Juan 2 - Dupade Uruode

Jesús chécãre yodi enga nóña enga víno

¹ Uje dirode gadioque iji udojo quigade enga ore pésu dajñamini iji ore idai uje i tu Caná uje déji ore uniri Galiléa. Jnacari, gapua ore chisa ñane iji gu. Enga Jesús daté déji ore gari to.

² Enga ore tibidi Jesús, jé aja acadigode ore to ujetiga ore cháta rágaja ore to iji ore ajñamini.

³ Uje e íjnoque ore jodi víno enga Jesúsdaté chojningame Jesús: –E íjnoque víno iji ore.–

⁴ Mu Jesús chajnai enga chojninga: –Chequé á, ¿jé gotique gu a uje bango cuchade udore ome yu? Cáma chise diri ujetiga yingo yu aja ore.–

⁵ Mu Jesúsdaté e catecã́ri ore irógode uje ore chisi ore iji víno enga chojninga: –Beyoi uté ojningane cucha jnese.–

⁶ Enga cojna quedéjnanie déji ti uje chojmára iji ti uje judíode oidébedie u uje ore churu dabáyode. Ga cojna quedéjna chojmára a déji 100 lítrodie, jé uñanie déji 80 lítrodie.

⁷ Jesús chojningame ore irógode: –Beyoi enga ãretáyo cojnanie uniji ome yodi.– Ga ore doi yodi ga ore chĩreta cojnanie ome yodi enga iragupúsu jnese.

⁸ Jesús e chojninga: –Beyoi enga ajnicho garósi enga boyo údi aja ore ajñamini gajnesṍri ujetiga chetingare.– Jecute ore doi Jesús uruode.

⁹ Ga ore ajñamini gajnesṍri doi ga chetingare yodi. Mu yodi nóña ga víno u. Enga que uté chiraja garãtique go. Gusu ore irógode u uje ore chiraja garani. Ore u gu uje ore ijnimique yodi. Jecute ore ajñamini gajnesṍri uté doi enga tibidi jnacari uté uje quene chisa dacoté.

¹⁰ Enga chojningame: –Jé bajosigode ĩ́rique uje quene basi ome víno uneréjnai ome yoque. Uje que pisocai uté go iji pajñaminone iji deréjnane. Uje jecucha ore chisi ome víno uneréjnai ome yoque bajaque. Enga uje ore ibidigode uyoque subudé yóguiji enga ore chisi ome víno gajnarei ome yoque.–

¹¹ Jesús pésu dapesútedaté bajai uté iji ore idai Caná iji ore uniri Galiléa, uje chécãre yodi enga nóña enga víno. Enga isocai u uje chingo dáringai cuchape aja ore. Jecute acadigode ore changuretapise to.

¹² Udojo quigade ga Jesús chicáji ore idai uje i tu Capernaúm. Enga daté nóna to. Jé aja desade, acadigode ore. Mu dirode garósi ome ore iji ore idai Capernaúm.

Jesús chijócãre jnanione uje ore tẽra cuchade iji Dupade iguíjna cuchábi "témplo"

¹³ Uje qué idógosi judíode jnusinamánone dire uje i tu Páscua enga Jesús chicáji ore idai Jerusalén yui.

¹⁴ Uje Jesús déji Jerusalén enga chicáji Dupade iguíjna cuchábi enga chise jnanione iji uje ore tẽra buéyode, áyasadie, cucujnadatéode ore. Chisápo uñane iji ore charidi te rĩ uje ore doi oredie ome pláta quedéjnanie.

¹⁵ Uje Jesús chimo ore adode udore iji Dupade iguíjna cuchábi ajei enga pésu paójnane aja ñane enga chijna. Doi enga chijócãre ore aja guesi, jé aja ore gachidode tóro. Jé aja áyasadie. Enga tṍra pláta quedéjnanie guẽrasórone ore iplátadie aja jnumone enga chucuase mésadie to aja quedéjnane.

¹⁶ Enga Jesús chojningame udore ore uje ore tẽra cucujnadatéode: –Ajnicho udore. Boyo údi aja guesode. ¡Ca oyo cucha peranone iguíjnai iji Yapade iguíjnai!–

¹⁷ Enga Jesús acadigode udore ore jnusina Dupade uruode uje chojninga: "A yájningai tocade ome ore jne uje yetaque ore ipesudode iji baguíjnai."

¹⁸ Uje judíode ore catecã́ri Jesús enga ore chojninga: –Angoma yoque bapesútedatérique ujetiga jé ũré ua enga Dupade utocaite ua aja jnumi uje bajócãre cucha peranone guẽrasórone ore iji Dupade iguíjnai udé ajei.–

¹⁹ Enga Jesús chajnai ore ga chojninga: –Yipesútedatéi u udé: acuráso Dupade iguíjnai udé mu a yimánapo rĩ iji dire gadiótigo.–

²⁰ Jecute judíode ore catecã́ri Jesús enga ore chojninga: –Dupade iguíjna cuchábi udé guejnanie sequeré 46 nanique uje ore chimate nanique aja gaté. ¿Ja toguírasome ua ya ujetiga apésu enga amate iji dire gadiógode?–

²¹ Mu que ore chiraja Jesús uruode quigode. Jesús ojningai jé u re. Uje chacãra dabai aja Dupade iguíjna cuchábi.

²² Jecute uje Jesús e nijiápo iji pitoringai rĩ enga acadigode ore jnusina Jesús arecujaidie quigode ome re. Ore jnusinápo Dupade uruode atatasórone urusarane uje ore ojningai u Jesús. Jecute ore changuretapise Jesús uruode quigode jnese.

Jesús e iraja aro yocáyipiedie jnese

²³ Uje Jesús déji Jerusalén iji judíode jnusinamánone dire uje i tu Páscua enga uásejna ore uje ore changureta. Ore chimo ipesútedatéode nanique gu ome úringai Dupade utocaite.

²⁴ Mu Jesús que cháta raja ore. Chotigase ore gu. Chamáñaje chirajapise jnanione áyipiedie quigode jnese gu.

²⁵ Uje Jesús e iraja aro ore áyipiedie uje cáma ore chingome, uje chiraja cuchade iji ayoré chojmarai áyipie.