Juan 20 - Dupade Uruode

Jesús ecáji datoringai quigade

¹ Uje e chise domíngoi enga María Magdaléna tibágui Jesús ode iji direjnímei, uje qué topiéjna erámi. Uje chise Jesús ode enga chimo uje íjnoque cucarané cuchabé iji Jesús ode piagoi.

² Jecute María Magdaléna jno ga chayopísaja Pédro jogadi, uje Jesús acadigode uñai déji to uje Jesús chijnorapise diríca. Enga uaté chojninga: –A ore jno Yocangarádejnai Jesús ajnoquéode údi enga ore chicháji sañeque. Enga que yirajágo jogatique.–

³ Uje ore chudute María ojñane enga jĩraque Pédro ore jno enga ore chicáji Jesús ode.

⁴ Enga Pédro, jõrai ore chayopise mu ibisoque jõrai, jecute bajagája Jesús ode.

⁵ Enga uté chajo raja jnumi enga tajirome Jesús ode. Chimo borapéode iji jnumi uje ore chigaru Jesús gai ome diríca. Mu que uté chacája ajei.

⁶ Mu Simón Pédro di to iji uté quigade. Mu Pédro u uje chacája Jesús ode ajei. Enga uté u to uje chimo Jesús iguidi casodé borapeque.

⁷ Mu Pédro chidójninga uje Jesús gatoi jogonore casodé borapeque que déji borapéode uñane jogadi. Mu pipocayacho aja ñane enga déji jogate uñai.

⁸ Quigade enga Pédro jõrai uje bajagája Jesús ode doi enga chacája ajei to. Enga uje uté chimo uje Jesús íjnonguiji ode enga jogadi u uje changureta Jesús úringai niriji iji pitoringai.

⁹ Mu uje cáma cucha dacadode udojo tocade enga que Jesús acadigode udore ore chiraja Dupade uruode atatasórone urusarane quigode uje chatata uje Jesús a nijiápo rĩ iji datoringai quigade.

¹⁰ Uje ore chimo uje Jesús íjnonguiji ode enga ore chajnésaru daguíjnai.

Jesús chiqueta raja María Magdaléna

¹¹ Mu María que jno to go. Mu cháji guesi iji ode enga poji ejode. Mu uje qué po enga chajo raja jnumi enga chajire Jesús ode ajei.

¹² Uje chajire ajei enga chimo Dupade utocaite gáreode uje ore déji dayaridode iji Jesús mochádi casé. Enga ore iguidedie póroroi. Enga udore uñai chácariji Jesús aoi gatẽrasui; jé uñai cháji guídade jogadi.

¹³ Enga Dupade utocaidode ore catecã́ri María enga ore chojninga: –Chequé á, ¿gotique gu a uje babo?– Enga María chajnai ore uruode enga chojninga: –Yibo gu uje a ore jno Yangarádejnai ajnoquéode údi aja sañeque, enga que yiraja jogatique.–

¹⁴ Mu uje e chejna daruode udore guesi enga jĩraque chajire dedoboi enga chimo Jesús iji. Mu que chiraja uje Jesús u imoi.

¹⁵ Enga jĩraque Jesús catecã́ri ga chojninga: –Chequé á, ¿gotique gu a uje babo? ¿Jé bacuetique é?– Mu María jos eti uje ore acadie pore irodisṍri u Jesús. Enga catecã́ri enga chojninga: –Ujetiga ua u uje babo Yangarádejnai údi enga angome yu jogatique ga yiji enga yijóchame jne.–

¹⁶ Mu uje Jesús catecãrápoi rĩ enga chojninga: –María.– Enga jĩraque María chajire daquigade enga catecã́ri Jesús ome judíode uruode enga chojninga: –¡Raboní!– Uje uruode udojo quigode u "ore acadisṍri" ome judíode arecujaidie.

¹⁷ Enga María jĩraque chisa Jesús mu Jesús chojninga: –Arame yu. Chamáña gu uje cáma yicáji Yai jogadi iji gaté. Mu bo enga acáji yijorane ore enga angome ore jne uje a yicáji Yai Dupade jogadi jne. Mu que gusu Yai, mu uacai jé u to yoquidupade.–

¹⁸ Jecute María Magdaléna jno ujetiga chingome Jesús acadigode ore uje chimópise ore angarádejnai Jesús ome dedodie, enga ujetiga chatata Jesús uruode udore quigode ome ore.

Jesús chiqueta raja dacadigode

¹⁹ Iji domíngoi uté iji dejai enga Jesús acadigode ore chamáta ñane aja guijnatajei. Enga ore surúpusu dabai. Chamáñaje ore todo judíode gu. Mu uje qué ore déji ñane gari iji guijnatajei enga Jesús chiqueta raja ore. Enga Jesús chingo darasitigade aja ore enga chojninga: –Yajéode u ujetiga pajesereringai déji uaque.–

²⁰ Uje chejna daruode udore guesi enga jé u uje chingo dajmanáyone aja ore. Enga chingopo ore ichajupídi ome ore rĩ, uje déji orotabidi. Enga ore irasique re uje ore chimo uje ore angaráni Jesús jé upúsu.

²¹ Enga chingopo daruode aja ore rĩ enga chojninga: –Yajéode u ujetiga pajesereringai déji uaque. A yiroque uágaja erámi jne. Adi u uje Yai chiroque yu aja erámi nanique.–

²² Jé u uje Jesús doi enga chubúchu dajñari aja dacadigode enga chojninga: –Yujopié Espíritu Sánto e chacája uaque ome yujñarone udojo.

²³ E uacajnei tu ujetiga ojnichome uñéngo: "E pĩroque uacasijnaringuéone." Enga uacajnei tupo rĩ ujetiga ojnichome uñeque: "Basijnaringuéone jé jogate ua."–

Tomás e chiraja uje Jesús ecápo rĩ

²⁴ Mu Jesús acadigode uje gare ore iji yirídai, uñai i tu Tomás uje garaja ore nanique. Mu que uté déji ore gari to uje Jesús chiqueta raja ore.

²⁵ Mu uje Jesús acadigode uñane ore chise Tomás enga ore chojninga: –Yimongopise Yocangarádejnai ome yoquedodie que.– Mu Tomás chojninga: –Ujetiga ca yimo ojnaquérodie piedie iji jmanáyone ga yiji enga yijmare yijmané aja ojnaquérodie piedie enga yijmárapo yijmanai aja ore ichajupídi iji orotabidi enga que toc ujetiga yangureta.–

²⁶ Uje dirode gadióguiji ti iji udojo quigade enga Jesús acadigode chamátapo raja ñane rĩ iji guijnatajénique. Mu Tomás e déji ore gari to. Enga guiguíjnai uté piagode jorídedie uajádiji jnese. Mu Jesús chacája guijnatajei uje que chuchẽre piagórique gai mu. Enga chiqueta raja ore enga chácariji ore ajei. Enga chojninga: –Yajéode u ujetiga pajesereringai déji uaque.–

²⁷ Enga jĩraque chojningame Tomás: –Ajirape yijmanáyone enga ajmare bajmané aja ojnaquéro pié iji yijmanai. Enga ajmárapo bajmanai aja ore ichajupídi iji yorotabidi. Jé ca bo botigayaquéode údi ome yu mu angureta yu.–

²⁸ Jé u uje Tomás chojningame Jesús: ¡Yangaráni tu ua, enga yidupade upo ua rĩ!

²⁹ Jesús chojningame Tomás: –Tomás, bamo yu que, jecute bangureta yu. Mu a pininaquei jogadi upúsu ome udore ore jnese jne uje que ore chimo yu mu ore changureta yu.–

Juan chatata dáyipiedie quigode uje churúsãre udojo

³⁰ Yipota jetiga arajáyo uje Jesús ipesútedatéode uñane jiépiso uje pésu iji dacadigode iquéode. Mu gusu udojo uje yurúsãre ore quigode iji darujna aoi udé.

³¹ Mu Jesús ipesútedatéode udore uje déji darujna aoi udé, purusãracho gu ujetiga anguretáyo Jesús úringai Dupade utocaite Crísto. Enga ujetiga anguretáyopo úringai Dupade Ape rĩ. Yigaidi tu gu ujetiga pucuecaringué eyúgojmai déji uaque to ome uacanguretigai iji Jesucrísto.