Josué 7 - Dupade Uruode

Jnani bajai Acán ijnimique Dupade ájningai nanique uje chijna jericógosode ore ugúchade nanique uje Dupade chãraque mu

¹ Pangarádejnai Dupade e chutṍri israélgosode ujetiga ore chiborome jericógosode ore ugúchade jnese. Mu israélgosode uñeque déji Josué ore ujade to nanique uje angoninguite parique ome Dupade uruode udore ga uté i tu Acán. Ga uté gãrapi tu jnani bajai Jacob ujnacarode uñai nanique uje i tu Judá. Ga Acán daipísi i tu Cármi, jé basa ga dáqui i tu Zábdi, jé basa ga dáqui gatei i tu Zéra to nanique. Enga Acán uté chijna jericógosode ugúchade uñane uje cáma israélgosode ore chãru udore gai nanique, enga cho dajnenguíji cucha puyade udore to. Ga uté ijnimique Dupade ájningai nanique uje chó Dupade uru iyiejájnane gai gu. Mu que gusu ome uté nanique, mu Dupade jé cho israélgosode ore báji to. Ga ájningaránguipíse ome ore jnese.

Israélgosode ore doi háigosode ore nanique mu que Dupade nóna ore aja ore jocaningai uje chetaque Acán oriquéode nanique gu

² Uje e ore chejnápise jericógosode ore jnese nanique, enga jé Josué catecã́ri jnanione uñane to nanique jetiga ore jno nanique ga ore chajmitape ore idai uñai uje i tu Hai. Uje ore idai Hai uté déji ore idáyode uñane dosadi iji guedé garani yui to. Uje ore idáyode udore ore íode u udojo: Betel, Bet-avén ore.

³ Ga jé u uje ore jno nanique ga ore chise ore idai enga ore chajire údode, mu jĩraque ore chajniápo Josué ore gai to rĩ. Ga ore chojningame Josué nanique: "Garósipise jõcaratade iji ore idai Hai uté, enga jé areque jeta jé ca yicoi ore jnese. Mu aroque jnanione uñéngo aja ore idai uté jeta ore chise 2.000 ga ore doi pocaningai ome ore. Jeoga jeta apota enga 3.000 urásu barógode udore jne. Mu a ca u pocaningai gaisõripísode uyoque jnese jne. Chamáñaje garósosi ore ga a jĩraque yejnángo ore jne gu."

⁴ Ga jé u nanique uje Josué tangári jnanione udore ga chiroque pocaningai gaisórone uñane aja ore uje ore chise 3.000 nanique. Ga jé u nanique uje Josué urasade ore cugujnáji ore to, mu ore chose ore, enga jé u uje israélgosode ore chayome ore to. Ga que toque ome ore nanique jeta ore chejna háigosode ore.

⁵ Enga háigosode ore cugujnáji israélgosode ore iji ore ujuyaquei joride ga chicha degode aja joride ejode iji israélgosode, ga ore yugode chise 36 ore iji Josué urasade udore. Ga qué ore cugujnápoi ore gaté rĩ, ga ore chicha deque gatéode aja ore ejopiéraque uje ore jochadíe u cucaranenie iji uté, ga ore chicha deque ejode cachodode aja ore ejopié uaté ejode to. Enga jé u nanique uje israélgosode ore serẽrája iji háigosode ore jmainie, enga que ore chichagápo raja dáringárique pujnuéngaisṍre rĩ. Enga ore chayome ore jnese.

⁶ Uje Josué, ujode pangarate ore tangári pocaningai gaisṍri casodé ore ojñane to ome háigosode ore yugode ujnomei, enga áyuguhebátaguipíse ore nanique. Ga ore chisa daguidedie iji daróbedie enga ore chajnangarásiji dabai. Ga ore chisapo puchucurúode rĩ enga ore chujé aja dójodie. Ga jé u nanique uje ore chayója Dupade uruode jogapi cajo, enga ore chicha datajidode aja jnumone iji uté iquei. Ga que toque jeta ore nijiápo rĩ, enga jé ore chuságaja guedéjnoringái uje ore chisa dabade iji Dupade uruode pi cajo ejode.

⁷ Ga Josué catecãripísi Dupade enga chojninga: –¡Jiii! Pangarádejná, Dupade á, que atapója yoque to rĩ. ¿Jé gotique gu uje basi ome yote quedéjnai Jordán uéchamitó ome yoque diríca? ¡A omi turásu diríca ujetiga jé yácagoji yote quedéjnai uéchamitó casé to diríca! ¿Ama báyipie u diríca ya ujetiga orei yóguiji de diríca ome yocumajosórone amorréogose ore jetiga ore chejna yoque jnese a?–

⁸ Ga chojninga: –¡Jiii! ¡Que yirajápo yisocárique rĩ ome yurasade uyoque, uje e ore chayome háigosode ore diríca gu!

⁹ Chamáñaje a yocujnomérique chise guidáyode jnese jne iji puniri Canaán udé údode uje háigosode ore sué yoquibai diríca. Enga a ore chimáta raja ñane jnese jne iji guidáyode údode ome yoque, enga a ore chejna yoque jne. Enga a ore chejna yoque to jne, enga a ca ayorérique áyipieraque dopoi yoque jne rĩ.– Ga Josué chojninga: –Bamo uje a ore chejna yoque jne, ga a yoqui bijna jne ga bei cuchábi a bijnapo tome ua rĩ. ¿Ama ca arota bei cuchábi casé jne a? Uje pirosobate bei tuté diríca ome ore jnese.–

¹⁰ Mu Yocangarádejnai Dupade chojningame Josué nanique: –Ayague bu. ¿Gotique gu a uje babetája iji jnumi?

¹¹ Cachi yetétigai tu gu uje israélgosode que ore tangári yuruode to gotique. Uje yojningame ore diríca: 'A yijína uágaja quedéjnane jne jetiga beyoi yojningane cucha jnese.' Mu ore cho cucha bisidéguiji yuru iyiejájnane udore diríca. Ga yajéode u diríca jeta ore chiquetame jericógosode ore ugúchade jnese, mu ore cho dajnéngu dasagode ore ugúcha. Uje ore chiraja yuruode quigode diríca mu, jé que ore doi yuruode quigode to diríca. Ga ore oridode cucha qué déji dagúchapísode ujade, mu ore pógu udore.

¹² Jecute israélgosode uaque que ajñapechome pocaningai gu uacoriquéode udore. Ga jé yajéode u ujetiga jé ca ajñapechome pocaningai uté uje jé tiógara gu ujetiga uacamajosórone chejnápise uaque. Enga a jé ate jne jeta ayóyome uacamajosórone, ga a ayóyome ore gatuaque iji deréjna pitade údode. Ujetiga ca aquetame uacoriquéode udore ¡bu!, enga a yijnime yu iji uacajade jne enga a ca yijínapo uágaja quedéjnarique to jne rĩ. Chamáñaje yurugaite pidai tuté, ugúchade ore jnese diríca jeta aquetáyome ore ugúchade jnese to.–

¹³ Ga Yocangarádejnai chojningápome Josué rĩ: –Josué á, ayague ¡bu! ga ango yuruode aja barasade ore jnese. Ga angome ore jeta ore pésu dajmapié omenie ome yu iji dejai tudé jetiga dimane ore ome yu ga ore chingo raja yu jnese dirome. Uje israélgosode uacangureni Dupa u yu gu, ga uacangarádejnai upo yu rĩ. Enga yósi tome uaque: 'Israélgosode uaque á, yurugaite jericógosode ore ugúchade jnese, ga yiroque uágaja ujetiga aquetáyome ore ugúchade jnese diríca. Mu uacajnáño uacajegaitígo iji ore ugúchade ujade diríca. A quene yatire uacáringane pujnuéngaisóño ome uaque jne ujetiga óraño uacoriquéode ore ugúcha aja uacaquetatique pioque to. Mu a jé ate jne uje uacayóyome uacamajosórone jne uje jericógosode ore ugúchade qué déji uacajade gu.'

¹⁴ Ujetiga dire dirome enga ajucho uáguiji ñane dirome. Uacáqui gatéode ore ape gatéode cãra dajogadode ome ñane. Jé basa ga uacáringane cucherãque cãra dajogadode ome ñane. Ga jé u ujeta jnanione chojmara, chojmarane ore chimáta dajogasupísode aja ñane to. Enga a jé u jne jetiga e agúsoi yiquei jnese enga a yatata oriechoqui dáqui gaté i ome uaque jne. Enga jé u jne uje ayoré iguioserane iji ore uague uaté chingo daguiosode dayode ome yu jnese jne. Jé basa ga a jĩraque yijnime oriechoqui dayé jne iji ore dayode ujade ga jé basa ga uté chingo dajnacarode ome yu to jnese.

¹⁵ Ga a yijnime jnani oriechoqui uté jne iji uté dayé ujnacarode ujade. Enga a apótayome uté jne, jé aja jogasúode, gachidode, ugúchade ore jnese uje uté chijna yaréngone cucha diríca gu. Enga jé tiógarapísa jeta ajéyo, uje israélgose uté to, mu que tangári Pangarádejnai Dupade uyu yuru iyiejájnane diríca uje yisi ome israélgosode uaque.'"–

Acán cho daba doriquéode nanique ga urasade ore chujé to nanique

¹⁶ Enga e chise durasepise enga Josué choberipísi, enga e chimáta jogasurane ore aja ñane to. Ga qué durasepise uje e dimane ore ome Dupade yui. Ga Dupade e catecã́ri Josué nanique enga chojningame: "Jnani oriei tuté déji ore uague uati uje jnani bajai Judá ape disi ejode u ore to."

^17-18 Ga Josué catecã́ri judágosode udore ore enga chojningame ore: "Amátayo uágaja uacayode jnese jeta pijoque uáguiji ñane jeta Dupade chajire uacajogasúode jnese ore uáguedie." Ga Dupade catecãrápoi Josué rĩ enga chojninga: "Jnani oriechoqui uté déji ore uague tuaté uje ore dai i tu Zéra." Ga jé u uje e chajire jnani uté uje i tu Zéra, ga toji ujnacarode ore gáyode. Ga Dupade chojningame Josué: "Jnani oriei tuté déji Zéra uté ujnacari Zábdi jogasui uñai to." Ga Josué doi nanique ga cãra jnani tuté uje i tu Zábdi ore jogadi to. Ga Josué catecã́ri jnani uté uje i tu Zábdi enga chojningame: "Bajnacarode a ore tibágui yu jne mu a ore chijnire raja gadoi to jne; chojmara, chojmara ore aja gadoi to jne." Ga jé u nanique uje ore tibágui Josué ga ore chijnire rángaja Josué yui, enga chojmara, chojmara ore aja yui. Ga Dupade chojningame Josué: "Oriechoqui tuté dayé u uté uje i tu Cármi to. Ga uté ujnacari i tu Acán, oriei tuté."

¹⁹ Ga Josué catecã́ri Acán enga chojningame: –Yababi á, be ga ango boridode cucha aja yu to. Ca apógu boridode udore ome yu. Bagaidi turásu ujetiga picotaque israélgosode Yocangureni Dupa ome baru uréone udore, uje Yocangarádejnai u uté gu.–

²⁰ Enga jé u nanique uje Acán chajnai Josué uruode to nanique enga chojningame: –Cachi u arĩa. A yingome gajiné yisijnaringuéone ome uaque jnese.– Ga jé u uje Acán chojninga: –Yisijnaringuéone gajnesõripísi tu israélgosode Yocangarádejnai Dupa to gajiné.–

²¹ Ga Acán e narare enga chojningame ore: –A yingoma yoridi casodé ome uaque to jne uje yejnángo jericógosode ore diríca, ga yoria ore itarãpeque ueradéjnai to diríca uje babilóniagosode ore oraque uté. Enga yoriapo ore ipláta orerejnanie to diríca rĩ uje 200 u pláta guebéode udore diríca. Enga yoriapo ore ugúchai rĩ uje cho cucarãte uejade to diríca uje ore pésu uté ga óro ueguipise mu jé yoria to diríca. Pénupise óro uaté to ga ore chuguhésirase enga batigai a chise kíloraque gatócoro to. Uje yajire cuchade udore diríca ome yedodie ga yijnorapise cuchade udore diríca, jecute yoria diríca. Uje yajníngo aja yoquirengu casé yocapáringai diríca ga yijnare yu aja yiguíjnai cárpa údi diríca. Ga jĩraque yijóchame diríca enga yicháji yoridode udore aja yejopié iji yiguíjnai údi. Ga yicha yoridedie pláta orerejnanie aja yejo údipísi diríca, jé basa ga yicha yoridi ore itarãpeque aja yoridedie plátai gai to diríca, jé aja yoridi cucarãte uejaque uje oreranguipise uté. Chamáñaje óro ueque gu.–

²² Enga jé u nanique uje Josué tibidi jnanione uñane iji darasade ujade enga chojningame ore: –Boyo ¡bu! to jne. Ga beyoi Acán oridi casodé jericógosode ore ugúchade to jne uje uté chijóchame diríca iji daguíjnai cárpa údi to.– Ga ore chucué iji iguíjnai údi enga ore chise to iji uté ga jé upúsu Acán uruode uje ore ipláta orerejnanie déji ejo eruépisi, ga jé basa ga chujé doridi ore itarãpeque ueradéjnai aja gai gaté, jé aja cucarãte uejai to uje óro ueque cucarãte uejai uté.

²³ Ga jé u uje ore jno ga ore chisi ome Acán oridode cucha ome Josué to nanique iji darasade edominone iquei. Ga Josué ujode pangarate ore chingo Acán oridode cucha aja Dupade gaté.

²⁴ Enga jĩraque ore jno Acán údi aja cucarani uje tuijnai déji údi, uje tuijnai tuté i tu Acor nanique. Enga jé u uje ore jno Acán údi aja uté to enga ore chátaja urodie, ujnacarode ore, jé aja gachidode ore jnese, jé aja oridode cucha jnese to: ore ipláta orerejnanie, jé aja ore itarãpeque ueradéjnai, jé aja cucarãte uejai to uje óro ueque cucarãte uejai uté to.

²⁵ Ga jé u nanique uje Josué catecã́ri Acán. Enga chojningame: –Pujuré dejnanie chise israélgosode uyoque diríca, mu cucha gosi tupúsu ua diríca. Omi tu jetiga Yocangarádejnai Dupade doi ga chójnepise pujuredie babai to jeta gusu ua ome to. Ga a jé atoi bajnenie pujurei údi to jne.– Ga jé u nanique uje Josué chejna daruode udore guesi ome Acán nanique enga jé u uje chiroque darasade ore aja jetiga ore chisa cucaranenie iji gatéode jnese. Enga ore chatingare uté údode, jé aja jogasúode ore jnese to, ga ore chejnápise ore ¡jaripe! Ga jé u uje ore chiquetame ore to.

²⁶ Uje e ore chiquetame ore jnese, ga ore doi cucaranenie ga ore chujé cucaranenie aja ore cachodi gai, enga chise ore cachodi eruéode jnese, cucaranenie. Ga jé jogate ore cachodi tuté jé aja dirode udojo uje qué déji to. Ga ore pésu tuijnai tuté i nanique ga i tu Acor uje i qui tu 'Pujuredie Jogadi.' Ga jé u nanique uje Dupade ájningai doi jnumi ome israélgosode nanique.