Josué 3 - Dupade Uruode

Israélgosode ore chaquesu yote quedéjnai uje i tu Jordán nanique ga ore cho jnumi iji tié cajnóningai nanique

¹ Uje direjnipe ga jĩraque Josué, urasade israélgoso ore jnome dajesui iji dapáringa casé darengu uje i tu Sitim nanique. Enga ore chise tié Jordán edógai mu que ore chaquesu míraque. Ore pésu darengúi iji tié edógai, enga ore moji edógai to.

² Enga ore mochádode gadioque iji yote quedéjnai edógai. Mu ore asutedie chacája ñane iji ore irengúi údode jetiga ore cho ore quique ome doi.

³ Enga ore chojninga: "Yico gajiné enga ajichopise Dupade icatecãraisṍredatéode ore yúode. Ujetiga udore e ore chijnoque Dupade uru pirosobádode pi cajo gajiné enga ayágueyo to gajiné enga ajínaño ore aja dajei to jne.

⁴ Uacamóño uje que amóño erámone to iji uacaquéode, jecute ajnáño Dupade uruode pi cajo jnungórone ore iji jnumi. Mu idája uáguiji ore jne enga kilómetro chojmarárique déji uacajai to jne."

⁵ Enga jé u uje Josué catecã́ri ore jnese nanique enga chojninga: "A amóño jne Yocangarádejnai Dupade átedatérique dirome. Jecute aruyo uacabáyode gatuaque jne enga beyoi israélgosode yoquijmapiedie údi to jne ome uaque. Uacagaidi u gu uacáringane icha ga e uacamácho uágome Yocangarádejnai Dupade áyipiedie yui."

⁶ Dire uñai enga Josué catecã́ri Dupade uruode pi cajo jnungórone ore uje Dupade catecãraisṍredatéode u udore ome darasade. Enga chojningame ore: "Asayo Dupade uruode pi cajo enga aquesúyo yote quedéjnai iji uacarasade ore iquei." Ga ore chisa Dupade uruode pi cajo uté ¡saque! enga ore jno bajaque ome darasade.

⁷ Ga jé u uje Yocangarádejnai Dupade catecãrápoi Josué rĩ, enga chojningame: "Ujetiga barasade israélgoso ore chimo yátedatéi iji diri udé jne enga a ore chicotápise ua jne uje a yangúromei tu ua ome yipesudode udore gu. Mu que gusu diri udé jne ujetiga picotaque ua ome ore, mu a báringai pangarate quérã jne iji deréjnane jnese. Enga a ore chojninga: 'Dupade nónapísa Moisés nanique ga jé dopoi dasocai to rĩ ga nonapo yoqueduguéjnai Josué aja quedéjnane to rĩ.'

⁸ Acatecã́ri yuruode pi cajo jnungórone enga ojningame ore jne: 'Oyo ¡jñararara! aja yote quedéjnai ajei uje uté i tu Jordán ga ayáguenaño iji uté jochai gajiné.'"

⁹ Enga Josué chudute dajnéone Dupade urúo ome re enga tibidi darasade ore jnese enga chojningame ore: "Beyoi to ga angachobi yatatagode Dupade urúo ome yu uje cho quique dáyipiedie ome yu que.

¹⁰ A ca potigayaquérique déji uacuñeque ajénique jne uje Yocangarádejnai Dupa togójma déji darasade israélgoso yocujade. Uje a chejna yoquiqui tuté punire idaisórone ore jnese jne. Ga a cho jetiga chibote jnumi ga cho jetiga escóba déji jmainie. Chibote ¡jaripe! enga íjnoque ore jnese. Yojningane u cananéogosode ore jnese, jé aja hitítagosode, jé aja hevéogosode ore to, jé aja ferezéogosode ore to rĩ, jé aja gergeséogosode ore to, jé aja amorréogosode ore to rĩ, jé aja jebuséogosode ore to. Ga a chejna ore ¡jaripe! jne.

¹¹ ¡Mu cajichope to uje Dupa Eyúgojmai uté uje gajneque erámi údode jnese uté uruode pi cajo e chaquesu yote quedéjnai tudé jne iji uacaquei!"

¹² Josué qué jno daruode údi ome darasade nanique ga chojningame ore: "Mu boyo ga ajnicho jnani chojmarárique iji israélgosode yocuáguedie jnese ujetiga gare ore iji yirídai jne, ga a dimane uacajegaidode udore jne ome Dupade iroquéode yúode.

¹³ Ujetiga Dupade uruode pi cajo jnungórone e ore cho ¡jñararara! aja yote quedéjnai ajei enga ore chise ajei jochai enga a Dupade uté uje gajneque erámi údode, a uté chaquĩ́ra yote quedéjnai jne enga a chajuque re jne ome ñane, ga a ca toque jne ujetiga yodi qué chayopo rĩ. Ga a cho jetiga ayorérique suru yúode ga chicha górigaja ga que yote quedéjnai chayo uje suru yui gu."

^14-17 Iji dirode udore nanique uje israélgosode e ore chaquesúrase yote quedéjnai Jordán, enga cananéogosode e ore na dacade cucha. Enga jecucha ate uje ore na dacade cucha nanique enga iragupúsu yodi iji yote quedéjnai uté ga jecucha chayója quedéjnane ga chayója edógade pijnanane údode. Mu uje israélgosode ore jnoji darengúi uté ujetiga ore chaquesu yote quedéjnai nanique, enga bajaque Dupade uruode jnungórone aja ore iquei. Uje udore ore cho ¡jñararara! aja ajei enga ore chise ajei jochai enga jĩraque yodi chajuque re nanique. Ga yodode uñane chácaripísiji purása quedéjnaringo idánique uje i tu Adam, ga idógosiji ore idai Saretán uté nanique. Jé basa ga yodode uñane qué chayója daqui ¡jñara!, ¡jñara! ga chayója yote quedéjna uñai uje uté i tu Yote Quedéjna Toi. Uje e Dupade uruode pi cajo jnungórone ore chajuque yote quedéjnai uté uje i tu Jordán nanique, ga ore guídade e teta ome yote quedéjna bayaque tututudei nanique ga jé u uje yodi quene chácare to. Ga jé u nanique uje israélgosode ore cho jnumi iji tié cajnóningai enga ore jnome daqui Jericó yui, uje ore idáidatéi uté déji tié uéchamitó to. Mu Dupade uruode pi cajo jnungórone que ore chungurase re iji dayaridi uté to nanique iji yote quedéjnai gatócoro. Ore gaidi tu gu ujetiga ore urasade chejna raja tié uéchai jnese.