Juan 14 - Dupade Uruode

Dajeque ugurui u Jesús ujetiga gosi chise Dupade

¹ Enga Jesús chojningame dacadigode ore: –Jé ca oyo uacáyugu uaque. Anguretáyo Dupade ome uaque enga anguretáyopo yu rĩ.

² Chamáñaje pijogadode uásejna iji Yapade idai. Ujetiga ca ũré udore enga a ca yingorása uaque. Jecute a yiji jne enga yipésu uacajogadode ome uacaríringai yui.

³ Mu ujetiga yiji, enga e dimane uacajogadode ome uaque, enga a yĩriápo jne rĩ. Enga jogadi u ujetiga yiji uacádi. Yigaidi u gu ujetiga agúsoji ta to yiyaridi.

⁴ Uacarajáyo yiqui enga uacarajayópo dajei te rĩ aja yiqui yui.–

⁵ Tomás chojninga: –Yocangarádejná, que yirajágo baquitique. ¿Jé yoco rique jne a ujetiga yajnángo dajei aja baqui yui?–

⁶ Jesús chajnai uruode enga chojninga: –Dajei jé u uyu. Enga cucha uréone, pucuecaringuei ore garani jé upo yu rĩ. Gusu panguretigai ome yu ujetiga gosi chise Yai.

⁷ Ujetiga arajáyopise yu enga a arajayópo Yai to rĩ. Uje e uacamóño gatuaque jecute a e arajáyopise Yai iji de gajneri.–

⁸ Enga Felipe catecã́ri Jesús enga chojninga: –Yocangarádejná, be enga ango bayé aja yoc enga pininaquei irágu yoque jne.–

⁹ Jesús chajnai Felipe uruode enga chojninga: –Felipe á, e iyajmanguipise yu iji uacari mu cáma arajáyo yu. Ujetiga gosi chimo yu enga chimópo Yai to rĩ. ¿Ome gotique gu a uje bango yu ujetiga yingo Yai aja ua?

¹⁰ ¿Ca angureta yu a uje yugúsiji Yai gari enga Yai déji yari rĩ? Yatatagode ome uaque que garani u yu go mu garani u Yai uje déji yari. Enga angúromei tu yu uje pésu dapesudode cucha.

¹¹ Beyoi enga anguretáyo yu uje Yapade déji yari enga yugúsiji Yapade gari to. Mu ujetiga ca togome uaque ujetiga anguretáyo yu bisideque, mu anguretáyo yu gu yipesudode cucha.

¹² Jé ũrepise yu ome yuruode udojo: ujetiga gosi changureta yu ga a pésu dapesudode udore cucha to ujetiga chopise yipesudode quigode. Mu a uté ipesutígo uñéngo sué yipesute bajade gáyode. Chamáñaje a yicáji Yai jogadi jne.

¹³ Cuchade jnese ujetiga atáyoji Dupade gu uacanguretigai iji yi enga a yipésu ome uaque jne. Uje yigaidi u gu ujetiga Dupade Abi uyu yingo Yai ingoningájnai aja uaque.

¹⁴ Enga que cucha uñeque cus ujetiga ca yipésu ome uaque gu uacanguretigai iji yu.–

Jesús chichaga Dajopié Espíritu Sánto ujetiga chirógaja ore

¹⁵ Ujetiga ajnóraño yu enga beyoi yiroquéode.

¹⁶ Enga a yijócha Yai ajei údi ujetiga chiroque uacátajató aja uaque jne ujetiga cháji uacari iji deréjnane jnese enga chisi ome picasitigai ome uaque.

¹⁷ Enga uacátajató uaté u Dupade Ujopié Espíritu Sánto, uje cucha uréone gãrapié tu. Que togome erámone jogosórone ore jnese ujetiga Dupade Ujopié chise ore. Chamáñaje que ore chimo to enga que ore chiraja go. Mu uaque u uje uacarajáyo. Uacaríjogoto uaté gu. Enga a chise deréjnai jne ujetiga uaté chacája uaque jne iji deréjnane jnese.

¹⁸ A ca yijíñome uáguiji te jmete mu a yajniápo uacabai te jne rĩ ujetiga yugúsapóji uacari rĩ.

¹⁹ Idógosi ujetiga ayoréode ca ore chimópo yu rĩ. Mu uaque u ujetiga amóñopo yu rĩ. Chamáñaje a yitoi mu a yiquecápo rĩ jecute a uacasocai u uté to jne. A aquecáyo jne iji deréjnane jnese.

²⁰ Ujetiga e yiqueca iji yitoringai enga a jogadi u jne ujetiga arajáyo uje Yai, uyu yitojmárango. Enga a arajayópo rĩ uje uhuaque, uyu yitojmárango jnese to.

²¹ Ujetiga gosi chiraja yiroquéode quigode enga doi enga pésu, uté u uje chijnóra yu. Enga Yai chijnóra uté gosi gu ijnoraquei ome yu. Que gusu Yai uje chijnóra uté gosi mu uyu u to uje yijnóra, enga a yingo yu aja uté gosi jne.–

²² Júdas uñai catecã́ri Jesús. Mu que Jesús guẽrasṍri Júdas Iscariote u go. Enga uté chojninga: –Yangaráni á, ¿gotique gu a uje a ango ua aja banguresórone uyoque jne, jé basa que ango ua aja erámone jogosórone?–

²³ Jesús chajnai uruode enga chojninga: –A gusu yingo yu aja yangarásõripísode. Uje uté gosi ujetiga chijnóra yu doi ga pésu yuruode quigode. Jecute Yai a chijnóra uté gosi jne. Enga a Yai uyoque yátago yógaja uté gosi.

²⁴ Mu gosi uje que chijnóra yu enga que doi yuruode quigode. Mu uacadudigode yacajnaquéo udojo que garani uyu go. Mu garani u yirósõri Yai Dupade.

²⁵ Uje qué yugúsiji uacari enga yingo cuchade udojo jnese aja uaque.

²⁶ Mu quigade enga Yai a chiroque Dajopié Espíritu Sánto aja uaque jne ujetiga basája yijogadi. Enga uté a chátaja uaque jne enga a chajni uacajnusiétigade jne. U to jne ujetiga chacate uágome cuchade jnese enga uté upo rĩ uje jnusinápo yacajnaquéode quigode jnese ome uaque rĩ.

²⁷ A yiji jne ome uaque mu a yijíñome yijogosṍri pajesereringa iji uaque. Mu yerani pajesereringa que cunguésõri erámone jogosórone ore irasitigai pajesereringa ome uaque, uje cachi ore urúo. Jecute ca oyo uacáyugu ome cuchade. Ca atodóyopo cuchárique rĩ.

²⁸ E uacadúcho yuruode uje yingo yicoringai aja uaque. Jé aja ujetiga yisápo uaque rĩ ujetiga yugúsapói uacari rĩ. Ujetiga jec ũré ajnóraño yu enga a pirasitigai jogadi u ome uaque uje yicáji Yai jogadi. Chamáñaje Yai sué yibai gu.

²⁹ Yingo cuchade udojo aja uaque uje cáma tocade. Yigaidi u gu ujetiga tocade, enga anguretáyo.

³⁰ Mu a jé ca yiji yuruode udojo údi ome uaque. Chamáñaje erámone jogosórone ore eduguéjnai Satanás diringai e puja yui. Mu que togome uté ujetiga etotiguérique sué yibai.

³¹ Mu yajnéone cucha a tocade jne ome yu. Yigaidi u gu ujetiga erámone jogosórone ore chiraja yijnoraquei ome Yai. Enga u to ujetiga ore chiraja uje yipésu yirósõri Yai ojningane cucha ome yu. E gusu yacajnaquéode udojo ome uaque. Boyo, yico iji de.–