Juan 13 - Dupade Uruode

Jesús churu dacadigode ore guídade

¹ Enga e dire chojmarai iji judíode ore jnusinamáni dire yui uje i tu Páscua. Ga jé u uje Jesús chiraja uje deréjnai e idógosi ujetiga jnoji erámone udojo ujetiga jé chicapóji dai rĩ. Jecucha Jesús chijnorapise danguresórone uje déji ore gari iji erámi, mu e idógosi ujetiga chingo dajnoraquédatéi ome ore.

² Jesús, acadigode ore taguíji ñane gari. Mu Satanás e chijocase Júdas Iscariote áyipie ujetiga tẽra Jesús ome umajosórone. Júdas uté u Simón gaté ujnacari.

³ Jesús chirajapise darani uje Dupade u. Chirajápo rĩ uje a chajniápo aja Dupade gari rĩ. Enga chiraja uje dai Dupade chisi ome cuchade jnese ome ujetiga chijocase.

⁴ Uje qué ore déji dabosode gai enga Jesús chague. Jé u uje chejñu daguidé gaimitodie enga chigaru dapajei ome borapetique.

⁵ Jesús chojne yodi aja piéraque, enga jé u uje churu dacadigode guídade. Enga quigade ga chejñu borapei iji dapajei enga jé u uje chaguñéra dacadigode guídade gáyode.

⁶ Uje jé chururase Simón Pédro guídade mu Pédro chetaque ga chojninga: –Yangarádejná, que pisocai u go ujetiga pacadisónique churu dacaditique guídade.–

⁷ Mu Jesús chajnai Simón Pédro uruode enga chojninga: –Cáma araja yipesudi udé quigode. Mu a quene araja iji quigade.–

⁸ Mu Pédro chajnai Jesús uruode enga chojninga: –A ca yujuéga ujetiga aru yirídade to jne go.– Mu Jesús chojninga: –Ujetiga ca yuru barídade enga a jé ca toque jne ujetiga yitojmárango jne iji jnumi.–

⁹ Enga Simón Pédro chojningame Jesús: –Ujetiga jé ũré baruode udore enga ca gusu yirídade mu aruapo yatoi, yijmainie ore jnese rĩ.–

¹⁰ Mu Jesús chojningame: –Uje quene gosi chise dáringárique puruque enga icha gai jnese. Gusu uté guídade uje iguirode déji gáyode, jecute guídade u ujetiga purucho. Ichapise yacadigode uhuaque, mu que icha uaque jnese go.–

¹¹ Jesús e chiraja dẽrasṍri gosi jecute chojninga: "Que icha uaque jnese go."

¹² Uje e chejna guesi uje churu ore guídade enga chiguiápo daguidedie uquidé rĩ, enga nonapo ore iji ore atigabié mésa rĩ. Jé u uje chojningame ore: –¿Ja arajáyo a yipesudode udojo quigode a?

¹³ Uacojnichome yu: "Yocacadisṍri á." Uacojnichopome yu rĩ: "Yocangarádejná." Enga jé tiógara ujetiga oyo uacacadisṍri iji yu. Enga oyópo uacangarádejnai iji yu rĩ. Chamáñaje uyu u gu.

^14-15 Ujetiga uacangaráni, uacacadisṍri u yu mu jé yuru uacarídade. Mu beyoi enga ajnáño yijmapié enga aruyo ñane guídade to.

¹⁶ Jé ũrepise yu ome yuruode uje que togome pirótique ujetiga sué darósonique gai. Enga que togápo rĩ ome putocaitique rĩ ujetiga sué datocaisṍri gai.

¹⁷ Ujetiga arajáyo yacajnaquéode udojo quigode, enga beyoi quigode, jogadi u jne ujetiga anínaño uaque.

¹⁸ Mu que yojningane u uaque jnese go. Yiraja yajegaidode iji uaque, mu yirajápo rĩ uje uacuñai a tẽra yu jne ome yumajosórone. Yiraja gu uje que toc ujetiga Dupade uruode quigode ca tocade. Uje ore urusarane Dupade urúo déji uje chojninga: "Yacásõrasórone uñeque a tẽra yu jne."

¹⁹ Yingome uaque cucha dacadode udore bajaque ujetiga ajnusináño quigode ujetiga e tocade. Enga jogadi u jne ujetiga arajáyo uje que yãra uaque ome yúringai yojninga, enga anguretáyo yu jne.

²⁰ Jé ũrepise yu ome yuruode udojo: ujetiga gosi chimesẽre yirótique enga imoi tu uje imeserãque yu to. Enga isocai u to ujetiga gosi chimesẽre yu enga chimesẽrapo yirósõri to rĩ.–

Jesús chatata uje Júdas u jne ujetiga tẽra

²¹ Uje Jesús chejna daruode udore guesi enga chise áyipie uje acadigode uñai a tẽra jne. Enga jé u uje chingopísa daruode aja dacadigode ore. Enga chojninga: –Jé ũré yu uje a uacuñeque tẽra yu jne ome yumajosórone ore.–

²² Enga acadigode ore chajire ñane mu que ore chiraja Jesús ojningai iji ore.

²³ Jesús acadigode uñai déji Jesús ejoi iji ore atigabié mésa uje Jesús ijnorai u uté.

²⁴ Enga Simón Pédro toji dajõrai uté gai enga cho dabujame ujetiga catecã́ri Jesús ome ojningai gosi.

²⁵ Jecute Jesús ejominóri uté chose yui enga chojninga: –Yangaráni á, ¿gosi u bojningai?–

²⁶ Ga Jesús chajnai uruode enga chojninga: –A yaca arureque petíguiji yoquibosode otadi, enga yojningai uté u uje yisi ome.– Uje chejna daruode udore guesi enga Jesús chaca arureque pei iji ore posode otadi enga chisi ome Simón gaté ujnacari Júdas Iscariote.

²⁷ Uje Júdas chisa Jesús guerani arureque pei enga jĩraque Satanás chijocase Júdas áyipie ujetiga tẽra Jesús. Jecute Jesús chojninga: –Aguito, bo gajneri enga jĩraque apésu bajéningo.–

²⁸ Mu que Jesús acadigode uñeque chiraja Jesús uruode udore quigode, uje ore déji mésa gai.

²⁹ Júdas uté u uje chañuru Jesús, acadigode ore iplátadie pié bólsa guio. Jecute ore jos eti Jesús uruode qui u ujetiga Júdas doi dajegaitígo cucha ome ore jnusinamáni dire yui. Jeoga chisi jmatágode ore iji dajnunguenie plátai.

³⁰ Uje Júdas e chisa Jesús guerani arureque pei enga jnoji ore gari. Enga e dejaque.

Jesús chisi ome daroqué ichai ome dacadigode ore

³¹ Uje Júdas e jno enga Jesús catecã́ri daríjogosórone ore enga chojninga: –Deréjnai udé e u ujetiga pijoque Dupade utocaidi uyu yingoningájnai. Enga Dupade ingoningájnai pijógapo iji yu to rĩ.

³² Ujetiga Dupade utocaidi uyu yingome Dupade ingoningájnai aja ore enga jogadi a jé u to ujetiga Dupade chingo yingoningájnai aja ore to. Enga a jĩraque yuruode udore tocade jne.–

³³ Enga Jesús chojningápome ore rĩ: –Yababode uaque á, a ca diyajmaque yu iji uacari jne. A acueyoi yu jne mu a ca eso yu. Adi jé u yuru casodica ome judíode ore uje yojninga ica ome ore enga jé yingome uaque to: uje a ca togome uaque jne ujetiga eso yijogadi.

³⁴ Mu yijíñome yiroqué ichai udé iji uacari: ujetiga beyoi ga ajnóraño ñane. Adi jé u ome yu uje yijnóra uaque, enga beyoi yijmapié uaté to enga ajnóraño ñane.

³⁵ Ujetiga ajnóraño ñane enga jogadi a u jne ujetiga erámi unirisórone ore chiraja jnese uacáringane yacadicho.–

Jesús chatata uje Pédro a chotigase jne

³⁶ Enga Simón Pédro catecã́ri Jesús enga chojninga: –Yangarádejná, ¿acáji rique jne a?– Enga Jesús chajnai uruode enga chojninga: –A ca togome ua ujetiga ajína yu aja yijogadi, mu quigade enga a ese yijogadi jne.–

³⁷ Mu Pédro catecãrápoi Jesús rĩ enga chojninga: Yangarádejná, ¿ome gotique gu a ujetiga ca togome yu ujetiga yijína ua jne? Chamáñaje dimane yu ujetiga yẽra yu ome ua.–

³⁸ Jesús chajnai uruode enga chojninga: –¿Jé ũrepise ua ya ome baruode udore ujetiga ẽra ua ome yu a? Jé ũrepise yu ome yuruode udojo: ujetiga cáma adute cochagájnai agoyedie dirome, mu a otigase yu jne enga ga gadioque.–