Josué 6 - Dupade Uruode

Yocangarádejnai Dupade chingo dáyipiedie ome Josué nanique ujetiga ore sué Jericógosode ore gai nanique

¹ Enga e pisadodéringai chisípise idáidatéi Jericó idaisórone ore ajéode jnese ome israélgosode átedatéode udojo. Ga jé u uje ore cugujnáji dajuyaquéode jorídedie iji dabai jetiga ore suru dabai ga que toc jeta gosi chicáji guesi. Que toque rĩ jeta gosi chacája ore idai ajei to rĩ.

² Mu Yocangarádejnai qué catecã́ri Josué nanique ga chojningame: "A yẽrate ore idai Jericó uté ome ua to jne, ga a yicha ore eduguéjna cuchábi aja bajmainie ajei, jé aja irógode ore jnese uje jõcaratáguebeque irógode udore to. Enga a ajnuépise ore gáyode to jne."

³ Ga Yocangarádejnai qué jno daruode údi ome Josué enga chojningame: "A qué yingome yuruode aja ua bajaque jne, jetiga bojode jõcaratácho, uhuaque jnese apéso yuruode udojo to. Ga yósi tome uaque: Beyoi ga apéso uacajochatígo jne iji dirode jnese jeta dirode chojmára iji ti, enga apacho ore idai gai ga acayóji eruéode jnese. Ga apacho gai ga chojmára iji dire chojmara, chojmarane jnese.

⁴ Leví ape disi ejórigo uñane uje ore icatecãraite yu ome uaque to, a ore chácariji yuruode pi cajo jnungórone ore iquei jne, enga yojningane udore a gare ore iji yijmanai uñai jne. Ga a ore chijna dabuchugode iji dajmainie jne uje pipesucho udore iji áyasa choquíode uedie. Mu ujeta e chise uje dirode gare iji ti dirome enga obechopísi yui dirome iji dúrasabía jetiga apacho ore idai gai ga gariji ti iji dire chojmarai tuté. Ga yicatecãraisórone udore jé u jeta ore chubúchu dabuchugode ¡pu! ¡pu! aja dajesúode to."

⁵ Mu ujetiga uacadúcho uje ore naráraja dabuchugode to enga jé u ujetiga anguíraño uacabijnanone aja ore to ga ejnáñopusu uacabijnanone. Ga a jé u jne jeta amóño ore ujuyaquéode iji ore idai gai ga cṍra ga urúji jnumone jne uje taratapísiji jnumi. Enga a jé u jne ujetiga acugujnáñoji ore idai ajei enga jé u jne jetiga ejnáño ore jnese."

⁶ Ga Josué chudute dajnéone udore Yocangarádejnai urúo nanique ga jno ga chicáji jnani bajai Leví ape disi ejode uje ore icatecãraite Dupade ome darasade ore jetiga chingo Dupade uruode ome ore. Enga chojningame ore: "Dupade uruode pi cajo jnungórone uaque á, a yipéco yoquijochai jne, enga a bajade u uaque jne." Jé basa ga chojningame Leví ape disi ejode uñane to: "Beyoi ga gare uáguiji ti jeta ácayoji cajo jnungórone udore iquei, ga asayo uacabuchugode iji gatéode to jne."

⁷ Ga jé u uje catecã́ri darasade ore jnese to enga chojningame ore: "Beyoi jne enga apéso uacajochatíguiji ore quigade jne." Ga chojningame ore: "Boyo ga apacho ore idai Jericó gai to jne, mu jnani õrácharã́tigo a ore chácariji Yocangarádejnai uruode pi cajo jnungórone iquébi to jne." Ga jé u uje chiroque ore aja doi to.

^8-9 Ga jé u uje ore doi Josué uruode jnese ga ore cho ¡buru, buru, buru! uje ore jno. Ga Leví ape disi ejode uje gare ore iji ti yijmanai uñai ore chicha rágaja Dupade uruode pi cajo jnungórone ore iquei enga ore chijna dabuchugode jnese. Jé basa ga pocaningai gaisṍripísode uñane ore chayópisiji pubuchugode oisórone udore ore iquei jeta ore chácariji ore iquei. Jé basa ga uñane chácariji cajo jnungórone quigade. Ga ore ubuchugode oisórone ore chubúchu dabuchugode aja dajesúode ga que ore chacho ore chubúchu ¡pu! ¡pu! ¡pu!

¹⁰ Mu Josué chãraque darai ome darasade ore, jé aja jõcaratáguebéode enga chojningame ore: "Oyópise parácho jne. Ga gusu pubuchugode oisórone ore jetiga ore chubúchu ¡pu! ¡pu! ¡pu! Jé aja dire garijitia jeta oyópise parácho. Jetiga adúcho ore ubuchugode uje e ore naráraja dabuchugode ga jé u ujetiga anguíraño uacabijnanone aja idaité ore, ga ejnáñopusu uacabijnanone ome ore."

Israélgosode ore pésu Dupade áyipiedie nanique ga jé u uje ore sué Jericógosode ore gai nanique

¹¹ Josué chiroque ore aja ujetiga ore nóna Dupade uruode pi cajo ga ore chaparu ore idáidatéi Jericó gai ga chojmara iji dire bajai tuté nanique, ga jé u uje ore chimate ga ore chajniapója ore apáringai rĩ ga ore moji dapáringai uté iji dejai uté nanique.

¹² Uje e dire enga Josué niji iji durasepise nanique ga Dupade uruode pi cajo jnungórone ore niji to ga jĩraque ore chijnoque dajnui tuté Dupade uruode pi cajo tuté aja dajesui.

¹³ Que gusu ore mu jnani bajai Leví ape disi ejo uñane uje gare ore iji ti yijmanai uñai jĩraque ore chisa dabuchugode to ga e ore jnome dajesui to enga que ore chácare gotique iji diri údode, enga que ore cha chubúchu dabuchugode udore to uje ore chubúchu iji Dupade uruode pi cajo iquei. Enga pocaningai gaisṍripísode uñane ore diguiji udore ore iquei, jé basa ga udore ore jorane diguiji Dupade uruode pi cajo quigade.

¹⁴ Ga ore chaparu ore idai gai ga chojmara iji dire ejoi tuté to nanique. Ga uje ore chise Jericó eruéode jnese, ga jé u uje ore chajniapója dapáringai rĩ ga ore mopóji uté iji dejai uté rĩ. Ga jecucha ga ore doi dasocabei uté iji dirode jnese uje ore chaparu ore idai gai ga ore moji dapáringai uté iji dejade jnese. Ga ore guejnanie dire chojmára iji ti uje ore chaparu ore idáidatéi tuté gai nanique.

¹⁵ Ga e chise dire garijitia ga ore choberipísi dajesui nanique. Ga ore doi dasocabei uje ore pésu dajochai. Mu iji dire garijitia uté nanique ga ore chaparu ore idai gai ga gare iji ti nanique iji dire chojmarai uté.

¹⁶ Mu uje Josué chudute uje pubuchugode oisórone e ore naráraja dabuchugode gáyode ga gare iji ti uje ore naráraja dabuchugode gáyode enga jé u nanique uje Josué chinguíra dabijnani taja gáguegotó iji darosadode, ga chojningame ore: "¡Anguíraño uacabijnanone aja ore ga ejnáñopusu uacabijnanone aja ore! ¡Chamáñaje Yocangarádejnai a nóna yógaja ore jne ga a chicha yógaja ore idai gatócoro to jne!"

¹⁷ Ga chojninga: "Yocangarádejnai ajéode u ujetiga yejnángopíse Jericógosode ore jnese, jé aja idáidatéi uté jogonórone cucha jnese to. Mu jé ca ajéyo chequé dibéchoquía to jne uje uaté i tu Rahab, jé aja jogasui ore to uje e ore déji iguíjnai jnese gu. Uje uaté añeraque yocurasade ore diríca uje yoquirócho ore diríca, enga chañurupúsu ore guio diríca uje pógu ore diríca ome jericógosode ore eduguéjna cuchábi irógode ore."

¹⁸ Ga Josué chojningame darasade ore: "¡Jetiga ejnáño ore ga ejnáñopíse ore! Jé aja gapudíe, jnacarode, jé aja jnanione, jé aja chequedíe ore rĩ, jé u ore jnese. Mu ca uacuñeque chijocase ore ugúchade, jeta ca uñeque chijnoque uñeque to jne. Uje Yocangarádejnai ajéode u jetiga yejnángopíse ore jnese, enga yátagoja ore ugúchade aja ore enga ore patĩ́ora dagúchade ome yoque to." Ga chojningame ore: "Jetiga gosi chijnoque ore ugúchade uñeque enga Yocangarádejnai a chopise darúja israélgosode yocapáringaméi yoquirengu to enga yoquibai a u uté gosi to jne.

¹⁹ Ga Dupade juegádi tu ome yoque jetiga yisago ore ipesutique ore ugúcha jetiga óro, jeoga pláta, jeoga hiérro, jeoga bronce. Jetiga yisago marínga, ca yocuñeque cho dajnéngu to jne. A yisago mu yisígo ome Dupade to jne ga a Dupade cho dajnéngu to jne."

²⁰ Ga Josué chejna daruode udore guesi nanique enga jé u uje gáguegotó chinguirapísa dabijnanone aja idaité ore, ga jé chopome ore ubuchugode oisórone ore to rĩ, enga ore chubúchu ga ore chejnápusu dabuchugode to. Enga cho jetiga erámi tãrara, tãrara iji ore jmainie enga jericógosode ore ujuyaquéode iji dabai cṍraja ore gai ga urúpise iji jnumone. Ga jé u uje jõcaratade ore cugujnapísiji ore idai gatócoro ga jé u uje ore chujé ñane, jericógosode, israélgosode ore. Enga jericógosode ore que ore chisapise dejóringome israélgosode ore enga ore serẽrája iji ore jmainie.

²¹ Ga israélgosode cugujnáji jericógosode ga ore chijna dasṍrenie ome ore. Ga ore chichagu chequedíe ¡paru!, jé aja jnanione, jnacarode, jé aja choquíjnamone, gatabidie ore jnese, jé aja ore gachidode to rĩ, aquirájnane ore, ga ore chichagu ore pajéode jnese, jé aja áyasabidie, burica quedéjnane ore to. Ga que cucha uecárique dépoji ore arúbuchatíque ajesúrique rĩ. Ore chejnápise cucha uecade ¡jaripe!

²² Ga jé u uje Josué doi jnani gárode udore uje ore cho guidai ome jericógosode diríca, enga catecã́ri ore enga chojningame ore: "Boyo ga beyoi gapu dibéchoquía, jogasui ore enga ajnicho ore uje uacasíñome uacaru iyiejájnane ome ore ica uje gapu dibéchoquía chañuru uaqueo ica."

²³ Enga jé u uje ore cugujnáji Rahab iguíjnai to enga ore chijnime dayé, daté, neronie, dajade ore jnese enga ore jno ore údi jetiga idája ore iji ore idai Jericó. Ga ore jno ore údi nanique mu que ore chicha ore taja darengúi to. Ore cãra ore irengúi iji israélgosode ore irengúi ejórique.

²⁴ Uje e idája Rahab ore iji ore idai casé ga jé u uje ore chãru ore ugúchade gai jnese enga ore idai casé ¡popío iji jnumi! Ga gusu Dupade ojningane cucha nanique uje ore chijna to: óro, pláta, bronce, hiérro ore jnese, ga ore jno udore údi jnese aja Dupade iguíjnai jnungórone jeta ore chañuru guio to.

²⁵ Mu Josué chãraque Rahab, jogasui ore uje uaté chañurupúsu jnani gárode udore ore guio diríca gu enga pogupúsu ore ome eduguéjna cuchábi irógode diríca. Ga jé u uje Rahab ore, ore chacája Josué ore irengúmei ore apáringaméque to, enga israélgosode ore cho darása iji uaté ape disi ejode to jé aja deréjnane udojo to.

²⁶ Ga jé u nanique uje Josué narare ome daru pirosobádode ga chojningame daruode: "Yipésupú gajneri ga ca pipesudápo guidáidatéi Jericó gaminórone ore ujuyaquéo aja gaté to gajiné rĩ. Jeta uñeque chirópo ujuyaquéode aja gaté rĩ enga jé uté ipesute dagajnarétigade ome Yocangarádejnai Dupade jne, enga uté gosi ipesudi ujuyaqueque a cṍra uté gosi ape urẽjájnarique gánique to jne, jeoga ujuyaquei jorídedie uñáraque a cṍra to gajiné iji ore ape parátagatique gánique to gajiné rĩ."

²⁷ Uje Yocangarádejnai chatapísaja Josué nanique enga Josué cutejmai ujnomédaté chise erámi údode jnese.