Josué 8 - Dupade Uruode

Israélgosode pésu Dupade áyipiedie ga jé u uje ore sué Háigosode ore gai nanique

¹ Ga jé u nanique uje Yocangarádejnai catecãrápoi Josué rĩ enga chojningame: "Josué á, jé ca atodo cuchade yúode, enga be ga dicase ua ome cuchade yúode. A bepoi pocaningai to jne rĩ enga a amo báringai pujnuéngaisṍre jne. Be ga amáta pocaningai gaisórone ore jnese ga beyopoi háigosode rĩ. Enga a yisi ome uacáringáringo pujnuéngaisóño ome uaque to jne. Enga a ajnuéño ore eduguéjna cuchábi gai to jne, jé aja ore idai idaisórone ore jnese jeta ajnuéño ore gáyode to. Enga a uacajneque háigosode ore idai jne, jé aja ore gajnéone jnumío jnese to.

² E yisi ome uaque jetiga ejnáño ore jnese, ga a adi tu jericógosode uje yisi ome ore ome uaque diríca. Enga a ejnáño ore ¡dígui, dígui! Enga a jé u jetiga yisi ome ore ugúchade ome uaque jne jeta uacajnecho, jé aja ore gachidode cucha jnese, enga a uacajnecho to jne. A beyoi ore jne mu a apóchopúsu uáguiji ore idai uécha uñai jne."

³ Ga jé u nanique uje Dupade cha catecã́ri Josué, enga jĩraque Josué tibidi pocaningai gaisórone ore to uje ore chise 30.000 nanique. Enga e dejaque nanique ga Josué chiroque pocaningai gaisórone udore uñane aja doi.

⁴ Enga chojningame ore: "Angachopísi yuruode udore to. A yiroque uaque bajaque jne aja ore idai uéchai jeta ayóyo ore idai gai ga dimane uáguiji joride uña iji ore idai uéchai to, jeta oyópise parácho iji uté uécha uñai.

⁵ Jé basa ga uyoc uñane a yiquetágo dajei taja ore idai to jne. Enga a ore imo bajade u yoque jne iji dajei garani. Enga a ore chojninga: 'Israélgosode ore u arĩa, uje que ore ujñapegome yoque diríca, enga a yejnángopó ore to jne rĩ.' Mu a yayógo ome ore garósi jne, ga adi tu jne uje yayógo ome ore diríca.

⁶ Enga jé basa ga a ore cugujnáji yoque jne enga a ore jos eti yayógo gu uje yitodógo ore, adi tu uje yayógome ore diríca.

⁷ Mu ujetiga ore cugujnáji yoque enga a jé u jne ujetiga acugujnáñoji ore idai tuté jne uje e íjnoque jnanione pocaningai gaisóningo iji ore ujade. Ga a jé u jeta amóño to jne ujetiga Pangarádejnai, uacangureni Dupa chicha ore idai aja uacajmanáyone gatócorodie jne.

⁸ Jeta e ejnáño ore ga aquetáñome ore idai jne jeta pioi chejna ore idai tuté údode jnese. Uje Pangarádejnai jé urúo udojo gu."

⁹ Ga e dejaque nanique uje Josué chiroque darasade uñane aja doi to jetiga ore chácariji ore idáyode Betel, Hai ore ujai iji guedé cacadi yui to nanique. Mu Josué, jorane ore qué ore chácariji darengúi to jeta ore choberipísi dirome.

¹⁰ Ga chise dire uñai uje guedé quene tocádesi to, enga Josué doi ga chimáta darasade ore aja ñane. Ga pésu ore jochai ga jé chicáji ore iquei. Ga Josué ujode pangarate ore cháta rágaja Josué iji ore iquei jnese. Ga jé u uje ore jno bu enga ore jnome háigosode ore.

¹¹ Ga jiei ore uje ore jno ica ga ore cho cutuque ga ore doi darengúi tiji casaque garani yui. Háigosode ore idai déji ore iquei mu pararinguérique déji ore idai Hai, Josué urasade ore ujai nanique.

¹² Enga Josué chiroque darasade uñane ujeta ore chácariji Betel, Hai ore ujábi, enga ore chise 5.000 nanique, Josué urasade udore. Enga ore chacosipise ráguiji dayaridi tuté iji ore idai Hai uécha uñai iji guedé cacadi yui ujetiga ca pimo ore iji ome uñeque.

¹³ Ga israélgosode e ore chajuque re ome ñane ome pocaningai yui. Ore peque uñai chicáji ore idai yui ga ore chácariji uté uécha uñai iji guedé cacadi yui, jé basa ga ore peque uñai chicáji casaque garani yui to. Ga e dejaque nanique enga Josué, jorane ore uje ore déji casaque garani yui ore jno ga ore cho jñara aja dajesui ga ore chise pararinguei ajépisi nanique.

¹⁴ Mu háigosode ore eduguéjna cuchábi chimo Josué ore iji guesáringai. Jecute uje e dire enga jé u uje chiroque pocaningai gaisórone aja daquigade enga jé u uje ore chajna Josué, urasade ore. Ga jnanione ore íjnongaja doi uje ore chajna ore. Mu que ore chiraja uje israélgosode uñane pógu ráguiji ore idai uéchai to.

¹⁵ Ga jé u uje Josué, jorane ore, ore chãra ránguiji bayai tome ore, mu ore chajnésaru daquigade ome háigosode udore. Mu háigosode ore jos eti Josué ore chayome ore, enga ore chojningame ñane: 'Cachi ore qui tu erãpetarei iji te.' Ga ore chajna ore aja ore ajesui.

¹⁶ Ga jé u uje ore eduguéjnai chiroque darasade aja Josué ore quigade ga chojninga: "Boyo ga ejnáñopise uágaja ore quigade." Ga ore jno ga ichapise ore idai tome jnanione.

¹⁷ Enga ca gusu háigosode ore mu ore cháta rágaja betélgosode ore ga ichapise ore idai tome jnanione to. Jecute háigosode, betélgosode ore rĩ, que ore irotangónique ayoré cusipise jnese to.

¹⁸ Ga jé u nanique uje Yocangarádejnai Dupade catecã́ri Josué enga chojningame: "Asa boidi quesédaté poté ga ãrai gaté ga a jé u jne jetiga barasade ore chimo quesei uté enga ore cugujnáji háigosode ore idai tome. Enga a amóño jne jeta yicha uágaja ore idai gatócoro jne." Ga jé u nanique uje Josué chudute dajnéone Dupade urúo to enga jĩraque chãrai doidi quesédaté iji gaté.

¹⁹ Uje Josué chãrai daquesei iji gaté enga urasade uñane uje ore pógu ráguiji guidai uéchai uté ore cugujnáji háigosode idai to. Ga jé u uje ore chejna guidai jogosórone ore jnese enga jĩraque ore chiquetame ore idai údode jnese.

²⁰ Mu uje háigosode ore chajire daquigade mu pioi tagu ore idai tuté gai to ga ore chojninga: "¡Pioi popío iji yoquidai tuqué é!" Ga ore chajire mu úyujnanie chise gatajnoquei. Mu uje qué ore chajire dedai, mu jé u uje Josué urasade ore cugujnáji háigosode jnani uégode ga ore chimochẽre ome jnanione udore yui, ga que toque ore quitique uje ore chimochẽre ome ore yui. Enga ore jos eti Josué ore qui tu erãpetarei ajei, mu jé basa ga Josué cho cutuque ga jé u uje ore cugujnáji ore.

²¹ Enga jé u uje Josué ore chimo pioi úyujnanie uje popío aja gaté, enga jĩraque ore chiraja uje utocaidode ore chejna idai idaisórone que iji ore idai Hai uté, enga jé u uje ore cho cutuque ga ore cugujnáji ore to.

²² Uje Josué utocaidode udore ore chejna ore idai ¡jaripe!, ga ore cugujnáji Josué ore quigade to, ga ore chimochẽre ome Háigosode ore yui. Enga ore cháta rágaja Josué ore to ome háigosode udore iji pararinguei ajei enga israélgosode uague gáredie udire ore cugujnáji ore ga ore chejnápise pocaningai gaisórone iji háigosode udore nanique.

²³ Ga jé gusu ore isaque háigosode ore eduguéjna cuchábi enga ore jno údi aja Josué to.

²⁴ Ga ore chejna háigosode pocaningai gaisórone ore ome dasṍrenie. Ga quigade ga ore cugujnápoji háigosode idai to rĩ, ga ore chucué uecárigo iji ore idai údode ga ore chichagu ore ome dasṍrenie ga ore chejnápise ore.

²⁵ Enga Josué ore chejna jnanione, chequedíe ore jnese, enga ore yugode u 12.000 nanique iji diri tuté nanique, enga que uñeque chapite iji ore idai Hai uté údode jnese.

²⁶ Chamáñaje Josué que cha chujé ore nanique jé aja jeta chejnápise háigosode ore jnese.

²⁷ Ga jé u nanique uje ore chejna ore ga ore cho dajnenguíji ore gachidode cucha to, jé aja ore ugúchade uñane to. Uje Yocangarádejnai uruode u udore ome Josué uje chojninga: "A yisi ome háigosode ore ugúchade ome uaque to ga a oyo uacajnéngu to jne."

²⁸ Ga jé u uje Josué ore chiquetame ore idai Hai uté nanique, jé aja jogonórone cucha jnese, ga ore chejnápise ore idai Hai jnese, ga que uñeque chirópo cuchárigo iji ore idai uté rĩ, jé aja dirode udojo.

²⁹ Enga jé u uje Josué doi háigosode ore eduguéjnai nanique enga chadíja etabi taja poria ga cho ¡cochógaja! jnumi ga jé chuságaja guedéjnoringái iji poria uaté. Ga jé u nanique uje Josué tibidi darasade ore enga chojningame ore: "Beyoi ga ejñúño ore eduguéjnai etabi tiji poria ga óraño aja ti ¡chac! Ga boyo ajnoquéode údi aja ore idai joride to iji ore idai yui, ga achayoi ajnoquéode aja ore idai ajéjonguei to jne. Ga beyoi cucaranenie ga ajéyo aja gai to." Ga jĩraque ore doi uruode, enga cucaranenie udire a jé jogate ajnoquéode gai jé aja dirode udojo to.

Josué naráraja Dupade uruode gai ome darasade uje ore déji cucarãte cuchábi Ebal ójo nanique

³⁰ Ga jé u nanique uje ore chicáji cucarani to uje uté i u Ebal. Ga Josué pésu daserani iji uté to ome israélgosode ore yugode yui ujetiga ore tẽrája dangarádejnai Dupade iji uté to.

³¹ Ga Josué dopísi Dupade iroi Moisés acajnaquéode to nanique uje pésu daserani ome Dupade, enga que chujé cucaranéraque eruénique aja jnumi bajaque to, mu chisa cucaranenie ga chujé ore aja ñane gai bisideque. Chamáñaje Moisés urusarane Dupade urúo déji uje chojningame ore: "Jeta gosi pésu daserãtique ome Dupade ga ca chujé cucaranéraque eruéningome daranguéraque. Gusu jetiga asayo bisideque ga ajéyo aja ñane gai iji uacaserãtique gánique." Ga jé u nanique uje ore chipotame degode uje ore tẽrája Dupade ome udore nanique, ga jiei ore iborigode ome daserani tuté nanique ome Dupade. Ga ore iborigode dosipeque gare jogadode nanique. Bajai tu pininaquei gajnengóri uje ore chujé dachite choqui ueradéjnane uje pimoi u dáringáringo ujñapetágome Dupade. Jé basa ga ejoi tu pajesereringai gajnengóri to nanique.

³² Ga Josué doi daserani nanique ga churúsãre cucaranenie gáyode iji daserani údode ga churúsãre iji darasade edominone ga ore toji Josué gai tiji urusarane gai. Ga urusarane quigode u Dupade iroquéode uje Moisés urusãracho udore nanique.

³³ Uje ore chimate deranone dosipeque údi enga israélgosode pésu dajochade iji Dupade uruode pi cajo dosadode jnese. Uñane chicáji cucarãte cuchábi Ebal tiógarei. Jé basa ga uñane chicáji cucarãte cuchábi uñai tiógarei to uje cucarãte cuchábi uté i u Gerizim nanique. Ga Dupade irógode Leví ape disi ejo ore déji ore iquei uje ore chijnoque Dupade uruode pi cajo iji dorotadode nanique. Israélgosode ore déji jnese. Ore angaránone ore déji to jnese, jé aja ore eduguéjnane uñane to, jé aja ore adode ajirisórone ore to rĩ. Jé aja purása quedéjnane ore to uje ore nóna israélgosode aja quedéjnane to, jé aja udore ore abode to rĩ uje ore basíji israélgosode ore irengúone to nanique. Ore gaidi tu gu jeta ore tangári Josué ajirigode Dupade urúo jne, ga jogadi tu uté jne jeta Dupade chacacãre ore ome cucha omone. Dupade iroguipísi Moisés acajnaquéode u pisocade udore gu nanique iji taningápisi, jeta ore chajuque re ome ñane ga ore chácariji cucarãte cuchábode udore tiógareode jeta ore tangári Dupade uruode quigode, ga jé u ujeta Dupade chacacãre ore to iji dajogadode udore.

³⁴ Ga Josué chisa Moisés urúsaraníe Dupade arecujáchi to nanique ga chejnápusu daruode uje naráraja gai ome ore. Ajirigode u Dupade uruode uje Dupade chacacãre ore ome cucha omone jeta angoninguite guesac ore ome uruode, ga chacacãrápo ore rĩ ome cucha gajnaréngone ujetiga ca ore tangári uruode enga cucha gajnaréngone a tocade ome ore to jne.

³⁵ Josué que chimonguipise Moisés urusarane quitique gotique uje naráraja gai ome darasade udore, ga israélgosode ore tangári ajirigode udore jnese: jé aja chequedíe, disiode, gapudíe ore jnese. Ga jé chuságaja purása quedéjnane uñane ore to uje ore nóna israélgosode aja quedéjnane to.