Josué 9 - Dupade Uruode

Gabaóngosode chutai israélgosode uru iyiejájnane ome raque nanique ujetiga pajesereringane déji ore ome ñane

¹ Enga Josué ore ujnomei e chise ore idáyode jnese iji yote quedéjnai Jordán uécha uñai iji guedé cacadi yui nanique. Ga ore eduguéjnane dosóñime ore ujnomédatéi yúode iji ore idáyode udore jnese: hitítagosode, jé aja amorréogosode, jé aja cananéogosode, jé aja ferezéogosode, jé aja hevéogosode, jé aja jebuséogosode ore to. (Ga eduguéjnane udore ore unirone chise cucarãte umarone. Ga chise atétadie to, jé aja yote quedéjna cuchábi uje chisípise edúdi to. Uje yote quedéjna cuchábi uté i u Mediterráneo nanique. Ga ore unirone chicáji casaque garani yui nanique uje ore uniri Líbano déji eruei to.)

² Ga jé u nanique uje eduguéjnane udore ore nararome ñane enga ore chojninga: "Yátago yógaja ñane ome Josué uáguedie israélgoso jeta ca ore chejna yoque to."

³ Mu hevéogosode uje ore idai i tu Gabaón nanique ore chudute Josué ujnoméone to nanique uje Josué urasade ore chejna jericógosode ore, jé aja háigosode ore to, ga ore todópisa ore yúode.

⁴ Ga jé u nanique uje ore pésu dáyipiedie ome raque ujetiga ore chãra ránguiji pachamite quedéjnarique iji toniñeque, iji cananéogosode ore uécha gatéode. Ga jé u nanique uje ore chijnime dajegaidode jnanío iji dajade enga ore chojningame ore: "Beyoi uacachidode burica quedéjna ore, enga agacho uacagúcha taratágode aja uécha uñai, ga agacho cucha ao taratágode aja uécha uñai to rĩ uje pijotai víno gajneque udore. Ga a cho jne jeta idájapise uacanirone, ga cho jeta uacamochádode jiei aja ore yúode to.

⁵ Ga jé adi tupo rĩ ome uacaguidé taratáguedie ga a aguíyo to jne, enga a cho jeta uacarãtique punire idája jne. Ga jé chopome uacachiédode to rĩ jeta tarata mu jé achíyoi to ga cho jetiga dajéode chejna uacachiédode to. Ga jé chopome uacabosode to rĩ. Enga eduyo arureque etógode jé aja dijichugode to, ga cho jetiga idájapise uacarãtique punire to."

⁶ Ga jé u nanique uje ore jnome Josué ore yui to. Ga ore chise Josué ore iji ore irengúmei to nanique iji ore ajmitique uje i tu Gilgal. Enga ore catecã́ri Josué, urasade israélgoso ore nanique. Enga ore chojningame: –Eyúgape yoque ga yiquíjnojopise uje idájapise yocarani punire to gu iji Canaán uéchade iji ¡tii! Ga yudúco uacajnomédatéode to uje uaquejnáñopise jericógosode, jé aja háigosode diríca. Enga yibájoi uaque gu jeta yijóchago uacajéode údi jetiga ca ejna yoque to iji yocuniri uje déji ¡tiiii! Ga asi ome baru iyiejájnane ome yoque ga a jé u jetiga pajesereringai déji yógome ñane jne, enga a yajníngo yocurasade gai to jne.–

⁷ Mu israélgosode ore chajnai hevéogosode ore uruode to enga ore chojningame ore: –Taque uaque arĩa, uje idógosi uacanirone to. ¿Ama yisígoráse yocuru iyiejájnaringo ome uaque to a?–

⁸ Mu jé ore chose raja Josué údi nanique ga ore catecãripísi. Enga ore chojningame: –Yocangarádejná, yocurasade uyoque enga oyo uacaróguiji yoque jne, ga asíyo uacaru iyiejájnaringo ome yoque jne enga a yocurasade uyoque yicoi uacaroquéode bisideque jne.– Ga jé u nanique uje Josué catecãripísi ore enga chojninga: –¿Órañoji rique a? ¿Uaque gosode to a?–

⁹ Ga ore chojninga: –Jé ũrepise yoque uje yórangoji yocunire idájai iji ¡tiii! ga yico uáguiji de jeta yicatecãcoi uaque to. Uje yudúco to uje uacangureni Dupa ujopíerã́quedaté. Uje yudúco to uje uté chijnime uáguiji egíptogosode gari nanique.

¹⁰ Yudúco uacajnoméone to uje uaquejnáño amorréogosode ore eduguéjnane to nanique iji yote quedéjna cuchábi Jordán uéchamitó nanique. Ga uaquegode udore uñai i tu Sehón uje idai u Hesbón nanique. Jé basa ga uñai i tu Og to uje uté cho dedai iji Astarot nanique iji ore uniri Basán uté nanique.–

¹¹ Ga ore chojningame Josué: –Yitodógopisa uaquéode to. Ga yocurasade, yoqueduguéjnane ore chiroque yógaja uaque ga ore chojningame yoque to: "Boyo, ga ajnócho uacabosode ga abáchoi Josué, urasade ore iji ¡tiii! Ga angoñome ore to jne jetiga ca ore chujé yoque to enga a ore cho daróguiji yoque to jne. Ga angoñome ore jetiga yico ga yicoi ñane ga yisígome yocuru iyiejájnane ome ñane to."–

¹² Ga ore chojningame Josué: –Bamo to arĩa uje yoquigode arurécho udore qué jũrua nanique uje yico nanique, ga yijnójo aja yocajesui nanique uje yucuegoi uaque to nanique. Cajire to uje etoguipíso, ga uñane e dijidipise uje yiríngo iji uaque to. Ga imoi tu ome uaque uje yocuniri idájapise.

¹³ Cajire yoquigode cucha ao uje yoquijotai víno gajnecho udore uje icha nanique uje yucuegoi uaque to nanique, mu bamo uje e edodie cuse to. Jé cajire to yocuchiédode, jé aja yoquiguidedie, jé aja yocugúchade uñane to. Uje icha jnese uje yico nanique, mu e taratapise uje yico uaque to iji de. Chamáñaje idájapise yocuniri iji uacaniri udé, ga iyajmanguipise yóguiji dajei diríca aja uaque.–

¹⁴ Ga jé u uje israélgosode ore chajire hevéogosode ore ugúchade to uje udore ore idai u Gabaón nanique. Enga ore chojninga: "Jé ũré ore to arĩa uje tarata ore ugúchade jnese gu. Ga imoi tu uje ore uniri idájapise. Enga beyoi ga yisígo yocuru iyiejájnane ome ore enga a yoco yoquiróguiji ore to jne." Mu gajnarenguipise nanique uje que Josué ore catecã́ri Dupade bajaque to.

¹⁵ Ga jé u uje Josué chojningame ore: –A ca yujégo uacarasade uñeque to jne.– Enga Josué ujode pangarate ore chojningame ore: –Jé yocáyipiedie u to arĩa jeta yisígo yocuru iyiejájnane ome uaque. Ga boyo ga ajníño uacarasade ore gai to jne.–

¹⁶ Mu uje ore chisi ome daru iyiejájnane ome ore, jé basa ga dirode e gadióguiji ore yui uje ore chudute to uje ore ãraque ore, enga ore idai u Gabaón, uje Gabaón uté idógosiji Josué ore irengúi uje ore apáringaméque.

¹⁷ Ga uje israélgosode ore chudute to uje jnanione udore chãra ore diríca enga jnanione uñane chajna ore, ga ore mochádode gadióguiji ore quigade uje ore chise ore idáyode udore to. Ga hevéogosode ore idáyode gagájni jogatígo nanique ga ore íode u udojo: Gabaón u uñai, jé basa ga Cafíra u uñai to, jé basa ga Beerot u uñai to rĩ, jé aja Quiriat-jearim u to.

¹⁸ Mu israélgosode que ore chujé ore nanique. Uje ore angaránone chisi ome daru iyiejájnane ome ore to gu. Uje ore chojningame ore diríca: 'Yocurasade israélgose uyoque yocangureni Dupade tangaripísi yocuruode, jecute a ca yujégo uaque to jne.' Ga jé israélgosode ore chetaque dangaránone áyipiedie enga ore chojningame ore: "¿Jé gotique uje uacasíyo uacaru iyiejájnane ome ore diríca?"

¹⁹ Enga ore angaránone chajnai darasade uruode enga ore chojninga: –Jé ore dóji. Uje Yocangarádejnai Dupade tangári yocuruode diríca enga que toc jeta yocuruode cucha bisidécho to jne ome ore.

²⁰ Ujetiga ca yicoi yocuruode enga yujegorase ore, enga a jé u uje Yocangarádejnai chorase yoquiba yoquijocaningáringo ome ore jne, enga a cho dajuñame yoque to jne. Jé dóji ga a ca yujégo ore to jne.–

²¹ Enga jé u uje ore angaránone chojninga: –Jé ore dóji to ga a ore doi pidode ome yoque jne gatuaque, jé aja yodi jeta ore dopoi ome yoque to rĩ.– Ga jé u nanique uje israélgosode ore angaránone uru iyiejájnane jé jogate ome gabaóngosode ore.

²² Mu Josué tibidi gabaóngosode enga chojningame ore: –Gabaóngosode uaque á, ¿gotique gu a, uje uacaráño yoque to diríca? Uje chiese idája uacanínique diríca uje uacaniri jé uté iji yoquejoi tuté.–

²³ Ga Josué chojningame ore: –Yipésupú ga Dupade cho darúja uaque enga a beyoi yoquiroquéode iji deréjna pitade to jne. Ga uacagaidode a u pidode to jne rĩ, jé aja yodi to ome Dupade iguíjnai jogosórone cucha.–

²⁴ Ga gabaóngosode ore chajnai Josué uruode enga ore chojninga: –Cachi yarángo uaque gu uje yitodógopisa uaquéode to ujetiga ajéyo yoque to. Uje yudúco uje uacangureni Dupa catecã́ri daro casicaite Moisés ica enga jmongarája yoque nanique ga chojninga: "Boyo ga acayóji punire ueradéjnai tuté enga ejnáño unirisórone ore jnese jne, enga oyo uacaniri iji ore uniri jne."

²⁵ Jecute yarángo uaque diríca mu cho jeta yichago yógaja uacajmanáyone ajã́ronie. Jecute beyoi uacáyipiedie ome yoque to jetiga oyo uacaróguiji yoque jne, jetiga ca ajéyo yoque to.–

²⁶ Jecute Josué charanguipise gabaóngosode ore jnese to jetiga ca chuque ore to.

²⁷ Mu chiroque gabaóngosode iji dirode udojo nanique, enga ore gaidi cucha pisaque jé upúsu yodi ome israélgosode nanique, jé aja pidode to. Enga chojningame ore nanique: "Ujetiga yipéco Dupade iguíjnai iji Dupade ojningai pidai jne enga a jé uacasai u pidode ome yocaseradéjna cuchábi to jne ujetiga yiboco yoquẽratígo dosipeque ome Dupade iji uté gai jne." Enga gabaóngosode qué ore isai tu cuchade udore jé aja deréjnane unojo to gajiné.