Juan 11 - Dupade Uruode

Lázaro itoringai u udé

¹ Enga jnani ejnarétatique déji ore idai Betánia uje i tu Lázaro. Ga jõra gáredie ore idai jé u to uje ore íode u María, Márta ore.

² Ga ejnarétai Lázaro jõra María uaté u uje chojne cucha ai uneréjna aja Jesús guídade gai nanique enga doi ga chaguñéra datui aja gai.

³ Diga Lázaro jõra gáredie udire ore chiroque darógode aja Jesús ujetiga ore chojningame: –Yocangaráni á, bajõrai Lázaro ejnarétaque.–

⁴ Uje Jesús chudute ore uruode enga chojninga: –Dequejnarei uté a ca chujépise Lázaro jne. Mu ejnarétaque Lázaro gu ujetiga Dupade chingo dáringai eduguéjna cuchape aja ore. U to ujetiga chingopo dabi uyu yúringai cuchape aja ore rĩ.–

⁵ Jesús chijnorapise Márta, María, Lázaro ore marínga, que jĩraque tibágui ore.

⁶ Uje ore chojningame Jesús: "Lázaro ejnarétaque," mu qué chejnapo dire gáreode iji dayaridi rĩ.

⁷ Mu uje Jesús chejna dire gáreode enga chojningame dacadigode: –Boyo ga yico. Yicagópoi Judéa rĩ.–

⁸ Mu Jesús acadigode ore chetaque áyipiedie quigode ga ore chojninga: –Yocacadisṍri á, qué upo diri casodé uje judíode iji Judéa ore chucué dasocáringome ua ujetiga ore chatingare ua ome cucaranenie. ¿Ome gotique gu a uje bapota bajniápo aja Judéa rĩ?–

⁹ Mu Jesús chojningame dacadigode: –Jec ũré yu erĩ́e uje gusu 12 hóras ujetiga gosi diguiji deréjnai údode. Ujetiga gosi diguiji dínique enga que toc ujetiga cṍra. Chamáñaje díreca jnumi gu.

¹⁰ Jé basa ujetiga gosi diguiji dejai enga cṍra. Amiri tu dírecaringuéi ome gu.–

¹¹ Udojo quigade ga Jesús chojninga: –Yoquijõrai Lázaro qué mo. A yiji jne enga yiringare jne.–

¹² Uje Jesús acadigode ore chudute uje Lázaro e mo enga ore chojninga: –Yocangaráni á, ujetiga jec ũré baruode udore enga ísega Lázaro e ninguira údode jõ.–

¹³ Mu Jesús urui qui u uje Lázaro e toi. Jé basa acadigode ore jos eti quigode u ujetiga Lázaro qué déji damótique.

¹⁴ Jogadi jé u uje Jesús chingopísa ore enga chojninga: –Lázaro e toi.–

¹⁵ Mu Jesús chojninga: –Jé areguipise ome uyu uje que yugúsi to uje Lázaro toi. Uje ueradi tu ome uaque ujetiga amóño yipesútedatérique gajneri enga jogadi u ujetiga anguretáyo yu.– Enga chojningápo rĩ: –Bo yico enga yibájoi.–

¹⁶ Mu Tomás catecã́ri dojode Jesús acadique ore enga chojninga: –Boyo yico, yijínango, enga yoco yoquibaya jne iji ta ujetiga ore chujé.– Tomás uté u uje garaja ore nanique.

Pucuecaringuei guẽrasṍri u Jesús

¹⁷ Uje Jesús chirõre ore idai ga ore chojningame Jesús: –E dirode gagájni iji yui uje ore chijóchame Lázaro diríca.–

¹⁸ Ore idai uté Betánia idógosiji Jerusalén. Enga kilómetrodie gare enga nóna petique iji ore idáyode udore ujai.

¹⁹ Enga uásejna judíode ore uje ore tṍraji Jerusalén ga ore chicáji Betánia ujetiga ore chajire Márta, María ore ome dajai itoringai.

²⁰ Uje Márta e chiraja uje Jesús e di enga chachai iji garani. Mu jõra María chácariji ore iguíjnai.

²¹ Mu Márta chojningame Jesús: –Yangaráni á, ujetiga agúsirási de diríca enga yocaja casé a ca torási diríca.–

²² Enga Márta chojninga: –Mu yiraja uje a Dupade chisi ome ua bataidode cucha jnese.–

²³ Jesús chojningame Márta: –Uacajai a jé ecápo jne rĩ.–

²⁴ Márta chojninga: –Yiraja uje a nijiápo jne rĩ iji datoringai quigade iji dirode udore erueminóri uje piringarãque togode.–

²⁵ Jecute Jesús chojninga: –Uyu u uje yiringare ore. Uyu upo rĩ uje yisi ome pucuecaringuei ome ore. Ujetiga gosi changureta yu, gosi a toi mu a ecápo jne rĩ.–

²⁶ Jesús qué jno daruode údi enga chojninga: –Enga isocai jé upo ome yanguresõre uecade ore jnese. Uje ore changureta yu, a ca ore chimo pitoringai ome re gotique.– Enga chojningápome Márta rĩ: –¿Angureta yuruode udojo a?–

²⁷ Márta chojninga: –Ejẽ́, yangureta baruode, Yangaráni á. Enga yanguretápo báringai yoquijnati Crísto rĩ, jé aja báringai Dupade ape. Ua u uje Dupade chichagája yoque iji erámi tudé.–

Jesús poji Lázaro ode ejoi

²⁸ Udojo quigade ga Márta chise dajõra María enga catecã́ri mu pógu daruode enga chojninga: –Yocacadisṍri de ti. Pota ujetiga chimo ua.–

²⁹ Uje María chudute udojo, dajõra Márta uruode, enga jé u uje jĩraque María jno enga tibágui Jesús.

³⁰ Jesús cáma chise ore idaipísi. Jé qué déji dayaridi uje Márta chisíji.

³¹ Uje María osõrasórone judíode ore chimo María uje jĩraque jno ga ore nóna. Ome ore ajéode ga María jno gu ujetiga poji dajai ode ejode.

³² Uje María chise Jesús charidi enga chichaga dagataidie aja jnumi iji Jesús ejoi enga chojninga: –Yangaráni á, ujetiga agúsirási de, yaja casé a ca torási diríca.–

³³ Uje Jesús chimo María uje po, jé aja judíode ore rĩ uje ore nóna, ga chosõripise ore. Enga ore agoyedie chijõrorasipise.

³⁴ Enga Jesús catecã́ri ore ga chojninga: –¿Ajóchañome iji rique diríca ya?– Enga ore chojninga: –Yocangaráni á, boji ti enga ajire to.–

³⁵ Enga Jesús po to.

³⁶ Ga judíode ore chojninga: –Cajicho to. A chijnorapise Lázaro jõ.–

³⁷ Mu uñane ore chojninga: –Uté u ica uje chuchẽre edopari edodie gáyode. ¿Gotique gu a uje que di diríca enga chiqueta Lázaro diríca ujetiga ca toi?–

Jesús chiqueta Lázaro iji itoringai

³⁸ Posõraquei chisápo Jesús ajei rĩ. Jé u uje chose Lázaro ode yui. Ga Lázaro ode cucarã́tedó mu ore suru gai ome cucarané.

³⁹ Enga Jesús chojninga: –Ajnicho cucarané iji Lázaro ode gai.– Mu Lázaro toi jõra Márta chojninga: –Yocangaráni á, a e ánique chójmare. Jé dóji. E dirode gagájni iji yui uje toi diríca.–

⁴⁰ Mu Jesús chojningame Márta: –¿Ja ca ajnusina yuru casodé a? Uje yojningame ua: "Ujetiga angureta yu jne enga a amo Dupade ujopié ingoningájnai."–

⁴¹ Jecute ore chijnime cucarané iji Lázaro ode piagoi. Jé u uje Jesús chajire gaté enga catecã́ri dai Dupade. Enga chojninga: –Yapá, yacãre babai iji de. Chamáñaje bangári yuruode gu.

⁴² E yiraja uje jecucha bangári yu. Mu yicatecã́ri ua iji ayorébui udé ore iquei ujetiga ore chiraja yúringai batocaite enga ore changuretápo yu rĩ.–

⁴³ Uje chejna udojo guesi ga jé u uje chejnapúsu daruode enga tibidi Lázaro enga chojninga: –¡Lázaro, be guesi iji bode!–

⁴⁴ Enga jé u uje jnani toi uté doi guesi iji dode. Enga guídade, jmainie ore chimeríji borapei údode. Adi jé u ome edodie, gatoi ore rĩ. Jesús chojninga: –Ejñúño borapéode iji údode. Jé dóji ga dique.–

Judíode ore angaránone uñane ore pésu dáyipiedie ujetiga ore chisa Jesús

⁴⁵ Udojo quigade enga uásejna judíode uñéngo uje ore changureta Jesús. Yojningane u udore ore uje ore chajna María aja dajai Lázaro ode enga ore chimo Jesús uje chiqueta ore dajai iji itoringai.

⁴⁶ Mu udore uñéngo ore tibágui fariséode ore ujetiga ore chingo Jesús ipesudode aja ore.

⁴⁷ Jecute fariséode, sacerdóteode eduguéjnane ore cháta rágaja ore angaranipísode. Enga ore chojninga: –¿Jé yoco ringome jne a ome jnani uté ome ipesudode cucha pitijabácho? Uje e uásejna ipesudode udore cucha.

⁴⁸ Ujetiga ca yãrájo uté ipesudode udore ome enga a ore changureta úringai Dupade utocaite jnese jne. Enga a yoqueduguéjna cuchábode, rómagosode, a ore jos eti yoco yoqueduguéjna iji uté. Enga jogadi u ujetiga ájningarãque ore ome yoque. Enga a ore chajnangarase Dupade iguíjna cuchábi enga a ore chãraque yocúringane eduguéjna ome yoque to.–

⁴⁹ Mu ore eduguéjnane uñeque déji uje i u Caifás. Enga sacerdóteode ore eduguéjnapisi u uté iji sequeré uaté. Enga uté chojningame ore: –¡Que arajáyo cuchárique!

⁵⁰ Enga que adójnachopísa to rĩ uje omitigai tupúsu ome yoque ujetiga gusu toque jnani chojmarai ome yocurasade ore jnese, enga jé ca yocuniri jnese íjnoque jne.–

⁵¹ Mu que eduguéjnai Caifás uté uruode garani u re gotique. Mu garani u Dupade. Chamáña gu uje sacerdóteode ore eduguéjnai u uté iji sequeré uaté. Jecute Dupade chingo payuquetotiguei aja ujetiga chatata uje Jesús a toi jne ome darasade judío ore.

⁵² Mu que gusu judíode ujetiga Jesús toi ome ore, mu jé upo ome erámone unirisórone ore jnese ujetiga ore chise dáringáringo Dupade abío. Enga a jogadi u ujetiga chamáta ore iji erámi údode jnese.

⁵³ Jecute diri uté jé u uje judíode ore angaránone ore chimate dáyipiedie ujetiga ore chujé Jesús.

⁵⁴ Jecute Jesús que chingopo raja judíode ore rĩ. Mu jnoji ore uniri Judéa. Enga chicáji ore idánique uje i tu Efraín uje idógosiji erãp eyutiguei. Enga Jesús acadigode ore cháji Jesús gari iji te.

⁵⁵ Uje dirode e garósi ome judíode ore jnusinamáni dire uje i tu Páscua enga judíode ore íjnongaja Jerusalén uje ore tṍraji guidáyode uñane. Ore gaidi u ujetiga ore doi dajmapiedie ome dáringáringo icha, ujetiga dimane ore ome dajnusinamáni dire yui.

⁵⁶ Enga judíode ore chucué Jesús aja dajesúode. Diga ore chise Dupade iguíjna cuchábi enga ore catecã́ri ñane enga ore chojninga: –¿Chimo jóroque re eti ca Jesús chicáji yocujnusinamáni dire to jne?–

⁵⁷ Enga fariséode, sacerdóteode eduguéjnane ore chingome ayorébui ujetiga gosi chiraja Jesús jogatique enga chingo jogadi aja ore. Jé u ujetiga ore doi ga ore chisa Jesús enga ore suru gai.