Juan 4 - Dupade Uruode

Jesús catecã́ri chequé uje uniri tu Samária

¹ Enga fariséode ore chudute uje Jesús angarásorone jiépisi ome ore guetei Juan angarásorone. Enga ore chudute to uje jiépisi ore uje Jesús chaca ore edodie iji yodi. Jecute ore chetaque Jesús.

² Mu que Jesús u go uje chaca ore edodie iji yodi, mu acadigode ore u.

³ Uje Jesús chiraja uje fariséode ore chetaque adode enga jnoji ore uniri Judéa enga chajnésaru aja daniri Galiléa.

⁴ Uje Jesús jnome dajesui ga chiramísara ore uniri uje i u Samária.

⁵ Enga chise ore idai iji ore uniri Samária uje i tu Sicar. Enga idógosiji jnani bajai Jacob gajnepídi jnupe uje uté gueranome dabi José nanique.

⁶ Ejopié déji uté uje Jacob u nanique uje chijócha. E idógosi guedé gatócoro uje Jesús chise ejopié uaté. Ga Jesús eyúguiji dajei nanique jecute chácariji ejopié uaté ejoi.

^7-8 Mu Jesús acadigode ore jno, ga ore chicai ore idaipísi ujetiga ore doi oré tome cucha pibosode ome Jesús ore. Uje gusu Jesús iji charidi mu samáriagoto chise. Gaidi u yodi iji ejopié. Enga Jesús chojningame: –Asíape yu iji yodi.–

⁹ Judíode que ore chimesẽre samáriagosode adode. Jecute que ore cháta rágaja ñane. Jecute chajuque samáriagoto aguté uje Jesús chutai yodi iji. Enga jé u uje uaté chojninga: –¿Jé go uje judío ua mu jé batai yodi iji yu? Uje Samária goto yu mu.–

¹⁰ Mu Jesús chajnai samáriagoto uaté enga chojninga: –Ísega ca araja to uje Dupade pota ujetiga chisi ome cuchadatei ome ua. Enga a ca araja uyu gosi uje yutai yodi iji ua. Ujetiga arajárase yu enga a atárasi yodi iji yu enga a yisírasome yote uecai ome ua.–

¹¹ Chequé chajnai Jesús uruode enga chojninga: –Yodi erásonique que déji ua erĩ́e ujetiga ajnime yodi iji ejopié uaté uje idája iji guesi. ¿Jé déji rique jne a bojningai yote uecai ujetiga asi ome yu enga yóji?

¹² Uje yocai jnani bajai Jacob noñome iji yocari ejopié uaté nanique. Uje jopidé jé u ejopié uaté nanique enga abode ore jopidé jé u to nanique, jé aja gachidode cuchiso. ¿Ja bajéode u ujetiga ajnué yocai jnani bajai Jacob gai a?–

¹³ Jesús chojninga: –Gosode uje ore chóji yodi iji ejopié udaque enga a ore cajnórapo iji jne rĩ.

¹⁴ Mu ujetiga gosi chóji yerani yote uecai enga que toque ujetiga uté gosi qué cajnóriji. Chamáñaje yerani yote ome uté gosi gajnui u sibíjnai iji gosi ajei ujetiga ca íjnongapo rĩ, jé iji deréjnane jnese. Enga gosi eca iji deréjnane jnese to.–

¹⁵ Jecute chequé chojningame Jesús: –Be ga asi ome yu yote uecai uté enga yóji ujetiga ca yicajnórapo iji rĩ. Ujetiga ca yijiápoi yodi rĩ iji de jogadi gatuaque.–

¹⁶ Jesús chojningame chequé: –Bo ga abágui babai enga acayobíji de.–

^17-18 Mu chequé chojninga: –Íjnoque yabai.– Jesús chojninga: –Jé ũrepise baruode udore uje que bamanique cus. Mu babayode déji nanique uje ore chejna yijmanai. Adi jé u uje e bagúsapoi uñai gari rĩ mu que babaipise go.–

¹⁹ Uje chequé chudute udojo, Jesús uruode, enga chojninga: –¡E yiraja uje Dupade uruode atatasórone uñai u ua!

²⁰ Mu samáriagosode uyoque, judíode uaque yocáyipiedie cãra re ome cuchade. Samáriagosode yocayode jnani bajácho ore tẽrája Dupade nanique iji cucarani uta. E qué yicoi ore jmapiedie udire. Jé basa ga judíode uaque ga ueratigai u ujetiga ore tẽrája Dupade iji ore idai Jerusalén.–

²¹ Jesús chojningame chequé: –Yajéode u ujetiga anguretapise yuruode. Uje que qui u ujetiga acayoi cucarani uta jeoga acayóji Jerusalén ome uacajmapiedie ome Dupade. Uje a chise deréjnai jne ujetiga ore chicota Yocai Dupade iji dayaritígo jnese.

²² Mu samáriagosode uaque uacabeyoi uacajmapiedie ome Dupade mu que arajáyo uruode quigode jnese. Jé basa ga judíode uyoque yirajágo Dupade uruode jnese. Jecute yirajágo uje yoquiquetangóri garani u judíode uyoque.

²³ A chise dínique, mu deréjnai e u ujetiga ũrepise Dupade adode gaisórone enga ore icotaquéode ome Dupade garanone u ore ajépisode. Chamáñaje Dupade ajegaidi u ujetiga yoquisocai u udé uje yicoi adode.

²⁴ Uacamóño uje pujopié Dupade ga que pimo. Jecute udore ore jnese uje ore pota adode ga ore doi ga ore chejna dáyipie pimojmanie aja dacotaquéode ome Dupade iji dajéode. Enga ũrepise ore ome dadode udore.–

²⁵ Chequé chojningame Jesús: –Yiraja uje a Dupade utocaidi Crísto di jne. Ujetiga e di enga a chuchẽre cuchade iji guesode ome yoque.–

²⁶ Enga Jesús chojninga: –Bojningai Crísto jé u bacatecãraisṍri uyu.–

²⁷ Uje Jesús qué catecã́ri chequé mu acadigode ore chise. Enga ore cho dáyugu re uje Jesús catecã́ri chequé, mu que uñeque cási ujetiga catecã́ri Jesús ome ore ajegaitique ome ñane, jeoga ome ore uruode quitígo.

²⁸ Uje Jesús acadigode ore chise enga chequé noñome darané enga chicapoi ore idai rĩ ujetiga tibidi darasade.

²⁹ Uje di iji ore enga chojninga: –Boyóji ti. Cajicho jnani uje déji te enga chingome yu yipesudode jnese. ¡Ísega yoquijnati Crísto u jõ!–

³⁰ Jecute ore jnoji dedai enga ore tibágui Jesús iji charidi.

³¹ Uje cáma ore chise Jesús iji charidi mu acadigode ore chijócha ajei údi enga ore chojninga: –Yocacadisṍri á, agu bu cucha pibosode to.–

³² Mu Jesús chajnai dacadigode ore uruode enga chojninga: –Cucha pibosode déji uje yibosode u mu que arajáyo go.–

³³ Jesús acadigode ore catecã́ri ñane enga ore chojninga: –¿Ja uñeque chisi ome potígome que a?–

³⁴ Jesús chojninga: –Yibosode u yirósõri Yapade iroquéode. Yajéode u ujetiga yimate uté áyipiedie aja jnumi.–

³⁵ Jesús chojningame dacadigode: –Uacarajáyo uje ayoré utácai chaca cucha ajñunie enga chojninga: "A qué yirote guedosi gagájnione jne ujetiga timate enga yĩra." Mu yojningame uaque: Cajicho ayoré díode udore ore to uje quene paca Dupade uruode iji ore áyipiedie mu e ore timate ujetiga pĩraque ore ome Dupade.–

³⁶ Jesús qué jno daruode údi enga chojninga: –Gosi uje na cucha pacaque timachugode ga ore cho oré gosi. Adi jé u to ome udore ore uje ore ijnimique ayoréode aja pucuecaringué eyúgojmai. Dupade cho ore oré to. Jecute ujetiga gosi chaca Dupade uruode iji dojórique ayoré áyipie jeoga gosi imanique dojórique ayoré aja pucuecaringué eyúgojmai, mu a ore ininaquéode cho ñane ome dasagode Dupade iroquéo.

³⁷ Jé ũré ore uruode uje ore chojninga: "Uñane gajnei tu ujetiga ore chaca cucha ajñunie. Jé basa ga uñane gajnei upo rĩ ujetiga ore na cucha pacade."

³⁸ Yiroque uaque ujetiga aráño uñane acade cucha. Uje que ejnáño uacaguesi ome. Uacagutíyamánone u uacojode ayoré uje ore chejna daguesi ome Dupade iroquéode iji uacaquei.–

³⁹ Uásejna samáriagosode iji ore idai uté uje ore changureta Jesús ome chequé ojñane uje chojninga: –Jnacari uté chingome yu yadode jnese.–

⁴⁰ Uje samáriagosode ore di enga ore chijócha Jesús ajei údi ujetiga chacarabíji ore gari iji ore idai Sicar. Jecute Jesús cháji ore gari ome dire gáreode.

⁴¹ Enga uje Jesús déji ore idaipísi enga uásejnapise uñane uje ore chudute acajnaquéode enga ore changureta to.

⁴² Enga ore chojningame chequé: –Que gusu batatagode uté acho ome yoque ujetiga yanguretágo uté. Mu e yudúco uté acajnaquéode quigode to. Jecute yanguretágo úringai yoquijnati Crísto. Enga yirajágo uje jé ũrepise uje erámi unirisórone yoquiquetangóri u.–

Jesús chiqueta ore eduguéjna cuchábi iróquegatéi abi

⁴³ Uje Jesús e chimate dire gáreode iji ore gari enga jnoji Samária enga jé qué jno dáringai urugu údi aja ore uniri Galiléa.

⁴⁴ Jesús u uje chojninga nanique: "A Dupade uruode atatasónique dirásiji dedánique enga que urénga urasade ore tangári."

⁴⁵ Mu uje Jesús díji Galiléa enga ore nínapúsu yui. Uje ore déji Jerusalén to nanique iji judíode ore jnusinamáni dire uje i tu Páscua. Enga ore chimo Jesús ipesútedatéode jnese iji ta.

⁴⁶ Udojo quigade enga Jesús chajni aja ore idai Caná uje déji ore uniri Galiléa. Uté u nanique uje Jesús chinoningase yodi enga nóña enga víno. Enga ore eduguéjna cuchábi iróquegatéi déji Caná uje abi ejnarétaguipíse iji ore idai Capernaúm.

⁴⁷ Eduguéjna cuchábi iróquegatéi chudute uje Jesús jnoji Judéa enga e déji Galiléa. Ga jno ga tibágui. Enga chijócha ajei údi ujetiga chicáji iguíjnai enga chiqueta abi uje idógosi ujetiga toi.

⁴⁸ Uje Jesús chudute uruode enga chojninga: –Yiraja uje a ca anguretáyo yu ujetiga ca amóño yipesútedatérigo, yipesute pitijátigo ore.–

⁴⁹ Mu ore eduguéjnai iróquegatéi chojninga: –Yocangaráni á, aguito uje cáma yabi toi.–

⁵⁰ Jesús chojningame jnani: –Bo ga ajni aja baguíjnai. Babi ejnarei e ninguira. A eca jne.– Enga jnani changureta Jesús uruode ga jno. Enga chajni aja daguíjnai.

⁵¹ Uje chajni aja daguíjnai enga irógode ore chachai iji garani enga ore chojninga: –Babi ejnaréngone e ninguira iji údode. A eca jne.–

⁵² Eduguéjna cuchábi iróquegatéi catecã́ri ore ga chojninga: –¿Guedé batigárique déji rique qué a ujetiga ninguira ejnarei iji údode?– Enga ore chojninga: –Guedé e cho jñuque diríca uje gai dotáningai e íjnonguiji.–

⁵³ Jecute disi uté dayé e jnusina uje guedé batiga casé uté jé u diríca uje Jesús chojningame: "Babi a e eca jne." Jecute uté changureta Jesús, jé aja jogasui jnese.

⁵⁴ Jesús ipesútedaté ejoi u udé uje jnoji Judéa enga chicáji Galiléa.