Josué 5 - Dupade Uruode

Josué chica dojode israélgose ore iji ore apáringaméi nanique uje uté i tu Gilgal

¹ Mu amorréogosode ore eduguéjnane jnese iji yote quedéjnai uéchamitó uña iji guedé cacadi yui, ore chudute Yocangarádejnai Dupade ipesútedatéi ome israélgosode uje chaquĩ́ra yote quedéjnai Jordán ome ore ga nóña ga dajeque cajnore ga ore chicáji uéchai to. Mu que gusu amorréogosode ore eduguéjnane uje ore chudute israélgosode ore ujnoméone udore, mu cananéogosode uje ore unirone déji yote quedéjnai Mediterráneo edógai ore chudute to. Enga jé u nanique uje pujnoméone udore chajuguipise ore agutedie jnese, ga que eduguéjnane udore uñeque cási Josué ore nanique jeta gosi doi pocaningai ome ore.

² Mu Dupade catecãrápoi Josué rĩ ga chojningame: "Be ga apésu quesérigo iji cucaranenie enga aquesu barasade israélgose ore aoi tiji ore ujnungunguenie gáyode to jne. Uje jé yuruode u nanique gu ome uacáqui gatéode to ujetiga ore pijógome yu to."

³ Ga Josué chijnare raja cucarãte cototé nanique uje cucarani uté i tu Aralot, enga pésu queséode iji cucaranenie iji uté ga caríchacho ipesudode. Ga jé u uje tibidi darasade israélgose ore aja re enga chica ore jnese.

⁴ E picaque jnanione jnese uje ore jnoji egípto nanique, mu ore toji erãpetarei nanique enga que udore uñeque chise Dupade ojningai punire ueradéjna to. Yojningane u israélgosode ore uje e ore chise dáringane jnacare nanique uje ore chijna dõrachade aja dajesúode nanique uje qué ore déji dajei aja daqui punire ueradéjna uté nanique, udore ore jnese uje ore toji daqui tuté yui nanique.

⁵ Jé basa ga disi ejode uje ore basíji erãpetarei nanique que ore dayode chica ore gotique, jecute ore u nanique uje Josué chica iji cucarãte cototé uté nanique.

⁶ Israélgosode ore guejnanie siquerei 40 u nanique uje ore diguiji erãpetarei údode uje ore qui turásu punire ueradéjnai uté uje Dupade chingome ore dáquiode nanique. Ore chudute uje cutérone piéjna iji ore uniri uté nanique, ga jé cho jnacarai to rĩ uje jiéjna rĩ ga ore gachidedie tagu to ga ijnanie tamutája jnumone to uje ore chijose to. Mu jnanione udore uje ore chijna dõrachade nanique aja dajesúode erámio, que ore tangári Yocangarádejnai Dupade gotique. Uje Dupade chimo ore angoninguite paritigade enga pésu daru iyiejájnane ome ore nanique ujetiga ca udore uñeque chimo guerani punire ueradéjna uté nanique. Jecute ore toji erãpetarei ajei bisideque nanique jnese.

⁷ Mu Yocangarádejnai chicha angoninguite parigode udore ore ujnacarode aja ore jogadi nanique ujetiga ore cho daniri iji punire ueradéjnai uté jne. Enga ore u uje Josué chica ore nanique, udore ore jnese uje ore basíji erãpetarei ajei nanique uje ore dayode qué déji dajei aja punire ueradéjnai yui nanique. Chamáñaje ore dayode que ore chica dape diyoquíode gu iji erãpetarei ajei nanique.

⁸ Enga uje Josué e chimate dacapídode iji ore jnese nanique ga urõsópise ga qué ore chapápome re rĩ iji darengúi nanique, jé aja ujetiga arégapo ore rĩ.

⁹ Ga Dupade catecãrápoi Josué nanique rĩ ga chojningame: "Pajegátigai jogadi u ome uaque nanique uje uacayáyo yadode ga uacapéso egíptogosode ore jmapiedie. Mu e uacapéso yuruode to enga uacacáyo uacaode iji uacajnungunguenie gáyode. Jecute e yĩro uacajegátigai uté enga uacáringane omío e u ome yu." Enga jecucha cucarãte cototé tuaté i tu Gilgal ome ore nanique jé aja deréjnane udojo to, uje pĩroque ore ajegátigai gu iji uté nanique.

¹⁰ Dirode e gagájni iji yirídai nanique iji guedosírique uje israélgosode qué ore déji dapáringaméi darengu nanique uje i tu Gilgal, ga ore jnusinamáneméi dire jé chise ore iji uté to. Enga ore jnusinamáneméi dire uté i tu Páscua nanique, ga ore pésu dajmapiedie iji diri tuté uje chise ore. Ga ore apáringaméi tuté déji garáijnai iji ore idáidatéi Jericó eruei yui.

¹¹ Enga uje e ore pésu Páscua adode jnese nanique enga ore tagu arurégode uje ore chibore bisideque uje que ore cháta bisidi taja gotique. Jé basa ga ore tagu arroz quedéjna bisideque to uje ore chibore uté bajaque to. Mu dire uñai enga quene ore tagu cananéogosode ore acade cucha to uje dimane iji ore iquei nanique.

¹² Uje qué ore déji erãpetarei nanique enga Dupade chisi ome arureque quedéjnai ome ore nanique uje i tu maná. Mu Dupade e cha chisi ome arurégode udore ome ore. Ga e ore poti u cananéogosode ore acadie cucha to iji siqueré bajé uaté uje e ore déji ore uniri Canaán ajei gu.

Gaté unirisórone uje ore doi Pangarádejnai Dupade iroquéode ore Eduguéjna Cuchábi chiqueta raja Josué nanique

¹³ Enga e chise dire uñeque nanique enga Josué chisṍriji erámi iji ore idáidatéi Jericó ejode to. Ga chimo jnanírique enga chimo asṍreraque iji jmanai to uje chãrai dasõre tiji gaté. Ga Josué chicai yui ga chirõre ga e tibidi. Ga chojningame: –¿Ama yocurása ua to a? ¿Jeoga yoquetésõre ua ya?–

¹⁴ Enga jnani tuté chajnai Josué tuté pijnane enga chojninga: –Que barása yu gotique to. Enga que betésõrapo yu rĩ. Mu yachaite ua iji dore ujetiga yicatecã́ri ua. Ga yarani u Dupade idai, ga uté irógode gaté unirísõre jõcaratáguebéode iji gaté uje ore doi Pangarádejnai Dupade iroquéode ore Eduguéjnai tu yu.– Enga jé u uje Josué chichaga dagataidie aja jnumi ga chichagápo dacuruté taja jnumi rĩ iji iquei. Enga catecã́ri, enga Josué chojningame uté: –Be ga angome yu baru quitígo, Yangarádejná, jeta yiraja báyipierigui quitígo aja yu uje bachai yu iji de, ga yiji bojningáringo cucha jnese.–

¹⁵ Enga gaté unirisórone ore Eduguéjna Cuchábi uté chajnai uruode enga chojninga: –Josué á, ejñu bachiédode iji barídade. Chamáñaje yugúsi de gu ga puyaguipise bayaridi tudé gajiné.– Ga Josué quejname dachiédode enga chejñu ga tṍraja ta.