga ore chopo dedai iji ore idáyode Hesbón, Aroer ore to nanique rĩ, jé aja acorásedie iji ore idáyode ejode, jé aja ore idáidatéode uñane uje déji tié Arnón edúdode. ¿Gotique gu a, amóngosode uaque, uje e siqueredie chise 300 años ome yóguiji punirone udojo mu quene uacapótayo jeta oyo uacaniri iji yocunirone udojo?

²⁷ Que yocatique gajnaréngome uaque gotique. Uaque u uje uacapótayo oyo uacajocaningame yoque. Mu Pangarádejnai Dupade chimo cuchade jnese ga pañaji israélgosode yocadode jnese, jé aja amóngosode uacadode to, ga uté a u ujeta chiraja uyoque gosode jeta gajnareque gosode adode ga a chirota uréningo iji yoque jne ga a chijna punirone udojo iji tátigo gari jne.'"

²⁸ Amóngosode ore chudúdi jóroque Jefté uruode, mu que ore tangári. Ga qué ore pésu rágome pocaningai yui.

Jefté chisi ome daru iyiejájnaringo ome Dupade nanique

²⁹ Ga Pangarádejnai Dupade Ujopié Espíritu Sánto base Jefté gai ga dicasepis ome pocaningai yui. Enga jĩraque Jefté chimáta dasoldádode ga ore chajuque manasésgosode ore uniri Galaad iji gatócoro aja dajesui ga ore chise daqui ore idai Mízpa ga ore chuquéjnai amóngosode ore iji ore uniri uté eruei.

^30-31 Ga Jefté chojningame Dupade: –Dupade, ujeta apésu gajiné ga pujnuéngaisṍre yu ome yocumajosórone amóngose udore ore gajneri ga a yiyágo pocaningai ome ore jne enga a yisápo yiguíjnai te jne rĩ ga a gosi tṍraji ajei jne jeta chachai yu, ga a yujé uté gosi jne. Ga a yẽra gosi jne ome ua jne ga a yibore gosi jne iji yaseradéjnai gai ome ua.–

³² Ga jé u uje Jefté jno ga nóna israélgosode ore aja amóngosode ore uniri. Ga ore chachẽre amóngosode ga ore sué ore gai ga Dupade chisi ome Jefté úringai pujnuéngaisṍre ome nanique.

³³ Ga Jefté yugode jiéji amóngosode nanique. Ga ore guejnane ore idáyo chise 20 nanique rĩ. Ga ore guejnane idáidatéo u Aroer, Minit, Abel-keramim ore nanique ga idai ajámone déji ore ujai to nanique uje ore chejna idaisórone iji to nanique. Ga jé u uje israélgosode ore sué amóngosode ore gai nanique.

³⁴ Uje Jefté e díji daguíjnai ga ape ugurábia qué doi jobeyei iji iquei ga chujé deguedie cucha uña uje i tu panderéta. Uje irasique dayé yui gu uje chudute ujnomei uje sué amóngosode ore gai. Ga uaté u uje jĩraque doi guesi bajaque iji dayé iguíjnai ajei iji ore idai Mízpa uté nanique ujetiga chachai dayé iji garani.

³⁵ Uje Jefté chimo dababía ga jĩraque jnusina dáñieja casodé ga chisa daguidé ga chajnangarásiji daróbuchai gai uje imoi u uje Jefté que jé chiraja dasocáringome daru casé yui. Enga chojningame dabia: –Urénga, yababía, bajuyapise yu ome páyuguhebátigai uje yojningame Pangarádejnai Dupade diríca, 'A yujé gosi jne jeta tṍraji yiguíjna piagoi bajaque,' ga ua u uje bṍraji bajaque que. Ga ua u jne jeta yujé ua ome Dupade, uje yurúo diríca. Ga a ca toc jeta jé ca yi yuruode.–

³⁶ Ga Jefté abia chajnai dayé uruode ga chojningame: –Iapá, yai tu ua, ga jé be baruode gotígo diríca ome yu uje a barúo ome Pangarádejnai Dupade diríca gu. Uje uté guẽrate báringai pujnuéngaisṍre gu ga bajnué yocumajosórone amóngoso ore gai diríca. Jecute a jé ca yotigase ua ome baru quitique jne.–

³⁷ Enga uaté chopósi tome dayé uté rĩ: –Mu Iapá, ajuégabá ga yapídape aja guedosi gáningo, ga yi ga yijínama yijoranie aja cucaranone edúdode iji datã, ga yibobája yajesúode uje a jé ca yimo jnani pamanique ome yu to jne.–

³⁸ Jefté chajnai uaté uruode ga chojninga: –Jé areque, be báyipiedie udire.– Enga jé uje Jefté juéga guedosi gárode ome dabia jetiga uaté chapite aja guedosi gárode uje abia ojningane jé u gu. Enga abia joranie ore nóna ga uaté joranie jecucha poji ejode to uje ore chudute to uje a dayé chujé jne ga a jé ca chimo jnani pamanique jne ome re.

³⁹ Uje uaté chejna guedosi gárode ga jé u uje chajníja dayé iguíjnai te rĩ. Ga cachodi jé u ome dayé uje dayé urúo ica gu ome Dupade. Jefté urábia tosi dáringamía parape údi nanique uje cáma chimo jnacare pamanique ome re to nanique.

⁴⁰ Ga israélgosode jecucha ore pésu diri nanique iji siqueredie jnese jeta Jefté urábi casica ujodie gapu ore pésu diri ga jecucha ore poji uaté quigade nanique enga ore chejna dire gagájnione ome dáringanie ugoi uje ore jnusina Jefté uro cachopi dire gu.