Juan 8 - Dupade Uruode

Judíode ore chicha chequé aja Jesús iquei uje abupié uaté nanique

¹ Mu Jesús chicáji cucarãtique uje i tu Olívos.

² Dire uñai enga Jesús jnoji direjnímei enga chicapóji Dupade iguíjna cuchábi rĩ. Enga ayorébui ore chose yui enga Jesús chácariji dayaridi iji Dupade iguíjna cuchábi ajei enga jé u uje chacate ore.

³ Uje qué Jesús déji dacajnaquéode gai mu Moisés urusarane atatasórone, fariséode uñane ore chijna chequé aja Jesús uje ore chisíji jnani gari uje qué ore chisa ñane. Enga ore chicháji ayorébui ajénique.

⁴ Enga ore chojningame Jesús: –Pacadisṍri á, yico chequé udaque que iji ate gajnaréngone gai uje déji jnani quedéjnarique gari.

⁵ Bamo uje Moisés urusarane quigode jé u ujetiga yujégo uje yatingáraco chequé ate gajnarénguenie ujetiga yico ore iji ore ate gajnaréngone gáyode. ¿Jé o ringome chequé udaque a?–

⁶ Ore ajéode u ujetiga ore chise Jesús bárique cucha iji uruode ujetiga ore doi enga ore chaguhéta gai iji dangaránone iquei. Jecute Jesús doi jnumi iji dayaridi enga churúsãre iji jnumi ome dajmané.

⁷ Mu jé ore ate dadi uje ore catecã́ri Jesús uje ore chojninga: "¿Jé o ringome chequé udaque?" Mu Jesús chipotingarápo re rĩ enga chojningame ore: –Ujetiga íjnoque uacuñeque isijnaringuéone enga bajaque uté gosi jne ujetiga chisa cucaranéraque ga chatingare chequé ome doidéraque cucarané.–

⁸ Dopoi jnumi iji dayaridi rĩ ga jé ate uje churúsãre iji jnumi.

⁹ Mu Jesús uruode udojo chajuque ore agutedie enga jĩraque ore jnusina date gajnaréngone jnese. Enga e ore chijnire ñane aja guesi. Bajade u jnanipísode. Uje ore déji guesi jnese enga Jesús chuniname eti gusu chequé iji charidi. Uje uaté cháji uté gu.

¹⁰ Jé u uje Jesús chipotingare re aja gaté. Enga que chimo ayorérique. Gusu chequé iji charidi. Jecute catecã́ri, enga chojninga: –Chequé a, ¿jnanione ucode jé ore déji rique uje ore chaguhéta cuchade babai? ¿A ca uñeque chatingare ua que a?–

¹¹ Enga chequé chojninga: –Que uñeque chatingare yu que.– Jecute Jesús chojninga: –Adi jé u yadi uje a ca yo yujuñame ua to jne. Mu bo ga ca apésapo cucha gajnarétique jne rĩ.–

Jesús u dírecaringuéi iji erámone

¹² Jesús chacadápo ayorébui ore rĩ enga chojninga: –Dírecaringuéi u uyu iji erámone udojo. Ujetiga gosi tangaripísi yacajnaquéode quigode enga uté gosi u uje déji dírecaringuéi. Enga pucuecaringué eyúgojmai gajnesṍri u uté gosi. Enga a ca digapóji ijnangununie jne rĩ.–

¹³ Uje fariséode ore chudute udojo enga ore chetaque Jesús acajnaquéode. Enga ore chojninga: –A ca pangurete ua. Chamáñaje bãrarare babai gu.–

¹⁴ Mu Jesús chojninga: –Jé ũré yu erĩ́e. Yĩrarare yibai mu que cucha bisidécho yuruode go. Chamáñaje yiraja yarani. Enga yiraja yiqui te rĩ. Enga que cucha bisidécho yarani, yiqui ore. Mu que arajáyo yarani enga que arajayópo yiqui rĩ.–

¹⁵ Jesús qué catecã́ri fariséode ore enga chojninga: –Uacarajáyo uje erámi unirisórone uhuaque uacajmapiedie cuse ome uacojode ayoréo uje uacajicho ore adode aja quigode. Jé basa uyu, que yajire ayorérique atique aja quedéjnai.

¹⁶ Mu ujetiga yajirirase ayorérique atique aja quedéjnai mu a jĩraque yirajárase adode. Chamáña gu uje yirósõri yai Dupade iroque yu gu, jecute déji yari enga cháta raja yu ome yajirigode ore acho.

¹⁷ Uacarajáyo uje uacajirigode, Moisés iroquéo quique uñai chósi te: ujetiga cucha dacatique pijogúsoningo gare ore enga ore ojningáringo cucha jé chopise ñane enga jogadi u uje uacoyo ũrepíso iji ore ojñane.

¹⁸ Adi jé u ome yu uje yipijogúsorone gare ore to. Uñai u uyu. Jé uñai upo Yai rĩ uje iroque yu aja erámone udojo.–

¹⁹ Jecute ore catecã́ri ome dai enga ore chojninga: –¿Jé déji rique bai gosi?– Jesús chojningame ore: –Que arajáyo uyu gosi. Que amóñopo Yai to rĩ. Ujetiga arajayórase yu enga a arajáyopórase Yai te rĩ.–

²⁰ Jesús uruode u cuchade udojo uje chacate ore iji Dupade iguíjna cuchábi ajei, iji jogadi uté uje ore gueranone pi déji to. Mu que togome uñeque ujetiga chisa Jesús enga suru gai. Chamáña gu uje cáma deréjnai u gu ujetiga ore chisa.

Jesús chatata dacoringai ome ore

²¹ Jesús chojningápome ore rĩ: –A yiji jne ome uaque. A acueyo jórogui yu jne mu a atoyoi jne uje uacasijnaringuéone jé jogate uaque. Enga a ca togome uaque jne ujetiga eso ta yiqui.–

²² Mu judíode ore catecã́ri ñane ome Jesús uruode udore enga ore chojninga: –¿Ja chujé re jne a? Uje chojninga: "A ca togome uaque jne ujetiga eso ta yiqui."–

²³ Jecute Jesús catecã́ri ore enga chojninga: –Uacayaridi u udé jnumi. Jé basa yiyaridi u ta gatajnoquei. Erámone udojo jogosórone u uaque mu que erámone jogosõre yu to gotique.

²⁴ Jecute yingome uaque que uje a atoyoi uacasijnaringuéone údi jne. Jetiga ca anguretáyo yu ome yúringárique ũré uje yingo yu aja uaque, enga diga yuruode a tocade jne ome uaque. Enga a atoyoi uacasijnaringuéone údi jne.–

²⁵ Ga ore catecã́ri Jesús enga ore chojninga: –¿Jé ua gosi a?– Jesús chojningame ore: –E yingome uaque iji taningápisi.

²⁶ A yajéraso enga yajirirase uacadode aja quigode jé iji de. Enga a jiérasi yatatagode uacapesute gajnarécho. Mu yirósõri uruode ũréo jnese. Jecute a yedu udore ome yatatagode ome erámi unirisórone. Chamáñaje yudute puru uréone udore nanique iji uté pijnani.–

²⁷ Mu que ore chiraja uje Jesús ojningai darósõre u dai Dupade.

²⁸ Jesús jno darade údi enga chojninga: –Jecute yurúo udojo ome uaque: ujetiga apotingacho Dupade utocaidi uyu yajnei curesei dirome, jogadi jé u uté ujetiga arajáyo yúringai ũré uje yingo yu aja uaque. Enga a arajáyo to jne uje yacajnaquéode que garani u uyu mu yedu yirósõri Yai uruode uje yacate uaque.

²⁹ Uacamóño uje yirósõri uté u uje déji yari. Enga Yai que noñome yu iji te go. Chamáña gu uje yipesudode jecucha u ajegaidode cucha, jecute irasiguipise yu.–

³⁰ Uje Jesús uruode udojo ome ore enga uásejna uñane uje ore changureta.

Jesús chacãra pisijnaringuéone ipesungórone aja ayoré pisai

³¹ Jecute Jesús cho judíode ore quique uje ore changureta enga chojninga: –Ujetiga adotáyo uáguiji yacajnaquéode enga obiréjna uje yanguresõripísode u uaque.

³² Enga a arajáyo cucha uréone udore enga gajnui u ujetiga chijnime uaque iji uacasasórone jmainie.–

³³ Ga jé u uje ore chojningame Jesús: –¿Jé gotique gu a? uje bo ayoré pisaguíji yoque uje bojninga: "A gosi doi enga chirame uaque jne." Jnani bajai Abraham ape disi ejo yoque erĩ́e. Que toc ujetiga ayorérique cho dasaguíji yoque nanique jé aja deréjnane udojo.–

³⁴ Jesús cho quique daruode enga chojninga: –Jé ũré yu ome yuruode. Ujetiga gosi pésu pisijnaringuéone enga pisijnaringuéone isaque gosi.

³⁵ Que toc ujetiga ayoré pisai cháji dasangóri iguíjnai iji deréjnane jnese. Mu uté isangóri abipísi u uje gajnei tu ujetiga cháji dayé iguíjnai iji deréjnane jnese.

³⁶ Ujetiga Dupade Abi uyu yirame uaque jne enga a ca pisijnaringuéone suépo uacabáyode jne rĩ iji deréjnane.

³⁷ Yiraja uje jnani bajai Abraham ape disi ejo uaque. Mu que anguretáyo yojningane cucha ome uaque enga uacapótayo ujetiga ajéyo yu.

³⁸ Yatatagode u Yapade ingoméone cucha ome yu. Enga uacagaidode u uacai ojningane cucha to.–

³⁹ Enga ore chojninga: –Yocai tu Abraham.– Mu Jesús chojningame ore: –Ujetiga jec ũré uaque ujetiga Abraham ape uaque enga a uacapesudode urásu Abraham ipesudode to.

⁴⁰ Uje yatatagode u Dupade acajnaqué uréone ome yu mu uacajegaidi u ujetiga ajéyo yu. Mu Abraham que áyipieraque déji ujetiga chujé Dupade utocaitique nanique. Que adi u uacadi uje uacapótayo chui ome yu.

⁴¹ Uacapesudode u uacai ipesudode to.– Jecute ore chajnai Jesús uruode enga ore chojninga: –A ajos eti pape bisideque yoque enga que yirajágo yocai gosi. Mu que quigode u go. Mu yocai ugurui cuse uje Dupade u.–

⁴² Jesús chajnai ore uruode ga chojninga: –Ujetiga jec ũré enga Dupade ape uaque enga a ajnórañorase yu. Uacamóño uje yarani u Dupade enga e yugúsi de. Que togome yu ujetiga yiji yajénique quitique mu yugúsi de gu uje Dupade iroque yu gu aja de.

⁴³ ¿Gotique gu a uje que toque ujetiga arajáyo yojningane cucha quigode? Ísega quigode u uje que apótayo angáchoi yacajnaquéode quigode.

⁴⁴ Uacai u Satanás. Enga uté gajneque uaque. Jecute uacapótayo apéso uté ajegaidode cucha. Ayoré yungore Satanás uté iji taningápisi. Enga que togome ujetiga urúrique ũré. Chamáñaje cucha uréone guetésõre uté gu. Urupatáquechoquí u enga uruode u purupatáringane. Enga urupatáquechoquíode ore dai u uté. Chamáñaje purupatáringane garani u uté gu.

⁴⁵ Jecute uje yingome cucha uréone ome uaque mu que toc ujetiga anguretáyo yu.

⁴⁶ ¿Jé gosi te iji uaque ujetiga chingome yoque ujetiga pisijnaringuérique déji yu? Ujetiga ca déji yu enga obiréjna yuruode uje ũrepíso. ¿Jé ome gotique gu a uje que anguretáyo yu?

⁴⁷ Ujetiga Dupade gajneque gosi ga gosi doi enga tangári Dupade uruode. Uje que Dupade gajneque uaque enga que apótayo angáchoi Dupade uruode.–

Uje cáma Abraham base mu Crísto jé jogate

⁴⁸ Jecute judíode ore chojningame Jesús: –¿Ja ca ũré yoque a? uje yojnicome ua: "Yoquetégode samáriagosode uñai u ua. Enga Satanás utocaitique déji bajei."–

⁴⁹ Jé u uje Jesús chajnai ore uruode enga chojninga: –Que Satanás utocaitique déji yajénique go. Mu yucuegode u Yai úringárique picotaque. Mu que eso yipesudode unétique enga gajnui u ujetiga oyo cucha bisidéguiji yu.

⁵⁰ Que yajéode u ujetiga acotáyo yu. Mu uñai déji enga uté ajéode u ujetiga acotáyo yu. Enga uté u uje chajire uacadode aja quigode.–

⁵¹ Jesús jno daruode údi enga chojninga: –Gosi ujetiga doi yacajnaquéode quigode enga a ca gosi chimo pitoringai ome re iji deréjnane jnese.–

⁵² Jecute judíode ore catecãrápoi Jesús rĩ enga ore chojninga: –Que potigayaquérique déji yoque uje a Satanás utocaitique déji bajéode ome baruode udore. Uje yocai jnani bajai Abraham, Dupade uruode atatasórone uñane ore toi jnese. Mu jé go uje bojninga: "Gosi ujetiga doi yacajnaquéode quigode a ca gosi toi jne iji deréjnane jnese."

⁵³ ¿Ja bajéode u ujetiga ajnué yocai Abraham gai to a? Bamo uje Abraham toi nanique, jé aja ujode Dupade uruode atatasõre uñane jnese. ¿Jé ua gosi te a ome bajéode?–

⁵⁴ Jesús chajnai ore uruode enga chojninga: –Ujetiga yisírase yibai enga a ca cuchárique tõrarásiji. Mu Yai déji enga uté u uje chisi yibai, enga que toc ujetiga oyo cucha bisidéguiji uté icotaquéode. Chiese uacangureni u Dupade, mu jé u Yai uté to.

⁵⁵ Chiese uacangureni u Dupade mu que arajáyo go. Uyu u uje yiraja. Ujetiga yojningárasa: "Que yiraja Dupade," enga a yorase uaque ome uacáringane urupatáquechoquío. Mu jé ũré yu uje yimo Dupade enga que yiyó ojningárique cucha gai ome yu.

⁵⁶ Uacai jnani bajai Abraham nínapúsu re nanique uje chiraja uje a yĩri jne. Diga chimo yiríringai enga pininaquei irágu ajei.–

⁵⁷ Jecute judíode ore catecã́ri Jesús enga ore chojninga: –Quedéjnapise baruode uje cáma bejnáringui sequeré 50 iji bei múñi chiese amo yocai jnani bajai Abraham. Bamo uje sequeredie e jiépisi iji Abraham quigade.–

⁵⁸ Jesús chajnai ore uruode enga chojninga: –Jé ũrepise yu erĩ́e. Uje Abraham cáma base nanique mu jé yijogate aro nanique. Enga jé yijogate.–

⁵⁹ Jecute ore chisa cucaranenie ujetiga ore chatingare Jesús údode, enga ore chujé. Mu Jesús chacose re iji ore ujade, enga doi guesi iji Dupade iguíjna cuchábi enga jé u uje jno.